Mak 11
11
Yesò kwen a Jelusalèm a nə̀ fòn
(Mat 21.1-11; Luk 19.28-40; Jon 12.12-19)
1Yesò wenə̀ ndzɨ̀mtə̀sə bàm wen nè jèʼ dyʉ̀ boʼsə a Jelusalèm, a mbyɨ ntə̀ʼsə sətsensə a və ndzàŋə̀ la Bephag nə̀ Betanì, sə diʼ a mbyɨ̀ pfèn Olìf. Yesò tɨm ndzɨ̀mtə̀sə bàm wen la səbò, 2gàʼà à vəwenə la, “Ghə̀ŋ kwen ə̀ dyʉ̀ a tì ntə̀ʼ ghèn à ghə̀ŋ a shɨ lə̀. Ghə̀ŋ ne sə nkwenə dyʉ̀ ə yen wàyn Jàkas a və chuŋə̀ tsu kèn la wìʼ ntɨmə̀ kùʼ à yì a kətʉ. Ghə̀ŋ zas ə̀ vì nə̀ wen. 3Ghə̀ŋ sətsèn sə nzàsə̀ à bèm tè ndò à ghə̀ŋ la à gàʼ ndò la ghə̀ŋ zas lo, ghə̀ŋ gàʼa la, Bobo kiʼ kənyʉ̀ ənè nə̀ wen, diʼ be a bwènsə̀ tɨm tò luwèn.”
4Vəwenə lù dyʉ̀ yèn wàyn Jakas ghə̀ ti a ji mu və chuŋ li a kətyɨ a chʉ ngə̀ŋ vəwenə zas. 5Ando vəwenə nzàsə̀ viʼi a və nti tsu bèm la,“Ghə̀ŋ zàsə̀ Jakas yì ənè ghò tsu a?”
6Vəwenə bwènsə̀ gàʼ ando Yesò yì gàʼ à vəwenə. Viʼi a vyi ghʉsə vəwenə lyɨ̀ lù nə̀ wen. 7Ndzɨ̀mtə̀sə bàm wen ashì vì nə̀ wàyn Jàkas ayì à Yesò ə̀ zìsə̀ ndisə vəwenə à yì a kətʉ. Yesò kuʼ ŋwʉʼʉ tsu. 8Viʼi no vəghoʼo tsuʼtə ndisə vəwenə ə̀ mòʼ a ji, vətsenvə kwàʼtə̀ tʉ nkòʼ fa təsɨm ə̀ mòʼ a ji ghə̀ chò fà yì a kətʉ. 9Viʼi a və ndyʉ̀ fa mbì bènə̀ vi a və mvì fa bàm sə zɨmə̀ gàʼà la, “Hosanà! mbwaʼmə̀ dìʼ à wìʼ yì a ghə̀ vi a zhiʼ Bobo!” 10Mbwaʼmə fòn diʼ a fòyn ə Devìt yì a ghə̀ vì! Hosanà dìʼ à Nyìngòŋ yì a ghə̀ diʼì a kəshi kə ŋaŋtəkə!
11Yesò nè kwèn a Jelusalèm ə̀ dyʉ̀ a ngə̀ŋ Nyìngòŋ ghoʼo ə̀ ki kaʼsə nə̀ fo no tsèm ə̀ bwènə̀ fʉ̀ wenə̀ ndzɨ̀mtə̀sə bàm shi njʉ̀sə̀ bò wen ə̀ dyʉ̀ a Betanì byìʼàndo zhʉ nsə̀ diʼ mu ghə̀ dyʉ̀ li no alə̀.
