Mathiơ 22

Bơhmutu Kơ Tơlơi Ƀơ̆ng Huă Dŏ Rơkơi Bơnai

(Luk 14:15-24)

1Yêsu yua tơlơi bơhmutu pơhiăp dơ̆ng hăng gơñu tui anai, 2“Dêh čar pơtao adai jing kar hăng sa čô pơtao pơkra tơlơi ƀơ̆ng huă pơdŏ rơkơi bơnai kơ ană đah rơkơi ñu. 3Ñu pơkiaŏ ƀing ding kơna ñu nao iâu ƀing ñu hmâo jak laih kơ tơlơi ƀơ̆ng huă, samơ̆ ƀing anŭn ƀu kiăng rai ôh. 4Ñu pơkiaŏ nao ƀing ding kơna pơkŏn dơ̆ng, hăng pơtă tui anai: ‘Laĭ bĕ kơ ƀing kâo hmâo jak laih, anai nê, kâo pơkra laih mơnơ̆ng ƀơ̆ng huă, čuh laih rơmo laih anŭn ană rơmo rơmŏng, abih bang mơnơ̆ng prăp pre laih soh sel; rai bĕ kơ tơlơi ƀơ̆ng huă pơkol rơkơi bơnai.’ 5Samơ̆ ƀing gơñu jak anŭn ƀu bơngơ̆t ôh laih anŭn nao kơ bruă pơkŏn, pô anai nao pơ hmua, pô pơkŏn nao sĭ mia, 6đơđa ƀing pơkŏn mă ƀing ding kơna ñu ngă sat kơ ƀing gơ̆ laih anŭn pơdjai hĭ. 7Pơtao hil biă mă, ñu pơkiaŏ nao ƀing tơhan ñu pơrai ƀing pơdjai mơnuih anŭn hăng čuh hĭ plei pla gơñu. 8Laih anŭn ñu laĭ kơ ƀing ding kơna ñu: ‘Mơnơ̆ng ƀơ̆ng huă pơdŏ rơkơi bơnai pơkra giơ̆ng laih, samơ̆ ƀing kâo jak ƀu hmâo hlơi năng lăp rai ôh. 9Tui anŭn, nao bĕ amăng abih bang jơlan phŭn laih anŭn jak abih bang mơnuih ƀing gih ƀuh brơi rai kơ tơlơi ƀơ̆ng huă tơlơi pơdŏ rơkơi bơnai.’ 10Ƀing ding kơna anŭn nao pơ abih bang jơlan, jak ba abih bang ƀing mơnuih gơñu ƀuh, wơ̆t mơnuih sat wơ̆t mơnuih hiam. Tui anŭn, anih ƀơ̆ng huă bă hăng mơnuih.

11Samơ̆ tơ pơtao mŭt lăng ƀing rai, pơ anŭn ñu ƀuh sa čô đah rơkơi ƀu buh ao phiăn ƀơ̆ng huă kơ tơlơi dŏ rơkơi bơnai ôh. 12Ñu laĭ kơ pô anŭn: ‘Ơ gơyut, hyư̆m ih dưi mŭt pơ anai ƀu buh ôh ao phiăn ƀơ̆ng huă tơlơi dŏ rơkơi bơnai?’ Mơnuih anŭn ƀu thâo laĭ glaĭ ôh. 13Laih anŭn pơtao laĭ kơ ƀing ding kơna ñu: ‘Čaŏ hĭ tơkai tơngan ñu laih anŭn glŏm ñu amăng anih kơnăm mơmŏt pơ gah rơngiao; pơ anŭn či hmâo tơlơi čŏk hia laih anŭn tơlơi kĕ tơgơi.’#Mat 8:12; 25:30; Luk 13:28.

14Yua kơ arăng jak iâu lu mơnuih, samơ̆ kơnơ̆ng ƀiă mơnuih đôč arăng ruah mă.”

