Luk 19

Khua Yang Yêsu Hăng Sačê

1Yêsu mŭt amăng Plei Yêrikô laih anŭn găn plei anŭn. 2Pơ anŭn hmâo sa čô mơnuih pơdrŏng anăn ñu Sačê, ñu jing sa čô khua ƀing ring jia. 3Ñu hơduah kiăng lăng hlơi Yêsu jing, samơ̆ ƀu dưi ƀuh ôh yua kơ ƀing mơnuih lu, laih anŭn ñu jing mơnuih ber. 4Tui anŭn ñu nao hlâo laih anŭn đĭ ƀơi phŭn kơyâo Sikamôr kiăng lăng Yêsu, yua kơ Yêsu či găn nao pơ anŭn. 5Tơ Yêsu truh pơ anih anŭn, Yêsu angak lăng đĭ hăng laĭ: “Ơ Sačê trŭn tañ bĕ, yua kơ hrơi anai Kâo khŏm dŏ glaĭ amăng sang ih.”

6Tui anŭn Sačê trŭn ječ meč mơtam hăng hơ̆k kơdơ̆k jum Yêsu. 7Ƀing mơnuih lu ƀuh tui anŭn, leng kơ pơhiăp brŏk hăng laĭ: “Mơnuih anai mŭt dŏ amăng sang mơnuih soh.”

8Samơ̆ Sačê tơgŭ dơ̆ng ƀơi anăp Khua Yang hăng laĭ: “Ơ Khua Yang, anai nê kâo či mă ha mơkrah dram gơnam kâo laih anŭn pơpha brơi hĭ kơ ƀing mơnuih ƀun rin laih anŭn tơdah kâo hmâo plư ƀơ̆ng gơnam arăng, kâo či kla glaĭ pă wơ̆t lu hloh.”

9Yêsu laĭ kơ ñu: “Hrơi anai tơlơi pơklaih hmâo mŭt laih amăng sang anai, yua kơ pô anai ăt jing sa čô ană tơčo Abraham mơ̆n. 10Yua kơ Ană Mơnuih rai laih kiăng hơduah laih anŭn pơklaih ƀing răm rơngiă.”#Mat 18:11.

Tơlơi Bơhmutu Kơ Tơlơi Yua Prăk

(Mat 25:14-30)

11Tơdang gơñu dŏ hmư̆ tơlơi anŭn, Yêsu pơhiăp sa tơlơi bơhmutu dơ̆ng, yua kơ Ñu giăm truh pơ plei Yêrusalem, laih anŭn yua kơ arăng pơmĭn dêh čar pơtao Ơi Adai či pơrơđah mơtam yơh. 12Tui anŭn Yêsu laĭ: “Sa čô mơnuih arăng pơpŭ nao pơ čar ataih kiăng kơ mă tŭ tơlơi dưi jing pơtao giơ̆ng anŭn ñu či wơ̆t glaĭ. 13Ñu iâu pluh čô amăng ƀing ding kơna Ñu. Ñu brơi kơ ƀing gơ̆ pluh sar prăk hăng laĭ: ‘Brơi ƀing ih nao sĭ mia hăng sar prăk anai tơl kâo wơ̆t glaĭ dơ̆ng.’ 14Samơ̆ ƀing ană plei ñu bơrơmŭt kơ gơ̆ laih anŭn pơkiaŏ nao pô pơala kiaŏ tui ñu hăng laĭ: ‘Gơmơi ƀu kiăng ôh mơnuih anai wai lăng gơmơi’.

