Shwèʼ 11
11
Bità shə̀ʼtə̀ làynsə kənyʉ̀ a kə mfʉ a Sisalìyà
1Viʼi ntɨm Yesò nə̀ viʼi vəbyɨməvə vətsenvə vi a və ndìʼ a Judiyà zhʉ la viʼi tɨm be shìsə kənyʉ̀ kə Nyìngòŋ. 2Bità nè mbwènə̀ kuʼ a Jelusalèm, viʼi a və mbyɨmə̀ la və nshɨ̀tə̀ ndyə̀ wàyn sə ghàmə̀ wen, 3gàʼà la, wù tə ndiʼ wù ghayn a ngə̀ŋ viʼi tɨm, zhɨ wenə vəwenə, andiʼ viʼi a və ko shɨ̀tə̀ ndyə̀ wàyn. 4Bità mù shə̀ʼtə̀ kùʼ no nə̀ nyʉ̀ tsèm a və nlyɨ kəshi.
5Ghə̀ gàʼ la, “Mà ndìʼ a ntə̀ʼ Joba jɨ̀mə̀, kəbàs kə kəfo kətsenkə fʉ̀ à mò a kə̀ʼ a jòm, diʼ to nə̀ kəbàs kə ndisə kə ghoʼokə, və shiʼsə vì nə̀ kəwenkə fa kàŋ mu və ghaŋsə fa yì təsoŋ tə kàʼ. Və shiʼsə a lì ə̀ ghʉ̀ à mò a mbyɨ̀. 6Mà sə ki tin yi ə̀ yèn nyamsə ngə̀ŋ nə̀ sə toʼsə nə̀ fo ŋaŋləvə bènə̀ mənyin, 7ə̀ bè zhʉ̀ gɨ̀ tsen ghə̀ gàʼ à mò la, ‘Bità, lù zhwilə fo venə ə̀ pfiʼ.’ 8Mà bwènsə̀ la, ‘Mà zì ko ma lù mwòm a Bobo byìʼàndo kəfo kə ko ntɨmə̀ kwen à mò chʉ̀, a soʼ loʼ yès ko byɨmə la və zhɨ.’ 9Gɨ̀ yì bè gàʼ la, ‘Nyìngòŋ sətsèn ghʉ̀ la kəfo kə laynə kwʉ̀ʼʉ̀ a məzhɨ, mu wù ko diʼ gàʼ la soʼ loʼ wù ko byɨmə.’ 10Kənyʉ̀ kènkə lyɨ̀ kəshi aghayn a taʼ, və mù bwènsə̀ gùf kəfo akì ə̀ kùʼsə a kàŋ no kə tsèm. 11A bè ndìʼ tò a zhʉ ayì, viʼi və taʼ əvi a ngə̀ŋ yì a mà ntsi tsu lì, mu və tɨm vəwenə fa Sisalìyà la vəwenə vi ə̀ yèn mo. 12Kəzhwì kə ŋwòʼəkə gàʼ à mò la mà dyʉ̀ yo vəwenə kə ma mɨŋmə. Viʼi vəbyɨməvə venə ntʉfə a və nlù fa Joba lə̀ bè vì, yo vəwenə dyʉ̀ a muʼu ə̀ dyʉ̀ zaʼa a Sisalìyà ə̀ dyʉ̀ kwèn a ngə̀ŋ wutsen və dzàŋə̀ nə̀ Kòneliyòs. 13Ghə̀ shə̀ʼtə̀ à yès ando ghə̀ tə yèn ntsɨ̀ŋ ngə̀ŋ Nyìngòŋ, ghə̀ ti à wen a ngə̀ŋ. Ntsɨ̀ŋ ngə̀ŋ Nyìngòŋ ayì gàʼ à wen la, ‘Tɨm wìʼ ghə̀ dyʉ̀ a Joba ə̀ dyʉ̀ dzàŋ wìʼ yì a zhiʼ wen diʼ Simon Bità. 14Ghə̀ a vì ə shə̀ʼtə̀ nyʉ̀ à wù, a və a bwòŋsə wù nə̀ ngwàʼa ngə̀ŋ wù, bènə̀ viʼi shwèʼ wù.’ 15Mà nè zìtə̀ əgàʼ à vəwenə no a zhʉ̀ kò, Kəzhwì kə ŋwòʼəkə vì à vəwenə tò ando kə mvi à vəghəŋ a kənzìtə̀. 16Mà mù kwòʼtə̀ kənyʉ̀ a Bobo nlù gàʼ la, ‘Joyn nku mu à viʼi tò nə̀ nkàntə̀ à mù, alì və diʼ ne ku mu à ghə̀ŋ nə̀ Kəzhwì kə ŋwòʼəkə.’ 17Mà mù ə̀ nyen nəmwèʼè la Nyìngòŋ tə kù Kəzhwì kə ŋwòʼəkə à viʼi tɨm a vyi tò ndə̀ŋndəŋ ando ghə̀ nku à vəghəŋ a tʉʼ a vəghəŋ mbyɨmə̀ à Bobo Yesò Klistò. Mà tə ndiʼ ndò ətàm kənyʉ̀ kì a Nyìngòŋ nkiʼi ənè a.”
