Luka 8

Badzɛ ba klɔ gi beze nì Yesu kude e

1Lipoetɔ kede e, Yesu aklani ima ni kumami yɔ mɛ gi azaapani Aya yɛ kaʋaŋaa su Liboe Gbã nɛ aklanɔ ɛ. Badɔkpasi liɔfɔ ni tiaʋa ba beze ni yɛ kude. 2Badzɛ batɔ mɛ gi Yesu akpikpini ifuɛfuɛ zimizi ne dono o, xe ayɔni ba ní ba bànya ba mɛ fɛ beze ni ba kude e. Ba mɛ ɔtɔ eze Maria gi bizɛxwa fɛ si Magdalene e, gi yɛ mɛ Yesu akpikpini ifuɛfuɛ zimizi tigloele le dono e. 3Odzedze eze Yohana gi yenye eze Kuza: lɛ Kuza ɛ eze Herodes yɛ kekusipea mɛ ɔka ɔtɔ ɔ. Odzedze ɔtɔ fɛ eze Susana. Ni ba ya kede e, badzɛ dzedze glegle fɛ beze ni Yesu kude, gi bɛkɔ ba tutɔ iwla mɛ bidɔ ɛkɔ ɛpɔni Yesu ni yɛ badɔkpasi ba a.

Abee ní amu na ogluglu ye su

4Banima bɛzɛɛdɔ ima ede ede me eba Yesu klɔ, lɛ lipoe lɛ gi linɔkpi ʋidi itɔ lixogo e, Yesu ebu abee aki ba si,

5“Liba lɛ mɛ si onyime ɔtɔ atrɛ ní amu oglu kɔ. Gi azɛɛkpɛ amu na ní kayaa mɛ ɛ, atɔ ɛwɔli ɛdɔ ní kudeo me. Banima bɛga ní la aʋa, lɛ kudzɔʋi yɔ kwita la ɛmlɔ ɛ. 6Atɔ ɛwɔli ɛdɔ kese kpakpla aʋa. Ɛyɛ, pɔ̀ gi sise se sísrɛ ki la loso e, amɔ kuni, lɛ loso ɛyurɔ ɔ lɛ etse e. 7Amubi la atɔ fɛ ewɔli iku bibu ʋe me. Agi ɛyɛ ɛ, xe la ni bibu ʋe bizeetsi kpɛ likpɔ ɛ, bibu ʋe biwà ɛda la aʋa. 8Lɛ atɔ fɛ ɛdɔ ní kese gbã aʋa a; niteme si la kɔ etsi, lɛ likáka liyo amubi alafa a.”

Lɛ Yesu agu yɛ abee si, “Xe batu bali ní mlɔ awla ɛ, tɔ mlenu!”

Kidiliɛ gi kɛ loso bebu abee ʋa ɛ

9Yesu yɛ badɔkpasi ba beʋi abee liɛ gi ebu ese e. 10Lɛ ebu le onu aki ba si i, “Aya yɛ Kaʋaŋaa su eboe kpokpo la su kuboeteo e, bɛkɔ kɔ ɛki mlɔ. Pɔ̀ ki banɔ gɔgɔ ba ɛ, mizɛpani ní abee ʋa mɛ,

“ ‘tɔ xegi bedi fɛ ɛ, bátramɔ ɔ;

lɛ xegi bɛta kutu fɛ ɛ, bátranu liboeboe ese e.’

Yesu ebu amu na ogluglu ye yɛ abee ese

11“Lɛ Yesu asi ba si, abee yɛ ese onu si: amubi la enu Aya yɛ liboe le. 12Amubi ala la klɔ gi ɛwɔli ɛdɔ ní kudeo me e, la enu banɔ baklɔ gi bizenu liboe le e, pɔ̀ kɔ́ Ozimizi ye aba ekple liboe le ebu ní ba ina nɛ mɛ ɛ. Niteme si bátrazɛ lɛ aʋa ɛɛŋa a xe biamɔ kubúbú u. 13Amubi ala la klɔ gi edɔ ní kese kpakpla aʋa ɛ, la enu banɔ baklɔ gi bizeenu liboe le e gi bizɛzɛ lɛ ni isami fɛ ɛ. Pɔ̀ liboe le liʋita igu u. Lipoe kpekpemi itɔ ko bizɛzɛ lɛ aʋa ɛɛŋa. Pɔ̀ xegi baxixa ʋa bɛba ko e, kɔ bɛɛdzi kede e. 14Amubi ala la klɔ gi ɛwɔli eku bibu ʋe me e, alɛ aki banama gi bizenu liboe le e. Pɔ̀ ligbã nɛ mɛ kusuŋwasiɔ, exo la ni ligbã́ŋaŋa nɛ, bikpɛ likpɔ kɔ bimi liboe le kpɛ ba mɛ, gi líʋibu libi tɔ́tɔ liwewe e. 15Amubi ala la klɔ gi ɛwɔli ɛdɔ kese gbã aʋa ɛ, la alɛ aki banɔ baklɔ gi xe benu liboe le e, bizevu lɛ ɔzɔ mɛ ni kutununu ɔna gbã a. Nite si bizɛkpɛ ikũ nɛ ní liboe le kɔkpɛ nì lipoe lɛ klɔ gi liabu libi i.

