Luk 2
2
Bwi Yesò
(Mat 1.18-25)
1A bè ndiʼ a tʉʼ ayì mu fòyn Augustus kuli soʼ la və nyoʼ təzhiʼ tə viʼi no vətsèm a tə̀loʼ tə̀tsèm a ti nə̀ Lum. 2A ndiʼi mbi zhʉ a və nyòʼò təzhiʼ ando Kulinoy ndiʼi kətʉ a shə sylia a loʼo Luma. 3No məndò bwènə̀ dyʉ̀ a wen a loʼo ə dyʉ̀ nyòʼò zhiʼi wen. 4Josèf mù lù fa ntə̀ʼ Nazalèt a loʼo Galìlì dyʉ̀ a ntə̀ʼ Betə̀lèhem a loʼo Jùdiyà a ndiʼi kəshi a və bwì fòyn Devìt tsu ando ghə̀ nlu fa ngwàʼa fòyn Devìt. 5Josèf ndyʉ̀ alì ədzʉ̀ nyòʼo zhiʼi wen a taŋ ghèn wenə̀ Mèli a ndiʼi lyɨ a nə̀ wi wen, alì mu Mèli sə diʼ nə̀ bèmə̀. 6Ando vəwenə ndiʼi tsu, zhʉ kwʉʼə̀ Mèli bwi. 7Ghə̀ nbwi wàyn mbì wen à diʼ wulɨm, lemtə wen nə̀ basə ndisə, nyòŋsə̀ wen a tyi ntʉʼ a nyamsə nvì zhɨ fa tsu, byeʼe ando kəshi kə nko bè ndiʼ a ngə̀ŋ yi a viʼi jèʼ əvì tsi tsu, ə vəwenə tsi tsu. 8A ndiʼi nə̀tʉʼə ayì, a shə loʼo ayì, ntsɨ̀ŋsə nyamsə sətsensə diʼ a toʼ, tsɨ̀ŋə̀ nyamsə vəwenə. 9A sətsèn ntsɨ̀ŋ ngə̀ŋ Bobo fʉ̀ a vəwenə ashɨ, baynə Bobo vì kaʼ vəwenə, vəwenə sə diʼ nə̀ fàynə no nànto. 10Alì ntsɨ̀ŋ ngə̀ŋ Bobo yì gàʼà vəwenə la “Kə ghə̀ŋ à fàyn, ghə̀ŋ zhʉtə, byèʼè ma vili nə̀ ntɨm jùŋə a ghə̀ŋ ne nè viʼi vətsèm saŋlə. 11Və bwili mbwòŋsə̀ lan a ghə̀ŋ a loʼo fòyn Devìt a diʼi Klistò a ghə̀ diʼi Bobo. 12Kəfo a kə diʼ a ghə̀ŋ kə diʼ la ghə̀ŋ a yen wàyn a və lèmtə a basə ndisə ə nyòŋsə̀ a ntʉʼ nyamsə.” 13A sətsèn, nòynə ntsɨ̀ŋsə ngə̀ŋ Nyìngòŋ vì boʼsə ntsɨ̀ŋ ngə̀ŋ Nyìngòŋ yì vəwenə sə̀ zhɨmə ndzàŋsə ghoʼsə Nyìngòŋ la,
14“Vəghəŋ ghoʼsə Nyìngòŋ a ghə̀ diʼi a kàŋ.
Mbwaʼmə diʼ a kwi nse a viʼi a ghə̀ kòŋə.”
15Ando ntsɨ̀ŋsə ngə̀ŋ Nyìngòŋ sə bwenə li kuʼ a kàŋ, ntsɨ̀ŋsə nyamsə gàʼ a vəwenə ntyìntyìn la “Vəghəŋ dyʉ̀ a Betə̀lèhem dyʉ̀ lye kənyʉ̀ kenkə a kə fʉ̀ tsu a Nyìngòŋ neli vəghəŋ nkɨ.”