18Andìʼ ando Vəjew vəbyɨməvə nzhʉ kənyʉ̀ a Bità ngaʼà, vəwenə nko bè ghàm wen. Vəwenə sə bwomsə̀ Nyìngòŋ gàʼà la, “Nyìngòŋ be ku ji à viʼi tɨm la vəwenə kwitə tətyɨm tə vəwenə fa vəwenə a nyʉ̀ byɨvə ndi lu kiʼi bwòŋ.”
Ntsèntə̀ viʼi və byɨməvə a Antìyòk
19Viʼi vəbyɨməvə vi a və nlù nyɨŋkə byìʼì ngəʼ yi a ghə̀ ndiʼ ando və nzhwi Stifèn ə̀ sàykə̀ dyʉ̀ a loʼ Fònisiya nə̀ a loʼ Saybùs bènə̀ a ntə̀ʼ ghoʼo tsen, a və dzàŋə̀ la Antìyòk. Vəwenə nshə̀ʼtə̀ dyʉ̀ nə̀ ntɨm jùŋ tò à Vəjew. 20Viʼi vəbyɨməvə vətsenvə fʉ̀ vì fa Saybùs nə̀ ntə̀ʼ Silen, ə dyʉ̀ a Antìyòk bè sə shə̀ʼtə̀ dyʉ̀ nə̀ ntɨm jùŋə à viʼi tɨm byìʼì Bobo Yesò. 21Nyìngòŋ sə gyàmtə̀ ku àdyoʼ a vəwenə. Viʼi byɨmə no vəghoʼo ə̀ kù tətyɨm tə vəwenə à Bobo.
22Viʼi vəbyɨməvə vi a və ndìʼ a Jelusalèm nè zhʉ̀ soʼgho byìʼì kənyʉ̀ akènkə ə̀ tɨ̀m Balnabas la ghə̀ dyʉ̀ a Antìyòk. 23Ghə̀ dyʉ̀ tsu ə̀ yèn ando Nyìngòŋ diʼì li tyɨm jùŋghə à vəwenə, ə̀ sə saŋlə no nànto ə sènsə vəwenə la vəwenə mboʼsə Nyìngòŋ nə̀ tyɨm vəwenə no tsèm. 24Balnabas ghèn ndìʼ wu jùŋ, kiʼ byɨmə no a nkàyn be diʼ mu Kəzhwì kə ŋwòʼəkə lwin li à wen a tyɨm. Viʼi byɨmə à Nyìngòŋ byìʼì wen no vəghoʼo.
25Balnabas mù bè lù dyʉ̀ a ntə̀ʼ Talsus əkəŋ Saul. 26Ghə̀ nè kəŋə wen ə̀ yen, ə̀ lyɨ̀ wen wenə̀ wen dyʉ̀ a Antìyòk ə̀ tsì tsu ngwʉʼ mpfen ziʼì viʼi vəbyɨməvə no vəghoʼo. Andìʼ a Antìyòk a və nzìtə̀ sə toŋtə̀ ndzɨ̀mtə̀sə bàm Yesò nə̀ və Viʼi və byɨməvə.
27Andìʼ tò a mətsi ayì, nshə̀ʼtə̀sə səghoʼkəsə sətsensə lù fa Jelusalèm ə̀ shiʼi a Antìyòk, 28ghə̀ tsen diʼ a vəwenə a ntìntìn, a zhiʼ wen ndìʼ Agabus. Kəzhwì kə ŋwòʼəkə tensə wen, ghə̀ gàʼ a ntsèntə̀ ando jɨ̀ŋ byɨ ne ku təloʼ tətsèm. Jɨŋ ayì lù ku a tʉʼ a andiʼ Klodùs diʼ foyn ə ghoʼo. 29Ndzɨ̀mtə̀sə bàm Bobo shì a sə ndiʼ tsu mù ghʉ̀ la no ndò diʼ ntɨmə gyàmtə̀ à viʼi vəbyɨməvə vi a və diʼ a Judiyà. 30Vəwenə tsèntə̀ fo a vyi ə̀ tɨ̀m Balnabas wenə̀ Saul la vəwenə lyɨ̀ ə̀ dyʉ̀ nə̀ wenəvə à vəchəʼ və ngə̀ŋ Nyìngòŋ.
Currently Selected:
Shwèʼ 11: bbkDBLnt
Highlight
Share
Copy
Want to have your highlights saved across all your devices? Sign up or sign in
