Shwèʼ 3
3
Və chʉʼ wù kənkwàʼkə̀
1Andìʼ kətsi kətsenkə, Bità wenə̀ Joyn dyʉ̀ a ngə̀ŋ Nyìngòŋ a təzhʉ tətaʼ a mbwaʼà kəbə̀ŋ andiʼ kəlyɨŋ kə zhʉ a viʼi mvi jɨ̀mə̀ tsu. 2Wù kənkwàʼkə̀ tsen ndìʼ tsu mu və mbwi wen tò a lì. Və nlu byèʼè wen vì nə̀ wen a chʉ̀ kəshi yì a və ndzàŋə̀ nə̀ “Chʉ mbàyn ə Jùŋ.” Vəwenə mvì nə̀ wen tsu no mətsi ntsèm ndi ghə̀ nloynə ko fa viʼi a və mvì a ngə̀ŋ Nyìngòŋ. 3Wù kənkwàʼkə̀ aghèn ne yen Bità wenə̀ Joyn ando vəwenə ncho əkwen a ngə̀ŋ Nyìngòŋ mù sə lonə ko fà vəwenə. 4Vəwenə ki dyʉ̀sə̀ nə̀ wen tò fəchìʼ. Bità mù gàʼ à wen la, “Ki yes!” 5Ghə̀ mù ki dyʉ̀sə̀ nə̀ Bità wenə̀ Joyn kwòʼtə̀ la vəwenə a ku kəfo à wen. 6Bità gàʼ à wen la, “Mà ko kiʼ ko no fa mpfen əku à wù alì diʼì ku tò kəfo kì a mà kiʼì. Mà gàʼà à wù a kədyòʼ Yesò Klistò ə wù Nazalèt la wù lu njèʼè.” 7Ghə̀ gàʼ a lì ə̀ ghàʼ kwoŋ toghə wen ə̀ tsòʼsə̀ wen, ghə̀ lù tɨ̀mə. Tò a zhʉ ayì, afwen wen to. 8Ghə̀ tsòʼ a kàŋ ə̀ zìtə̀ sə̀ jèʼè ə̀ dyʉ̀ kwèn a ngə̀ŋ Nyìngòŋ wenə̀ Bità nə̀ Joyn sə̀ tsòʼtə̀ kaʼa fa tsu saŋlə̀ be bwomsə̀ Nyìngòŋ. 9Viʼi no vətsèm a və ndiʼì a ngə̀ŋ Nyìngòŋ yen ando ghə̀ jèʼè chò bwomsə̀ Nyìngòŋ, 10ə̀ kɨ̀ la àdìʼ wìʼ yì a ghə̀ nlu ŋwʉʼ a chʉ mbàyn ngə̀ŋ Nyìngòŋ a və ndzàŋə̀ nə̀ chʉ mbàyn jùŋ loynə ko lì. Vəwenə sə̀ diʼi nə̀ kanə byìʼì kənyʉ̀ a kə yì chò nə̀ wen.
Bità gàʼ à viʼi a ngə̀ŋ Nyìngòŋ
11Andìʼ ando wù kənkwàʼkə̀ ghèn nto sə̀ dyʉ̀ tò fa bàmə Bità wenə̀ Joyn, viʼi no vətsèm sə̀ diʼ nə̀ kanə mù sə̀ nyɨŋə dyʉ̀ a kəshi a vəwenə ndiʼì tsu a kətò ə Sòlomùyn. 12Bità nè yèn a lì, mù bèm à viʼi a vyi la, “Viʼi Islel! Byìʼì ghò a ghə̀ŋ diʼì nə̀ kanə kùmə̀ kənyʉ̀ kènkə a? Byìʼì ghò a ghə̀ŋ ə tyùŋə ashɨ à yès a wèn sə à nè yès nə̀ kədyòʼ kə ngə̀ŋ ə̀ yès a? Ghə̀ŋ kwoʼtə la yès nè we kèn fa mbo yès ə fàynə̀ Nyìngòŋ no akàyn mu? 13Nyìngòŋ a vətìʼ və vəghəŋ və mbì a ndiʼì Ablaham, Izìk nə̀ Jàkob ə nkuʼsə li wù shyèʼ wen Yesò yì a ghə̀ŋ ə̀ nghaʼa wèn ə̀ kù à viʼi ə̀ bè mo wen a shɨ Bilate no tè ando Bilate nghʉ li la yì a mòʼtə wen ə ghə̀ dyʉ̀. 14Yesò ndìʼ wù Nyìngòŋ, diʼ wu ŋwoʼə be diʼ wù kənyʉ̀ kətɨməkə, alì ghə̀ŋ tyen wen ə̀ bòŋsə̀ gàʼ və shìsə̀ wìʼ a ghə̀ nzhwilə̀ viʼi. 15Ghə̀ŋ nè a lì və zhwì wìʼ yì a ghə̀ bòʼò jì bwòŋ à viʼi, alì Nyìngòŋ lùsə̀ wen fa pfʉ. No nkàntə̀ yès ə̀ ndìʼ viʼi və yenəvə a kənyʉ̀ aghèn. 16A dìʼ kədyòʼ kì a kə diʼì a zhiʼ Yesò a kə ne la wù kənkwàʼkə̀ ghèn a ghə̀ŋ ə yenə be kɨ lə̀ to. A dìʼi byɨmə à Yesò a ghə̀ ku wen ə̀ toghə wen ghenə no tsèm a shɨ ghə̀ŋ vətsèm.
