Joyn 16

1“Mà gàʼa nyʉ̀ venə no ətsèm a ghə̀ŋ alə ndiʼ kə ghə̀ŋ na maʼa əbyɨmə ə ghəŋə. 2Və ne ndzɨ̀mə̀ shisə ghə̀ŋ fa aloʼ ntsèntə̀. Ma gàʼà nəmwèʼè la əzhʉ̀ ə tseghə na vi, a wìʼ ne zhwi ghə̀ŋ, ghə̀ sə kwoʼtə la ghə̀ nè shwèʼ Nyìngòŋ. 3Viʼi ə nà nè nyʉ̀ a venə a ghə̀ŋ byìʼàndo vəwenə ə ko kɨ mo, ko və kɨ Tìʼ. 4Mà shə̀ʼtə nyʉ̀ a venə a ghə̀ŋ alə, ku kətyiftə ndiʼ əzhʉ̀ na kwʉʼ, ghə̀ŋ sə nè, ghə̀ŋ ə̀ kwoʼtə ando mà tə shə̀ʼtə̀ a ghə̀ŋ.

Əshyèʼ kəzhwì kə Ŋwoʼkə

“Mà ko tə shə̀ʼtə̀ nyʉ̀ venə a ghə̀ŋ fa ambì byìʼàndo mà bo tə diʼ vəghəŋ amuʼ. 5Luwen ma dyʉ̀ a ben nə̀ wìʼ yi a ghə̀ tə tɨm mo, ali wìʼ fa ghə̀ŋ ə ko bèmə tebè la ma dyʉ̀ fè lò? 6Ma shə̀ʼtə̀ li nyʉ̀ venə a ghə̀ŋ, və sə ku ngəʼ a ghə̀ŋ. 7Alì, ma gaʼa to a ghə̀ŋ nəmwèʼè la, à diʼ njùŋ a ghə̀ŋ ando mà sə lu. Mà sətsen faŋ kə dyʉ̀, ko Ngyàmtə̀ a vì a ghə̀ŋ. Alì mu mà dyʉ̀, a mà dyʉ̀ tɨm ə wen a ghə̀ŋ. 8Ghə̀ a vì, ə diʼi nyʉ̀ vyi a və byifə kumə mbyɨsə viʼi mbyi ə diʼ jisə tɨməsə, be diʼ ji yì a Nyìngòŋ ə lu soʼ viʼi fa tsù a ghə̀ŋ. 9Ghə̀ diʼi kənyʉ̀ kì a kə byɨfə kumə mbyɨ byìʼì ando viʼi ko byɨmə a mò, 10ə diʼ jisə tɨməsə byìʼàndo mà sə dyʉ̀ a ben ə Tìʼ ghom, ko ghə̀ŋ be ə diʼ ə yen mo. 11Ghə̀ a diʼ ji yì a Nyìngòŋ ə lu soʼo mbyi fa tsù byìʼì ando fòyn yi a ghə̀ soʼo mbyi ghèn sə diʼ mù ghə̀ fəŋ li nsòʼ.

12“Mà bò kiʼi nyʉ̀ ə gàʼ a ghə̀ŋ to kədə̀ŋ, ali mu ghə̀ŋ sətsèn əzhʉ̀ luwen, və a ku ngəʼ a ghə̀ŋ. 13Alì, kəzhwì kə Ŋwoʼkə kì a kə diʼi nəmwèʼè a vi tisə ghə̀ŋ, ghə̀ŋ kɨ no tèbe kənyʉ̀ kə kò ki a kə diʼi nəmwèʼè. Ghə̀ a vi, ko ghə̀ lu gaʼa tebè nyʉ̀ ə ngeŋ wen; ghə̀ a vì ə shə̀ʼtə̀ to nyʉ̀ mu və gàʼ gaʼa a wen, ə shə̀ʼtə̀ nyʉ̀, və bò diʼ ə ne fʉ̀. 14Ghə̀ a vi ə nè ghə̀ŋ kɨ nyʉ̀ ə vwomə, be nè a ji a ghèn, ghə̀ŋ yen kədyòʼ kì a ma kiʼi. 15Nò əfo ə Tìʼ ghom ə tsèm diʼ vwomə. A lə kənyʉ̀ ki a mà gàʼa la kəzhwì kə Ŋwoʼkə na vì, ə nlyɨ̀ nyʉ̀, a diʼ vwomə ə nè ə ghə̀ŋ kɨ.

Ə kusə shinsə nə̀ saŋlə

16“Ghə̀ŋ laʼtə to alə̀, kò ghə̀ŋ be ə yen mo, ə laʼtə to alə be bwensə yen mo.”

17Ndzɨ̀mtə̀sə bàm wen sə tsensə sə bèmə a vəwenə a ntìntìn la, “Ghə̀ tə gàʼ la, ‘Ghə̀ŋ laʼtə to lə kò və be a yen mo ə laʼtə to alə̀ ə bwensə yen mo,’ kə diʼ la ghò? Ghə̀ lə gàʼ alə̀ la, ‘Byìʼàndo ma dyʉ̀ a ben Tìʼ,’ kə diʼi la ghò?” 18Vəwenə sə kayntə to kayntə bèmə la, “Mə laʼtə a ghèn a ghə̀ gaʼa diʼ la ghò? Vəghəŋ ko kɨ la ghə̀ gaʼa la gho lò.”

