Joyn 10
10
Yesò ə mò ngàyn kumə ntsɨ̀ŋ byisə
1Yesò ə mò li ngàyn ə tsen ə gàʼ la, “Ma gaʼa a ghə̀ŋ no nəmwèʼè la, wìʼ sətsen vi ə wʉ̀sə əchʉ mbàyn ke kwen fa tsu ə dyʉ̀ kuʼ kwen fa akəshi kə kədyàŋ, mu ghə̀ diʼ tsòŋ. 2Wìʼ yi a ghə̀ diʼ to no nkàyntə̀ ntsɨ̀ŋ byisə ghə̀ nə̀ kwen to fa chʉ̀ mbàyn. 3Ghə̀ sə kəŋ kwen, wìʼ yi a ghə̀ tsɨŋ ə chʉ̀ mbàyn, ghə̀ boʼo a wen. Ali byisə ə zhʉ̀ kɨ gɨ ntsɨ̀ŋ byisə a ghèn. Ghə̀ dzàŋ, sə zhʉ̀ kɨ gɨ wen, ghə̀ lyɨ̀ fʉ nə̀ sə wensə. 4Ntsɨ̀ŋ a ghèn nə̀ lyɨ fʉ̀ nə̀ byisə wen a shisə no sətsèm ali, ghə̀ ə sə jèʼè tùʼmə̀ nə̀ səwensə, sə vì to fa wen abàm byìʼàndo sə zhʉ̀ kɨ gɨ wen. 5Byisə a shisə zizi ko sə lu dyʉ̀ fa bàm ə wìʼ yi a sə ko kɨ wen. Sə nə̀ yenə wù kədyàŋ, sə boŋsə nyɨŋ to nyɨŋ byìʼàndo sə ko zhʉ kɨ gɨ wen.”
6Yesò ə mò ngàyn a ghèn, ali viʼi vyi a və nzhʉtə nko kɨ la ghə̀ ngàʼà la ghò lò.
Yesò ə shə̀ʼtə̀ la ghə̀ diʼ ntsɨ̀ŋ byisə ə jùŋ
7Yesò ə gàʼ ali ə be mu gàʼ ə kwʉ̀ʼsə la, “Ma gaʼa a ghə̀ŋ to no nəmwèʼè la, ma diʼ əchʉ mbàyn yi a byisə chò fa tsu. 8Viʼi vi a və tə vyi a mo ambì no və tsèm, tə ndiʼ vətsoŋ, ali ko byisə lu zhʉtə vəwenə. 9Ma diʼ əchʉ mbàyn, mu no ndò a ghə̀ chò fa tsù, mu ghə̀ lu bwòŋ, ali ghə̀ ne chò kwenə, be chò fʉ to ando ghə̀ kòŋ, be kiʼi ə fozhɨvə ə zhɨ. 10Tsòŋ nə̀ vì ndiʼ ə tsoŋ, vi to ndiʼ ə zhwi be byɨbsə. Alì, mà nvi a mbyi ə nè la viʼi ə ntsi, ko və lu gho kəfo.
11“Ma diʼ no ntsɨ̀ŋ byisə ə jùŋ. Ntsɨ̀ŋ byisə ə jùŋ nə diʼ yi a ghə̀ saŋlə ə pfʉ byìʼì byisə a ghə̀ tsɨ̀ŋ. 12A vi a zhʉ a və loʼo wìʼ la ghə̀ ntsɨŋ byisə, ghə̀ ko diʼ ntsɨ̀ŋ byisə ko tì byisə, ghə̀ na yen to ando nyàm kəbo ə vì, ghə̀ nyɨŋ ə ghʉsə byisə, nyàm kəbo ə vi ku byi fa tsu sətsensə ə saykə. 13Ghə̀ nə̀ nyɨ̀ŋ moʼtə ali byìʼàndo və loʼo wen loʼo, mu à kòŋ à fʉ̀ no tèbe ghoʼ fʉ̀ byisə a shisə. 14Ma diʼ to no ntsɨ̀ŋ byisə ə jùŋ, ma kɨ byisə shomsə, sə kɨ mò, 15to ndə̀ŋndəŋ ando Tìʼ ghom ə kɨ mo, ma be kɨ wen. Ma tu ma ə pfʉ̀ byìʼì byisə shomsə. 16Ma kiʼi byisə shomsə sətsensə, a sə ko diʼ a mbàyn ashə, ma diʼ vi nə̀ səwensə ali sə zhʉ gɨ̀ ghom ə ndiʼ a nòyn ə mùʼ, be kiʼi to ntsɨ̀ŋ ə mùʼ.
17“Tìʼ ghom ə kòŋ mò byìʼàndo ma kəʼtə pfʉ̀ mibu ghə̀ be bwensə lùsə mò la mà ə ndiʼ. 18Wìʼ kodiʼ a ghə̀ zizi ghə̀ zhwi mo, ma kiʼi kədyòʼ ə ku kətʉ kom a pfʉ̀. Be kiʼi kədyòʼ ə shi kətʉ komkə fa pfʉ̀, Kədyòʼ a kènkə diʼ mu à ku Tìʼ ghom a mò.”
19Ghə̀ ngaʼa ali, viʼi Jus vyi ə be zìtə̀ kəgumə to a vəwenə a ntìntìn. 20Viʼi ə gaʼa to kədə̀ŋ la, “Ghə̀ kiʼi kəzhwì kə kəbyɨkə, sùtə̀ bomə no bomə. Ghə̀ŋ zhʉtə ghò fa wen a?”
