Luk 3

Ziʼi Joyn wu ku Amù

1A ndiʼ ngwʉʼ njʉ̀sə̀ tàyn ando Fòyn Tibeliyus Kaysa nsoʼo a Lum, Bontiyùs Bilate ndiʼ kətʉ a loʼ Judiyà, Helòd diʼ fòyn a loʼ Galìlì ando lèmə wen nsoʼo shə loʼ yi a və ndzàŋ nə̀ Ituliyà nə̀ Tilàkonaytis ə lisaniyas nsoʼo Abɨlin. 2Anàs bè nə̀ kàyafàs ndiʼ tʉtʉ ə tʉtʉ vəpfèm və Nyìngòŋ. Ntɨmə̀ Nyìngòŋ vì a Joyn wàyn Zakaliya a nse zɨm. 3Joyn fʉ̀ dyʉ̀ a Jodàn sə jèʼè kaʼa a loʼ ayi no tsèm, shəʼtə̀ ntəmə Nyìngòŋ ayì, gàʼà la viʼi kwitə fà vəwenə mbyɨsə ə shi mu ndi Nyìngòŋ lyesə ku mbyɨsə vəwenə. 4Kə diʼi ndə̀ŋndəŋ ando nshə̀ʼtə̀ Isayà nyòʼ la Wìʼ tsen zɨmə fa nse zɨm la “Ghə̀ŋ shɨ̀tə jì Bobo, ghə̀ŋ ne məjìtə mə wen mə nàyn. 5No kəfoŋlə kə kò diʼi və a lwinsə, bè bèytə̀ no pfen ko kò tàŋ ko yì shiʼsə ə və diʼi nè jisə gosəkə sə nayn. La və tsen mə kwòŋtə fa jisə ndi jì tsèm ndiʼ mbwaʼ 6No məndo lù yen bwòŋ yi a Nyìngòŋ vi nə̀ wen ghə̀.” 7A nè sə̀ ndi ando tənòyn tə viʼi nfʉ̀li əvì shi mu, Joyn ghàm vəwenə gàʼà la “Vunə zhusə byɨsə sènsə, a tofsə ndò ghə̀ŋ, ghə̀ŋ sə kəŋ nyɨŋ ngəʼ yì a Nyìngòŋ kəŋ tɨm a ghə̀ŋ a? 8Ghə̀ŋ nè nyʉ a və diʼi la ghə̀ŋ kwitə li tətyɨm təŋtə fa mbyɨsə. Kə ghə̀ŋ a kwòʼtə̀ fa mbwo ghə̀ŋ gàʼà a ghə̀ŋ a ntyìntyìn la ghə̀ŋ diʼ vunə Ablaham. Ma shə̀ʼtə̀ a ghə̀ŋ la Nyìngòŋ zì ghə̀ nè ngùʼ sènsə kaʼkə a vunə ghə̀ ku a Ablaham. 9Ghə̀ŋ kɨ la ndzam ti a tì nkòʼ luwen, mu a faŋ tə fəkòʼ fə ko ke kumə ashɨ jùŋ ghə̀ mu və a bvaʼ ə mòʼ a zhìʼ” 10Nòyn viʼi yi bèm a wen la “Yes la nè no gho luwen a?” 11Ghə̀ gàʼ a vəwenə la “No məndò a ghə̀ kiʼi ndisə sə̀ bò, ghə̀ ku sə̀ mùʼ a wi a ghə̀ ko kiʼ no fa mpfen. No məndo a ghə̀ kiʼi fozhɨvə, ghə̀ boŋ gə̀tə̀ ku viʼi vətsen və” 12Viʼi a və ntinə kənsè boŋ vì əshi mu ə bèm à wen la “Yes la nè gho a ndìʼsə̀?” 13Ghə̀ bwènsə̀ gàʼ a vəwenə la “Kə ghə̀ŋ be a nè wìʼ lòʼ ko kənsè, cho ando ghə̀ yi ndiʼi ndiʼ” 14Vəsugyèʼ boŋ bèm a wen la “Nkàyntə̀ yes a nè gho?” Ghə̀ gàʼ a vəwenə la “Kə ghə̀ŋ be shi kəfo kə wìʼ a kədyòʼ, kə ghə̀ŋ be gàʼ la wìʼ neli kənyʉ̀ kenla ghə̀ nèli, byiʼ ando ghə̀ŋ kəŋ kəfo. Ghə̀ŋ zhɨ tò ko a və loʼo ghə̀ŋ tsu.” 15Ando viʼi nlutə sù kə̀ʼtə̀ Bobo vəwenə mù sə̀ kayntə a vəwenə tətyɨm la gaʼa Joyn ko diʼ wen yì a və tsuʼli ə ghʉ lo? 16Joyn bwènsə̀ gàʼ a vəwenə vətsèm la “Ma a ku mu a ghə̀ŋ tò nə̀ mu mə amù, ali wi vì fa mò a bàm to chò mò, ma ko kwʉʼ no fampfen əzàs mpfʉ̀sə gwʉsə aghʉ wen. Ghə̀ a ku mu à ghə̀ŋ nə̀ kəzhwì kəŋwoʼkə ə bè chòsə̀ viʼi vətsen və a zhìʼ. 17A zhʉ a ghèn, ghə̀ a kiʼi kyeʼ lyelə wen a wenə kəvu, əfwoftə asaŋ ə ghʉ a wenə kàŋ, ali və nyùʼ yabyabsə shi nè zhiʼ a ghə̀ ko lə lɨmə no fa mpfen”. 18Ghə̀ gàʼ ali ə shə̀ʼtə̀ ntɨm ə jùŋ à vəwenə ə bè tyɨftə vəwenə a jisə a jisə. 19Kə ndiʼ ali Joyn lù ə ghàm fòyn Helòd a ghə̀ nsoʼo shə loʼo tsèn ghə̀ a ndiʼ ando ghə̀ ghaʼ shi Helodiyas a ndiʼi wì lèmə̀ wen ə bè nè nyʉ̀ byɨvə tsen və. 20A ndiʼ ando Joyn nghàmə̀ wen ali, ghə̀ bè nè to kətsenkə, ə ghaʼ Joyn ə shwin a nfɨŋ.