Kani yɛ izɛ ki kuklekle

16“Ɔnɔnɔ ɔ́ʋisu kani i, xe izɛkɔ yɛ ɛkpɛ agba yɛ ese e loo kpo ye ní abati ese. Boŋu i, bizɛkɔ yɛ trɔ ní kani yɛ ose lo aʋa tɔ okle ki banama gi beetiku kepea mɛ ɛ.

17“Lɛ kidɔ kakaa liɛ gi bekpo e, kiaŋwi. Lɛ kidiliɛ aʋa gi bewe bidɔ ɛ, biamɔ kɛ kɔ bebu ke basɛ ní oŋwe no e.

18“Lɛ loso e, mledi mumɔ tɔ mlevu aŋu ní kiliɛ gi mleenu eboe la ese e su. Lɛ ese linu si, ɔniliɛ awla gi bidɔ bilɛ ɛ, biaki yɛ bidɔ pɔnɔ. Pɔ̀ ɔniliɛ awla gi kididɔ kíma ɛ, kidiliɛ gi egyoedi si kilɛ ní yɛ awla kyɛ ɛ, biazɛ kɛ yɛ awla.”

Yesu yene ni yɛ benemi ba

19Yesu yene ni yɛ beneminyime ba bɛba si bɛɛmɔ Yesu. Pɔ̀ bátani yɛ kuti pɔnɔ ɔ, linɔkpi le kisrɛsrɛ loso. 20Ɔnutɔ asi Yesu si, “Wone nì wɔ beneminyime ba balɛɛ ní oŋwe no gi bɛpɛ si bɛmɔ wɔ ɔ.”

21Yesu asi banima petee si, “Mone ni mɛ beneminyime ba ɛ, ba benu banama gi bizenu Aya yɛ Liboe le e, xe bizɛbitɛ ní lɛ aʋa a.”

Yesu ayɔ liwɔ lɛ kigaglaɛ onu

22Liwe etɔ lɛ ɛ, Yesu nì yɛ badɔkpasi ba bemu iku ní katapokpa atɔ mɛ. Lɛ Yesu asi ba si, “Mlaki tɔ kutsa limu ne tɔ kutrɛ ní oge lɔ kɔlɔ aʋa.” Lɛ beku kudeo me e. 23Agi beze kuni yo aʋa ɛ, Yesu adɔ sra. Kyɔŋ ko, liwɔ gagla ɛtɔ likpese kufu ní limu ne aʋa gi liki si kuni yo kwiyaʋi iku katapokpaa mɛ ɛ. Nite si ba petee ba agbã́ na, eku kuxixa mɛ.

24Lɛ badɔkpasi ba bɛzɛhwani Yesu u, lɛ bɛsi yɛ si, “Ɔkaɛ, Ɔkaɛ, kuhanyrɔ ɔ!”

Yesu ayɔ, lɛ aki liwɔ lɛ ni kuni nyra nyra ɔsã ɛ. Lɛ onu klɔ ko e, liwɔ lɛ limɔni kufu, lɛ kuni yo kwidɔ zii gi niklɔ ɛgɔ kranaa a. 25Lɛ Yesu eʋi yɛ badɔkpasi ba si, “Nifɔ mlɔ kuziŋaa kulɛ ɛ?”

Pɔ̀ liboe le litu ba kugyɔ ɔ, lɛ lifu liku ba a. Lɛ beʋi ba ahanuglɔ ba si, “Nyaŋwɛ iliɛ? gi Yɛ kɔ izɛki liwɔ lɛ ni kuni yo ɔsã xe bizenu kutu iiki yɛ ɛ!”