15Giơ̆ng kơ ñu mă tŭ tơlơi dưi jing pơtao ñu wơ̆t glaĭ dơ̆ng, ñu iâu ƀing ding kơna rai pơ ñu, jing ƀing ñu hmâo brơi laih sar prăk, kiăng kơ thâo hyư̆m ƀing gơ̆ ƀơ̆ng kơmlai laih hăng tơlơi sĭ mia anŭn. 16Ding kơna tal sa truh ƀơi anăp ñu hăng laĭ: ‘Ơ Khua, sar prăk ih ƀơ̆ng kơmlai dơ̆ng jing pluh sar.’ 17Khua laĭ kơ ñu: ‘Hiam yơh, ơ ding kơna tơpă hiam; yua kơ ih hmâo tŏng ten laih amăng bruă anĕt, ih či hmâo tơlơi dưi wai lăng pluh boh plei.’ 18Ding kơna tal dua rai hăng laĭ: ‘Ơ Khua, sar prăk ih ƀơ̆ng kơmlai rơma sar dơ̆ng.’ 19Ñu laĭ kơ gơ̆: ‘Ih či wai lăng rơma boh plei.’ 20Ding kơna pơkŏn rai laih anŭn laĭ: ‘Ơ Khua, anai sar prăk ih, kâo hmâo pơdŏp laih ñu amăng khăn, 21Yua kơ kâo hwĭ kơ ih, yua kơ ih jing mơnuih khăng khĭp. Ih mă mơnơ̆ng ƀu djơ̆ jing gơnam ih ôh, laih anŭn hơpuă mơnơ̆ng ih ƀu hmâo sai ôh.’ 22Khua anŭn laĭ kơ ñu: ‘Ơ ding kơna sat ƀai! Kâo či phat kơđi ih tui hăng tơlơi ih pô pơhiăp! Ih thâo laih kâo jing sa čô khăng khĭp, mă mơnơ̆ng ƀu jing gơnam kâo ôh, laih anŭn hơpuă mơnơ̆ng kâo ƀu hmâo sai ôh. 23Tui anŭn yua hơgĕt ih ƀu pioh ôh prăk kâo amăng sang wai prăk, kiăng kơ tơ kâo wơ̆t glaĭ, kâo či mă glaĭ prăk anŭn wơ̆t hăng kơmlai ñu mơ̆n?’ 24Laih anŭn ñu laĭ kơ ƀing dŏ giăm: ‘Mă hĭ bĕ prăk mơ̆ng ñu, hăng brơi hĭ pô hmâo laih pluh sar prăk.’ 25Gơñu laĭ kơ gơ̆: ‘Ơ khua, ñu hmâo laih pluh sar prăk!’ 26Kâo laĭ kơ ƀing gih, hlơi pô hmâo, Ơi Adai či brơi thim dơ̆ng, samơ̆ hlơi pô ƀu hmâo, Ơi Adai či mă hĭ wơ̆t hăng mơnơ̆ng ñu hmâo laih.#Mat 13:12; Mar 4:25; Luk 8:18. 27Samơ̆ bơ kơ ƀing ayăt kâo, ƀing ƀu kiăng ôh kâo wai lăng gơñu, ba rai bĕ gơñu pơ anai laih anŭn pơdjai hĭ gơñu ƀơi anăp kâo.”

Yêsu Mŭt Plei Yêrusalem

(Mat 21:1-11; Mar 11:1-11; Yô 12:12-19)

28Giơ̆ng kơ Yêsu pơhiăp tơlơi anŭn, Ñu rơbat nao hlâo, đĭ nao pơ plei Yêrusalem. 29Tơ Ñu giăm truh pơ plei Bêtphajê hăng plei Bêthani, ƀơi čư̆ arăng pơanăn jing čư̆ Ôliwơ, Ñu pơkiaŏ nao dua čô ƀing ding kơna Ñu 30hăng laĭ: “Nao bĕ pơ plei ƀơi anăp ƀing gih. Tơ ƀing gih mŭt amăng plei, ƀing gih či ƀuh sa drơi ană aseh kle arăng akă pơ anŭn, arăng aka đĭ djơ̆ ôh. Kleh ñu hăng dui rai pơ anai. 31Tơdah arăng tơña kơ ƀing gih: ‘Yua hơgĕt ƀing gih kleh ñu lĕ?’ brơi ƀing gih laĭ tui anai: ‘Khua Yang#19:31,34 Khua Yang; ƀôdah pô khua gơ̆. kiăng ñu.’”

