Luka 14
14
Yesu ayɔ ni onyime ɔtɔ
1Liba lɛ mɛ ní Sabat liwe etɔ aʋa si Yesu atrɛ ní Farisianɛ ma ɔnɔ ʋidi ɔtɔ yɛ kepea mɛ bidɔ ɔŋa kɔ; lɛ banima bezevu aŋu ní Yesu su mɔmɔmɔ ɔ. 2Gi si yidi i, onyime ɔtɔ gi yɛ ikli ni iwla iye e, aba edo ní yɛ aŋu mɛ. 3Yesu eʋi Ɔsã nɔ badɔbasɛ ba ni Farisianɛ ma si, “Blɔ Ɔsã nɔ ɛki kude si bayɔni ɔnyanya ní Sabat liwe le aʋa loo kitɛ ɛ?” 4Pɔ̀ banima bapani i. Lɛ Yesu ebu onyimee kuka a, ayɔni yɛ, lɛ akpɛ yɛ kude e.
5Lɛ Yesu asi ba si, “Xegi mlɔ mɛ ɔtɔ Yebi i, loo yɛ ligume liwɔli iku ní vudo ye me ní Sabat yɛ aʋa a, mlaatrábu ba kyɔŋ ní Sabat yɛ ɔtutɔ aʋa na?” 6Pɔ̀ bátani liboe lɛ ya onu kubu kí yɛ ɛ.
Kudɔbasɛ ní Kusububɔ ni Kunɔdimɛnɔ su
7Gi Yesu akpɛ lɛ lixaŋu kiliɛ gi banɔkpekpe ba bɛzɛpɛ izekɔ gyɔgyɔ lɛ ki isu ya ɛ, Yesu ebu abee liɛ aki ba petee si, 8Xegi ɔnutɔ axwa wɔ amanɔ ní ɔdzɛ ɔgbanɔkplɔ su i, wukíze ní ozekɔ gyɔgyɔ lɔ ɔ; lɛ ese linu si wóte xe bekpe ɔnɔ gbɔgbɔ sani wɔ amanɔ ní ɔdɔŋakplɔ nɔ su u. 9Xegi liba lɛ mɛ nite e, kɔ kepea ɔkaɛ aabasɛ wɔ si, yɔ ní wɔ ozeklɔ ki onyime liɛ ya. Liaki si wɔayɔ ni kuyeo me kɔ wɔzedi ni ozekɔ lɔ gi óku aŋu i. 10Boŋu i, xegi bɛxwa wɔ ɛtsini ɔdɔŋakplɔ nɔ su i, wukize ni ɔgyɔgyɔ kɔ ɔ, tɔ xe kepea ɔkaɛ aba ɛ, aasi wɔ si, “Ɔʋia, yɔ tɔ zeeze ní ɔkɔ gbã ɔtɔ kɔ sanɔ.” Liaki si kubùbù kwiaze ní wɔ su ní banɔxwaxwa ba petee aŋu mɛ sanɔ. 11Lɛ ese linu si ɔnɔ kakaa gi emuni isu ya ɛ, biaple ni ye, lɛ ɔnɔ kakaa gi epleni isu ya ɛ, biamuni ye.
12Lɛ Yesu asi kepea ɔkaɛ si, xegi wɔ si wutrɔ ɔkplɔ ɛ, kíxwa wɔ baʋia nɛ, wɔ benemi, wɔ baŋanɛ loo banama gi ɔwla mɛ ɔlɛ ba a; lɛ ese linu si ba kyɛ ɛ, biadzini wɔ kuxwa gani lɛ mɛ ɛ, kɔ bɛtsa wɔ kuxwaxwaa liʋɛ nɛ ɛki wɔ ɛ. 13Lɛ loso xegi wɔtrɔ ɔkplɔ ɛ, xwa bepiplinete ba, banama gi ba kapɛ tiele ketse e, bafa ba ani kuŋupoo, 14kɔ Aya akrira wɔ ɛ; lɛ ese linu si ba batrátani wɔ liʋɛ nɛ kutsa ki wɔ ɔ. Aya aatsa liʋɛ nɛ ɔki wɔ ní liwee lɛ aʋa gi eboe gbã na babitɛbitɛ ba biayɔ dɔni bekpo ʋa mɛ ɛ.
Abee ní ɔdɔŋakplɔ trɔtrɔ ʋidi lo su
15Lipoe lɛ gi banama gi beze ní ɔkplɔ nɔ su ni Yesu ba mɛ tole enu liboe le e, asi yɛ si, “Banama gi biaŋa bidɔ ní ɔdɔŋakplɔ ʋidi lo su ni lifunu ne kaʋaŋaa mɛ ɛ, isami koŋ bɛtra mɔ.”
16Lɛ Yesu asi yɛ si, “Onyime ɔtɔ atrɔ ɔkplɔ ʋidi ɔtɔ, lɛ axwa banɔ gbí si bagaŋa bidɔ ni yɛ ɛ. 17Agi bidɔ mɛ liŋapoe le lina ɛ, akpɛ yɛ ɔnɔsumu ye si ɔzɛsi banɔxwaxwa ba si, ‘Mlaga ba, kidɔ kakaa kiflɔ.’