Yesò shi mu

21Ando Joyn nku mu a viʼi myètə, Yesò vi ghə̀ boŋ ku mu a wen. Ghə̀ nè sə njɨ̀mə̀, kaŋ boʼmə̀, 22Kəzhwì kəŋwoʼkə shiʼi a wen kətʉ, kəʼə to nə̀ kəlàto, gɨ fʉ̀ fa kaŋ gàʼà la “Wu diʼ wàyn kòŋ mo, ma saŋlə byìʼì wu nə̀ kwoŋ.”

Ngwaʼa ngə̀ŋ Yesò

23Yesò sə zìtə̀ shyèʼè wen a nsè diʼ ngwʉ̀ʼsə məwumə taʼ, diʼ wàyn Josèf ando viʼi nkòʼtə tìʼ Josèf diʼ Hèli. 24Hèli ndiʼ wàyn Matàt, Matàt ndiʼ wàyn Levì, Levì ndiʼ wàyn Melkì, Melkì ndiʼ wàyn Janày, Janày ndiʼ wàyn Josèf, 25Josèf ndiʼ wàyn Màtàtiyàs, Màtàtiyàs ndiʼ wàyn Emos, Emos ndiʼ wàyn Nawùm, Nawùm ndiʼ wàyn Esilì, Esilì ndiʼ wàyn Nagay, 26Nagay ndiʼ wàyn Mat, Mat ndiʼ wàyn Màtàtiyàs, Màtàtiyàs ndiʼ wàyn Simèyn, Simèyn ndiʼ wàyn Josèk, Josèk ndiʼ wàyn Jodà, 27Jodà ndiʼ wàyn Jùwanàn, Jùwanàn ndiʼ wàyn Lesà, Lesà ndiʼ wàyn Zèlubabèl, Zèlubabèl ndiʼ wàyn Shètèl, Shètèl ndiʼ wàyn Neli, 28Neli ndiʼ wàyn Melkì, Melkì ndiʼ wàyn Adì, Adì ndiʼ wàyn Kosàm, Kosàm ndiʼ wàyn Emadàm, Emadàm ndiʼ wàyn El. 29El ndiʼ wàyn Joshùwà, Joshùwà ndiʼ wàyn Eliyezà, Eliyezà ndiʼ wàyn Jolìm, Jolìm ndiʼ wàyn Matàt, Matàt ndiʼ wàyn Levì. 30Levì ndiʼ wàyn Simùn, Simùn ndiʼ wàyn Judiyà, Judiyà ndiʼ wàyn Josèf, Josèf ndiʼ wàyn Jonàm, Jonàm ndiʼ wàyn Eliyakìm, 31Eliyakìm ndiʼ wàyn Miliyà, Miliyà ndi wàyn Menà, Menà ndiʼ wàyn Màtatà, Màtatà ndiʼ wàyn Natàn, Natàn ndi wàyn Devìt. 32Devìt ndiʼ wàyn Jesì, Jesì ndiʼ wàyn Obèd, Obèd ndiʼ wàyn Bowàs, Bowàs ndiʼ wàyn Salmùn, Salmùn ndiʼ wàyn Nashòn, 33Nashòn ndiʼ wàyn Aminadàb, Aminadàb ndiʼ wàyn Adminada, Adminada ndiʼ wàyn Anì, Anì ndiʼ wàyn Helelòn, Helelòn ndiʼ wàyn Bèlès, Bèlès ndiʼ wàyn Judiyà. 34Judiyà ndiʼ wàyn Jàkob, Jàkob ndiʼ wàyn Izìk, Izìk ndiʼ wàyn Ablaham, Ablaham ndiʼ wàyn Telà, Telà ndiʼ wàyn Nawò, 35Nawò ndiʼ wàyn Selùk, Selùk ndiʼ wàyn Lu, Lu ndiʼ wàyn Belèk, Belèk ndiʼ wàyn Ebà, Ebà ndiʼ wàyn Shelà, 36Shelà ndiʼ wàyn Kenàn, Kenàn ndiʼ wàyn Afasàt, Afasàt ndiʼ wàyn Shèm, Shèm ndiʼ wàyn Nuwà, Nuwà ndiʼ wàyn Lamèk, 37Lamèk ndiʼ wàyn Metuselà, Metuselà ndiʼ wàyn Enòk, Enòk ndiʼ wàyn Jalet, Jalet ndiʼ wàyn Màʼalalil, Màʼalalil ndiʼ wàyn Kenàn, 38Kenàn ndiʼ wàyn Inòs, Inòs ndiʼ wàyn Set, Set ndiʼ wàyn Adàm, Adàm ndiʼ wàyn Nyìngòŋ.

Currently Selected:

Luk 3: bbkDBLnt

Highlight

Copy