Mak 10
10
Yesò ziʼi kùmə̀ kəngə̀sə̀ kə lam
(Mat 19.1-12; Luk 16.18)
1Yesò lù fa Kabanùm ayì ə təmə̀ dyʉ̀ a shyə Judiyà a ndzèn mù mə Jodàn. Nòyn viʼi bè vì tò vi à wen, ghə̀ sə ziʼi vəwenə ando ghə̀ nziʼi.
2Və Falàsi vətsenvə vì əzhʉtə chʉ wen mù bèm à wen la, “Soʼo lè byɨmə la wìʼ dzɨ̀mə̀ wì wen a?”
3Ghə̀ bwènsə̀ bèm à vəwenə la, “Mosìs nku soʼ à ghə̀ŋ la ghò?”
4Vəwenə gàʼ la, “Mosìs mbyɨmə li la wìʼ zì ghə̀ dzɨ̀mə̀ wì wen ə̀ nyòʼ ŋwàʼlə̀ ə kù à wen la ghə̀ dzɨ̀mə̀ li wen.”
5Yesò gàʼ à vəwenə la, “Mosìs ə nyoʼo soʼ ghenə à ghə̀ŋ byìʼàndo ghə̀ŋ nchiʼì kətʉ əzhʉ ziʼi, 6alì mu à ndìʼ a kənzìtə̀ kə mbi, ‘Nyìngòŋ nshɨ̀tə̀ wulɨm bènə̀ wùwì’, mù gàʼ la, 7‘Byìʼì alə̀, wulɨm lə lù mòʼtə tìʼ wen nə̀ lì wen ə dyʉ̀ tsèntə wenə̀ wì wen, 8vəwenə vəbò mu mbwènsə̀ diʼ a nə̀ kəfo kə mùʼ’, kèn la wìʼ be kiʼi kənyʉ̀ kə ngə̀ŋ wen. 9Kə lì dìʼì la, no ghò a Nyìngòŋ kwiʼi, kə wìʼ à zàs.”
10Vəwenə nè bwènə̀ pfwo a ngə̀ŋ, ndzɨ̀mtə̀sə bàm wen sə bè gàʼ à wen la, ghə̀ gaʼà laynsə tʉ vəwenə byìʼì kənyʉ̀ kə lam akì. 11Ghə̀ gàʼ à vəwenə la, “No ndò sətsèn dzɨ̀m wì wen ə̀ dyʉ̀ làm ghə̀ kədyàŋ, mu ghə̀ nè li mbyɨ à wùwì mbì yì. 12Ndə̀ŋndəŋ ando wùwì sətsèn fʉ̀ lam bè dyʉ̀ lam wù kədyàŋ, mu ghə̀ tsi li nə̀ wulɨm a ko diʼ ghə̀ wen.”
Yesò bwaʼsə̀ vunə
(Mat 19.13-15; Luk 18.15-17)
13Viʼi sə lyɨ̀ vunə və tyətəvə vì nə̀ vəwenə à Yesò a kətsi kətsenkə la ghə̀ kumsə vəwenə ə̀ bwàʼsə vəwenə, ndzɨ̀mtə̀sə bàm wen sə yen a lì ə̀ sə̀ kənkə viʼi a vyi. 14Yesò nè yèn kənyʉ̀ akì a vəwenə nè lì ə̀ fwisə tin ə̀ gàʼ à vəwenə la, “Ghə̀ŋ ghʉsə vunə vəwenə vi à mò. Kə ghə̀ŋ be tàm vəwenə byìʼe fòyn ə Nyìngòŋ kiʼ viʼi a nə̀ vəwenə. 15Mà gàʼà à ghə̀ŋ nəmwèʼè la, no ndò a ghə̀ fàŋ ke byɨmə fòyn Nyìngòŋ a nə̀ wàyn bwaʼ, kò ghə̀ lə̀ kwèn a fòyn Nyìngòŋ ayì.” 16Ghə̀ gàʼ a lì ə̀ tsòʼsə̀ vəwenə ə̀ mù ghʉ avu wen a vəwenə a tʉ ə̀ bwàʼsə vəwenə.