Tơlơi Duh Jia Kơ Sêsar

(Mar 12:13-17; Luk 20:20-26)

15Hlăk anŭn ƀing Pharisi nao pơ črŏng sai ƀơč mơneč kiăng hơduah tơlơi dưi phong Yêsu amăng tơlơi Ñu pơhiăp. 16Tui anŭn gơñu pơkiaŏ nao ƀing ding kơna gơñu hrŏm hơbĭt hăng ƀing mơnuih gah kơ Hêrôt, hăng laĭ: “Ơ Nai, gơmơi thâo Ih jing mơnuih tơpă sĭt, pơtô tơlơi Ơi Adai hăng tơlơi tơpă sĭt laih anŭn ih ƀu pơkah lăng mơnuih phara phara ôh; yua kơ Ih ƀu lăng ôh hyư̆m tơlơi arăng jing gah rơngiao. 17Tui anŭn laĭ brơi bĕ kơ gơmơi hơgĕt Ih pơmĭn. Phiăn mơ̆ duh jia kơ Sêsar#22:17 Ƀing mơnuih Rôm iâu pơtao kơ ƀing gơñu jing Sêsar. ƀôdah ƀu phiăn ôh?”

18Samơ̆ Yêsu thâo tơlơi pơmĭn sat gơñu, laih anŭn laĭ glaĭ: “Yua hơgĕt ƀing gih lông lăng Kâo, Ơ ƀing plơ̆m ƀlor? 19Brơi Kâo lăng prăk duh jia anŭn.”

Gơñu brơi kơ Yêsu sa đơniê. 20Yêsu tơña gơñu “Rup hăng anăn hlơi anai?” 21Gơñu laĭ glaĭ: “Pơtao Sêsar.” Tui anŭn Yêsu laĭ kơ gơñu: “Tui anŭn pơglaĭ bĕ kơ Sêsar gơnam lơ̆m kơ Sêsar, laih anŭn pơglaĭ bĕ kơ Ơi Adai hơgĕt gơnam lơ̆m kơ Ơi Adai.” 22Tơ gơñu hmư̆ tơlơi anŭn, gơñu kơtuă hling hlang; gơñu lui Yêsu laih anŭn nao.

Tơlơi Tơña Kơ Tơlơi Hơdip Glaĭ

(Mar 12:18-27; Luk 20:27-40)

23Amăng hrơi anŭn mơ̆n, hmâo ƀing Sadusi rai pơ Yêsu, jing ƀing laĭ ƀu hmâo tơlơi hơdip glaĭ dơ̆ng ôh. Gơñu tơña kơ Yêsu tui anai,#Bruă 23:8. 24“Ơ Nai, Môis laĭ ‘Tơdah sa čô đah rơkơi djai hĭ ƀu hmâo ană ôh, brơi adơi ñu dŏ bơnai ayŏng ñu kiăng hmâo ană tŏ tui djuai ayŏng ñu.’#Mơñă 25:5. 25Tui anŭn hmâo amăng ƀing gơmơi tơjuh adơi ayŏng. Ayŏng tha dŏ bơnai laih anŭn djai hĭ, ƀu hmâo ană ôh, laih anŭn pioh glaĭ bơnai ñu kơ adơi ñu. 26Kar kaĭ mơ̆n adơi tal dua ñu laih anŭn adơi tal klâo, tơl truh pơ adơi tal tơjuh. 27Tơdơi kơ abih bang, đah kơmơi anŭn djai mơ̆n. 28Tui anŭn ƀơi hrơi hơdip glaĭ dơ̆ng, đah kơmơi anŭn či jing bơnai kơ hlơi amăng ƀing tơjuh čô anŭn, yua kơ rĭm čô gơñu leng hmâo dŏ laih đah kơmơi anŭn?”

