Tơlơi Yap 5
5
Tơlơi Juăt Kơ Tơlơi Rơgoh Hiam
1Yêhôwa laĭ hăng Môis tui anai: 2“Pơđar bĕ kơ ƀing Israel puh pơđuaĭ hĭ ƀing hlơi hmâo tơlơi djơ̆ phŭng ƀôdah hmâo tơlơi djơ̆ krơ laih anŭn ƀing hlơi pô jing hĭ grĭ hơƀak yua kơ ñu ruaih djơ̆ drơi jan djai. 3Khŏm puh pơđuaĭ hĭ ƀing đah rơkơi ƀôdah đah kơmơi mơ̆ng anih jưh kiăng kơ gơñu ƀu ngă pơgrĭ ôh anih jưh, jing anih Kâo dŏ ƀơi anŭn.” 4Ƀing Israel puh pơđuaĭ hĭ gơñu mơ̆ng anih jưh djơ̆ tui hăng tơlơi Yêhôwa hmâo pơtă laih kơ Môis.
Tơlơi Juăt kơ Tơlơi Kla Glaĭ
5Yêhôwa laĭ kơ Môis tui anai:#Lêwi 6:1-7. 6“Pơtă bĕ kơ ƀing Israel tui anai: ‘Tơdah sa čô đah rơkơi ƀôdah đah kơmơi ngă pơrăm kơ mơnuih pơkŏn, anŭn jing soh ƀu tŏng ten hăng Yêhôwa, pô anŭn dŏ đom amăng tơlơi soh yơh. 7Mơnuih anŭn khŏm pơhaih tơlơi soh laih anŭn kla glaĭ tum num, rơngiao mơ̆ng anŭn ñu khŏm kla thim sa črăn amăng rơma brơi kơ mơnuih ñu hmâo ngă pơrăm anŭn. 8Tơdah mơnuih tŭ arăng ngă pơrăm djai hĭ laih anŭn ƀu hmâo kơnŭng djuai giăm ôh jing pô či tŭ mă gơnam kla glaĭ, gơnam anŭn či lơ̆m kơ Yêhôwa yơh laih anŭn khŏm jao brơi kơ ƀing khua ngă yang, brơi thim sa drơi triu tơno ngă yang song mă tơlơi soh brơi kơ pô đom kơ tơlơi soh anŭn. 9Abih bang gơnam pơyơr rơgoh hiam kơ ƀing Israel ba nao pơ khua ngă yang, či lơ̆m hĭ kơ khua ngă yang yơh. 10Hơdôm mơnơ̆ng ngă yang rơgoh hiam kơ rĭm čô mơnuih pơyơr, či lơ̆m kơ khua ngă yang; mơnơ̆ng hơgĕt ñu brơi kơ khua ngă yang či lơ̆m kơ khua ngă yang anŭn yơh.’”
Tơlơi Juăt kơ Tơlơi Tơgar
11Yêhôwa laĭ kơ Môis: 12“Pơtă bĕ ană plei Israel tui anai: ‘Tơdah sa čô đah kơmơi jrok jơlan laih anŭn ƀu tŏng ten hăng rơkơi ñu; 13tơdah hmâo sa čô đah rơkơi đih hrŏm hăng đah kơmơi anŭn samơ̆ rơkơi ñu ƀu thâo ôh laih anŭn arăng aka thâo ôh tơlơi grĭ hơƀak ñu (yua kơ ƀu hmâo ôh tơlơi gơ̆ng jơlan kiăng kơ phong kơđi kơ ñu laih anŭn arăng ƀu hmâo mă ñu ƀơi anăp mơta ôh.) 14Tơdah rơkơi ñu gar kơ bơnai ñu yua kơ bơnai ñu hmâo jing grĭ hơƀak laih ƀôdah ñu gar kơ bơnai ñu, wơ̆t dah bơnai ñu ƀu ngă ôh tơlơi grĭ hơƀak, 15pô anŭn khŏm djă ba bơnai ñu nao ƀơi anăp khua ngă yang hăng djă ba dua lit#5:15 Boh hră phŭn: sa črăn amăng pluh êphah. tơpŭng pơdai ôrgơ kiăng ngă mơnơ̆ng ngă yang brơi kơ bơnai ñu. Ñu anăm tuh ôh ia rơmuă ƀơi mơnơ̆ng ngă yang laih anŭn kŏn anăm pioh lơi mơnơ̆ng ƀâu hiam ƀơi hăng ngŏ kơ mơnơ̆ng anŭn, yua kơ anŭn jing sa tơlơi ngă yang hăng braih pơdai kơ tơlơi gar, jing sa tơlơi ngă yang hăng braih pơdai kiăng kơ pơhơdơr kơ tơlơi soh.
