Mak 2

Yesò chʉʼ wù kənkwàʼkə̀

(Mat 9.1-8; Luk 5.17-26)

1Andìʼ ando, Yesò bwènə̀ dyʉ̀ a Kabanùm, viʼi zhʉ̀ la ghə̀ pfwo li, 2mù dyʉ̀ zhùŋtə̀ a ngə̀ŋ tsu no vəghoʼo a ji a no kəshi kə ko bè ndiʼ a tì ngə̀ŋ ko a kəbəŋ ə viʼi tɨmə tsu. Ghə̀ mù sə shə̀ʼtə̀ kənyʉ̀ kə Nyìngòŋ à vəwenə. 3A sə laʼtə viʼi vətsenvə vəkàʼ byèʼè wù kənkwàʼkə̀ sə vì nə̀ wen a əghàm. 4Vəwenə vì kò jì lu ndiʼ, vəwenə kuʼ a kətʉ kə ngə̀ŋ ə̀ tsuʼ kəbʉ̀ʼ a kətʉ kə kəshi a Yesò ndìʼ tsu. Ə̀ shiʼsə wù kənkwàʼkə̀ ayì fa tsu ə̀ nyòŋsə̀ a shɨ Yesò. 5Yesò nè yèn byɨmə yi a viʼi a vyi nkiʼi ə̀ gàʼ à wù kənkwàʼkə̀ yì la, “Və maʼà li nyʉ̀ byɨvə ə̀ wù.”

6Ndìʼsə̀sə təsoʼ sə tsensə a sə ŋwʉʼ tsu yen kənyʉ̀ akì mù sə nyoʼo kantə̀ à vəwenə a ntìntìn la, 7“Byìʼì ghò a wìʼ ghèn gàʼà alə̀ a? Ghə̀ telə̀ Nyìngòŋ. A lè zì à maʼa ndo nyʉ̀ byɨvə ə̀ wìʼ ə chò tò Nyìngòŋ a.”

8Nò a zhʉ̀ kò, Yesò kɨ nyʉ̀ vyi a vəwenə nkwòʼtə̀ lì mù bèm à vəwenə la, “Ghə̀ŋ kantə̀ nyʉ̀ venə alə̀ byìʼì ghò? 9A bwaʼmə̀ kə kò; əgàʼ à wù kənkwàʼkə̀ ghèn a? La, ‘Və maʼà li nyʉ̀ byɨvə’ wù mu əgàʼ à wen la, ‘Lù lyɨ̀ əghàm wu ə njèʼè lò’? 10Mà a dìʼ à ghə̀ŋ luwèn la wàyn wìʼ kiʼi kədyòʼ a nse a shèn ə maʼa nyʉ̀ byɨvə viʼi.” 11Ando ghə̀ ngàʼ a lì, ghə̀ mù gàʼ à wù kənkwàʼkə̀ yì la, “Mà gàʼà à wù la wù lu lyɨ̀ əghàm wu ə mpfwo!”

12Tò a zhʉ ayì, ghə̀ lù tò a shɨ viʼi vətsèm ə̀ lyɨ̀ əghàm kə wen ə̀ fʉ sə dyʉ̀. Vəwenə vətsèm ndìʼ nə̀ kanə mù sə bwomsə̀ Nyìngòŋ gàʼà la, “Yès nko təmə̀ yèn nki kənyʉ̀ alə̀.”

Yesò dzàŋ Levì

(Mat 9.9-13; Luk 5.27-32)

13Yesò bwènə̀ dyʉ̀ a mbyɨ̀ mo Galìlì. Viʼi zhùŋtə̀ a wen a mbyɨ̀ no vəghoʼo ghə̀ mù sə ziʼi vəwenə. 14Ghə̀ nè lù sə njèʼè dyʉ̀ yèn Levì wàyn Alphùyùs a andiʼì wù tinə̀ kənsè ghə̀ ŋwʉʼ a tò yì a və ntinə kənsè tsu, ə̀ gàʼ à wen la, “Dzɨ̀mtə̀ mo” No a zhʉ̀ ko, ghə̀ lù sə dyʉ̀ fà wen a bàm.

15Yesò wenə̀ ndzɨ̀mtə̀sə bàm wen nè dyʉ̀ ŋwʉʼʉ a kəshi kə kəzhɨ a ngə̀ŋ Levì viʼi ntinə kənsè vətsenvə bènə̀ viʼi nè nyʉ̀ byɨvə vətsenvə no vəghoʼo vì tsèntə̀ Yesò wenə̀ ndzɨ̀mtə̀sə bàm wen a kəshi kə kəzhɨ byìʼàndo andìʼ a lì viʼi jèʼè fa bàm Yesò no vəghoʼo. 16Ndìʼsə̀sə təsoʼ shì bènə̀ Falàsi vi a və ndiʼì tsu nè yèn ando ghə̀ zhɨ wenə̀ viʼi ne nyʉ̀ byɨvə bènə̀ viʼi tinə̀ kənsè, mù sə bèmə̀ à ndzɨ̀mtə̀sə bàm wen la, “Byìʼì ghò a ghə̀ zhɨ wenə̀ viʼi tinə̀ kənsè bènə̀ viʼi nè nyʉ̀ byɨvə vətsenvə a?”

