Luk 1

Ntɨm Jùŋ kùmə̀ Yesò Klistò

1Nghoʼo viʼi ndìʼ mu vəwenə mwomsə̀ li ənyòʼ ə shyə̀ʼtə̀ nyʉ̀ vyi a və ncho à yes a ntìntìn. 2Vəwenə nyòʼo nyʉ̀ mu vəghəŋ Zhʉ li fà viʼi vyi a və n-yèn nyʉ̀ avyi no fa kənzìtə, ando və nlyɨ̀ kəshi. 3Mà nyen la kə bòŋ a Bobo la no kàyntə̀ mò boŋ nyòʼ ə shə̀ʼtə nyʉ̀ venə tò mbaʼa-mbaʼa à wù byìʼì ando mà kyitə li kuʼ nə̀ wen və no kàyn ando və zìtə̀ sə̀ chì. 4Mà shə̀ʼtə̀ alì wu kɨ kənyʉ̀ a kə diʼ nə̀ mwèʼè a ntyìntyìn nyʉ̀ a vyi a və shə̀ʼtə̀li a wù.

Və shə̀ʼtə̀ la və bwili Joyn wù ku a mù

5A ndìʼ a tʉʼ Helòd, Fòyn Judiyà pfèm Nyìngòŋ tsen ndiʼ tsu a və ndzàŋ wen nə̀ Zakaliya. Ghə̀ nlu fa nòyn Abijà. Ghə̀ nkiʼi wu wì a ghə̀ nlu fa ngwaʼa ngə̀ŋ Alòyn, Zhiʼi wen diʼ Elizabet. 6Vəwenə vətsèm ntsi kətsi kə tɨmə kə a shɨ Nyìngòŋ. Nè nyʉ̀ vyi a və gàʼ no tsèm bè ghʉ təsoʼ tə Nyìngòŋ no tətsèm, kò vəwenə lə nkiʼ məghàm no fa mpfen 7vəwenə nko kiʼi vunə byìʼì Elizabet nko bwi alì mu vəwenə be dwin no nànto. 8Tʉʼ nlayn a kətsi kə tsen kə à diʼ viʼi nòyn Zakaliya əshyèʼ a ngə̀ŋ Nyìngòŋ. Zakaliya dyʉ̀ sə̀ nè shyèʼ wen a diʼi nə̀ pfem ngə̀ŋ Nyìngòŋ. 9Və ntem baʼ bu tsuʼ wen la ghə̀ nyʉʼ kələŋ a ngə̀ŋ Nyìngòŋ ando ntsìnə̀ vəpfèm ndiʼi. 10Zhʉ nè kwʉʼ və nyuʼ kələŋ a kì, nòyn viʼi ntsentə ayi ŋwʉʼ a kəbəŋ sə̀ jɨ̀mə̀. 11Ntsɨŋ Bobo fʉ̀ a wen shɨ, ghə̀ diʼi a shə kwoŋ to ghə̀ kəbaŋ a və nyuʼ kələŋ tsu li. 12A ndiʼ a zhʉ a Zakaliya n-yenə ntsɨŋ Bobo a ghèn, kəlem kə wen kə tyinkə, fayn bè vì a wen. 13Ali ntsɨ̀ŋ Bobo yì gàʼa wen la “Kə a fayn a zakaliya; byiʼè Nyìngòŋ zhʉli jɨ̀mə̀ wu. Wi wù Elizabet nè bwi wàyn wulɨm a wù a chʉ zhiʼ wen nə̀ Joyn. 14Wu ne saŋlə no nànto byìʼì məvì wen, viʼi və ghoʼo və be saŋlə byìʼì bwi wen, 15byiʼè ghə̀ lu ndiʼi no wu ghoʼo a shɨ Bobo. Ghə̀ kò ə nyʉ məlyʉ̀ʼ no fa mpfen, kəzhwì kəŋwoʼkə lu lwin a wen tyɨm ghə̀ bu a bèm ə li wen. 16Ghə̀ a nè la nghoʼo vunə Islel bwenə vì a Bobo Nyìngòŋ vəwenə. 17Ghə̀ nè dyʉ̀ a shɨ nə̀ Bobo nə̀ kədyòʼ kə Nyìngòŋ ndə̀ŋndəŋ tò nə̀ Elija; ndì nè la vətiʼi wenə vunə vəwenə tsi ntsìnə̀ muʼ, bè nè la viʼi a və to kətʉ bwenə bwaʼmə, bè tof to nə̀ viʼi kənyʉ̀ kə tɨmə kə. Ghə̀ ne gyàmtə̀ ənè la viʼi sə̀ mbaʼtə ndiʼ wen və Bobo ti a kayn a byɨmə.” 18Zakaliya mù bèm a ntsɨŋ Bobo yi la “Wu ne nè no gho la mà kɨ la kənyʉ̀ a ken diʼ nəmwèʼè a?” Yo wì ghom diʼ mù yes dwinəli no na to.

