Luk 17

Tơlơi Soh

(Mat 18:6-7; Mar 9:42)

1Yêsu laĭ kơ ƀing ding kơna Ñu: “Tơlơi pơteč tơhnač khŏm truh sĭt, samơ̆ răm ƀăm yơh kơ hlơi pô ngă tơlơi teč tơhnač anŭn! 2Hiam hloh akă ƀơi tơkuai pô anŭn sa boh rơsŭng boh pơtâo laih anŭn glŏm hĭ ñu amăng ia rơsĭ, hloh kơ lui ñu ngă brơi sa čô amăng ƀing anĕt anai ngă soh.

3Brơi ƀing gih thâo răng bĕ. Tơdah adơi ayŏng ih ngă soh, ƀuah ñu bĕ; laih anŭn tơdah gơñu kơhmal tơlơi soh gơñu, pap brơi gơñu bĕ.#Mat 18:15. 4Laih anŭn tơdah ñu ngă soh hăng ih tơjuh wơ̆t amăng sa hrơi, laih anŭn tơjuh wơ̆t mơ̆n ñu rai laĭ hăng ih: ‘Kâo kơhmal tơlơi soh kâo,’ brơi ih khŏm pap brơi kơ ñu.”

Tơlơi Đaŏ

5Ƀing khua ding kơna laĭ hăng Khua Yang: “Rơkâo kơ Ih thim brơi tơlơi đaŏ ƀing gơmơi!”

6Khua Yang laĭ: “Tơdah ƀing gih hmâo tơlơi đaŏ đơr sa asar pơjeh añăm bơi, ƀing gih dưi laĭ kơ phŭn kơyâo sikamôr anai: ‘Tơbuč bĕ ih laih anŭn nao čăt amăng ia rơsĭ,’ laih anŭn ñu či gưt kơ ƀing gih mơ̆n.”

Bruă Kơ Ding Kơna

7“Hmâo mơ̆ hlơi amăng ƀing gih hmâo sa čô ding kơna nao čuar hmua ƀôdah wai triu, tơdah ñu phrâo glaĭ mơ̆ng hmua gih či laĭ kơ ñu: ‘Rai tañ bĕ dŏ ber ƀơ̆ng huă mơtam’? 8Ƀu djơ̆ ôh hă ñu či laĭ kơ gơ̆: ‘Rơmet mơnơ̆ng ƀơ̆ng huă kơ kâo bĕ, hruă hơdrăng kơiăng ih laih anŭn buih bruă kơ kâo tơl kâo ƀơ̆ng huă giơ̆ng kah ih ƀơ̆ng huă’? 9Ñu či bơni mơ̆ kơ ƀing ding kơna anŭn yua kơ gơ̆ ngă laih tơlơi ñu pơtă? 10Ƀing gih kar kaĭ mơ̆n, tơ ƀing gih ngă giơ̆ng laih abih tơlơi arăng pơđar kơ ƀing gih khŏm ngă, laĭ bĕ: ‘Gơmơi jing ƀing ding kơna ƀu lăp ôh, tơlơi ƀing gơmơi hmâo ngă laih kơnơ̆ng jing bruă jao laih kơ ƀing gơmơi khŏm ngă.’”

Yêsu Pơsuaih Pluh Čô Mơnuih Djơ̆ Phŭng

11Tơdang Yêsu nao pơ Yêrusalem, Ñu găn nao kơplah wah guai tring Samari hăng tring Galilê. 12Tơ Ñu mŭt amăng sa boh plei anŭn, hmâo pluh čô mơnuih djơ̆ phŭng rai čơkă Ñu. Gơñu dŏ pơ ataih 13laih anŭn iâu kraih: “Ơ Yêsu, Ơ Nai, pap mơñai kơ gơmơi đa!”

14Tơ Yêsu ƀuh gơñu, Ñu laĭ: “Nao pơrơđah bĕ ƀing gih pô kơ ƀing khua ngă yang.” Laih anŭn tơdang gơñu nao, gơñu hmâo tơlơi rơgoh.#Lêwi 14:1-32. 15Sa čô amăng ƀing gơñu, ƀuh ñu hlao laih, ñu wơ̆t glaĭ pơpŭ bơni hơơč kơ Ơi Adai hăng săp kraih kơtang. 16Gơ̆ bon kŭp ƀơi tơkai Yêsu, laih anŭn bơni hơơč kơ Ñu. Pô anŭn jing sa čô mơnuih Samari. 17Tui anŭn Yêsu laĭ: “Ƀu djơ̆ ôh hă pluh čô hmâo tơlơi rơgoh? Pơpă dua rơpăn čô anŭn lĕ? 18Kơnơ̆ng sa čô tuai anai đôč hă wơ̆t glaĭ pơpŭ bơni kơ Ơi Adai?” 19Yêsu laĭ kơ gơ̆: “Tơgŭ nao bĕ, tơlơi đaŏ ih hmâo pơklaih ih laih.”

