Shwèʼ 4
4
Bità wenə̀ Joyn a kəbòʼkə soʼ
1Bità wenə̀ Joyn mbu gàʼà a viʼi, vəpfèm və ngə̀ŋ Nyìngòŋ, kətʉ kə ntsɨ̀ŋsə ngə̀ŋ Nyìngòŋ bènə̀ Vəsadùsis vì a vəwenə. 2Vəwenə mvì a lì mu tinsə vəwenə sə fwi li byìʼàndo Bità wenə̀ Joyn nziʼi viʼi la Yesò lu li fa pfʉ, kə mu dìʼì la viʼi vətsèm be lu lù fa pfʉ. 3Byìʼì ziʼi aghenə, və ghaʼ Bità wenə̀ Joyn ədyʉ̀ shwìn a ngə̀ŋ mfɨŋ vəwenə tsi tsu byìʼàndo və ə̀ nghàʼ vəwenə a zhʉ mpfwomə. 4Nghoʼo viʼi a və nzhʉ ziʼi Bità wenə̀ Joyn byɨmə ə nè nòyn viʼi a və byɨmə kuʼu chò nkamsə tayn. 5Tʉʼ layn, tʉtʉ Vəjew nə̀ ndìʼsə̀sə təsoʼ bènə̀ vəchəʼ tsèntə a Jelusalèm, 6nə̀ Anàs a ndìʼ kətʉ kə tʉtʉ vəpfèm nə̀ Kayifàs, Joyn, Alèksandà bènə̀ vətsenvə a ndiʼì viʼi ngwaʼa ngə̀ŋ kətʉ kə tʉtʉ vəpfèm. 7Və lyɨ̀ Bità wenə̀ Joyn ə̀ vì tìsə vəwenə a shɨ viʼi mù bèm à vəwenə la, “Ghə̀ŋ tə lyɨ̀ kədyòʼ fa fe ənè la wìʼ ghèn lu njèʼè a? Ghə̀ŋ tə chʉʼʉ wen a zhiʼ ndò?”
8Andiʼ a lì kəzhwì kə ŋwòʼəkə diʼ mu kə lwin li a tyɨm ə̀ Bità, ghə̀ mù bwènsə̀ à vəwenə la, “Tʉtʉ viʼi bènə̀ vəchəʼ, 9Ando ghə̀ŋ ə ghàmə̀ yès layn byìʼì njùŋ yì a yès ə ne à wù kənkwàʼkə̀ be kəŋ əkɨ la ghə̀ to ale lo? 10Ghə̀ŋ nə̀ viʼi Islel no vətsèm diʼi ə kɨ la wìʼ ghèn a ghə̀ ti à ghə̀ŋ a shɨ lə̀ to tò byìʼì kədyòʼ kə zhiʼ Yesò Klistò ə wù Nazalèt. Yesò Klistò aghèn dìʼ wìʼ yì a ghə̀ŋ tə bàyntə a kəntò, ghə̀ pfʉ alì Nyìngòŋ lùsə̀ wen fa pfʉ. 11Yesò aghèn dìʼ wìʼ yì a ŋwàʼlə̀ Nyìngòŋ ə gàʼà byìʼì wen la,
“Ngùʼ yì a ghə̀ŋ ə viʼi kəmbwom tə màʼà lì kaʼsə li sə diʼ ngùʼ ə̀ bʉ ngə̀ŋ. 12A diʼ tò wen nyɨŋ a ghə̀ zi ghə̀ bwòŋsə viʼi fà vəwenə a mbyɨsə byìʼe Nyìngòŋ ko mbè kù wùtsen a mbi no fa a mpfen a vəghəŋ zì vəghəŋ dzàŋə zhiʼ wen ə ghə̀ bwoŋsə vəghəŋ.”