19Yesò ə kɨ la vəwenə sə kəŋ ə bèm kənyʉ̀ a kènkə a wen ə mu gàʼ a vəwenə la, “A ghə̀ŋ kayntə̀ kənyʉ̀ kì a mà gàʼ la, ‘Kə laʼtə to lə̀ ko ghə̀ be a yen mo, ə laʼtə to lə ə bwensə yen mo.’ 20Ma gaʼa a ghə̀ŋ to no nəmwèʼè la, ghə̀ŋ ə̀ dì no nànto, mbi saŋlə sàŋlə. Ghə̀ŋ nè sə kusə shinsə, ali ə kusə ə shinsə a yi kaʼkə a saŋlə. 21Wùwì nə̀ sə kəŋ mbwi, ghə̀ sə zhʉ kəzaf byìʼàndo zhʉ̀ kwʉ̀ʼ li la ghə̀ bwi, ali na bwi, ghə̀ lyesə kəzaf na ki byìʼì saŋlə ando wàyn sə diʼ a kəvu. 22Kə lə diʼ to ndə̀ŋndəŋ luwen a ghə̀ŋ, ando ghə̀ŋ kusə shinsə, ali ma diʼ ə ne be ə yen ghə̀ŋ la ghə̀ŋ, ghə̀ŋ ə̀ saŋlə, ko wìʼ diʼ ə nè la kə ghə̀ŋ be sàŋlə.

23“Kətsi na kì ə na kwʉ̀ʼ, a ghə̀ŋ faŋ kò ghə̀ lə be bèm kənyʉ̀ a mò. Ma gaʼa a ghə̀ŋ to no nəmwèʼè la, Tìʼ ə na ku no tèbe ghò yi a ghə̀ŋ bèmə chò fa mo a əzhiʼ. 24Ə zàʼa fa luwen, ghə̀ŋ ko bèmə kəfo chò fa mo əzhiʼ. Ghə̀ŋ bèm, a ghə̀ŋ a kiʼi, ə kiʼi saŋlə, ghə̀ŋ kuʼ kwʉ̀ʼ.

Yesò ə shə̀ʼtə̀ la ghə̀ soʼ li zhɨ mbyi

25“Mà temlə nyʉ̀ to tèmlə a ghə̀ŋ ali əzhʉ̀ diʼ ə vì a mà ko be a ngàʼà a ghə̀ŋ a ji ghèn. Ma na shə̀ʼtə̀ mwetə nyʉ̀ kumə Tìʼ a ghə̀ŋ. 26Kətsi na kì na kwʉ̀ʼ, a ghə̀ŋ ne bèmə əfo a Tìʼ ghom chò fa mo əzhiʼ, to fa ghə̀ŋ a ngeŋsə. Ma ko gàʼà la, a na ə be bèmə mò bèmə kəfo fa Tìʼ a ghə̀ŋ akəshi. 27Jòʼ. Tìʼ no fa wen a ngeŋ ne kòŋ ghə̀ŋ byìʼàndo ghə̀ŋ kòŋ li mò, be byɨmə la mà lù fa ben nə̀ Tìʼ. 28Mà tə lù fa ben nə̀ Tìʼ mibu vi a mbyi, bwenə dyʉ̀ a ben nə̀ Tìʼ.”

29Yesò ə gàʼa ali, ndzɨ̀mtə̀sə bàm ə wensə gàʼ la, “Wù sə gàʼà to no a ndayn luwen, ko wu be tèmlə nyʉ̀ tèmlə. 30Yès yen li luwen la wù kɨli no nyʉ̀ ə tsèm, ə yen la wìʼ ə ko diʼ ə mbe bèmə kənyʉ̀ bèmə fa wù. Nakènkə nè li yès ə byɨmə la wù lù vì fa ben ə Nyìngòŋ.”

31Yesò ə bwensə bèm a vəwenə la, “A ghə̀ŋ byɨmə li luwen? 32Əzhʉ ne vì, ma gàʼà ali mu à sə diʼ to no wenə ghə̀ lə, ghə̀ŋ diʼ ə ghəsə ə no ndò ə phwò. Ghə̀ŋ wʉ̀sə mò, a mà sə diʼ to mo nyɨŋ, ali ko ma laynsə diʼ to mò nyɨŋ byìʼì ando Tìʼ ə diʼ yo wen. 33Mà shə̀ʼtə nyʉ̀ a venə a ghə̀ŋ alə̀ ndi ghə̀ŋ faŋ to mò, ə kiʼi mbwaʼmə. Ghə̀ŋ na kiʼi ngəʼ a mbyi ashə. Alì kə wìʼ na bwaʼ! Ma to li chò mbyi.”

Currently Selected:

Joyn 16: bbkDBLnt

Highlight

Copy