19Ntsɨŋ Bobo yì gàʼ la “A diʼ mo Gabliyà a ghə̀ ŋwʉʼ a mbyɨ Nyìngòŋ. A təmə wen tɨm mo la ma vi shə̀ʼtə̀ ntɨm jùŋ ghèn à wù. 20Wù a chiʼ la kùʼ əzaʼa fa kətsi kyì a kənyʉ̀ kènkə lu lyɨ kəshi byiʼè ando wù ko byɨmə kənyʉ̀ a ma gaʼà. Alì kə diʼ lu kwʉʼ tò zhʉ yi a və ghʉli.”

21A ndiʼ alə̀ viʼi a və nkə̀ʼtə̀ zakaliya a kəbəŋ sə̀ kaynə la a nè ghò ghə̀ tàŋ a tyì ngə̀ŋ Nyìngòŋ alə̀ lo? 22Zakaliya fʉ̀ kò ghə̀ bè kɨ əgàʼ a viʼi vyi ə shə̀ʼlə nyʉ̀ tò nə̀ avu. Viʼi a vyi kɨ la Nyìngòŋ ə vili a wen a jòm.

23Mətsi mə shyèʼ wen nè mè, ghə̀ bwenə pfwo à wen à kəbəŋ. 24Mətsi mə sə̀ chò, wì wen Elizabet tɨmə nə̀ bèmə ə lyòmtə̀ tò a ngə̀ŋ a və sàŋ və tàyn gàʼà la 25“A lè mo alə̀ a? Bobo nèli kənyʉ̀ kə kaynə kə à mò; ghə̀ maʼli ə tsəʼsə nyʉ̀ kətʉ kədiʼkə fà mò à kətʉ. Wìʼ ko bè a ghə̀ʼ mo.”

Və shə̀ʼtə̀ la və a bwi Yesò

26A ndiʼ ando Elizabet ndiʼ nè bèmə a vəsàŋ ntʉfə, Nyìngòŋ tɨm ntsɨ̀ŋ wen Gabliyà, la ghə̀ dyʉ̀ a ntə̀ʼ tsen a loʼo Galìlì a və ndzàŋ nə̀ Nazalèt, 27ədyʉ̀ yen wàyn wùwì ngòyn tsen a ghə̀ nko ntəmə kɨ wùlɨm a ghə̀ ndiʼ mu və tisəli nyʉ̀ lam ə wen wenə wulɨm ə tsen a və ndzàŋ nə̀ Josèf a ghə̀ ndiʼ wù ngwaʼa ngə̀ŋ fòyn Devìt. 28Ghə̀ ndyʉ̀ yen wen ə gàʼ la, “Mà toŋtə̀; mbwaʼmə ndiʼ a wù! Bobo diʼ ve wen, ghə̀ bwaʼsə li wù.”

29Kənyʉ̀ kènkə a ntsɨ̀ŋ ngə̀ŋ Nyìngòŋ ghèn ngaʼa sə yʉŋsə Mèli no nànto, ghə̀ sə kàyntə̀ la ghenə diʼi nkyì toŋtə̀ kò lo? 30Alì ntsɨ̀ŋ ayì gàʼa wen la “Kə a fàyn a Mèli, Nyìngòŋ kòŋli wù, 31Wù kɨ la, wù a tɨmə nə̀ bèmə ə bwi wàyn wulɨm ə chʉ zhiʼi wen nə̀ Yesò. 32Ghə̀ lu kwi kuʼ ə ndiʼ wu ghoʼo Nyìngòŋ yì a ghə̀ tyiftəli la və kə dzàŋ wen nə̀ wàyn Nyìngòŋ bè ku kəkɨ kə təfòyn tiʼi wen a wen à mù diʼ kəkɨ kə Devìt. 33Ghə̀ a kwi ədiʼ fòyn a ngə̀ŋ Jàkob a ghə̀ a faŋ to ghayn mù; a fòyn wen ko lə mè.” 34Mèli mù bèm a ntsɨ̀ŋ ngə̀ŋ Nyìngòŋ yì la “Kənyʉ̀ a kènkə la zì kə lyɨ kəshi ale kèn la ma kɨli wulɨm a?”