13Bità gàʼ a lì, viʼi a vyi yen nki tətyɨm tətotə tì a wenə̀ Joyn nkìʼ be kɨ la vəwenə diʼ to mbʉ viʼi byìʼàndo vəwenə nko kɨ ŋwàʼlə̀. A ndìʼ a zhʉ ayì a vəwenə mù be kɨ̀ la Bità wenə̀ Joyn ndìʼ viʼi jèʼè Yesò. 14Chʉ zɨm vəwenə kènla vəwenə be kiʼ kənyʉ̀ əgàʼ byìʼàndo wìʼ yì a və nchʉʼ lì mbu ti a mbyɨ̀ Bità wenə̀ Joyn. 15Vəwenə kàyn Bità wenə̀ Joyn nə̀ wìʼ yì a və nchʉʼ fʉ̀ dyʉ̀ a kəbəŋ. Vəwenə ŋwʉʼmə sə chʉʼmə tʉ əyen la vəwenə zì və nè ale lo. 16Mù sə kayntə̀ a vəwenə a ntìntìn la, Vəghəŋ a nè no ghò nə̀ viʼi venə lo? No tè ndò a Jelusalèm ə kɨ nki kənyʉ̀ kə kaynəkə a vəwenə nè, ko andiʼ la ntsèntə̀ vəghəŋ ghèn zì ghə̀ tensə la vəwenə ko nè. 17Vəghəŋ dzàŋ viʼi avenə ə̀ kàyn la kə vəwenə be lə̀ gàʼ kənyʉ̀ kə tsen a wutsen a zhiʼ Yesò Klistò, ndi kə viʼi be a zhʉ̀ kənyʉ̀ kèn no və ghoʼo. 18Vəwenə bwènsə̀ dzàŋ Bità wenə̀ Joyn ə kàyn la kə vəwenə be lə̀ mwòmsə əgàʼ ko be ziʼi kənyʉ̀ a zhiʼ nə̀ Yesò no fa mpfen. 19Bità wenə̀ Joyn bòŋsə̀ bwènsə̀ bèm a vəwenə la, “Ghə̀ŋ kwòʼtə̀ la à bòŋ kə kò ashɨ Nyìngòŋ a? La yès zhʉ fa Nyìngòŋ mu la yès zhʉ fa ghə̀ŋ lo? 20Yès zì ko yès lu faŋ ke gàʼ tò kənyʉ̀ kì a yès ə nyenə be zhʉ.”
21-22Viʼi a vyi yen la vəwenə ko be kiʼ jì ə zhuŋsə Bità wenə̀ Joyn byìʼàndo no viʼi vətsèm sə bwomsə̀ tò Nyìngòŋ byìʼì kənyʉ̀ kì a kə ncho wìʼ yì to. Vəwenə mu bè kàyntə̀ nyʉ̀ a Bità wenə̀ Joyn a gɨ to mù ghʉsə vəwenə la vəwenə ndyʉ̀. Wìʼ yì a və nchʉʼʉ̀ lì ndiʼ mu ghə̀ chò li ngwʉʼ məwum nkàʼ.
Viʼi və byɨməvə jɨ̀m ə kiʼi tətyɨm tətotə
23No a zhʉ̀ kò a və ə̀ mòʼtə Bità wenə̀ Joyn la vəwenə dyʉ̀, vəwenə bwènə̀ dyʉ̀ a vəwenə a ntsentə əshə̀ʼtə̀ kənyʉ̀ a tʉtʉ vəpfèm və ngə̀ŋ Nyìngòŋ nə̀ vəchəʼ yì gàʼ. 24Vəwenə nè zhʉ̀ kənyʉ̀ a kèn, ə̀ tsèntə̀ jɨ̀m no vətsèm la, Bobo nshɨ̀tə̀ kàŋ wenə̀ nse nə̀ mu məghoʼomə bènə̀ fo tsèm a və diʼ tsu! 25Wù nlu li nè kəzhwì kə ŋwòʼəkə nè wù tisə tìʼ yes a ghə̀ ndiʼi fa mbì, a diʼi wù shyə̀ʼ wù Devìt ando ghə̀ mbèmə̀ la: Byìʼì gho viʼi fwisə tin a?