Wu ghoʼo vì əyen Yesò
(Mat 19.16-30; Luk 18.18-30)
17Yesò nè lù sə ndyʉ̀ a ji, wutsen nyɨ̀ŋ vì shiʼi à wen alwi ashɨ Yesò ə bèm à wen la, “Ndìʼsə̀ jùŋ, mà lè zì mà ne no ghò ndi lu kiʼi bwoŋ yi a ghə̀ ko lə mè a?”
18Yesò bèm à wen la, “Byìʼì ghò a wu dzàŋ mò nə̀ wu jùŋ a?” No wu jùŋ ko diʼ əchò tò Nyìngòŋ. 19Wù kɨ təsoʼ tèntə a tə gàʼà la, “Kə wìʼ à zhwi, kə wìʼ à tsi nə̀ wì wìʼ ko wenə lɨm wìʼ, kə wìʼ à tsoŋ, kə wìʼ à zhò ndzɨ̀ŋsə, kə wìʼ à tɨmə a bàm wìʼ a ghə̀ zhò ndɨ̀ŋ, kə wìʼ à zhɨ wutsen a tof, ngumlə̀ tìʼ wù bènə̀ lì wù.”
20Wìʼ ayì gàʼ à wen la, “Ndìʼsə̀, mà ghʉ li təsoʼ a tèntə no tətsèm fa tʉʼ a mà mbu wàyndyə.”
21Yesò ki wen alə̀ nə̀ kòŋə mù gàʼ à wen la, “kənyʉ̀ kə mùʼ kə diʼ a wù ko təmə̀ nè. Dyʉ̀ baʼlə fo vyə no tsèm ə̀ ku ko yi à viʼi kəmfem, ndi lu kiʼi ghoʼo a kàŋ. Wù nè a lì, wu vì ə̀ dzɨ̀mtə̀ mò.” 22Ghə̀ nè zhʉ gàʼa Yesò aghenə, kəʼə wen byɨf no tsèm, ghə̀ lù kò ghə̀ mbè saŋlə̀ byìʼàndo ghə̀ nkiʼi ghoʼ no a nkàyn.
23Yesò ki kaʼsə nə̀ viʼi a wen a mbyɨ̀ ə̀ gàʼ à ndzɨ̀mtə̀sə bàm wen la, “Kə lu nto no nànto ə viʼi və ghoʼkəvə kwen a kəshi kə fòyn Nyìngòŋ!”
24Təchʉ̀ tə ndzɨ̀mtə̀sə bàm wen tə zɨmtə. Yesò bè mù gàʼ la, “Kə lutə̀ sù to a vunə vwomə əkwen a kəshi kə fòyn Nyìngòŋ! 25Kə bwaʼmə̀ à lyeŋ ə ghə̀ chò fa kəbʉ̀ʼ kə nsoʼ chò la wu ghoʼo kwen a kəshi kə fòyn Nyìngòŋ.” 26Gaʼa Yesò aghenə kwen a təwèn ndzɨ̀mtə̀sə bàm wen, vəwenə sə bèmə̀ la kə lè yì ndiʼ a lì, “A lù bwòŋ ndò?”
27Yesò ki vəwenə tò fəchìʼ mù gàʼ à vəwenə la, “kənyʉ̀ a kènkə to ghoʼo tò viʼi alì kò kə lə nto chò Nyìngòŋ byìʼàndo nyʉ̀ tsèm bwaʼmə̀ à Nyìngòŋ.”
28Bità zìtə̀ sə gàʼ à wen la, “Gaʼa kò wù yen li ando yès moʼtə̀ no ghò yes sə dzɨ̀mtə̀ wù?”
