Mathiơ 20
20
Ƀing Mơnuih Mă Bruă Amăng Đang Boh Kơƀâu
1“Dêh čar pơtao adai jing kar hăng sa čô khua sang ưm mơguah tơbiă nao kiăng iâu apah mơnuih mă bruă amăng đang boh kơƀâu ñu. 2Giơ̆ng hmâo tơlơi tŭ ư laih hăng ƀing mă bruă sa đơniê amăng sa hrơi, ñu pơkiaŏ nao gơñu pơ đang boh kơƀâu ñu. 3Ƀơi kơplah dua rơpăn mông mơguah#20:3 Boh pơhiăp phŭn blŭng: mông tal klâo. ñu tơbiă nao dơ̆ng laih anŭn ƀuh ƀing mơnuih dŏ đôč đač amăng anih sang sĭ mia. 4Ñu laĭ kơ ƀing anŭn: ‘Kar kaĭ mơ̆n ƀing gih nao bĕ mă bruă amăng đang boh kơƀâu kâo, laih anŭn kâo či apah ƀing gih djơ̆ nua.’ Tui anŭn gơñu nao mơtam yơh. 5Ƀơi yang hrơi dơ̆ng,#20:5 Boh pơhiăp phŭn blŭng: Mông tal năm. laih anŭn ƀơi klâo mông klam#20:5 Boh pơhiăp phŭn blŭng: Mông tal dua rơpăn. pô đang boh kơƀâu tơbiă nao dơ̆ng hăng ngă kar hăng anŭn mơ̆n. 6Ƀơi rơma mông klam#20:6 Boh pơhiăp phŭn blŭng: Mông tal pluh sa. ñu tơbiă nao dơ̆ng ƀuh ƀing pơkŏn dŏ đôč đač, laih anŭn ñu laĭ kơ ƀing gơ̆: ‘Yua hơgĕt ƀing gih dŏ pơ anai đôč đač abih sa hrơi?’ 7Ƀing anŭn laĭ hăng ñu: ‘Yua kơ ƀu hmâo hlơi kiăng yua gơmơi ôh.’ Pô đang laĭ kơ ƀing gơ̆: ‘Ƀing gih kar kaĭ mơ̆n nao bĕ mă bruă amăng đang boh kơƀâu kâo.’
8Tơ adai klam laih, pô đang boh kơƀâu laĭ kơ pô wai bruă ñu: ‘Iâu bĕ ƀing mă bruă laih anŭn brơi prăk kơ ƀing gơñu čơdơ̆ng mơ̆ng ƀing tơdơi truh kơ ƀing blŭng hlâo.’#Lêwi 19:13; Mơñă 24:15. 9Ƀing mơnuih mă bruă čơdơ̆ng mơ̆ng rơma mông klam rai, rĭm čô gơñu mă prăk apah sa đơniê. 10Tơ ƀing mơnuih mă bruă čơdơ̆ng mơ̆ng blŭng hlâo rai, gơñu pơmĭn dah či mă tŭ lu hloh. Samơ̆ rĭm čô gơñu ăt mă tŭ sa đơniê kar kaĭ mơ̆n. 11Laih anŭn tơ gơñu mă tŭ sa đơniê anŭn gơñu pơhiăp brŏk kơ pô đang, 12hăng laĭ: ‘Ƀing rai tơdơi mă bruă kơnơ̆ng sa mông đôč, laih anŭn ih yap gơñu mơdơ̆ hăng gơmơi jing ƀing mă bruă gleh kơtraŏ hăng dang gah yŭ pơ-iă kơtang abih sa hrơi.’ 13Samơ̆ pô đang laĭ glaĭ kơ sa čô amăng ƀing gơñu: ‘Ơ gơyut, kâo ƀu soh hăng ih ôh; ƀu djơ̆ ôh hă ih tŭ ư laih hăng kâo sa hrơi mă bruă kơnơ̆ng sa đơniê đôč? 14Mă bĕ prăk ih laih anŭn nao bĕ; kâo kiăng brơi kơ pô rai tơdơi anai mơdôm hăng ih. 15Ƀu djơ̆ ôh hă kâo dưi yua gơnam kâo tui hăng kâo kiăng? Ƀôdah yua kơ ih ƀuh kâo čơmah, hnŭn yơh ih moañ?’
16Tui anŭn ƀing tơdơi či jing hlâo, laih anŭn ƀing hlâo či jing tơdơi.”#Mat 19:30; Mar 10:31; Luk 13:30.