21Alì vətsevə gàʼa la, “ghenə ko diʼ tebè gàʼà a wìʼ a ghə̀ kiʼi kəzhwì kə kəbyɨkə. Kəzhwì kə kəbyɨkə zizi ko kə lu nè viʼi və fyifkəvə ə nyenə shi.”
Viʼi Jus ə mo Yesò
22Əzhʉ kəzhɨ ki a və nzhɨ kwòʼtə ando və bwensə ku ngə̀ŋ Nyìngòŋ ə ghoʼo a Jelusalèm a wen, a ndiʼ nə̀ byɨ̀ŋ. 23Yesò ə sə jèʼtə̀ chò fa kətò ə Sòlomùyn, a kəbəŋ kə ngə̀ŋ Nyìngòŋ, 24viʼi Jus vətsenvə vì zhùŋtə̀ a wen a ben ə bèm a wen la, “wù na ghʉ yès ə yès kəʼtə ə zaʼa fa ze? Shə̀ʼtə̀ a yès əbòʼ a ndayn a zhʉ a wù diʼ Wìʼ yi a və tsuʼ li ə ghʉ.”
25Yesò ə bwensə gàʼ la, “Mà sə diʼ mù ma shə̀ʼtə̀ li a ghə̀ŋ ali ko ghə̀ŋ lu ə byɨmə. Ənyʉ̀ ə kaynə və vi a ma nè a kədyòʼ ə Tìʼ ghom ə diʼi wìʼ yi a ma diʼ wen, 26ko ghə̀ŋ mbyɨmə byìʼàndo ghə̀ŋ ko diʼ byisə shomsə. 27Byi shomsə ə zhʉ̀ gɨ ghom, dzɨ̀mtə̀ mò, ma kɨ səwensə. 28Ma kù ntsìnə̀ yì a ghə̀ ko lu mè a byi a sensə, ko sə lu be ə pfʉkə. Wìʼ zizi ko ghə̀ lu ghaʼa ə shi səwensə fa mo kəvu. 29Tìʼ ghom yi a ghə̀ kù byi na sensə a mò ə chò mò. Kə lə diʼi la wìʼ zizi ko ghə̀ lu be ghaʼa shi fa kəvu ə Tìʼ ə ghom. 30Yo Tiʼi ghom diʼ to kənyʉ̀ kə mùʼ.”
31Ali viʼi Jus sə be boŋtə nguʼsə ə temlə wen tsu. 32Yesò ə bèm a vəwenə la, “Tìʼ ə ghom ku li kədyòʼ, ma nè nyʉ̀ ə jùŋ və a viʼi, to kədə̀ŋ. Ghə̀ŋ le kəŋ ə temlə mo luwen byìʼì kə ko?”
33Vəwenə gàʼ a wen la, “Yès ə ko kəŋ ə temlə wù a kənyʉ̀ kə tsen kə fa ntìntìn nyʉ̀ na venə. Yès ə kəŋ ə temlə wù byìʼàndo wù kumə diʼ to wìʼ, ali telə Nyìngòŋ, gàʼa la wù diʼ Nyìngòŋ.”
34Yesò ə mu bèm a vəwenə la, “A kò və nyòʼ a ghə̀ŋ Əsoʼ la, Nyìngòŋ ə ngàʼa la, ‘Ghə̀ŋ diʼ Vənyìngòŋ’? 35Nyìngòŋ ə sətsen ə toŋtə viʼi vyi a kənyʉ̀ kə Nyìngòŋ kə ə vì a vəwenə la, ‘Vənyìngòŋ,’ vəghəŋ ə kɨ la və zizi ko və lu kwitə kənyʉ̀ kə Nyìngòŋ, 36a lu be kwitə no ndò to ando Bobo sə diʼ mù ghə̀ ntsuʼli mò a wen a wù ə ntɨm a mbyi a? Kə le diʼ alə̀, ghə̀ŋ sə be ghamə mò a gho gaʼa la mà telə Nyìngòŋ, byìʼì ando ma gàʼa la ma diʼ wàyn wen a? 37Kə ghə̀ŋ a byɨmə a mo a zhʉ a ma ko ne nyʉ̀ vyi a Tìʼ ghom ə kəŋ la ma ə nè. 38Alì, ma na nè shwèʼè na yi, ghə̀ŋ faŋ ko ghə̀ŋ lu byɨmə a mo, ghə̀ŋ byɨmə byìʼì nyʉ̀ vyi a ma nè ndiʼ ghə̀ŋ ziʼi sə kɨ la yo Tìʼ ghom ə diʼ to kənyʉ̀ kə mùʼ, nəkwoŋ ko diʼ.”
39Ghə̀ gàʼ ali, viʼi a venə sə be mwomsə ə ghaʼa wen, ali ghə̀ nyɨŋ fʉ̀.
40Ghə̀ lù ə bwenə dyàŋ dyʉ̀ a dzen ə Jodàn, ashə yi a Joyn ə ku mu tsu fa ambì faŋ to tsu. 41Viʼi ə nvi li a wen, to kədə̀ŋ, vi ali gàʼa la, “Nò tèbe ando Joyn ə ko ə diʼi nchwi kənyʉ̀ kə kaynəkə kə tsen, no tèbe ghò a ghə̀ ə ngàʼà kumə wìʼ ghèn a ndiʼ to nəmwèʼè.” 42Viʼi ə byɨmə a wen tsu, to kədə̀ŋ.
Currently Selected:
Joyn 10: bbkDBLnt
Highlight
Share
Copy
Want to have your highlights saved across all your devices? Sign up or sign in