16Vəwenə nyɨŋ dyʉ̀ yèn Mèli nə̀ Josèf bènə̀ wàyn yì a ghə̀ nyəŋ a tì ntʉʼ. 17Ando vəwenə yènə wen, vəwenə shə̀ʼtə̀ kənyʉ̀ a ntsɨ̀ŋ ngə̀ŋ Nyìngòŋ ngaʼa li byìʼì wàyn ghèn. 18No məndo a ghə̀ nzhʉ kənyʉ̀ a ntsɨ̀ŋsə nyamsə sensə ngaʼà, vəwenə ndìʼì no nə̀ kaynə, 19Alì Mèli ghʉ nyʉ venə a wen a tyɨm sə kwòʼtə̀ byìʼì wen və. 20Ntsɨŋsə nyamsə sensə bwènə̀ dyʉ̀ zhɨmə ndzàŋsə ghoʼsə Nyìngòŋ a nyʉ̀ ə tsèm a vəwenə zhʉ bè yen a ntsɨŋsə Nyìngòŋ sə ngàʼà.
Və chʉ zhiʼi Wàyn
21A ndi a bàmə mətsi fwomə, və shətə ndyə̀ wàyn, ə chʉ zhiʼi wen nə̀ Yesò, byèʼè ando a ndiʼi zhiʼi a ntsɨ̀ŋ ngə̀ŋ Nyìngòŋ chʉ mimbu ghə̀ sə ndiʼi a bèm li wen.
Və dyʉ̀ diʼ wàyn a ngə̀ŋ Nyìngòŋ
22Kətsi kə kwʉʼ vəwenə shʉ̀ təwen tə vəwenə ando soʼ Mosìs ndiʼì, və lyɨ̀ wàyn kuʼ nə̀ wen a Jelusalèm ədiʼ a Bobo. 23Ando və ə nyòʼ a soʼ Bobo la “No wàyn wulɨm kò a ghə̀ nfʉ̀ fa bèm a mbì və diʼi la à diʼ wàyn Bobo.” 24Və kuʼ nə̀ wen əku kəku kəlàto bò kò vunə bi làto bò ando soʼ Bobo ngàʼà. 25A ndiʼ alì wutsen diʼ a Jelusalèm a və ndzàŋ zhiʼi wen nə̀ Simon, ghə̀ nkiʼ kəzhwì kəŋwòʼ Kə sə̀ tsi tò ntsìnə̀ tɨmə bè lyɨ̀ zhʉ əshyèʼ shyèʼ Nyìngòŋ. Ghə̀ ntsi kə̀ʼtə̀ mətsi a Bobo a tyì məshɨ mə viʼi Islel. 26Mu kəzhwì kəŋwoʼkə ndiʼ li a wen la ghə̀ ko lu pfʉ kèn la ghə̀ yenli wìʼ yi a Bobo ntsuʼ li ə tɨm. 27A ndiʼ ando tiʼi Yesò wenə lì wen ndyʉ̀ nə̀ wen a ngə̀ŋ Nyìngòŋ ndì və nè a wen ando soʼ ngàʼà, kəzhwì kəŋwoʼkə tènsə Simon ghə̀ lù ə dyʉ̀ tsu tò a zhʉ ayì. 28Ghə̀ shi wàyn ayì à wen avu mu sə̀ kuʼsə Nyìngòŋ gàʼà la.
29“Nèli luwèn a Bobo, wu shyèʼè wu pfwomə tò nə̀ mbwaʼmə ando wù ghʉ li gàʼà wu,
30byiʼè ando ashɨ ghomə yenli bwoŋ wu,
31a wu nèli viʼi vətsèm yen,
32Bayn yì a ghə̀ a diʼ jì wu a viʼi a və ko kɨ Nyìngòŋ,
be vì nə̀ kuʼsə a viʼi vyə a loʼo Islel.”
