Joyn 15

Yesò ə gàʼ la ghə̀ diʼ to no nkàyntə̀ fèkoʼ

1Yesò be gaʼa la, “Ma diʼ nkàyntə̀ fèkoʼ fə ashɨ nkoʼ, Tìʼ ghom diʼ tì ə sɨm, 2chwaynə maʼ tətam titə a tə ko kumə ashɨ a mo wèn, tsùʼtə fo fa tətam a tyi a tə ko kumə ashɨ, ndiʼ tə tuʼ kumə. 3Ghə̀ŋ sə diʼ nə̀ laynə byìʼì əziʼi yì a mà ziʼi a ghə̀ŋ. 4Ghə̀ŋ faŋ a mò ndi mà be faŋ a ghə̀ŋ. Ando ntam ə fəkoʼ zizi ko ghə̀ lu kumə ashɨ fa ngeŋ, ghə̀ diʼ ə ndiʼ a fəkoʼ mibu ghə̀ a kumə ashɨ. Kə le diʼ to ndə̀ŋndəŋ ando ghə̀ŋ zizi ko ghə̀ŋ lu kumə ashɨ, a bwen la ghə̀ŋ fàŋ a mo wen.

5“Ma diʼ fəkòʼ, ghə̀ŋ diʼ tətam. Wìʼ sətsen faŋ a mo wen, ma be a faŋ a wen, ghə̀ a kumə ashɨ, to kədə̀ŋ. A bwèn fa mo, ghə̀ŋ zizi ko ghə̀ŋ lu nè kənyʉ̀. 6A tyen no ndò la ghə̀ ko a faŋə a mo wen, və a təmə wen ə maʼa, to nə̀ ətam yi a və nə̀ chwaynə mòʼ, ghə̀ zɨm. Və nè bwensə boŋtə tətam a tentə ə nyuʼ azhiʼ. 7Ghə̀ŋ sətsen faŋ a mo wen, əziʼi ə ghomə a faŋ a ghə̀ŋ kətʉ, ghə̀ŋ bèm no tèbe ghò a ghə̀ŋ kòŋ fa Tìʼ ghom, ghə̀ a ku a ghə̀ŋ. 8A ndiʼ a azhʉ̀ a ghə̀ŋ kumə ashɨ to kədə̀ŋ, diʼi la ghə̀ŋ diʼ ndzɨ̀mtə̀sə bàm ə mo, no mbyi ə tsèm yen kədyòʼ kə Tìʼ ghom. 9Ma kòŋ ghə̀ŋ ndə̀ŋndəŋ ando Tìʼ ghom əkòŋ mò. Ghə̀ŋ faŋ a mò kòŋ. 10Ghə̀ŋ ghʉ̀ təsoʼ ə tyomtə, ghə̀ŋ faŋ a mo kòŋ ndə̀ŋndəŋ ando mà fàŋ a kòŋ Tìʼ ghom byìʼàndo ma ghʉ̀ təsoʼ tə wen.

11“Mà shə̀ʼtə̀ nyʉ̀ venə a ghə̀ŋ ndi ghə̀ŋ kɨ saŋlə yì a ma kiʼi, a diʼ saŋlə mu ghə̀ lwin li kwʉ̀ʼ. 12Kènkə diʼ əsoʼ ə ghomə la, ghə̀ŋ kòŋ təwen ə təŋtə to ando mà kòŋ ghə̀ŋ. 13Wìʼ zizi ko ghə̀ lu be diʼi kòŋ, ghə̀ chò ando wìʼ ə kòŋ ndoŋsə wen ə pfʉ a vəwenə. 14Ghə̀ŋ nè to ando əsoʼ ə ghomə əgàʼa, ghə̀ŋ ne ndiʼ doŋ shomsə. 15Mà ko be toŋtə tebè ghə̀ŋ luwen la viʼi ə shyèʼ byìʼàndo wu ə shwèʼ ko nə̀ kɨ kənyʉ̀ kì a tì shyèʼ wen nə̀ nè. Ma toŋtə ghə̀ŋ luwen la doŋ shomsə byìʼàndo mà shə̀ʼtə li nyʉ̀ vyi a mà zhʉ fa Tìʼ ghom a ghə̀ŋ no ətsèm. 16A ko tə tsuʼ ghə̀ŋ tsuʼ mo. A tə lù mò tsuʼ ghə̀ŋ ə tɨm la ghə̀ŋ dyʉ̀ ə kumə ashɨ, a diʼ a yi a ghə̀ zizi ghə̀ tsi faŋ. Ghə̀ŋ nè ali, Tìʼ ghom a ku no tèbe ghò yi a ghə̀ŋ bèmə fa wen chò fa mo azhiʼ. 17Kènkə diʼ əsoʼ ə ghomə la, ghə̀ŋ kòŋ təwen ə təŋtə.

