Lêwi 20
20
Tơlơi Pơkơhmal kơ tơlơi soh pơyơr ană kơ yang Môlok
1Yêhôwa pơhiăp hăng Môis: 2“Brơi ih pơtă kơ ƀing ană plei pla Israel tui anai:
‘Hlơi amăng ƀing gih jing mơnuih Israel ƀôdah mơnuih čar tuai dŏ amăng čar Israel djă ba đơđa ƀing ană tơčo ñu pơyơr kơ yang Môlok, sĭt pô anŭn khŏm tŭ tơlơi pơdjai; mơnuih čar anŭn či glŏm boh pơtâo pơdjai ñu. 3Bơ kơ Kâo, Kâo ƀu či lăng ƀô̆ mơta pô anŭn dơ̆ng ôh laih puh pơđuaĭ hĭ ñu mơ̆ng ană plei pla ñu yua kơ ñu hmâo pơyơr laih đơđa ană tơčo ñu kơ yang Môlok, ngă pơgrĭ anih rơgoh laih anŭn pơsoh anăn rơgoh Kâo. 4Tơ pô anŭn pơyơr sa čô amăng ƀing ană tơčo ñu kơ yang Môlok samơ̆ ƀing mơnuih amăng plei pĭt hĭ mơta ƀu bơngơ̆t laih anŭn ƀu pơdjai hĭ ñu ôh, 5tui anŭn Kâo pô ƀu či lăng ƀô̆ mơta pô anŭn laih anŭn sang kơnŭng djuai pô anŭn dơ̆ng tah, samơ̆ puh pơđuaĭ ñu hăng ƀing mơnuih tŭ ư hrŏm hơbĭt hăng ñu mơ̆ng ană plei pla yua kơ tơlơi soh pơgop hrŏm hơbĭt hăng yang Môlok.’
Tơlơi pơkơhmal kơ tơlơi soh đaŏ kơ bơngăt ƀing djai laih anŭn ƀing pơjâu
6‘Hlơi pô anăp nao pơ ƀing mơnuih pơhiăp hăng bơngăt mơnuih djai, ƀing pơjâu laih anŭn ngă tơlơi rih răm hăng gơñu, Kâo či klă anăp pơkơdơ̆ng hăng mơnuih anŭn laih anŭn puh pơđuaĭ ñu mơ̆ng ană plei pla. 7Brơi ƀing gih pơkah bĕ ƀing gih pô kơ tơlơi rơgoh laih anŭn jing rơgoh, yua kơ Kâo jing Yêhôwa Ơi Adai ƀing gih. 8Brơi ƀing gih djă pioh laih anŭn gưt tui tơlơi juăt Kâo; Kâo jing Yêhôwa, Pô pơrơgoh ƀing gih.’
Tơlơi pơkơhmal kơ tơlơi soh hơtơ̆m pah amĭ ama
9‘Hlơi pô hơtơ̆m pah amĭ ama ñu pô, ñu khŏm tŭ tơlơi pơdjai. Ñu hmâo hơtơ̆m pah laih amĭ ama ñu, drah ñu či tuh glaĭ ƀơi akŏ ñu.’#Tơb 21:17; Mat 15:4; Mar 7:10.
Khul tơlơi pơkơhmal pơkŏn
10‘Tơdah sa čô mơnuih ngă soh klĕ pyu hăng sa čô đah kơmơi hmâo laih rơkơi, ƀôdah hăng bơnai ƀing mơnuih dŏ jum dar, abih đah rơkơi hăng đah kơmơi anŭn leng khŏm tŭ tơlơi pơdjai.#Tơb 20:14; Lêwi 18:20; Mơñă 5:18. 11Tơdah sa čô mơnuih đih hơbĭt hăng bơnai ama ñu, kiăng laĭ hmâo ngă pơmlâo laih ama, tui anŭn abih dua gơñu khŏm tŭ tơlơi pơdjai; drah ƀing gơñu či tuh glaĭ ƀơi gơñu.#Lêwi 18:8; Mơñă 22:30; 27:20. 12Tơdah sa čô mơnuih đih hơbĭt hăng bơnai ană đah rơkơi ñu, tui anŭn abih dua gơñu leng kơ khŏm tŭ tơlơi pơdjai, ƀing gơñu hmâo ngă laih tơlơi grĭ hơƀak; drah ƀing gơñu či tuh glaĭ ƀơi gơñu.#Lêwi 18:15. 13Tơdah sa čô đah rơkơi đih hăng sa čô đah rơkơi pơkŏn kar hăng đih hrŏm hăng sa čô đah kơmơi, tui anŭn abih dua gơñu khŏm tŭ tơlơi pơdjai, ƀing gơñu hmâo ngă laih tơlơi grĭ hơƀak; drah gơñu či tuh glaĭ ƀơi gơñu.#Lêwi 18:22. 14Tơdah sa čô đah rơkơi mă pô amĭ wơ̆t hăng pô ană ngă bơnai, anŭn jing sa tơlơi soh sat yơh; abih klâo gơñu khŏm tŭ čuh pơdjai kiăng kơ tơlơi soh anŭn ƀu dŏ glaĭ amăng ƀing gih.#Lêwi 18:17; Mơñă 27:23.