Yesò ghʉ kòn a wèn fəkòʼ fə figs
(Mat 21.18-19)
12Tʉʼ lan, vəwenə sə mbwènə̀ vì fa Betanì, jɨ̀ŋ sə zafə Yesò. 13Ghə̀ sə ki dyʉ̀sə̀ ə̀ yèn fəkòʼ fə figs fə ti no kəghaf mu fə zhʉ̀ li no a nkàyn. Ghə̀ dyʉ̀ à yì a ti əyen la yì a yen ashɨ tsu lo, alì bòŋsə̀ yen tò təfʉ byìʼàndo a nko diʼ zhʉ a fə lu nkumə̀. 14Ghə̀ mù ghʉ kòn a wèn fəkòʼ ayì gàʼà la,“Wìʼ ko lu be pfiʼ ashɨ mu ghə̀ kwòŋ fà wù a kətʉ!” Ndzɨ̀mtə̀sə bàm wen sə zhʉ kənyʉ̀ akì a ghə̀ ngaʼà lì.
Yesò dyʉ̀ a ngə̀ŋ Nyìngòŋ ghoʼo
(Mat 21.12-17; Luk 19.45-48; Jon 2.13-22)
15Vəwenə nè dyʉ̀ zaʼa a Jelusalèm, Yesò dyʉ̀ kwèn a ngə̀ŋ Nyìngòŋ ghoʼo ə̀ dzɨ̀m shìsə̀ viʼi vyi a və mbaʼlə̀ bè zenə tsu. Ghə̀ tenlə chiʼ vi a viʼi nkwitə ko à yì a tʉ, bə̀ŋsə kɨ vi a viʼi ŋwʉʼ tsu baʼlə̀ làto. 16Ghə̀ nkò byɨmə la wìʼ bwèʼè kəfo kə baʼlə kə kətsenkə chò fa fətin fə ngə̀ŋ Nyìngòŋ ghoʼo. 17Ghə̀ nè sə nziʼì vəwenə mù bèm à vəwenə la, “Gaʼa ko və nyòʼò li a ŋwàʼlə̀ Nyìngòŋ la, ‘viʼi lu ndzàŋə̀ ngə̀ŋ ghom la ngə̀ŋ jɨ̀m à viʼi mbyi venə no vətsèm lo’ Ghə̀ŋ nkaʼsə luwèn à sə diʼ kəshi a vətsoŋ ə lyòmtə̀ tsu!”
18Tʉtʉ vəpfèm və ngə̀ŋ Nyìngòŋ wenə̀ ndìʼsə̀sə təsoʼ nè zhʉ̀ kənyʉ̀ akì mù sə kəŋə ji əzhwi Yesò. Vəwenə mfànə̀ wen byìʼàndo nòyn yi no tsèm ndìʼ nə̀ kanə byìʼì nyʉ̀ a ghə̀ diʼsə.
19A nè sə ndiʼ a kəlyɨŋ kə mpfwomə Yesò wenə̀ ndzɨ̀mtə̀sə bàm wen fʉ̀ fa ntə̀ʼ ayì.
Yesò ziʼi kùmə̀ kənyʉ̀ a byɨmə zì ghə̀ ne
(Mat 21.20-22)
20Tʉʼ nè layn tò tsi boʼòngə̀ŋ, Yesò wenə̀ ndzɨ̀mtə̀sə bàm wen sə mbwènə̀ dyʉ̀ ə̀ yèn fəkòʼ fə figs fìfə a Yesò tə ghʉ kòn a wèn ə̀ fəwenfə lì mu fə zɨm li alə̀ aghaŋ yi nzɨm, 21Bità bwènsə̀ kwòʼtə̀ kənyʉ̀ kì a kə tə chò ə̀ gàʼ à Yesò la, “Yen a ndìʼsə̀, fəkòʼ fì a wù tə ghʉ kòn a wèn fəwenfə lì zɨm li!”
