Mak 1
1
Shyèʼè Joyn wù ku à mù
(Mat 3.1-12; Luk 3.1-18; Jon 1.19-28)
1Kènkə diʼ kənzìtə kə ntɨm jùŋə Yesò Klistò, ə Wàyn Nyìngòŋ. 2Nshə̀ʼtə̀ Isayà nsə̀ diʼ mu ghə̀ nyòʼò li ntɨm.
Nyìngòŋ ghə̀ gàʼà la, “Yen a! Mà lu tɨm wù ntɨm ə̀ mò ə ghə̀ dyʉ̀ à wù à mbì ə̀ shɨ̀tə̀ jì à wù. 3Wutsen ə zɨmə gàʼà fa nse zɨm la, ‘Ghə̀ŋ shɨtə jì Bobo. Ghə̀ŋ ne mə jìtə mə wen mə nàyn.’” 4Joyn wù ku à mù mfʉ li vì a nse zɨm sə shə̀ʼtə̀ ntɨm Nyìngòŋ gàʼà la, “Viʼi kwitə tətyɨm tə vəwenə ə shi mu ndi Nyìngòŋ maʼa nyʉ̀ byɨvə vəwenə.”
5Viʼi lù fa loʼ Judiyà nə̀ fa Jelusalèm tò vətsèm ə̀ dyʉ̀ à wen sə dì byìʼì mbyɨsə vəwenə. Ghə̀ ku mu à vəwenə à mù mə Jodàn.
6Kə ndiʼ a lì Joyn mòʼò ndisə mu və bo nə̀ nyɨŋsə nyàm tsen a və dzàŋə nə̀ Kamel, kwiʼi kətəŋ mu və shɨ̀tə̀ nə̀ gwʉ̀ nyàm. Fozhɨvə wen ndìʼ tò ngùməsə nə̀ fədyom. 7Ghə̀ nshə̀ʼtə̀ kənyʉ̀ kə Nyìngòŋ à viʼi gàʼà la, “Wìʼ ə vì fà mò bàm a ghə̀ chò mò. Mà ko kwʉ̀ʼ tè a nə̀ kəkòs əlaŋtə la mà zàtə̀ mpfʉ̀sə gwʉsə aghʉ wen. 8Mà ku mu à ghə̀ŋ tò nə̀ mu a lì ghə̀ diʼ vì ku mu à ghə̀ŋ nə̀ kəzhwì kə ŋwoʼəkə.”
Ando Yesò nshì mu Satan mwòm wen
(Mat 3.13–4.11; Luk 3.21-22; 4.1-13)
9Andìʼ to mətsì ayì, Yesò lù fa Nazalèt ashə loʼ Galìlì ə̀ dyʉ̀ Joyn ku mu à wen à mù mə Jodàn. 10Ghə̀ nè shì mu sə mfʉ̀ kuʼu vì fa mu, ə̀ yèn ando kaŋ bòʼmə̀, kəzhwì kə ŋwoʼəkə fʉ̀ shiʼi à wen a kətʉ diʼ tò nə̀ kəlàto. 11Gɨ̀ tsen fʉ̀ fa kàŋ gàʼà la, “Wù dìʼ wàyn kòŋ mò. Mà saŋlə̀ byìʼì wù nəkwoŋ.”
12No a zhʉ̀ kò, kəzhwì kəŋwoʼkə nè Yesò lù dyʉ̀ a nse zɨm, 13ə̀ tsì tsu mətsi məwum nkàʼ, Satan mwòmsə̀ wen, ghə̀ be tsi dyʉ̀ tò a shi a nyamsə toʼ sə ntsi tsu, alì ntsɨ̀ŋsə ngə̀ŋ Nyìngòŋ sə nlye wen.
Yesò dzàŋ viʼi ku shʉsə vəkàʼ a nə̀ ndzɨ̀mtə̀sə bàm ə wen
(Mat 4.12-22; Luk 4.14-15; 5.1-11)
14A ndìʼ ando və nwè Joyn a mfɨŋ, Yesò bwènə̀ kuʼ dyʉ̀ a Galìlì sə shə̀ʼtə̀ ntɨm jùŋ Nyìngòŋ tsu, 15gàʼà la, “Zhʉ kwʉʼʉ̀ li, soʼo Fòyn Nyìngòŋ boʼsə li. Ghə̀ŋ kwitə tətyɨm təŋtə fà ghə̀ŋ a mbyɨsə ə̀ byɨmə ntɨm jùŋə ghèn.”