17“Luwèn a vəlèmə̀ vwomə, mà kɨ la kənyʉ̀ a ghə̀ŋ nə̀ tʉtʉ vəŋə ə nè à Yesò ə̀ ndìʼ tò byìʼàndo ghə̀ŋ nko kɨ kənyʉ̀ a ghə̀ŋ ə nè. 18Ando ghə̀ŋ ə̀ ne a lì, kənyʉ̀ a Nyìngòŋ ə̀ ngaʼà ə̀ chò fa nshə̀ʼtə̀sə ghoʼkəsə wen la Wìʼ yì a yì ntsuʼ li ə̀ ghʉ diʼi lu yenə ngəʼ, ə lyɨ li kəshi. 19Ma sə gàʼà à ghə̀ŋ la ghə̀ŋ kwitə lì tətyɨm ə̀ təŋtə ə̀ bwènə̀ vì à Nyìngòŋ a ghə̀ a shʉ nyʉ̀ byɨvə ghə̀ŋ ə màʼà. Bobo mu nè tətyɨm təŋtə tə nzhʉ̀tə̀ a zhʉ ayì, 20ə̀ be tɨm Klistò yì a ghə̀ nsə̀ diʼ mu ghə̀ tsuʼ li ə̀ ghʉ à ghə̀ŋ. 21Ghə̀ diʼi faŋ tò a kàŋ əzaʼa fa tʉʼ a zhʉ a kwʉ̀ʼ a no mə ghò a kaʼsə ndiʼ tò a mfi, à mu diʼ zhʉ yi a Nyìngòŋ ngaʼà li ə̀ chòsə̀ fà nshə̀ʼtə̀sə sə ghoʼkəsə wen fa tʉʼ mbì. 22Mosìs nlù gàʼ la, ‘Bobo Nyìngòŋ ghə̀ŋ lu tsuʼ wìʼ a nə̀ nshə̀ʼtə̀ ghoʼo fà ghə̀ŋ a ntìntìn ə tɨm à ghə̀ŋ ndə̀ŋndəŋ ando ghə̀ ntɨmə̀ mo. Ghə̀ŋ diʼi ne nzhʉ no mə ghò a ghə̀ shə̀ʼtə̀ a ghə̀ŋ.’ 23No mə ndò a ghə̀ lù faŋ ke nzhʉtə̀ fà nshə̀ʼtə̀ ghoʼo aghèn, və a shìsə̀ wen fa tì nòyn viʼi Nyìngòŋ. 24Nshə̀ʼtə̀sə ghoʼkəsə no sətsèm a Nyìngòŋ ntɨmə̀ la sə vi ngàʼà, ngaʼà li no nyʉ̀ tsèm byìʼì nyʉ̀ vyi a və lyɨ̀ kəshi a mətsi ghèn. Nshə̀ʼtə̀sə ashì ndìʼ Samwèl ə be boʼsə nə̀ sətsensə shì a sə mvi a wen a bàm. 25Nyʉ̀ venə no tsèm a Nyìngòŋ nghʉ li ə chò fà nshə̀ʼtə̀sə wen lə̀ dìʼ à ghə̀ŋ, ghə̀ŋ be dìʼ a tì məkàyn mì a Nyìngòŋ nzhɨ wenə̀ vətìʼ vəŋə və mbì ando ghə̀ ngàʼa à Ablaham la, ‘Mà lu chò fà vunə ngwàʼa ngə̀ŋ wù ə bwaʼsə viʼi no vətsèm a nse a shèn.’ 26Nyìngòŋ mù tsuʼ wù shyèʼ wen ə̀ tɨ̀m à ghə̀ŋ a mbì ndi ghə̀ bwaʼsə ne la no tè ndò à ghə̀ŋ a ntìntìn ghʉsə jisə byɨsə wen.”
Currently Selected:
Shwèʼ 3: bbkDBLnt
Highlight
Share
Copy
Want to have your highlights saved across all your devices? Sign up or sign in