Yesu ayɔni onyime ɔtɔ mɛ gi ifuɛfuɛ zimizi ize e

26Yesu ni yɛ badɔkpasi ba bɛga limu ne aʋa lɛ bɛzeedo ni Garaseanɛ ma kesea aʋa ɛ. Garaseanɛ ma kesea kebu aŋu mɛ ɛkpɛ Galilea kanìa ní limu ne oge lɔ kɔlɔ. 27Kiliɛ gi Yesu eple ní katapokpaa mɛ ko e, onyime ɔtɔ mɛ gi ifuɛfuɛ zimizi ize e, ádɔ ní ɔma nɔ mɛ aba atsani yɛ ɛ. Onyimee eze liya lipoe gblamadza lɛ óze kepe me fɛ ɛ. Ikpodrɔ lɛ me ize yɛ ozeklɔ. 28Gi amɔ Yesu i, akpɛ ozi gaglaa, lɛ adɔ ní Yesu ketu ya ɛ. Lɛ apani ni ozi si, “Wɔ Yesu, Ɔka Ʋidi ye Yebi ye! Liboe woli wɔɛpɛ ní mɛ su u? Maki wɔ litukpo wukihe kutu iiki mɛ ɛ!” 29Apani nite lɛ ese linu si, Yesu akpɛ ɔsã aki ɔfuɛfuɛ zimizi no si “do ní yɛ mɛ.” Epoe glegle e, xe ɔfuɛfuɛ nɔ ɛdɔ ní yɛ aʋa a, xe bɛkpɛ yɛ bibɔ ʋɛ, ikli ni iwla a, xe beepe ye fɛ ɛ, ɔfuɛfuɛ zimizi no izɛki si onyimee izɛpa bala ʋa kɔ ɛkpikpini yɛ ɛtsisi ɔyaya klɔ ɛ.

30Yesu eʋi ye si, “Kitɛ bizɛxwa wɔ ɔ?”

Onyimee ebu isu ya onu si, Mɛ linyi si “Likpi.” Lɛ ese linu si ifuɛfuɛ zimizi glegle ize ní yɛ mɛ. 31Ifuɛfuɛ zimizi ne ikí Yesu litukpo si ɔki kpikpini nɛ zɛɛkpɛ ní lizokpo gluglui lɛ gi odukɔ ɔma ɔki lɛ ɛ mɛ.

32Lipoe lɛ klɔ mɛ ɛ, iha likpɔkpɛkpɛ ʋidi itɔ lizɛɛŋa bidɔ ní ketokpaa su ní niklɔ. Lɛ loso ifuɛfuɛ zimizi ne iiki Yesu litukpo, si ɔki tɔ izetiku ní iha lɛ mɛ ɛ. Lɛ Yesu aki lɛ kudeo onu i. 33Ifuɛfuɛ zimizi ne ido ní onyimee me lɛ izetiku ní iha lɛ mɛ ɛ. Nite si iha lɛ likpi le petee liseeple ketokpaa lɛ izɛdɔ limu ne, iŋwɛ kuni yo xe itse e.

34Baxwɛwaa ba gi bezeedi iha lɛ aʋa ɛ, bɛmɔ liboe lɛ gi liba lɛ mɛ ɛ; nite si bese etrɛ lɛ bezehle liboe le kpɛ ní ɔma nɔ mɛ ni inyrɔɔ nɛ aʋa a. 35Lɛ banima bedoetrɛ si bezeedi liboe lɛ liba lɛ mɛ ɛ. Gi bɛba Yesu klɔ ɛ, bɛmɔ onyime liɛ klɔ mɛ gi ifuɛfuɛ zimizi ne ido e, gi odi ní Yesu ikli lɛ onu u; akpɛ awu, lɛ yɛ begyodi ʋa bɛflɔ ɔ, lɛ lifu liku ba a. 36Banama gi bɛmɔ liboe le kibabaɛ mɛ ɛ, bɛsi banɔ dzedze ba kiliɛ gi Yesu ayɔni onyime liɛ mɛ gi ifuɛfuɛ zimizi ne ize e. 37Lɛ Gerasese banɛ ma petee bɛsi Yesu si, ɔsɛ ní ba kesea mɛ lɛ ese linu si lifu liku ba nyani nyani. Lɛ loso e, Yesu emu eku katapokpaa mɛ lɛ asɛ ɛ. 38Onyime liɛ klɔ mɛ gi ifuɛfuɛ zimizi ne ido e, aki Yesu litukpo si, “Ki tɔ mize ni wɔ kude.” Pɔ̀ Yesu akpɛ yɛ kude si, 39“Dzi trɛ ní kepea mɛ tɔ zɛɛsi banima kidiliɛ gi Aya abitɛ akí wɔ ɛ.” Niteme si onyimee atrɛ lɛ azɛɛpani aklanɔ ɔma nɔ mɛ kidiliɛ gi Yesu abitɛ aki yɛ ɛ.