18“Pɔ̀ ba petee bekpese ba baxixa ʋa kubu basɛ tole tole e. Ɔnɔ tɔpu yɛ asi ɔnɔsumu ye si, ‘Medzi kese katɔ gi lilɛ si mizɛɛtapo kamɛ odi i, lɛ loso e, zi mɛ kuxixaa ki mɛ.’ 19Ɔnɔ dzedze kyɛ si, ‘Medzi egume nyime liɔfɔ tɔ míkɔ ɛsɔ mɛ ɔnyrɔ mɛ, nite si kudeo me malɛ te gi matrɛsɔ ni la edi i, lɛ loso mátratani ku ba a.’
20“Ɔnɔ dzedze kyɛ si, ‘magbani ɔdzɛ vuvu lɛ loso mátratani kuba a.’
21“Ɔnɔsumu ye azɛɛki yɛ ɔkaɛ kunutsatsaa. Ɔkaɛ amɔ kusuyeʋi gagla lɛ asi yɛ ɔnɔsumu ye si, ‘Kɔsi tɔ trɛ ní ɔma nɔ ablɔ ʋa aʋa ni igbade ne me, tɔ zɛɛxwa bepiplinete ba, bafa ba, kuŋupoo ni banama gi kapɛ tiele ketse ki ba ɛ manɔ.’
22“Gi liŋwe ne si lɛdɔ ɛ, ɔnɔsumu ye edzi aba lɛ asi yɛ kepea ɔkaɛ ɛ si, ‘Lixwɛ nɛ gi wɔkpɛ mɛ ɛ, mawa lɛ. Pɔ̀ kyɛ ɛ, izekɔ lɛ iʋíblo o.’ 23Nite si ɔkaɛ asi ɔnɔsumu ye si, ‘Do trɛ ní inyrɔ nɛ bede ʋidi ʋa aʋa ni ikli lɛ bede ʋa me tɔ xwa ɔnɔ kakaa gi wɔamɔ manɔ ɔ, tɔ mɛ kepea keyi. 24Mɛɛsi mlɔ si, banama petee gi bɛxwa ní ɔtɔpu kɔ ɛ, ba mɛ ɔtɔtɔ ɔ́trakpɛ mɛ ɔkplɔ nɔ aʋa kididɔ ní onugu me e.’ ”
Ɔdɔkpasi kuzeze, kúnu kidɔ plɔplɔ ɔ
25Liwe etɔ lɛ gi Yesu ni linɔkpi ʋidi itɔ beze ní kudeo aʋa ɛ, ekyi lɛ asi ba si, 26“Ɔnɔ kakaa gi aba mɛ klɔ ɛ, ɔ́tratani mɛ ɔdɔkpasi kudzi xegi ɔ́lɔ mɛ sani ɔka loo one e, odze loo bebi, beneminyime loo benemidzɛ, loo yɛ tutɔ yɛ isu ya kyɛ. 27Banama gi bátratani ba tutɔ ba isetsase le kutu u, xe biakuni mɛ kude e, bátratani mɛ badɔkpasi kuze e.
28“Xegi mlɔ mɛ tole ɔtɔ atrɔ si yiwa lifunu ligba a, liziã si oze kese ní ɔtɔpu kɔ, tɔ obu akɔnta atɔ odi si tiasɛ ligba lɛ liazɛ ɛ, lɛ kibɔ kisrɛ ní yɛ awla gi aatani ligba lɛ kuwa gù na a. 29Xegi óbu ɔkliɔ lɔ klɔ ɛ, ɔ́tratani ligba lɛ kuwa gù u, xe akpɛ ɔxɔ lɔ pɔ ɛ. Nite si banama petee gi biamɔ yɛ kibitɛ ɛ, biamwɛ yɛ. 30Kɔ bɛpani si, ‘Onyime liɛ ekpese ligba lɛ kuwa pɔ̀ ɔ́tani lɛ kugù u.’
31“Xegi okusi ɔtɔ akɔ baguta akpe liɔfɔ si yitrɛta kigũ ni okusi dzedze gi baguta akpe avi taʋa balɛ yɛ awla ɛ, aaze kese gi aadi si kɔ yɛ atani kigũ kuta ní okusi liɛ klɔ na a? 32Xegi ete si yɛ ɔ́tratanɔ ɛ, kɔ akpɛ banɔ ní okusi liɛ klɔ kɔ lipoe lɛ gi ba kusi kwidze e, tɔ beʋi kusuyɔ. 33Lɛ Yesu agu yɛ liboe le si, Nite ke mɛɛsi mlɔ si ɔnɔnɔ ɔ́tratani mɛ ɔdɔkpasi kuze e sanɔ si ayurɔ kidɔ kakaa gi kilɛ yɛ awla ɛ.”
Kùmwɛ gi kupɛ ɛ
34“Kùmwɛ kuzeze ɔgyi, pɔ̀ xegi ɔgyi nɔ eblo ní kɔ mɛ ɛ, bátratani ɔgyi kukpɛ ní kɔ mɛ tɔ ɔ. 35Kúpɛ ɛki kididɔ tɔ ɔ, kiŋwia ko biaŋwia kɔ oʋe. Xegi kutu kuli mlɔ ɛ, tɔ mlenu.”
Currently Selected:
Luka 14: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