29Yesò gàʼ à vəwenə la, “Mà gàʼà à ghə̀ŋ nəmwèʼè la wìʼ ko diʼ a ghə̀ moʼtə̀ kəbəŋ kə wen, ko vəlèmə̀ vəwen ko vəlèmə̀ və wen ki, ko lì wen, ko tìʼ wen, ko təsɨm təwen, ko vunə wen, byìʼì mò bènə̀ ntɨm ə jùŋ, 30a ghə̀ ne fàŋ ke kiʼi məbəŋ, nə̀ vəlèmə̀ və wen, nə̀ vəlèmə̀ və wen ki, nə̀ və mpfi, nə̀ vunə, nə̀ təsɨm tə wen a ghàyn ghɨ no tè be a mbi layn, alì və bè tsuʼ aghʉ wen. Kətsi lə vì a ghə̀ a kiʼi bwòŋ a ghə̀ ko lə mè. 31Nghoʼo viʼi a və diʼ a mbì luwèn lu ndiʼ a bàm, viʼi be diʼ a bàm luwèn a və lu ndiʼ a mbì.”
Yesò bè gàʼ byìʼì pfʉ wen
(Mat 20.17-19; Luk 18.31-34)
32Yesò wenə̀ viʼi lù a zhʉ aghèn sə kuʼu dyʉ̀ a Jelusalèm. Yesò dyʉ̀ fa mbì ndzɨ̀mtə̀sə bàm wen shì njʉ̀sə̀bò, vəwenə diʼ nə̀ kanə. Viʼi vətsenvə a və mboʼsə̀ lì be diʼ nə̀ fanə. Yesò gùbtə̀ ndzɨ̀mtə̀sə bàm wen shì njʉ̀sə̀bò ə̀ shə̀ʼtə̀ kənyʉ̀ kì à vəwenə a kə ne fʉ̀ à wen. 33Ghə̀ mù gàʼ la, “Ghə̀ŋ nkɨ la ando vəghəŋ ə kuʼu dyʉ̀ a Jelusalèm luwèn lə̀, və diʼ a dyʉ̀ ku Wàyn Wìʼ à tʉtʉ vəpfèm və ngə̀ŋ Nyìngòŋ bènə̀ ndìʼsə̀sə təsoʼ. Vəwenə a chòsə̀ soʼ la ghə̀ dìʼì pfʉ mu ku wen à viʼi tɨm 34vəwenə chəʼ wen, chʉ̀ mənte à wen a wèn, ghòm wen nə̀ ngwàynsə bè ghàʼa wen ə̀ zhwi. A sə ndiʼ a mətsì ntaʼ ghə̀ lù fa pfʉ.”
35Jems wenə̀ Joyn, ə̀ vunə Zebedì kwentə vì a mbì ə̀ gàʼ à Yesò la, “Ndìʼsə̀, yès kəŋə la wù ne no ghò à yès a yès a bèm à wù.”
36Ghə̀ bèm à vəwenə la, “Ghə̀ŋ kəŋə la mà ne ghò à ghə̀ŋ a?”
37Vəwenə bwènsə̀ la, “Byɨmə la à lu ndiʼ a tʉʼ a wù sə soʼo fòn wu, vəghəŋ ŋwʉʼ a muʼu, wìʼ mùʼ ŋwʉʼ à wù a kwoŋ toghə, ghə̀ tsen ŋwʉʼ à wù a kwoŋ nànkwè.”
38Yesò gàʼ à vəwenə la, “Ghə̀ŋ ko kɨ̀ kənyʉ̀ a ghə̀ŋ ə gàʼà.” Be mù bèm à vəwenə la, “Ghə̀ŋ lè zì ghə̀ŋ yen ngəʼ yì a mà diʼi ne yen be pfʉ a?”
