Markôs 7
7
Tơlơi Juăt Ƀing Ơi Adon
(Mat 15:1-9)
1Hlăk anŭn hmâo ƀing Pharisi hrŏm hơbĭt hăng đơđa ƀing nai pơtô tơlơi juăt mơ̆ng plei Yêrusalem nao pơtŭm jum dar Yêsu, 2gơñu thâo đơđa ƀing ding kơna Yêsu ƀơ̆ng huă hăng tơngan grĭ, kiăng laĭ ƀu rao tơngan.
3(Tui hăng tơlơi phiăn ƀing ơi adon, ƀing Pharisi hăng abih bang ƀing Yuđa ƀu ƀơ̆ng huă ôh tơdah ƀu rao tơngan hlâo, 4tơ ƀing gơñu glaĭ mơ̆ng sang sĭ mia, ƀing gơñu ƀu ƀơ̆ng huă ôh tơdah ƀing gơñu aka rao tơngan.#7:4 Ƀôdah pơblang: Laih anŭn tơdah gơñu glaĭ mơ̆ng sang sĭ mia, gơñu ƀu ƀơ̆ng huă ôh tơdah gơñu aka pơrơgoh gơñu pô hlâo. Laih anŭn gơñu tui lu mơta tơlơi phiăn pơkŏn dơ̆ng, kiăng laĭ tơlơi phiăn rao mŏng, gŏ lŏn, gŏ kong laih anŭn kơƀang ƀơ̆ng huă.#7:4 Đơđa hră Ơi Adai Pơhiăp so đưm ƀu hmâo ôh: kơƀang ƀơ̆ng huă)
5Yua kơ anŭn, ƀing Pharisi hăng ƀing nai pơtô tơlơi juăt tơña kơ Yêsu: “Yua hơgĕt ƀing ding kơna Ih ƀu hơdip tui tơlơi phiăn ƀing ơi adon, laih anŭn gơñu ƀơ̆ng huă hăng tơngan grĭ lĕ?”
6Yêsu laĭ glaĭ kơ gơñu: “Êsai laĭ lui hlâo kơ ƀing gih jing ƀing plơ̆m ƀlor djơ̆ biă mă yơh, kar hăng tơlơi hmâo čih laih:
‘Ƀing ană plei pla anai pơpŭ kơ Kâo hăng tơƀuai gơñu,
Samơ̆ pran jua gơñu dŏ ataih mơ̆ng Kâo biă mă.
7Bruă gơñu kơkuh pơpŭ kơ Kâo jing đôč đač,
Mơta tơlơi gơñu pơtô kơnơ̆ng jing khul tơlơi phiăn ană mơnuih đôč.’#Êsai 29:13; Êsê 33:31.
8Ƀing gih lui laih tơlơi Ơi Adai pơtă, laih anŭn djă pioh kơjăp tơlơi juăt ană mơnuih.”
9Tui anŭn Yêsu laĭ kơ gơñu: “Hăng tơlơi mơneč ƀing gih lui hĭ tơlơi Ơi Adai pơtă, kiăng djă pioh tơlơi phiăn ƀing gih pô. 10Yua kơ Môis laĭ: ‘Pơpŭ bĕ kơ amĭ ama ih,’ laih anŭn ‘Hlơi pô pơhiăp sat kơ ama ƀôdah amĭ ñu, sĭt ñu khŏm djai.’#Tơb 20:12; Mơñă 5:16.#Tơb 21:17; Lêwi 20:9; Mơñă 27:26; Bơrt 20:20. 11Samơ̆ ƀing gih laĭ: ‘Tơdah sa čô laĭ kơ ama ƀôdah amĭ ñu, hơgĕt mơnơ̆ng kâo dưi djru ih jing Kôrban,’ (kiăng laĭ pơyơr laih kơ Ơi Adai), 12ƀing gih ƀu brơi ñu djru amĭ ama gơ̆ dơ̆ng tah. 13Hăng tơlơi juăt ƀing gih pơtô, tui anŭn ƀing gih yap tơlơi Ơi Adai pơhiăp jing đôč đač. Laih anŭn lu tơlơi ƀing gih ngă kar hăng anŭn.”
Mơnơ̆ng Pơgrĭ Mơnuih
(Mat 15:10-20)
14Giơ̆ng anŭn Yêsu iâu dơ̆ng ƀing mơnuih lu, rai hăng laĭ kơ gơñu: “Brơi abih bang ƀing gih hmư̆ laih anŭn thâo hluh bĕ. 15Ƀu hmâo ôh sa mơta mơnơ̆ng mơ̆ng gah rơngiao mơnuih dưi mŭt amăng ñu hăng pơgrĭ hĭ ñu, samơ̆ hơgĕt mơnơ̆ng tơbiă mơ̆ng mơnuih, mơnơ̆ng anŭn yơh pơgrĭ ñu.”#7:15 Đơđa Hră Ơi Adai Pơhiăp so đưm thim dơ̆ng jơlan 16: Hlơi pô hmâo tơngia pioh kơ hmư̆, brơi ñu hmư̆ bĕ!