Yêsu Laĭ Tal Klâo Kơ Tơlơi Ñu Či Djai
(Mar 10:32-34; Luk 18:31-34)
17Tơdang Yêsu đĭ nao pơ plei Yêrusalem, Ñu ba hơjăn ƀing pluh dua čô ding kơna, laih anŭn rŏk jơlan Ñu laĭ kơ gơñu, 18“Anai nê, ƀing ta nao pơ plei Yêrusalem; arăng či jao Ană Mơnuih kơ ƀing khua ngă yang prŏng laih anŭn ƀing nai pơtô tơlơi juăt, laih anŭn ƀing gơñu či klă kơđi pơdjai hĭ Ñu. 19Gơñu či jao Ñu kơ ƀing djuai tuai kiăng kơ arăng klao mưč, taih Ñu hăng gai hnuăt, laih anŭn pơ̆ng hĭ Ñu ƀơi kơyâo bơrơkal; samơ̆ ƀơi hrơi tal klâo Ñu či hơdip glaĭ dơ̆ng.”
Tơlơi Amĭ Ƀing Ană Sêbêdê Rơkâo
(Mar 10:35-45)
20Hlăk anŭn amĭ ƀing ană đah rơkơi Sêbêdê nao pơ Yêsu hrŏm hơbĭt hăng ƀing ană đah rơkơi gơ̆. Đah kơmơi anŭn čon tơŭt ƀơi anăp Yêsu kiăng rơkâo sa tơlơi.
21Yêsu tơña kơ ñu: “Hơgĕt ih kiăng?” Đah kơmơi laĭ hăng Ñu: “Brơi dua čô ană đah rơkơi kâo dưi dŏ ber sa čô gah hơnuă, sa čô gah iao Ih amăng dêh čar pơtao Ih.”
22Samơ̆ Yêsu laĭ glaĭ: “Ƀing gih ƀu thâo hluh ôh hơgĕt ƀing gih rơkâo. Dưi mơ̆ ƀing gih mơñum kơčok Kâo či mơñum?” Gơñu laĭ glaĭ: “Gơmơi dưi mơ̆n.”
23Yêsu laĭ kơ gơñu: “Ƀing gih či mơñum kơčok Kâo, samơ̆ tơlơi dưi dŏ ber gah hơnuă ƀôdah gah iao Kâo, Kâo ƀu hmâo ôh tơlơi dưi brơi tơlơi anŭn, samơ̆ tơlơi anŭn pioh kơ ƀing hlơi Ama Kâo hmâo prăp pre brơi laih.”
24Tơ ƀing pluh čô ding kơna pơkŏn hmư̆ tơlơi anŭn, gơñu hil kơ dua čô adơi ayŏng anŭn. 25Samơ̆ Yêsu iâu gơñu hăng laĭ: “Ƀing gih thâo laih ƀing arăng brơi wai lăng ƀing djuai tuai khăp yua tơlơi kơtư̆ juă wai lăng ană plei, laih anŭn ƀing khua prŏng gơñu khăp yua tơlơi dưi kơtang amăng tơlơi gĭt gai ană plei pla. 26Samơ̆ tơ̆ng krah ƀing gih ƀu djơ̆ tui anŭn ôh; kơđai glaĭ, hlơi amăng ƀing gih kiăng jing prŏng, brơi ñu khŏm jing ding kơna kơ ƀing gih,#Luk 22:25,26. 27hlơi amăng ƀing gih kiăng jing mrô sa, brơi ñu jing hlŭn kơ ƀing gih;#Mat 23:11; Mar 9:35; Luk 22:26. 28kar hăng Ană Mơnuih hmâo rai laih ƀu djơ̆ kiăng kơ arăng mă bruă kơ ñu ôh, samơ̆ kiăng mă bruă kơ arăng, laih anŭn jao tơlơi hơdip ñu pô jing nua song mă kơ lu mơnuih.”
Yêsu Pơsuaih Dua Čô Mơnuih Bum Mơta
(Mar 10:46-52; Luk 18:35-43)
29Tơdang gơñu tơbiă mơ̆ng plei Yêrikô, hmâo lu mơnuih đuaĭ tui Yêsu. 30Anai nê, hmâo dua čô bum mơta dŏ ƀơi akiăng jơlan. Tơ gơñu hmư̆ kơ Yêsu găn pơ anŭn, gơñu ur kraih: “Ơ Khua Yang, Ană pơtao Đawit, pap mơñai kơ gơmơi đa!”
31Ƀing mơnuih lu khă brơi gơñu dŏ rơiăt; samơ̆ gơñu ur kraih kơtang hloh dơ̆ng: “Ơ Khua Yang, Ană pơtao Đawit, pap mơñai kơ gơmơi đa!”
32Yêsu dŏ hĭ, iâu gơñu laih anŭn laĭ: “Hơgĕt tơlơi ƀing gih kiăng Kâo ngă brơi kơ ƀing gih?”
33Gơñu laĭ hăng Yêsu: “Ơ Khua Yang, brơi mơta gơmơi dưi ƀuh rơđah.”
34Hăng tơlơi pap Yêsu ruaih mơta gơñu, tui anŭn mơta gơñu ƀuh rơđah mơtam, laih anŭn gơñu đuaĭ tui Yêsu.
Currently Selected:
Mathiơ 20: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