33Tiʼi wen nə̀ lì wen ndiʼ nə̀ kaynə byìʼì nyʉ̀ a Simon ngàʼà kumə wàyn a yì. 34Simon bwaʼsə vəwenə mù gàʼ a Mèli la “Zhʉtə à! Nyìngòŋ tsuʼli wàyn la ghə̀ byɨsə bè bwòŋsə nghoʼo viʼi a loʼo Islel. Ghə̀ lu ndiʼ nchwi fa Nyìngòŋ a və lu ngàʼlə byìʼì wen, 35ndi nyʉ̀ vyì a viʼi lyòmtə a vəwenə tətyɨm fʉ̀ no tsèm a dayn. Fənyì fə diʼ be ne sù tyɨmə wu.” 36A ndiʼ ali, nshə̀ʼtə̀ ghoʼo wùwì tsen diʼ a və ndzàŋ wen nə̀ Ana, a diʼ wàyn Fanuwèl wù ngwaʼa ngə̀ŋ Ashà, mu ghə̀ dwinəli no nànto. Ghə̀ diʼ mu ghə̀ lam ə tsi tò ngwʉ̀ʼsə sòmbo, 37lɨm ə wen pfʉ. Ghə̀ kwi a nə̀ wùwì pfʉ sə̀ diʼ ngwʉʼ njʉ̀sə̀ kaʼ a məwum fwomə, ŋwʉʼ tò ngə̀ŋ Nyìngòŋ, ghoʼsə Nyìngòŋ, bamə chʉ be jɨ̀mə̀ nə̀nchwì jɨ̀mə̀ nətʉʼʉ. 38A sə ndiʼ kəlyɨŋ kə zhʉ a və nvì nə̀ Yesò a ngə̀ŋ Nyìngòŋ li, ghə̀ bè kwen tò a zhʉ ayì ə ku kəzòŋ kə Nyìngòŋ byìʼì wàyn a ghèn ə sə̀ shə̀ʼtə̀ kənyʉ̀ kə wàyn kèn a no məndo a ghə̀ nkə̀ʼtə̀ la Nyìngòŋ vi zen kətʉ kə viʼi Jelusalèm fa ngəʼ?
Və bwenə pfwo nə̀ Yesò
39Josèf wenə Mèli nè myètə no nyʉ̀ tsèm ando soʼ Bobo ngàʼà, vəwenə bwènə̀ pfwo a ntə̀ʼ Nazalèt a loʼo Galìlì. 40Wàyn a ghèn kwi to. Ətof ə wen kwi dyʉ̀ nə̀ mbì, Nyìngòŋ bè bwaʼsə wen.
Yesò a tyì ngə̀ŋ Nyìngòŋ
41Tiʼi Yesò wenə lì wen sə̀ kuʼ no ngwʉ̀sə̀ tsèm a Jelusalèm zhɨ kətsi kə məzaʼsə. 42Wàyn nè kwi zaʼa a ngwʉʼ njʉ̀sə̀ bò vəwenə bè kuʼ tsu ando vəwenə nè. 43Vəwenə nè zhɨ kətsi kə məzaʼsə ə mè, sə̀ mpfwo, Yesò faŋ a bàm a Jelusalèm kò tiʼi wen wenə lì wen lə kɨ. 44Ando vəwenə nkwòʼtə̀ la ghə̀ diʼ a ntyìntyìn viʼi, vəwenə jèʼè kətsi kə mpfen, mù bwènə̀ sə bèmə̀ wen a viʼi ngwaʼa ngə̀ŋ vəwenə bènə̀ a viʼi vətsen və a və nkɨ wen. 45Ali kò və lu yenə wen. Vəwenə mù bwènə̀ kuʼ a Jelusalèm ə kəŋ wen fa tsu. 46Və nkəŋ wen a mətsi taʼ dyʉ̀ yen wen a ngə̀ŋ Nyìngòŋ, ghə̀ ŋwʉʼ wenə ndìʼsə̀sə, zhʉtə nyʉ a vəwenə ngàʼà be bèmtə̀ tsen və à vəwenə. 47No məndo a ghə̀ ndiʼ nə̀ kaynə byìʼì tof wen bènə̀ ji a ghə̀ bwènsə̀ tsu. 48A ndiʼ a zhʉ a tìʼ wen wenə liwen nyenə wen, vəwenə sə diʼ nə̀ kaynə kumə wen. Li wen bèm a wen la “Wàyn ghom, byìʼì gho a wu nè nki kənyʉ̀ kenkə a yès a?” Yo tiʼi wu kəŋ li wù alə̀ sə fàynə. 49Ghə̀ bèm a vəwenə la ghə̀ŋ yi nkə̀ŋ mò a gho? Ghə̀ŋ bè yi mo la mà diʼ a ngə̀ŋ tiʼi ghom. 50Vəwenə nko nkɨ kənyʉ̀ a ghə̀ ngàʼà kə wenkə. 51Ghə̀ lu a zhʉ a ghèn bwènə̀ shiʼi a Nazalèt wenə vəwenə mù zhʉmə vəwenə. Li wen ghʉ nyʉ̀ venə a wenə a tyɨm. 52Yesò sə kwi kuʼ no nkayn a wen nə̀ a tof. Nyìngòŋ sə̀ kòŋ wen ə viʼi bè boŋ kòŋə.
Currently Selected:
Luk 2: bbkDBLnt
Highlight
Share
Copy
Want to have your highlights saved across all your devices? Sign up or sign in