16Andiʼ kətsi kətsenkə Yesò sə nchò fa mbyɨ̀ mo Galìlì, ə̀ yèn Simon wenə̀ lèmə̀ wen Andɨ̀lò, vəwenə mòʼò dyʉ̀ nə̀ fəlàm fə a tì à mù əku shʉsə ando andìʼ ə shwèʼè vəwenə. 17Ghə̀ mù gàʼ à vəwenə la, “Ghə̀ŋ vi ə dzɨ̀mtə̀ mò, mà ziʼi ghə̀ŋ, ghə̀ŋ mbòŋsə̀ kutə̀ viʼi.” 18No a zhʉ̀ kò, vəwenə ghʉsə məlàm mə vəwenə tsu ə dzɨ̀mtə̀ Yesò.
19Ghə̀ bè sə dyʉ̀tə̀ tò alə̀ bè yèn Jems wenə̀ lèmə̀ wen ə̀ Joyn vunə Zebedì vəwenə ŋwʉʼ à vəwenə a nkànuʼ temə məlàm mə vəwenə. 20Ando Yesò nyenə vəwenə ghə̀ dzàŋ vəwenə tò dzàŋə. Vəwenə fʉ̀ ghʉ̀sə tìʼ vəwenə wenə̀ viʼi shwèʼ vi a və ndiʼ tsu a tì nkànuʼ ayì ə̀ dzɨ̀mtə̀ dyʉ̀ nə̀ Yesò.
Yesò dzɨ̀m ə̀ shìsə̀ kəzhwì kə byɨkə fà wìʼ a wèn
(Luk 4.31-37)
21Vəwenə nè dyʉ̀ zaʼa a ntə̀ʼ Kàbanùm, a nsə ndiʼ a kətsi kə zhʉtəkə, ghə̀ dyʉ̀ kwèn a ngə̀ŋ ntsèntə̀ sə ziʼi viʼi tsu. 22Ziʼi wen nè viʼi sə diʼ nə̀ kaynə byìʼàndo ghə̀ ko ndìʼsə̀ a nə̀ ndìʼsə̀sə təsoʼ. Ghə̀ ndìʼsə̀ a nə̀ wìʼ a ghə̀ kìʼ àdyoʼ.
23A sətsèn və yen wìʼ a ngə̀ŋ ntsèntə̀ ayì ghə̀ kiʼ kəzhwì kə byɨkə kə nè ghə̀ zɨmə 24ə̀ gàʼ la, “Wù kəŋə ghò à yès a ntìntìn a Yesò wàyn wù Nazalèt ghèn, wù vi əbyɨsə yes mu? Mà kɨ li wìʼ a wù diʼ wen. A dìʼ wù, wu ŋwoʼə Nyìngòŋ.”
25A lì Yesò kəŋkə̀ kəzhwì kə byɨkə akì gàʼà la, “Kə be gàʼ! chò fʉ̀ fa wèn wìʼ ghèn!”
26Kəzhwì kə byɨkə akì nə̀ʼ wìʼ ayì no nànto ə̀ bè zɨ̀mə no a gɨ to ə̀ mù fʉ̀ fa wen a wèn. 27Viʼi sə diʼ nə̀ kanə mù sə bèmə̀ à vəwenə a ntìntìn la, “Kènkə dìʼ ghò? Nki ziʼi fighə mu? Wìʼ ghèn ə kàyntə̀ nyʉ̀ nə̀ àdyoʼ no tè bè zhwì byɨvə zhʉ wen.” 28Əzìtə̀ fa zhʉ ayì, soʼgho byìʼì ziʼi wen ayi sàykə dyʉ̀ no a shì tsèm a Galìlì.
Yesò chʉʼ viʼi no vəghoʼo
(Mat 8.14-17; Luk 4.38-41)
29Yesò wenə Jems nə̀ Joyn fʉ̀ fa ngə̀ŋ ntsèntə̀ yì no a zhʉ̀ kò ə̀ nàyn tò fəchìʼ a ngə̀ŋ Simon bènə̀ Andɨ̀lò. 30Kə nsə ndiʼ a lì chì Simon ə wùwì kiʼ fiba. Yesò sə nkwenə vì a ngə̀ŋ no a zhʉ̀ kò və shə̀ʼtə̀ kwaʼa ayi à wen. 31Ghə̀ dyʉ̀ ghàʼ kəvu kə wen ə̀ tsòʼsə̀ wen, no a zhʉ̀ kò bvìʼ wen yì mè ghə̀ lù ku fozhɨvə vəwenə zhɨ.