Byìʼ ghò a viʼi baʼtə̀ nyʉ̀ byìʼì Bobo a və zì ko və lu ndiʼ nəmwèʼè a? 26Tə fòyn tə mbì tə mbaʼtə təwen tə vəwenə, bvʉ̀tə̀ soyn, viʼi a və nsoʼo loʼ be baʼtə̀ təwen tə vəwenə əsoyn Bobo Nyìngòŋ wenə̀ wìʼ yì a ghə̀ ntsuʼ li. 27A le kənyʉ̀ a kə ncho a ntə̀ʼ a shèn. Fòn Helòd wenə̀ Bontiyùs Bilate nə̀ viʼi tɨm vətsenvə bènə̀ viʼi Islel ə̀ zhùŋtə̀ sə̀ baʼtə̀ əsoyn Yesò, wù shwèʼ wu ŋwoʼə yì a wu ntsuʼ li ə̀ ghʉ. 28Vəwenə mpfʉ̀tə ənè tò kənyʉ̀ kì a wù nsə diʼ mu wu baʼtə̀ li ə̀ nghʉ, à wù a kədyòʼ la kə lu lyɨ̀ kəshi. 29Luwèn a Bobo, kwòʼtə̀ byìʼì nyʉ̀ venə a və gàʼà baŋsə yès tsu lə̀ ə̀ kwʉ̀ʼsə̀ kədyòʼ à yès ə viʼi shwèʼè wù ndi yès nshə̀ʼtə̀ ntɨm wù kènə̀ fwaynə. 30Ne viʼi kɨ la wù kìʼ kədyòʼ ənè viʼi vəkwaʼkəvə to. Gyàmtə̀ yes ə dìʼ chwitə nyʉ̀ kanəvə a kədyòʼ Yesò wù shwèʼè wu ŋwoʼə.
31Andìʼ ando vəwenə njɨmə̀ mwètə̀, kəshi kì a vəwenə ndiʼì tsu lì nə̀ʼ! kəzhwì kə ŋwoʼəkə ku kədyòʼ à vəwenə no vətsèm vəwenə zìtə̀ sə̀ shə̀ʼtə̀ ntɨm yì a Nyìngòŋ nkəŋə la vəwenə nshə̀ʼtə̀ nə̀ tətyɨm tə to tə.
Viʼi və byɨməvə ntsèntə̀ gə̀tə̀ fo vəwenə à vəwenə a ntìntìn
32Viʼi və byɨməvə no vətsèm sə̀ diʼ tò a kənyʉ̀ kə mùʼ. No wìʼ muʼ nko gàʼà la kəfo kikə kiʼ tò yì. No məndo nlyɨ̀ kəfo ghə̀ gə̀tə̀ kù vəlèmə̀ və wen. 33Viʼi ntɨm Yesò sə̀ shə̀ʼtə̀ no nə̀ kədyòʼ kə à viʼi la Yesò lu li fa pfʉ. Nyìngòŋ bwaʼsə vəwenə no vətsèm no a nkàyn. 34No wìʼ ko ndìʼ à vəwenə a ntìntìn a ghə̀ ngho kəfo. Viʼi a və nkìʼ təsɨm nə̀ aloʼ mbaʼlə̀ fo avenə vì nə̀ ko yi 35ku à viʼi ntɨm Yesò, vəwenə gə̀tə̀ à viʼi və byɨməvə; no ndò shi tò kəfo a kə kwʉ̀ʼʉ̀ a wen.
36-37Wù loʼ Sayblùs tsen be fʉ̀ vì nə̀ ko a ghə̀ mbaʼlə̀ sɨm ə wen tsu ə̀ kù à viʼi ntɨm Yesò la vəwenə gətə à viʼi və byɨməvə. Zhiʼ wìʼ ayi ndìʼ Josèf, və ndzàŋ wen la Balnabas kənàʼ kikə diʼ la, “Ghə̀ nwe tətyɨm” Ghə̀ ndìʼ wù ngwàʼa ngə̀ŋ Levì.
Currently Selected:
Shwèʼ 4: bbkDBLnt
Highlight
Share
Copy
Want to have your highlights saved across all your devices? Sign up or sign in