Yairo yɛ obidzɛɛ yɛ kuyɔnɔɔ Ni Ɔdzɛ ɔtɔ gi agbɔni Yesu yɛ liwu le e

40Gi Yesu edzì atrɛ ní limù ne oge lɔ kɔlɔ ɛ, banima bɛkpɛ yɛ wolaa, lɛ ese linu si banima petee bezeepe ye. 41Lɛ onyime ɔtɔ gi bizɛɛxwa si Yairo aba a, eze ɔka ní Yudanɛ ma ɔtsaklɔ. Adɔ ní Yesu yɛ ketu ya, lɛ aki yɛ litukpo si ɔba yɛ Yairo kepea mɛ ɛ 42lɛ ese linu si yɛ obidzɛ tolee gi aŋa agɔ liɔfɔ ni taʋa ihatse e.

Agi Yesu eze kudeo me e, linɔkpi le lizɛpɔ yɛ ɛkpɛ ní kupɛɔ petee. 43Ɔdzɛ ɔtɔ gi ika izedo ní yɛ su agɔ liɔfɔ ni taʋa nyɔŋ ɛ, eze ní linɔkpi le kusi. Pɔ̀ ɔdzɛ liɛ ɛ, ezizi yɛ kibɔɛ petee ní bawabitɛ ba su, pɔ̀ ɔnɔnɔ ɔ́tani yɛ kuyɔnɔ ɔ. 44Etutru isu ya akpɛ linɔkpi le kusi gani Yesu kedea, lɛ agbɔni yɛ liwu le kutu yɔ ɛ. Lɛ onu klɔ ko e, yɛ ika lɛ kudodoo kwitsa! 45Lɛ Yesu eʋi si, “Nyaŋwɛ agbɔni mɛ ɛ?”

Ɔnɔnɔ ɔ́dimɛ si yɛ ɛ. Niklɔ Petro asi yɛ si, “Ɔka, banima petee bɛpɔ wɔ ɛkpɛ”,

46Pɔ̀ Yesu apani si, “Ɔnutɔ agbɔni mɛ lɛ ese linu si mete si kigagla kido ní mɛ mɛ̀ ɛ.”

47Ɔdzɛɛ amɔ si kibitɛ kima tɔ ɔ; nite si ekpese kusugu, lɛ adɔ Yesu ní ketu ya ɛ. Lɛ ní banima petee aŋu na mɛ ɛ, asi yɛ kidiliɛ gi kɛ loso yɛ agbɔni yɛ nì kiliɛ gi kunyaa kwiyurɔ yɛ kyɔŋ ɛ. 48Lɛ Yesu asi yɛ si, “Mɛ obidzɛɛ, wɔ kuziŋaa kwiyɔni wɔ. Ga trɛ ní kusuyɔ mɛ!”

49Gi Yesu azaapani i, ɔnɔ kpɛkpɛ ádɔ ní Yairo kepea mɛ aba si Yairo ɔtsaklɔ ɔkaɛ si, “Wɔ obidzɛɛ etse,” lɛ loso e, “wukúkpɛ Ɔdɔbasɛ yɛ kunugu tɔ ɔ.”

50Pɔ̀ Yesu enu liboe le, lɛ asi Yairo si, “Wukíse lifu u; wɔ kɔ zi lɛ aʋa ŋa ko. Wobi ye aayɔ!”

51Gi Yesu eku Yairo kepea mɛ ɛ, ɔ́ki ɔnɔnɔ kude onu si oti oku sani Petro, Yohanes ni Yakobo kɔpɔni obika yɛ ni obinee e. 52Ɔnɔ kakaa eze ni asigaga mɛ lɛ bezeebemi ɔnuvɔɛ. Lɛ Yesu asi ba si, “Mlakíbemi i! Ɔnuvɔɛ ótse e; sra ko ɛɛdɔ!”

53Ba petee bɛmwɛ yɛ, lɛ ese linu si bete si ɔdzɛʋi yɛ etse. 54Pɔ̀ Yesu evu ɔdzɛʋi yɛ kawlakpɔa lɛ asi yɛ si, “Mɛ obi ye, yɔ!” 55Yɛ Ɔfuɛfuɛ nɔ edzì iku yɛ mɛ, nite si ayɔ ɔlɛɛ kyɔŋ. Lɛ Yesu asi ba si, bapɛ́ kiditɔ aki ɔdzɛʋi yɛ tɔ ɔŋa a. 56Obidzɛʋi yɛ yɛka ni yene ba inugu itse. Pɔ̀ Yesu akpɛ ɔsã aki ba si bakífeke onugu ní liboe le aʋa si ɔnɔnɔ ɔ.

Currently Selected:

Luka 8: avn

Highlight

Copy