32A nè sə ndiʼ a kəlyɨŋ kə zhʉ mpfwòmə, viʼi vì nə̀ viʼi və kwaʼkəvə vəwenə no vətsèm bènə̀ vi a və nkiʼi zhwì byɨvə, 33viʼi lù fa ntə̀ʼ ayì no vətsèm ə̀ vì zhùŋtə̀ tò a chʉ ngə̀ŋ ayì. 34Yesò chʉʼ viʼi no vəghoʼo a və nkiʼi təkwaʼa tò a tənkì a tənkì, be dzɨ̀m shìsə̀ zhwì byɨvə no ghoʼo fa təwèn vətsenvə. Ghə̀ ndzɨ̀mə̀ a lì kò ghə̀ lə mbyɨmə la no kəzhwì kə byɨkə kə mùʼ kə gàʼ kənyʉ̀ byìʼàndo zhwì byɨvə a vyi nkɨ wen.
Yesò shə̀ʼtə̀ kənyʉ̀ kə Nyìngòŋ a Galìlì
(Luk 4.42-44)
35Tʉʼʉ sə nlàynə vì, ghə̀ lu ə̀ fʉ̀ dyʉ̀ a kəshi kəlyomtəkə tò wen nyɨŋ, mù sə jɨ̀mə̀. 36Simon wenə̀ viʼi jèʼè wen mù sə jèʼè kəŋə wen. 37A ndìʼ ando vəwenə nyènə wen, vəwenə gàʼ a wen la, “Və kəŋ wù tò vətsèm!”
38Ghə̀ gàʼ à vəwenə la, “Ghə̀ŋ vi vəghəŋ dyʉ̀ a ntə̀ʼsə sətsensə a sə boʼsə a shə̀, ndi mà be shə̀ʼtə̀ dyʉ̀ nə̀ kənyʉ̀ kə Nyìngòŋ kə tsu, byìʼàndo a dìʼ kənyʉ̀ a mà tə vì ənè.”
39Ghə̀ gàʼ a lì sə jèʼè no shi tsèm a Galìlì, kwenə a aloʼ ntsèntə̀sə vəwenə gàʼà kənyʉ̀ kə Nyìngòŋ tsu, be dzɨ̀mə̀ shìsə̀ zhwì byɨvə fà viʼi a təwèn.
Yesò chʉʼ wu kənsòtə̀
(Mat 8.1-4; Luk 5.12-16)
40Wù kənsòtə̀ tsen vì ə̀ shiʼi à wen a nchiʼsə alwi a shɨ Yesò mù sə sensə̀ wen gàʼà la, “Wù sətsèn kòŋ mù wù zi wù chʉʼ mo.”
41Yesò sə diʼ nə̀ kusə nshinsə à wìʼ ayì no nànto ə̀ nàʼsə̀ kəvu kə wen ə̀ kùmsə̀ wen ə̀ gàʼ la, “Ma kòŋ li, to lì.” 42No a zhʉ̀ kò, kənsòtə̀ akì mè fa wen a wèn ghə̀ to. 43Yesò mù gàʼ à wen la ghə̀ ə̀ ndyʉ̀ bè pfàntə̀ wen la, 44“Kə a mwòm la wù shə̀ʼtə̀ kənyʉ̀ a wìʼ a kə yì chò. Dyʉ̀ diʼ wen ə wu tò à pfèm ə̀ ngə̀ŋ Nyìngòŋ bè kù kəku kì a soʼ Mosìs ngàʼa, ndi dìʼ la wù to li fà wù a kənsòtə̀.” 45Ghə̀ bòŋsə̀ dyʉ̀ sə kwe no ndo ghə̀ shə̀ʼtə̀ kənyʉ̀ akì tò shə̀ʼtə̀ à wen. Soʼgho ayì sàykə̀ a shi no tsèm, kə mù sə chò Yesò ə ghə̀ kwen a tì ntə̀ʼ ayì a dayn, ghə̀ mù sə jèʼè dyʉ̀ tò fa wenə̀ loʼ a nse zɨm. Alì viʼi be sə fʉ fa shi tsèm tò fʉ vi yenə wen tsu.
Currently Selected:
Mak 1: bbkDBLnt
Highlight
Share
Copy
Want to have your highlights saved across all your devices? Sign up or sign in