16Khua ngă yang či pơđar đah kơmơi anŭn nao giăm laih anŭn dŏ dơ̆ng ƀơi anăp Yêhôwa. 17Giơ̆ng anŭn, khua ngă yang mă đơsĕt ia rơgoh tro mŭt amăng sa boh get lŏn laih anŭn mă ƀiă lŏn ƀơi wăl Sang Khăn pioh mŭt amăng ia anŭn. 18Khua ngă yang pơđar kơ đah kơmơi dŏ dơ̆ng ƀơi anăp Yêhôwa, yaih hĭ ƀuk gơ̆ trŭn laih anŭn dưm mơnơ̆ng ngă yang pơhơdơr amăng plă tơngan ñu, anŭn jing tơlơi ngă yang hăng braih pơdai kơ tơlơi gar. Bơ kơ khua ngă yang djă get ia phĭ kơ tơlơi hơtơ̆m pah amăng tơngan ñu. 19Khua ngă yang brơi đah kơmơi anŭn khŏm ƀuăn rơ̆ng laih anŭn laĭ hăng gơ̆ tui anai: “Tơdah đah rơkơi ƀu hmâo đih ôh hăng ih, tơdah ih ƀu hmâo ngă soh ôh hăng rơkơi ih, laih anŭn ƀu rơngiă hĭ ôh tơlơi rơgoh hiam ih, tui anŭn ia phĭ kơ tơlơi hơtơ̆m pah anai ƀu či ngă răm kơ ih ôh. 20Tơdah ih hmâo rơkơi laih samơ̆ ăt nao jrok jơlan laih anŭn ngă soh hĭ hăng đah rơkơi pơkŏn ƀu djơ̆ jing rơkơi ih ôh...” 21(hlăk anŭn khua ngă yang brơi đah kơmơi ngă sa tơlơi ƀuăn rơ̆ng hăng sa boh pơhiăp sat) laih anŭn laĭ dơ̆ng: “Rơkâo kơ Yêhôwa ngă brơi ih jing hĭ tơlơi hơtơ̆m pah laih anŭn hơtŏm ƀua tơ̆ng krah ană plei pla, ngă brơi ih rơwang tơbiă sŭ, laih anŭn hlŭng ih pơpông đĭ, hruh ană ih kro hĭ, 22Brơi ia phĭ hơtơ̆m pah anai mŭt amăng pruăi hơtai ih, ngă brơi hlŭng ih pơpông đĭ laih anŭn rơwang tơbiă sŭ.” Pô đah kơmơi či laĭ: “Amen. Amen!”#5:22 Amen kiăng pia “sĭt khŏm hmâo kar hăng anŭn yơh”.
23Giơ̆ng anŭn, khua ngă yang khŏm čih hơdôm boh pơhiăp hơtŏm ƀua anai amăng sa sŏp hră, laih anŭn mă ia phĭ rao hĭ. 24Khua ngă yang či brơi đah kơmơi mơñum ia phĭ kơ tơlơi hơtơ̆m pah, laih anŭn ia phĭ anai či mŭt amăng ñu, ngă brơi ñu ruă nuă, tơnap tap. 25Khua ngă yang či mă mơ̆ng tơngan đah kơmơi anŭn mơnơ̆ng ngă yang hăng braih pơdai kơ tơlơi gar hơdai nao rai ƀơi anăp Yêhôwa laih anŭn pơyơr đĭ ƀơi kơ kơƀang ngă yang. 26Khua ngă yang mă sa kơpơ̆t tơpŭng mơnơ̆ng ngă yang hăng braih pơdai kơ tơlơi pơhơdơr laih anŭn čuh ƀơi kơƀang ngă yang, giơ̆ng anŭn pơđar đah kơmơi mơñum ia phĭ. 27Tơdang khua ngă yang brơi kơ đah kơmơi anŭn mơñum ia phĭ, tơdah đah kơmơi anŭn hmâo ngă soh laih, laih anŭn ƀu tŏng ten ôh hăng rơkơi ñu, tui anŭn ia phĭ kơ tơlơi hơtơ̆m pah či mŭt amăng ñu yơh, ngă kơ ñu tơnap tap, ruă nuă, hlŭng ñu či pơpông đĭ laih anŭn rơwang tơbiă sŭ. Đah kơmơi anai či jing hĭ tơlơi hơtơ̆m pah tơ̆ng krah ană plei pla ñu. 28Samơ̆ tơdah đah kơmơi anŭn ƀu hmâo ngă pơgrĭ hơƀak kơ pô ñu ôh, ăt dŏ rơgoh hiam, tui anŭn ñu ƀu či ruă nuă ôh laih anŭn ñu dưi tơkeng ană bă.
29Anŭn jing tơlơi juăt kơ tơlơi gar tơdang sa čô đah kơmơi jrok jơlan laih anŭn ngă pơgrĭ pô ñu hlăk ñu hmâo rơkơi laih, 30ƀôdah tơdang rơkơi ñu gar hăng bơnai ñu. Rơkơi anŭn khŏm ba bơnai ñu ƀơi anăp Yêhôwa laih anŭn khua ngă yang či ngă kơ đah kơmơi anai tui hăng abih tơlơi juăt anai. 31Đah rơkơi anŭn ƀu či hmâo tơlơi soh hơgĕt gĕt ôh, samơ̆ bơnai ñu či mă tŭ tơlơi pơkơhmal tơdah ñu ngă soh.’”
Currently Selected:
Tơlơi Yap 5: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.