17Tơ Ñu lui laih ƀing mơnuih lu laih anŭn mŭt amăng sang, ƀing ding kơna tơña Ñu kơ tơlơi bơhmutu anŭn. 18Yêsu laĭ kơ gơñu: “Wơ̆t kơ ƀing gih ăt aka thâo hluh mơ̆n hă? Ƀing gih ƀu thâo ôh hă hơgĕt mơnơ̆ng mơ̆ng gah rơngiao mŭt amăng mơnuih ƀu dưi ngă pơgrĭ mơnuih ôh? 19Yua kơ mơnơ̆ng anŭn ƀu mŭt amăng pran jua ôh, samơ̆ amăng hlŭng laih anŭn hlŏng tơbiă pơ gah rơngiao.” (Tui anŭn Yêsu kiăng laĭ abih bang mơnơ̆ng leng kơ dưi ƀơ̆ng soh sel.)
20Laih anŭn Yêsu laĭ: “Hơgĕt mơnơ̆ng tơbiă mơ̆ng mơnuih, mơnơ̆ng anŭn yơh pơgrĭ ñu. 21Yua kơ mơ̆ng amăng lăm, mơ̆ng pran jua mơnuih tơbiă rai tơlơi pơmĭn sat, tơlơi rih răm, tơlơi klĕ, tơlơi pơdjai mơnuih, 22tơlơi klĕ pyu, tơlơi hưp ham, tơlơi ƀrưh hmiah, tơlơi pleč ƀlor, tơlơi hơtoh djraĭ, tơlơi moañ, pơhiăp pơčeh, tơlơi pơgao, laih anŭn tơlơi mlŭk. 23Abih bang tơlơi sat anŭn leng kơ tơbiă mơ̆ng amăng lăm, laih anŭn ngă pơgrĭ mơnuih.”
Tơlơi Đaŏ Đah Kơmơi Kanaan
(Mat 15:21-28)
24Ñu tơbiă mơ̆ng tring anŭn nao pơ tring plei Tir.#7:24 Đơđa Hră Ơi Adai pơhiăp so đưm: laih anŭn plei Sidôn. Ñu mŭt amăng sa boh sang, Ñu ƀu kiăng arăng thâo Ñu dŏ pơ anŭn ôh, samơ̆ Ñu ƀu thâo hơgơ̆m ôh. 25Hmâo sa čô đah kơmơi hmâo ană đah kơmơi anĕt hmâo yang bơngăt grĭ hơƀak dŏ amăng ñu, hmư̆ hing kơ Yêsu, laih anŭn tañ mơtam nao bon ƀơi tơkai Yêsu. 26Đah kơmơi anŭn jing sa čô mơnuih Tuai mơ̆ng tring Phênisi čar Siri; ñu rơkâo kơwưh kơ Yêsu puh pơđuaĭ yang sat mơ̆ng ană đah kơmơi gơ̆. 27Ñu laĭ kơ gơ̆: “Brơi kơ ană bă ƀơ̆ng huă trơi hlâo amơĭ, yua kơ ƀu hiam ôh mă ƀañ tơpŭng ƀing ană bă laih anŭn glŏm brơi kơ asâo.”
28Samơ̆ đah kơmơi anŭn laĭ glaĭ kơ Ñu: “Djơ̆ yơh, Ơ Khua, samơ̆ ƀing asâo dŏ gah yŭ kơƀang ăt dưi ƀơ̆ng mơ̆n aru ƀañ ƀing ană bă lĕ trŭn.”
29Tui anŭn Yêsu laĭ kơ gơ̆: “Ih glaĭ bĕ, yua kơ tơlơi ih pơhiăp tui anŭn, yang sat tơbiă laih mơ̆ng ană đah kơmơi ih.”
30Đah kơmơi anŭn glaĭ pơ sang ƀuh ană ñu dŏ đih ƀơi sưng, laih anŭn yang sat tơbiă laih.
Yêsu Pơsuaih Mơnuih Tơngil Hăng Kơmlô
31Giơ̆ng kơ Yêsu tơbiă mơ̆ng tring plei Tir, găn plei Sidôn anăp nao ia rơsĭ Galilê, mŭt amăng tring Dêkapôlis. 32Arăng ba nao pơ Yêsu sa čô mơnuih tơngil hăng kơmlô laih anŭn gơñu rơkâo kơwưh kơ Yêsu ah tơngan ƀơi pô anŭn. 33Yêsu ba pô anŭn tơbiă mơ̆ng ƀing mơnuih lu nao pơ anih hơjăn, laih anŭn Ñu čŭt čơđeng Ñu ƀơi dua gah amăng tơngia ñu. Laih anŭn čuh ia bah pik ƀơi jơlah gơ̆. 34Tơdang Ñu angak đĭ mơta pơ adai. Ñu kơhôih jua hăng laĭ kơ gơ̆. “Êphatha” kiăng laĭ “pŏk bĕ.”
35Tañ mơtam tơngia ñu pŏk hĭ, jơlah ñu klaih, laih anŭn ñu čơdơ̆ng pơhiăp klă rơđah. 36Tui anŭn Yêsu pơtă kơ ƀing anŭn anăm ră ruai kơ arăng ôh, samơ̆ jai Yêsu khă jai hloh dơ̆ng gơñu ră ruai tơlơi anŭn. 37Ƀing anŭn dŏ kơtuă hling biă mă hăng laĭ “Ñu ngă abih bang bruă hiam soh sel. Ñu ngă brơi wơ̆t mơnuih tơngil dưi hmư̆ laih anŭn mơnuih kơmlô thâo pơhiăp.”
Currently Selected:
Markôs 7: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