22Yesò bwènsə̀ gàʼ à vəwenə la, “Ghə̀ŋ sətsèn nchoʼsə̀ tò à Nyìngòŋ 23mu mà gàʼà à ghə̀ŋ nəmwèʼè la, à gàʼ tè ndò fà ghə̀ŋ a ntìntìn à pfèn ghoʼo ghèn la tuʼmə ə̀ dyʉ̀ tsòʼ à mù mə nghoʼomə̀. Sə ngàʼà a lì kò ghə̀ lu nkwòʼtə̀ kwoʼtə alì kiʼ byɨmə la kənyʉ̀ akì a ghə̀ gàʼà lì a lyɨ kəshi mu və a ne ə kə lyɨ kəshi ando ghə̀ gaʼà. 24Ma mù sə gàʼà à ghə̀ŋ la ghə̀ŋ sətsèn njɨ̀mə̀ bèmə̀ no ghò à Nyìngòŋ byɨmə la ghə̀ŋ kiʼi li kəfo akì mu ghə̀ŋ ne kiʼi. 25Wù nè tɨ̀mə no a zhʉ̀ kò sə njɨ̀mə̀ nkiʼ kənyʉ̀ wenə̀ wìʼ, wu maʼa kənyʉ̀ akì ndi tìʼ wù yì a ghə̀ diʼ a kàŋ be lyèsə̀ ku mbyɨsə shyə̀sə. 26Wù sətsèn fàŋ ke maʼa mbyɨsə viʼi vətsenvə kò tìʼ wù yì a ghə̀ diʼ a kàŋ à màʼà mbyɨsə shyə̀sə.”
Viʼi sə bèmə̀ əkɨ kəshi a Yesò lyɨ̀ kədyòʼ fa tsu
(Mat 21.23-27; Luk 20.1-8)
27Yesò wenə ndzɨ̀mtə̀sə bàm wen bè bwènə̀ dyʉ̀ a Jelusalèm. Ghə̀ nè sə njèʼè fa tì ngə̀ŋ Nyìngòŋ, tʉtʉ vəpfèm və ngə̀ŋ Nyìngòŋ nə̀ ndìʼsə̀sə təsòʼ bènə̀ vəchəʼ və loʼ vì bèm à wen la, 28“Wù lyɨ̀ adyòʼ fa fe ənè nyʉ̀ venə a? A kù ndo àdyoʼ à wù la wù ə nè nyʉ̀ avenə a?”
29Yesò bwènsə̀ à vəwenə la,“Ma bèm kənyʉ̀ à ghə̀ŋ, mu ghə̀ŋ sətsèn bwènsə̀, mà mu à shə̀ʼtə̀ wìʼ yì a ghə̀ŋ a ghə̀ ku àdyoʼ la ma nè nyʉ̀ avenə tsu. 30Ghə̀ŋ shə̀ʼtə̀ à mò la à nkù Nyìngòŋ ku kədyòʼ à Joyn la ghə̀ nku mu à viʼi mu à nkù viʼi lo?”
31Vəwenə zìtə̀ sə soʼtə̀ à vəwenə a ntìntìn gàʼà la, “Vəghəŋ sətsèn gàʼ la, ‘A nkù Nyìngòŋ kù kədyòʼ à wen.’ Ghə̀ à bèm la, ‘Ghə̀ŋ bè tyèn la ghə̀ŋ ko a byɨmə kənyʉ̀ kì a ghə̀ ngàʼà byìʼì ghò?’ 32Vəghəŋ sətsèn gàʼ la, ‘Kə nlu fà viʼi!’” (vəwenə mfànə̀ viʼi byìʼàndo viʼi vətsèm nkɨ la Joyn ndìʼ nshə̀ʼtə̀ ghoʼo.) 33Vəwenə kwòʼtə̀ a lì ə̀ gàʼ à Yesò la, “Yès ko kɨ.”
Yesò mù gàʼ à vəwenə la, “Nkàntə̀ mo li ko a shə̀ʼtə̀ kəshi a ma lyɨ̀ kədyòʼ fa tsu sə nè nyʉ̀ venə tsu.”
Currently Selected:
Mak 11: bbkDBLnt
Highlight
Share
Copy
Want to have your highlights saved across all your devices? Sign up or sign in