35Ntsɨŋ ngə̀ŋ Nyìngòŋ yì bwènsə̀ gàʼa a wen la “Kəzhwì kəŋwoʼkə ne shiʼi a wu kətʉ, kədyòʼ kə Nyìngòŋ kə chiʼitə wu no tsèm. Kə la diʼi la wàyn a ghèn ne to və dzàŋ wen la wàyn Nyìngòŋ. 36Yen a, wù ngwaʼa ngə̀ŋ wu Elizabet be boŋ tɨmə nə̀ bèmə a dwin. A sə̀ diʼi vəsàŋ ntʉfə luwèn ali mu və ngàʼà la ghə̀ diʼ dem. 37Kə lè diʼi la kənyʉ̀ kò kə lə̀ chò Nyìngòŋ.” 38Mèli mù gàʼ la “Ma diʼ wù shyèʼè Bobo, kə fʉ̀ à mò ando wù gàʼa.” Ntsɨ̀ŋ ngə̀ŋ Nyìngòŋ mù lù.

Mèli lu dyʉ̀ ghayntə Elizabet

39Mèli lu to mətsi ayì ə zàŋsə̀ dyʉ̀ a ntə̀ʼ tsen a Judiyà a loʼ pfensə. 40Ghə̀ ndyʉ̀ li ə kwen a ngə̀ŋ Zakaliya ə tòŋtə Elizabet. 41Ando Elizabet nzhʉ tòŋtə Mèli, to zhʉ ghèn, wàyn tsòʼtə fa wen bèm, kəzhwì kəŋwoʼkə chiʼitə wen. 42Ghə̀ mù gàʼ a gɨ to la “Nyìngòŋ bwaʼsə li wù nchò no kyi vətsèm bè mbwaʼsə wàyn yi a wù a bwi. 43Ma lè diʼ no ndo a li Bobo ghom vi ghayntə mo a? 44Nò a zhʉ a wù yì toŋtə mò, wàyn yì a mo bèm ntsòʼ tə nə̀ saŋlə ghə̀. 45Saŋlə diʼ a wù ando wù byɨmə li la nyʉ̀ vyi a Bobo Nyìngòŋ gàʼa ne kwʉʼ no tsèm.”

Mèli kuʼsə Bobo

46Mèli zìtə̀ sə̀ temə təpfem a Nyìngòŋ gàʼa la:

Tyɨmə ghomə ku ghoʼsə a Bobo.

47Kəzhwì kom bè saŋlə̀ a Nyìngòŋ ə mbwòŋsə̀ ghomə.

48Byìʼ ando ghə̀ kwòʼtə̀ li mò, wù shyèʼè wen.

Əlù fa luwèn viʼi vətsèm a dzàŋ mo la saŋlə̀.

49Byìʼì nyʉ̀ kaynə və a Nyìngòŋ nèli a mò,

zhiʼi wen ə ŋwoʼ

50Ghə̀ diʼi kusə shinsə à

viʼi a və kiʼi fàyn a wen to a kəlyɨŋ a kəlyɨŋ.

51Ghə̀ diʼi li kədyòʼ nə̀ kwoŋ wen

ə sàs viʼi ghaŋsə wen bènə̀ təkwòʼtə̀ tə vəwenə.

52Ghə̀ shiʼsəli təfòyn tə ghoʼokətə fa vəwenə a fòyn, ə

kuʼsə viʼi və zɨmvə.

53Ghə̀ zhis li viʼi jɨŋ nə̀ fo jùŋvə, vəwenə zhɨ nkwìʼ

alì ndzɨm viʼi a və ko gho kəfo nə̀ avu zɨm ghə̀.

54Ghə̀ ghʉli gaʼa wen a ghə̀ ngàʼà a və tìʼ və vəti

gyamtə viʼi shyèʼè a diʼ viʼi Islel.

55Ghə̀ nkwoʼtəli ə diʼi kusə nshinsə a Ablaham

bènə̀ ngwaʼa ngə̀ŋ wen no tsèm no məzhʉ tsèm.

56Mèli ngàʼa ali ntsi vəsàŋ və taʼ wenə Elizabet mimbu bwènə̀ pfwo.

