Mak 14
14
Və baʼtə̀ əzhwi Yesò
(Mat 26.1-5; Luk 22.1-2; Jon 11.45-53)
1A nè sə ndiʼ a lì mu à fàŋ tò mətsi mbò fa kətsi kə məzaʼsə̀ nə̀ mətsi mì a və zhɨ kəbàyn kè nə̀ fəshɨ̀ŋ fə tsu, tʉtʉ vəpfèm və ngə̀ŋ Nyìngòŋ bènə̀ ndìʼsə̀sə təsoʼ sə kəŋə jì ənyoʼtə ghaʼ Yesò ə zhwi. 2Vəwenə mù sə gàʼà à vəwenə a ntìntìn la, “Kə vəghəŋ à ghàʼ wen a mətsi mə̀ kəzhɨ mèn, a bwen a lì viʼi à zìtə̀ soyn.”
Wùwì zuʼ Yesò a Betanì
(Mat 26.6-13; Jon 12.1-8)
3Yesò lù dyʉ̀ a Betanì sə̀ diʼ a ngə̀ŋ wìʼ a və ndzàŋə̀ nə̀ Simon a ghə̀ nsə̀ diʼ mu ghə̀ kwaʼa li nə̀ kənsòtə̀ kə. Ghə̀ nè ŋwʉʼʉ sə nzhɨ, wùwì tsen vì kwen a ngə̀ŋ ayì nə̀ fəshoʼ fə mənzhiʼ mu və shɨ̀tə̀ nə̀ ngùʼ tsen a və dzàŋə̀ nə̀ alàbàstà. Mənzhiʼ mə ko toghə mə nlèmtəmə̀ mə ntsenə̀ diʼ tsu mu və shɨ̀tə̀ nə̀ nald. Ghə̀ bòʼ fəshoʼ afì ə̀ shʉ̀ʼtə̀ mənzhiʼ a mì a kətʉ Yesò. 4Viʼi vətsenvə a və ndiʼì tsu yen a lì təbèm tə vəwenə tə bàs vəwenə mù sə̀ bèmə̀ à vəwenə a ntìntìn la,“Ghə̀ byisə̀ mənzhiʼ mèn alə̀ byìʼì ghò? 5Və yì zì və baʼlə no a ko ghoʼghə ə̀ kù à viʼi kəmfem.” Vəwenə ghàm wùwì ayì no nànto.
6Yesò bwènsə̀ gàʼ la, “Ghə̀ŋ ke ku ngəʼ ghò à wen a? Ghə̀ŋ ghʉsə wen tò a lì. Ghə̀ ne li no kənyʉ̀ kə jùŋə kə à mò. 7Viʼi kəmfem lu ndiʼ tò diʼì à ghə̀ŋ a ntìntìn, mu ghə̀ŋ kòŋ no a zhʉ̀ kò ghə̀ŋ à gyàmtə̀ vəwenə, alì mà ko a ndiʼ vəghəŋ məzhʉ̀ ntsèm bwèn. 8Wùwì aghèn nè tò kənyʉ̀ kì a ghə̀ zì ghə̀ ne. Ghə̀ shʉ̀ʼtə̀ li mənzhiʼ à mò a wèn əshɨ̀tə̀ ghə̀ kwʉʼ mibu zhʉ məbvɨ̀mə̀ nè sə kwʉ̀ʼ 9Mà gàʼà à ghə̀ŋ nəmwèʼè la no tè fe a tì mbi a və lu nshyə̀ʼtə̀ ntɨm jùŋ ghèn, və lu mboŋə shə̀ʼtə̀ kənyʉ̀ kèn a wùwì ghèn ne lə̀ ndiʼ viʼi nkwòʼtə̀ wen.”