Yesò ə shə̀ʼtə̀ la viʼi ə ne baynə ndzɨ̀mtə̀sə wen

18“Viʼi mbyi ne bayn ghə̀ŋ, ghə̀ŋ kwoʼtə ando və tə ə baynə mò fa ambì. 19Ghə̀ŋ tə ndiʼ viʼi mbyi mu vəwenə kòŋ ghə̀ŋ to nə̀ viʼi vəwenə. Luwen ə diʼ mù ma tə ə tsùʼtə shisə ghə̀ŋ fa mbyi, ghə̀ŋ ko diʼ viʼi mbyi. A le kənyʉ̀ ki a viʼi mbyi bàynə̀ ghə̀ŋ tsu. 20Kə ghə̀ŋ lyesə kənyʉ̀ ki a mà tə ziʼi a ghə̀ŋ la, ‘wù ə shwèʼ ko tɨmə chò tìʼ shyèʼ wen.’ Vəwenə sətsen ə ndi mu vəwenə ə ntsuʼ li kəghʉ ə kòmkə, vəwenə be a ntsuʼ kənkə to ndə̀ŋndəŋ. Vəwenə sətsen ə ndiʼ mu vəwenə ə zhʉtə əziʼi ə ghomə, vəwenə be a zhʉtə əziʼi ghəŋə to alì. 21Və a nè nyʉ̀ venə a ghə̀ŋ alə̀ no ətsèm, byìʼì mò byìʼàndo vəwenə ko kɨ wìʼ yì a ghə̀ tɨmə mo. 22Ma tə faŋ ke vì ə gàʼ a vəwenə kumə mbyɨsə vəwenə mu kə ko diʼi tebè la vəwenə nè li mbyɨ ando kə diʼi luwen. Vəwenə ko kiʼi kənyʉ̀ kə tsen kə luwen ə gàʼ kumə mbyɨsə vəwenə. 23A bayn no ndò bayn mo, kə diʼi la ghə̀ bàynə̀ Tìʼ ghom. 24A tə ndiʼ la mà ko ə nè nyʉ̀ a vəwenə a ghə̀ŋ ntìntìn, ko andiʼ la wìʼ ə tɨmə nè, mu kə diʼi la vəwenə nè li mbyɨ ando kə diʼi luwen. Luwen ə sə diʼ mù vəwenə yen li nyʉ̀ ə kaynə və venə ali be bàynə̀ mò to bàynə̀ boʼsə nə̀ Tìʼ ghom. 25Nò tèbe ali, kə tə ə diʼ ə fʉ to ji na ghèn ndiʼ kənyʉ̀ ki a və nyoʼo a vəwenə a soʼ la, ‘Ghə̀ŋ tə ə bàynə̀ mò to kədyàŋ,’ kwʉʼ.

26“Ngyàmtə̀ ne vì, a mà tɨmə ə gaʼa nəmwèʼè kumə mò. Ghə̀ na lu fa ben Tìʼ, a diʼ Kəzhwì kə wen kì a kə gàʼà to nəmwèʼè. 27Ghə̀ŋ be na ngàʼà to nəmwèʼè a viʼi kumə mò byìʼàndo ghə̀ŋ tə ə ndiʼ vəghəŋ amuʼ, fa kənzìtə.

Currently Selected:

Joyn 15: bbkDBLnt

Highlight

Copy