Elizabet bwi Joyn ku Amù

57Zhʉ bwi Elizabet kwʉʼ, ghə̀ bwi wàyn wulɨm. 58Viʼi a və ntsi boʼsə wen nə̀ viʼi ngwaʼa wen zhʉ njùŋ ə ghoʼo yì a Bobo nèli a wen sə̀ boŋ saŋlə. 59A sə̀ ndiʼ a mətsi fwomə, və vì əshɨtə ndyə̀ wàyn ayì. Və nkəŋ chʉ zhiʼi wen nə̀ zakaliya 60alì lì wen tensə ə gàʼ la “Jòʼ, zhiʼ wen diʼ Joyn.” 61Vəwenə gàʼa wen la “Joyn ko diʼ zhiʼi ngwaʼa ngə̀ŋ ghə̀ŋ.” 62Vəwenə mù bèm a tiʼi wen la nə̀ avu zhiʼ ghə̀ kəŋ və chʉ a wàyn a wen. 63Ghə̀ bèm kəbàs kə ə nyòʼ tsu la “Zhiʼ wen diʼ Joyn,” təchʉ̀ tə vəwenə tə zɨmtə. 64Tò a zhʉ a ghèn boʼ chʉ wen, kəlyɨŋ kə wen kə zìtə̀ ə jeʼ ghə̀ zìtə̀ sə̀ gàʼà kuʼsə Nyìngòŋ. 65Kənyʉ̀ a kyi sə̀ fàynsə̀ a viʼi ntə̀ʼ a vyi no nə̀ nànto. Soʼgho ayì jèʼ a tyì loʼ Judiyà no tsèm a ndiʼ loʼ pfensə. 66No məndo a ghə̀ nzhʉ soʼgho a ghèn ghʉ a vəwenə a tyɨm gàʼà la “Wàyn a ghèn le lu kwi ndiʼ ale?” Vəwenə mù yèn no nəmwèʼè la Bobo ndiʼ wen wàyn a ghèn.

Zakaliya Shə̀ʼtə̀ ntɨm ə Bobo

67Kəzhwì kəŋwoʼkə lwin a tyɨm tiʼi wen Zakaliya ə nè ghə̀ sə̀ gàʼà gɨ Nyìngòŋ la 68“Kuʼsə diʼ à Bobo Nyìngòŋ viʼi Islel byìʼì ando ghə̀ vili ə ghayntə viʼi wen bè zen kətʉ kə vəwenə. 69Ghə̀ kuli mbwòŋsə̀ ghoʼo a vəghəŋ à diʼ wù ngwaʼa ngə̀ŋ Devìt, wù shə wen, 70to ndo ghə̀ ngàʼà ə chòsə̀ fa nshə̀ʼtə̀sə musə wen. 71Ghə̀ ghʉli la ghə̀ a bwòŋsə vəghəŋ fa avu viʼi kəbàyn vəghəŋ bènə̀ fa adyòʼ viʼi a və baynə vəghəŋ. 72Ghə̀ nè nyʉ̀ venə ndi diʼ kusə nshinsə à vətiʼi və vəghəŋ bè diʼ la ghə̀ bu kwòʼtə̀ məkàyn mə ŋwòʼmə wen myì a ghə̀ nghʉ wenə vəwenə li. 73A ndiʼ məkàyn myì a ghə̀ nkàyn a tìʼ vəghəŋ Ablaham. 74Ndi nè la ando və bwòŋsə li vəghəŋ fa avu viʼi kəbàyn vəghəŋ, vəghəŋ shə̀ʼ a wen kenə fàynə, 75à jì ŋwoʼə bènə̀ a jì tɨmə no mətsi mə vəghəŋ ntsèm a tyi mbyi. 76A wù a wàyn ghom, və lu dzàŋ wù nə̀ nshə̀ʼtə̀ ghoʼo Nyìngòŋ Tìʼ yi. Wù à dyʉ̀ a mbi Bobo ə shətə jì à wen, 77əku tof la viʼi vəwenə bwoŋ diʼi à vəwenə la yi lyesəli ku mbyɨsə vəwenə. 78Nyìngòŋ vəghəŋ kusə nshinsə bè bwaʼmə ghə̀ a nè la chʉzhʉ saʼa ə bayn a vəghəŋ kətʉ. 79Ghə̀ a ku bayn a viʼi a və ŋwʉʼ a nfɨnə̀, bènə̀ à kəlyɨŋ kə pfʉ ndi be diʼ jì bwaʼmə a vəghəŋ.” 80Wàyn zakaliya kwi to a wèn bènə̀ a kəzhwì. Ghə̀ ntsi a nse zɨm ə zaʼa fa kətsi a ghə̀ ndiʼ zìtə̀ shwèʼè wen wenə viʼi Islel.

Currently Selected:

Luk 1: bbkDBLnt

Highlight

Copy