Dêh Čar Pơtao Či Truh

(Mat 24:23-28,37-41)

20Ƀing Pharisi tơña kơ Yêsu hơbin dêh čar pơtao Ơi Adai či truh, laih anŭn Ñu laĭ glaĭ: “Dêh čar pơtao Ơi Adai ƀu rai hăng tơlơi klă rơđah tơl arăng dưi ƀuh ôh. 21Arăng kŏn dưi laĭ lơi: ‘Lăng adih, ñu pơ anai!’ Ƀôdah: ‘Ñu pơ anŭn!’ Yua kơ, dêh čar pơtao Ơi Adai dŏ amăng pran jua ƀing gih.”#17:21 dŏ amăng pran jua ƀing gih; ƀôdah dŏ tơ̆ng krah ƀing gih, ƀôdah či blĭp truh tơ̆ng krah ƀing gih.

22Ñu laĭ dơ̆ng kơ ƀing ding kơna Ñu: “Či hmâo sa hrơi ƀing gih čang kiăng dưi ƀuh sa hrơi Ană Mơnuih, samơ̆ ƀing gih ƀu dưi ƀuh ôh. 23Arăng či laĭ kơ ƀing gih: ‘Ñu pơ anŭn’ ƀôdah ‘Ñu pơ anai!’ Anăm nao ôh; anăm đuaĭ tui gơñu ôh. 24Yua kơ kar hăng kơmlă blĭp črang mơ̆ng rơnuč adai anai truh pơ rơnuč adai adih, Ană Mơnuih amăng hrơi Ñu či jing ăt kar hăng anŭn mơ̆n. 25Samơ̆ blŭng hlâo, Ñu khŏm tŭ lu tơlơi ruă nuă laih anŭn ƀing mơnuih rơnŭk anai či hơngah lui Ñu. 26Amăng rơnŭk Nôê hyư̆m pă, amăng hrơi Ană Mơnuih ăt kar kaĭ mơ̆n.#Čơd 6:5-8. 27Arăng ƀơ̆ng mơñum, pơdŏ rơkơi bơnai, gơñu brơi ană bă pơdŏ rơkơi bơnai, tơl truh hrơi Nôê mŭt amăng kompăn, laih anŭn ia lip truh pơrai hĭ gơñu.#Čơd 7:6-24. 28Tơlơi hmâo truh amăng rơnŭk Lot ăt kar kaĭ mơ̆n: Arăng ƀơ̆ng mơñum, sĭ mia pơdrô čan, jŭ pla, ngă sang.#Čơd 18:20–19:25. 29Samơ̆ ƀơi hrơi Lot tơbiă mơ̆ng plei Sôđôm hmâo apui laih anŭn boh pơtâo apui lĕ mơ̆ng adai pơrai hĭ abih gơñu. 30Hrơi Ană Mơnuih bơrơđah rai ăt kar kaĭ mơ̆n.

31Amăng hrơi anŭn, hlơi pô dŏ ƀơi bơbŭng sang, anăm trŭn mă dram gơnam ñu amăng sang ôh. Ăt kar kaĭ mơ̆n hlơi pô dŏ pơ hmua anăm wơ̆t glaĭ pơ sang ñu lơi.#Mat 24:17-18; Mar 13:15-16. 32Hơdơr glaĭ bĕ kơ bơnai Lot.#Čơd 19:26. 33Hlơi pô hơduah jơlan kiăng pơklaih tơlơi hơdip ñu, ñu či rơngiă hĭ gơ̆; samơ̆ hlơi pô rơngiă tơlơi hơdip ñu, ñu či hmâo glaĭ gơ̆.#Mat 10:39; 16:25; Mar 8:35; Luk 9:24; Yô 12:25. 34Kâo laĭ kơ ƀing gih, amăng mlam anŭn či hmâo dua čô mơnuih đih hrŏm sa boh sưng, sa čô arăng mă đuaĭ, sa čô arăng lui. 35Či hmâo dua čô đah kơmơi dŏ tơ̆p pơdai hrŏm hơbĭt, sa čô arăng či mă đĭ laih anŭn sa čô arăng pioh glaĭ.”#17:35 Đơđa Hră Ơi Adai Pơhiăp so đưm thim jơlan 36: Dua čô đah rơkơi hlăk dŏ pơ hmua, sa čô arăng či mă đĭ, sa čô arăng či pioh glaĭ.(Lăng Mat 24:40). 37Ƀing ding kơna tơña kơ Yêsu: “Ơ Khua, pơpă tơlơi anŭn či truh?” Yêsu laĭ glaĭ: “Pơpă hmâo kơmăp drơi jan djai, pơ anŭn klang grư̆ či pơƀŭt glaĭ.”

Currently Selected:

Luk 17: JRA2016

Highlight

Copy