39Vəwenə byɨmə. Yesò gàʼ à vəwenə la,“Nəmwèʼè, ghə̀ŋ ne yen ngəʼ a mà dìʼi ne yen be pfʉ, 40alì à ko diʼ kəshi kom ə gàʼ la wìʼ ŋwʉʼʉ a mò a kwoŋ toghə ko à mò à kwoŋ nànkwè. Shi a vyi diʼ à kiʼ viʼi vyi a və tə shɨ̀tə̀ nghʉ à vəwenə.”
41Ndzɨ̀mtə̀sə bàm sətsen shì wum nè zhʉ̀ kənyʉ̀ akì sə fwisə tin à Jems wenə̀ Joyn. 42Yesò tsèntə̀ vəwenə ə̀ gàʼ à vəwenə la, “Ghə̀ŋ kɨ la təfòn tə mbi tə kiʼ àdyoʼ a kətʉ viʼi vəwenə be soʼo zhiʼtə viʼi vəwenə. 43Kə ko dìʼ ndiʼ a lì à ghə̀ŋ a ntìntìn. No ndò a ghə̀ kəŋə ndiʼ kətʉ a ghə̀ŋ a ntìntìn bòŋsə̀ diʼ ndiʼ wù shwèʼ à ghə̀ŋ vətsèm. 44No ndò yì a ghə̀ be kəŋə ndiʼ a mbì bòŋsə diʼ ndiʼ kəkòs à viʼi vətsèm. 45Kə diʼ ndiʼ a lì byìʼàndo Wàyn Wìʼ ko tə vì la və nshwèʼè à wen. Ghə̀ tə vì əshwèʼ à viʼi ndi be ku sò kətʉ wen ə pfʉ ndi zen kətʉ kə nghoʼo viʼi.”
Yesò chʉʼ wù shwèʼ tsen a və ndzàŋə̀ wen nə̀ Bàtìmayùs
(Mat 20.29-34; Luk 18.35-43)
46Yesò wenə̀ ndzɨ̀mtə̀sə bàm wen ə boʼsə nə̀ nòyn viʼi vi nè vì zaʼa a Jelikò yèn wù kənshɨ̀f tsen a və ndzàŋə̀ wen nə̀ Bàtìmayùs andiʼ wàyn Timayòs ghə̀ ŋwʉʼ a wenə ji lonə fo. 47Ghə̀ nè zhʉ̀ la andiʼ Yesò ə wàyn wù Nazalèt a ghə̀ chò ə̀ zɨ̀mə gàʼ la, “Yesò wàyn fòn Devìt, kusə nshinsə à mò.”
48Viʼi no vəghoʼo sə chìʼì wen gàʼà la ghə̀ chɨmə la kùʼ, ghə̀ bòŋsə̀ sə zɨmə̀ tò zɨ̀mə gàʼà la, “Wàyn Devìt kusə nshinsə à mò.”
49Yesò tɨmə mù gàʼ la, “Ghə̀ŋ dzàŋ wen ghə̀ vi à mò.” Vəwenə dzàŋ wù kənshɨ̀f ayì ə̀ gàʼ à wen a zhʉ ayì la, “Kə a fàyn, lù vì, ghə̀ ye ghə̀ dzàŋə̀ wù.”
50Ghə̀ zàʼà màʼà kəgwʉ̀nə̀ kə wen ə̀ nyɨŋ dyʉ̀ à Yesò.
51Yesò bèm à wen la, “Wù kəŋ la mà ne ghò à wù a?” Ghə̀ gàʼ la, “Ndìʼsə̀, ne ma mbwènsə̀ yenə shi.”
52Yesò gàʼ à wen la, “Bwènə̀ mpfwo wù. Byɨmə wu ne li wù nto.”
No a zhʉ̀ kò, ghə̀ bwènsə̀ sə̀ yenə shi ə̀ lù sə̀ dzɨ̀mtə̀ dyʉ̀ nə̀ wen.
Currently Selected:
Mak 10: bbkDBLnt
Highlight
Share
Copy
Want to have your highlights saved across all your devices? Sign up or sign in