17Yesò zhʉ kənyʉ̀ a vəwenə mbèmə̀ mù bèm à vəwenə la, “A lu mbi ngə̀ŋ ndò ghə̀ bè sə kəŋə kəfʉ a? A nə̀ nkəŋə tò viʼi vəkwaʼkəvə. Mà ko tə vì ə tisə viʼi kənyʉ̀ kə tɨməkə. Mà tə vì ə tisə viʼi nè nyʉ̀ byɨvə.”

Yesò gàʼ byìʼì bamə chʉ̀

(Mat 9.14-17; Luk 5.33-39)

18Tʉʼ layn kətsi kətsenkə, ndzɨ̀mtə̀sə bàm Joyn wù ku à mù bènə̀ Və Falàsi sə bamə chʉ̀, viʼi vì bèm à Yesò la, “Ndzɨ̀mtə̀sə bàm Joyn sə bamə chʉ̀, ndzɨ̀mtə̀sə bàm Və Falàsi sə bè bamə chʉ̀, shyə̀sə zhɨ tò zhɨ byìʼì ghò?”

19Yesò bwènsə̀ gàʼ à vəwenə la, “Viʼi zì kò və lə̀ dyʉ̀ a lam mbamə chʉ̀ lɨm ə wùwì bo bu tsu. Ghə̀ sətsèn ndiʼ tò tsu kò vəwenə à faŋ ke zhɨ. 20Kətsi kə lu vì a və a lyɨ̀ lɨm ə̀ wùwì lù nə̀ wen fà vəwenə a ntìntìn, vəwenə mu mbamə chʉ̀ a zhʉ ayì.

21“Wìʼ zì kò ghə̀ lə̀ lyɨ̀ kəbàs kə ndisə kəfi kə əbaʼsə ndisə mu sə tsu byìʼàndo ghə̀ sətsèn nè a lì, kəbàs kə ndisə kə fikə akì à bwènsə̀ tsuʼmə, sə tsuʼmə a zhʉ ayì tsuʼ ghoʼsə kəbʉ̀ʼ akì a və yì bàʼsə lì. 22Wìʼ zì kò ghə̀ lə̀ wè məlyʉ̀ʼ kèn la mə to li a vəsàʼ və gwʉ̀ nyàm və muvə. Ghə̀ sətsèn we, məlyʉ̀ʼ a mì nè sə to bàytə̀ vəsàʼ a vyi à mu ndiʼ la məlyʉ̀ʼ ə le li, vəsàʼ be nle. Kə bòŋ la və nwe məlyʉ̀ʼ kèn la mə to li tò a vesàʼ və fivə.”

Yesò gàʼ kùmə̀ kətsi kəzhʉtəkə Vəjew

(Mat 12.1-8; Luk 6.1-5)

23A sə ndiʼ a kətsi kə zhʉtəkə kətsenkə, Yesò sə nchò fa mbwaʼ sɨ̀m asaŋ dyə wenə̀ ndzɨ̀mtə̀sə bàm wen, vəwenə sə kwàʼtə̀ tʉ asaŋ tsenəvə. 24Və Falàsi vi mù bèm à wen la, “Byìʼì ghò a ndzɨ̀mtə̀sə bàm wù sə nè nki kənyʉ̀ kènkə a kətsi kə zhʉtəkə a soʼ ko byɨmə a?”

25Yesò bwènsə̀ bèm à vəwenə la, “Ghə̀ŋ bè ko təmə̀ dzàŋ əzhʉ kənyʉ̀ kì a Devìt nlù nè a tʉʼ yì a ghə̀ nkəŋ kəfo əzhɨ ando jɨ̀ŋ nzafə wen wenə̀ viʼi wen lo? 26Ghə̀ nkwen a ngə̀ŋ Nyìngòŋ wenə̀ viʼi wen a vyi, andiʼ Abyatà diʼ kətʉ kə Tʉtʉ vəpfèm və ngə̀ŋ Nyìngòŋ tsu, ə̀ lyɨ̀ kəbayn və nku kəku tsu a Nyìngòŋ ə̀ zhɨ a soʼ ndìʼ la a diʼi zhɨ tò vəpfèm və ngə̀ŋ Nyìngòŋ.”

27Yesò gàʼ a lì bè mù gàʼ mwètə̀ la, “Nyìngòŋ nshɨ̀tə kətsi kə zhʉtəkə kèn a njùŋ wìʼ ghə̀ nko shɨ̀tə wìʼ la ghə̀ ghʉ kətsi kə zhʉtəkə kədyàŋ. 28Adiʼ kənyʉ̀ ki a Wàyn Wìʼ kìʼ kədyòʼ ənè no ghò a kətsi kə zhʉtəkə kèn.”

Currently Selected:

Mak 2: bbkDBLnt

Highlight

Copy