15Tơdah sa čô đah rơkơi pơngui hăng hlô mơnơ̆ng, pô anŭn khŏm tŭ tơlơi pơdjai; ƀing gih khŏm pơdjai hĭ hlô mơnơ̆ng anŭn.#Tơb 22:19; Lêwi 18:23; Mơñă 27:21. 16Tơdah sa čô đah kơmơi nao jĕ sa drơi hlô mơnơ̆ng kiăng kơ pơngui hăng gơ̆, brơi ƀing gih pơdjai hĭ đah kơmơi hăng hlô mơnơ̆ng anŭn; gơñu khŏm tŭ tơlơi pơdjai, drah ƀing gơñu či tuh glaĭ ƀơi gơñu.
17Tơdah sa čô đah rơkơi dŏ kơ amai ƀôdah adơi sa amĭ ama, ƀôdah sa ama phara amĭ ƀôdah sa amĭ phara ama, anŭn jing sa tơlơi pơmlâo năng kơ mlâo hañ biă mă, arăng khŏm puh pơđuaĭ hĭ ƀing gơñu mơ̆ng ană plei pla. Pô hmâo ngă pơmlâo amai adơi ñu či khŏm gui mă tơlơi soh.#Lêwi 18:9; Mơñă 27:22. 18#Lêwi 18:19.Tơdah sa čô đah rơkơi đih hơbĭt hăng sa čô đah kơmơi amăng hrơi gơ̆ ƀuh eng laih anŭn pô đah rơkơi brơi arăng thâo tơlơi ƀuh eng đah kơmơi anŭn, laih anŭn đah kơmơi anŭn ăt brơi arăng thâo kơ tơlơi ñu ƀuh eng mơ̆n, tui anŭn arăng khŏm puh pơđuaĭ hĭ abih dua gơñu mơ̆ng ană plei pla.
19Ƀu dưi đih hơbĭt hăng ƀing amai adơi amĭ ƀôdah amai adơi ama yua kơ ngă tui anŭn ƀing gih ngă pơmlâo kơnŭng djuai ñu yơh; dua gơñu khŏm glăm mă tơlơi pơkơhmal kơ tơlơi soh anŭn.#Lêwi 18:12-14. 20Tơdah sa čô đah rơkơi đih hơbĭt hăng wa đah kơmơi ƀôdah neh ñu, ñu ngă pơmlâo laih kơ met wa ñu; abih dua gơñu khŏm či tŭ tơlơi pơkơhmal kơ tơlơi soh gơñu. Gơñu či djai pơđŭt hĭ djuai. 21Tơdah sa čô đah rơkơi dŏ kơ bơnai ayŏng ñu pô ƀôdah bơnai adơi ñu pô, anŭn jing tơlơi grĭ grañ yơh; mơnuih anŭn hmâo ngă pơmlâo laih adơi ayŏng ñu. Gơñu či djai pơđŭt hĭ djuai.#Lêwi 18:16.
22Brơi ƀing gih djă pioh laih anŭn ngă tui khul tơlơi phiăn laih anŭn tơlơi Kâo pơđar kiăng kơ lŏn čar Kâo ba ƀing gih mŭt dŏ ƀu či ĕk hĭ ƀing gih ôh. 23Ƀing gih ƀu dưi hla tui tơlơi phiăn kơ ƀing djuai mơnuih Kâo či puh pơđuaĭ hĭ gơñu mơ̆ng ƀing gih yua kơ gơñu hmâo ngă khul tơlơi anŭn laih anŭn Kâo bơrơmŭt biă mă kơ ƀing gơñu. 24Kâo hmâo laĭ laih kơ ƀing gih: “Ƀing gih či mă tŭ lŏn tơnah ƀing gơñu, Kâo či brơi kơ ƀing ih čar anŭn ngă kong ngăn; anŭn jing čar bă hăng ia tơsâo laih anŭn ia hơni.” Kâo jing Yêhôwa Ơi Adai ƀing gih, hmâo pơkah laih ƀing gih mơ̆ng kơnŭng djuai pơkŏn.
25Tui anŭn brơi ƀing gih thâo pơkah tơ̆ng krah hlô mơnơ̆ng rơgoh hiam hăng hlô mơnơ̆ng ƀu rơgoh hiam, tơ̆ng krah čĭm ƀu rơgoh hiam hăng čĭm rơgoh hiam; anăm ngă ƀing gih pô jing hĭ hơƀak drak yua kơ khul hlô mơnơ̆ng, yua kơ khul čĭm ƀôdah yua kơ khul arơ̆ng aroač amăng lŏn tơnah ôh, jing khul djuai Kâo hmâo pơkah laih kiăng kơ ƀing gih thâo jing grĭ hơƀak. 26Brơi kơ ƀing gih jing rơgoh hiam kơ kâo, yua kơ Kâo jing Yêhôwa, jing rơgoh; Kâo či pơkah phara ƀing gih mơ̆ng ƀing djuai mơnuih kiăng kơ ƀing gih lơ̆m kơ hơjăn Kâo.
27Tơ sa čô mơnuih đah rơkơi ƀôdah đah kơmơi jing mơnuih pơhiăp hăng bơngăt mơnuih djai ƀôdah jing pơjâu, pơdjai bĕ pô anŭn; gơñu khŏm tŭ tơlơi arăng glŏm boh pơtâo laih anŭn drah ƀing gơñu či tuh glaĭ ƀơi gơñu pô.’”
Currently Selected:
Lêwi 20: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.