32Tui anŭn ƀing gơñu nao hăng ƀuh abih bang tơlơi djơ̆ tui hăng tơlơi Yêsu hmâo laĭ laih. 33Tơdang gơñu kleh ană aseh kle anŭn, pô aseh anŭn tơña kơ gơñu: “Yua hơgĕt ƀing gih kleh ană aseh kle anai lĕ?”

34Gơñu laĭ: “Khua Yang kiăng ñu.” 35Laih anŭn gơñu dui ba aseh pơ Yêsu; gơñu tap khăn ao gơñu ƀơi rŏng ană aseh kle laih anŭn pŭ Yêsu đĭ. 36Tơ Yêsu đĭ aseh kle rơbat nao, gơñu lang khăn ao gơñu ƀơi jơlan.

37Hlăk Yêsu giăm truh pơ plei Yêrusalem ƀơi anih trŭn đŭng čư̆ Ôliwơ, abih bang ƀing ding kơna čơdơ̆ng hơ̆k mơak laih anŭn pơpŭ bơni kơ Ơi Adai hăng asăp kraih yua kơ abih bang khul bruă mơsêh mơyang gơñu hmâo ƀuh laih.

38Gơñu laĭ: “Ơi Adai hơơč mơyun kơ Pơtao rai amăng anăn Khua Yang!

Rơnŭk rơnua amăng adai, laih anŭn tơlơi guh kơang amăng anih Glông Hloh!”#Adoh 118:26.

39Amăng tơ̆ng krah ƀing mơnuih lu hmâo đơđa ƀing Pharisi laĭ kơ Yêsu: “Ơ Nai, khă bĕ ƀing ding kơna Ih.” 40Yêsu laĭ glaĭ: “Kâo laĭ kơ ƀing gih, tơdah gơñu dŏ rơiăt, boh pơtâo yơh či ur driao.”

Yêsu Hia Yua Kơ Plei Yêrusalem

41Tơ Yêsu nao giăm, Ñu ƀuh plei Yêrusalem, Ñu hia yua kơ plei anŭn hăng laĭ, 42“Kâo kiăng biă mă yơh tơdah hrơi anai ih dưi thâo tơlơi dưi brơi tơlơi rơnŭk rơnua kơ ih! Samơ̆ ră anai tơlơi anŭn pơdŏp hĭ laih kơ mơta ih. 43Yua kơ hrơi či truh, ƀing ayăt ih či bôr lŏn jum dar ih hăng wang dar ih, laih anŭn krư̆ hret ih jum dar, 44gơñu či pơrai hĭ ih wơ̆t ƀing ană bă ih ƀơi tơ̆ng krah ih. Gơñu ƀu lui brơi ôh amăng ih sa boh pơtâo anai dŏ đom ƀơi hăng ngŏ kơ boh pơtâo pơkŏn, yua kơ ih ƀu thâo ôh hrơi Ơi Adai hmâo čuă ngui ih laih.”

Yêsu Pơrơgoh Sang Kơkuh Pơpŭ

(Mat 21:12-17; Mar 11:15-19; Yô 2:13-22)

45Yêsu mŭt amăng sang kơkuh pơpŭ laih anŭn čơdơ̆ng pơpuh ƀing sĭ mia ƀơi anŭn, 46Ñu laĭ kơ ƀing anŭn: “Hmâo boh pơhiăp čih tui anai: ‘Sang Kâo či jing sang iâu laĭ’; samơ̆ ƀing gih pơjing ñu jing hĭ par kơ ƀing klĕ dŏp.”#Êsai 56:7; Yêr 7:11.

47Rĭm hrơi Yêsu pơtô amăng sang kơkuh pơpŭ. Ƀing khua ngă yang prŏng, ƀing nai pơtô tơlơi juăt, laih anŭn ƀing akŏ wai lăng ană plei pla hơduah jơlan kiăng pơdjai Ñu,#Luk 21:37. 48samơ̆ gơñu ƀu dưi ngă hơgĕt gĕt ôh, yua kơ abih bang ană plei khăp hmư̆ đơi kơ tơlơi Yêsu pơhiăp.

Currently Selected:

Luk 19: JRA2016

Highlight

Copy