Matìyò 28
28
Yesò lù fa pfʉ
(Mak 16.1-10; Luk 24.1-12; Jon 20.1-10)
1Və zhʉsə ə̀ zhɨ kətsi kə zhʉ̀təkə, tʉʼ lan a mbì kətsì a tì ngàm Vəjew, Mèli ə wù Magdala wenə Mèli tsen bwènə̀ dyʉ̀ a chʉ̀ sè Yesò. 2A sə tsèn ntsɨ̀ŋ Bobo shiʼi vì fa kàŋ shi nə̀ʼ no ŋàŋ. Ghə̀ dyʉ̀ a chʉ sè Yesò bùŋsə ngùʼ yì fa tsu lyisə kuʼ ŋwʉʼʉ à yi kətʉ. 3Kəʼ ntsɨ̀ŋ Bobo ayì mbanə to nə̀ ghʉ mwanəghə, ndisə wen sə be baynə to nə̀ awoŋə. 4Fanə ghaʼ vəsugyèʼ vì a və ntsɨ̀ŋə̀ sè ayì vəwenə fəŋkə a nse sə diʼ to nə̀ mpfʉ viʼi.
5Ntsɨŋ a yì mù gàʼà ki vi la, “Kə ghə̀ŋ à fàyn mà kɨ lè la ghə̀ŋ kəŋə. Yesò yì a və tə bàntə a kəntò lì. 6Ghə̀ ko diʼ a shèn. Ghə̀ lu li fa pfʉ ando ghə̀ ngaʼa. Ghə̀ŋ vi kwen yèn kəshi a ghə̀ tə nyoŋ tsu. 7Ghə̀ŋ zaŋsə lì dyʉ̀ shə̀ʼtə̀ à ndzɨ̀mtə̀sə bàm wen la ghə̀ lu li fa pfʉ, sə shiʼi dyʉ̀ a vəwenə a mbì a Galìlì. La vəwenə dyʉ̀ yèn wen tsu. Gaʼa kò ghə̀ŋ zhʉ li kənyʉ̀ a ma gaʼà.”
8Ki vi zàŋsə̀ lù fa benə sè yì nə̀ fanə alì saŋlə̀ no nànto mù nyɨŋ ədyʉ̀ shə̀ʼtə̀ à ndzɨ̀mtə̀sə bàm Yesò.
9A sə tsen Yesò bùmtə̀ vəwenə ə tòŋtə vəwenə gàʼà la,“Mbwaʼmə̀ dìʼ à ghə̀ŋ”, vəwenə dyʉ̀ ghàʼ aghʉ wen sə gumlə̀ wen. 10Yesò mù gàʼà vəwenə la, “Kə ghə̀ŋ be fwàyn. Ghə̀ŋ dyʉ̀ gàʼà vəlèmə̀ vwomə la vəwenə dyʉ̀ a Galìlì a vəwenə a yen mo tsu.”
Vəsugyèʼ shə̀ʼtə̀ kənyʉ̀ kì a kə ncho
11Ki vi lù sə njèʼè dyʉ̀ a ji vəsugyèʼ vətsenvə fa tì vi a və ntsɨŋə̀ sè Yesò lì kwen dyʉ̀ a tì ntə̀ʼ ə shə̀ʼtə̀ no ghò a ghə̀ yì chò a tʉtʉ vəpfèm və ngə̀ŋ Nyìngòŋ. 12Tʉtʉ vəpfèm a vi ghaʼ ntsèntə̀ wenə vəchəʼ və loʼ ə baʼtə kənyʉ̀ a vəwenə a gàʼ mù ku ko à vəsugyèʼ vi no ghoʼo, 13gàʼà la, “Ghə̀ŋ ngàʼà viʼi tò la ‘A tə ndiʼ nəntʉʼʉ ndzɨ̀mtə̀sə bàm wen sə vì yès bʉnə bʉ̀nə vəwenə tsoŋ kəmpfʉ kə wen lù nə̀ kəwenkə.’ 14Gumnà sə tsèn zhʉ̀ kənyʉ̀ akì yès a kɨ̀ ji tomsə shə̀ʼtə̀ à wen ndi chiʼi wen kə ghə̀ŋ à kwen a ngəʼ”
15Vəsugyèʼ a vyi shi ko ayi mù nè ando vəwenə ngàʼà. Ndzɨ̀ŋsə a sènsə a vəwenə mbwomə̀ lə̀ saykə̀ a loʼ ayì no tsèm. Vəjew mu sə tsi kɨ tò la və ntsòŋ kəmpfʉ kə Yesò tsoŋə əzaʼa fa lan.
Yesò fʉ̀ a kə̀ʼ ndzɨ̀mtə̀sə bàm wen
(Mak 16.14-18; Luk 24.36-49; Jon 20.19-23; She 1.6-8)
16Ndzɨ̀mtə̀sə bàm Yesò shì njʉ̀mùʼ zhʉ ntɨm wen ə dyʉ̀ zaʼa à Galìlì kùʼ a kwi pfen tsen a kəshi a ghə̀ ngàʼà vəwenə dyʉ̀ tsu. 17Vəwenə dyʉ̀ zaʼa tsu yèn wen mù sə̀ gumlə̀ wen, a lì vətsenvə bù momə̀ tò mwòmsə la wù lə̀ gàʼà la adiʼ wen lo. 18Yesò vìtə̀ boʼsə vəwenə mù gàʼ la “Nyìngòŋ ku li adyòʼ à mò no tsèm a kàŋ bènə̀ a nse la mà nsoʼo viʼi. 19Ghə̀ŋ dyʉ̀ lì à viʼi no a təloʼ tətsèm shəʼtə̀ ntɨm jùŋə ghom à vəwenə ndi vəwenə byɨmə ə̀ dzɨ̀mtə̀ mò, ghə̀ŋ ku mu à vəwenə a zhiʼ Tìʼ nə̀ wàyn bènə̀ kəzhwì kə ŋwoʼkə, 20ghə̀ŋ nziʼì vəwenə la vəwenə nghʉ nyʉ̀ vyi no tsèm a mà tə̀ gàʼ la ghə̀ŋ nè. Ghə̀ŋ nkɨ la mà ndiʼ vəghəŋ no məzhʉ̀ ntsèm.”
Currently Selected:
Matìyò 28: bbkDBLnt
Highlight
Share
Copy
Want to have your highlights saved across all your devices? Sign up or sign in