29Samơ̆ Yêsu laĭ glaĭ kơ ƀing gơñu: “Ƀing gih tơhwơl laih yua kơ ƀing gih ƀu thâo hluh ôh Hră Ơi Adai Pơhiăp, kŏn thâo hluh lơi tơlơi dưi mơyang Ơi Adai. 30Yua kơ amăng hrơi hơdip glaĭ dơ̆ng đah rơkơi ƀu dŏ bơnai dơ̆ng ôh, đah kơmơi kŏn dŏ rơkơi dơ̆ng lơi, samơ̆ gơñu či jing kar hăng ƀing ling jang Ơi Adai amăng adai. 31Bơ kơ tơlơi ƀing djai hơdip glaĭ dơ̆ng, ƀing gih aka lăng ôh hă Hră Ơi Adai hmâo laĭ laih kơ ƀing gih, 32‘Kâo jing Ơi Adai kơ Abraham, Ơi Adai kơ Isak, laih anŭn Ơi Adai kơ Yakôp?’ Ñu ƀu djơ̆ jing Ơi Adai kơ ƀing djai ôh, samơ̆ jing Ơi Adai kơ ƀing hơdip.”#Tơb 3:6.

33Tơ ƀing mơnuih lu hmư̆ tơlơi anŭn, gơñu hling hlang biă mă kơ tơlơi Yêsu pơtô.

Tơlơi Pơtă Prŏng Hloh

(Mar 12:28-43; Luk 10:25-28)

34Tơ ƀing Pharisi hmư̆ Yêsu hmâo ngă kơ ƀing Sadusi kơđĭp hĭ amăng bah, gơñu pơƀŭt glaĭ hrŏm hơbĭt. 35Sa čô nai pơtô tơlơi juăt amăng ƀing gơñu tơña tui anai kiăng lông lăng Yêsu, 36“Ơ Nai, amăng tơlơi juăt tơlơi pơtă hơgĕt jing prŏng hloh?”

37Yêsu laĭ kơ ñu: “‘Ih khŏm khăp kơ Khua Yang Ơi Adai ih hăng abih pran jua, hăng abih bơngăt laih anŭn hăng abih tơlơi pơmĭn ih.’#Mơñă 6:5. 38Tơlơi pơtă anŭn jing prŏng hloh laih anŭn yom hloh. 39Laih anŭn tơlơi pơtă tal dua ăt yom kar hăng anŭn mơ̆n: ‘Ih khŏm khăp kơ pô jum dar ih kar hăng kơ ih pô’.#Lêwi 19:18. 40Abih bang tơlơi juăt laih anŭn tơlơi ƀing pô laĭ lui hlâo pơtô leng kơ tơbiă rai mơ̆ng dua tơlơi pơtă anŭn soh sel.”#Luk 10:25-28.

Yang Krist Hăng Pơtao Đawit

(Mar 12:35-37; Luk 20:41-44)

41Tơdang ƀing Pharisi pơƀŭt glaĭ hrŏm hơbĭt, Yêsu tơña kơ gơñu tui anai, 42“Hơgĕt ƀing gih pơmĭn kơ Krist? Ñu jing ană hlơi?” Ƀing Pharisi laĭ glaĭ: “Ană Đawit.”

43Yêsu laĭ kơ ƀing gơñu: “Tui anŭn, hyư̆m ngă tơdang Đawit hmâo tơlơi kơčut mơ̆ng Yang Bơngăt Hiam, ñu iâu hĭ Gơ̆ jing Khua Yang? laih anŭn laĭ:

44‘Khua Yang laĭ kơ Khua Yang kâo:

Ih dŏ ber bĕ gah hơnuă Kâo,

Tơl Kâo pioh ƀing ayăt Ih ƀơi gah yŭ tơkai Ih’?#Adoh 110:1.

45Tơdah Đawit iâu Krist jing Khua Yang, hyư̆m Ñu dưi jing hĭ ană Đawit dơ̆ng lĕ?” 46Ƀu hmâo sa čô dưi laĭ glaĭ kơ Ñu dơ̆ng ôh, laih anŭn čơdơ̆ng mơ̆ng hrơi anŭn ƀu hmâo hlơi pô khĭn tơña Ñu sa mơta tơlơi hơgĕt dơ̆ng ôh.

Currently Selected:

Mathiơ 22: JRA2016

Highlight

Copy

Compare