Judàs byɨmə əbaʼlə Yesò
(Mat 26.14-16; Luk 22.3-6)
10Judàs Iskalìyòt a andìʼ wìʼ muʼ fa tì ndzɨ̀mtə̀sə bàm Yesò shì njʉ̀sə̀bò lù ə̀ dyʉ̀ yèn tʉtʉ vəpfèm və ngə̀ŋ Nyìngòŋ ndi baʼlə Yesò à vəwenə. 11Vəwenə sə̀ saŋlə̀ no a nkàyn mù ghʉ̀ la vəwenə a ku ko à wen. Judàs mù sə kəŋə jì jùŋ əbaʼlə Yesò.
Yesò zhɨ fozhɨvə məzaʼsə̀ wenə̀ ndzɨ̀mtə̀sə bàm wen
(Mat 26.17-25; Luk 22.7-14, 21-23; Jon 13.21-30)
12A nè sə ndiʼ a mbì kətsì a və nzhɨ kəbayn kè nə̀ fəshɨ̀ŋ fə tsu, andiʼ kətsi a və nshyə byisə məzaʼsə̀, ndzɨ̀mtə̀sə bàm Yesò sə bèm à wen la, “Wù kəŋə la yès dyʉ̀ ə̀ shɨ̀tə̀ fozhɨvə məzaʼsə̀ wù fe?”
13Yesò tɨm ndzɨ̀mtə̀sə bàm wen səbò gàʼà à vəwenə la, “Ghə̀ŋ kwen dyʉ̀ a tì ntə̀ʼ. Ghə̀ŋ nè sə nkwenə dyʉ̀ ə bùmtə wenə̀ wìʼ mu ghə̀ bwèʼè ətyom à mù. Ghə̀ŋ nè yèn wen, ghə̀ŋ mboʼsə̀ wen. 14Ghə̀ dyʉ̀ kwen tè a ngə̀ŋ ko ghə̀ŋ ə kwen tsu ə̀ gàʼ à tì ngə̀ŋ ayì la, ‘Ndìʼsə̀ bèmə̀ la, tì ngə̀ŋ viʼi ghayn ə mò yi ye ə mà zhɨ fozhɨvə məzaʼsə̀ yo ndzɨ̀mtə̀sə bàm mò tsu a?’ 15Ghə̀ à dìʼ tì ngə̀ŋ kàŋ ghoʼo mu və shɨtə̀ li mbaʼtə fo tsu. Ghə̀ŋ shɨtə fozhɨvə a vì tsu.”
16Vəwenə kwen dyʉ̀ a tì ntə̀ʼ ə̀ yèn no ghò ghə̀ diʼ ando Yesò yì gàʼ mù baʼtə̀ fozhɨvə məzaʼsə̀ a vyi tsu.
17A nè sə ndiʼ a kəlyɨŋ kə mpfwomə, Yesò vì wenə̀ ndzɨ̀mtə̀sə bàm wen shì njʉ̀sə̀bò kwèn tsu. 18Vəwenə nè ŋwʉʼʉ a məzhɨ, Yesò gàʼà vəwenə la, “Mà gàʼà à ghə̀ŋ nəmwèʼè la, wìʼ muʼ dìʼ à ghə̀ŋ a ntìntìn a ghə̀ ne baʼlə mo, yo wen ə zhɨ tò a muʼu.”
19Ando ghə̀ ngaʼà a lì, kənyʉ̀ akì sə̀ ku ngəʼ a vəwenə. Vəwenə mù sə bèmə̀ à wen tò mùʼ mùʼ la, “A dìʼ mo mu?”
20Ghə̀ bwènsə̀ à vəwenə la, “A dìʼ wìʼ muʼ fà ntìntìn ghə̀ŋ ndzɨ̀mtə̀sə bàm mò sèn njʉ̀sə̀bò, wìʼ yì a kəvu kə yo wen kə bùmtə a kəkaŋ. 21Wàyn Wìʼ a pfʉ ando ŋwàʼlə̀ Nyìngòŋ gàʼà alì ngəʼ ghoʼo diʼ à wìʼ yì a ghə̀ a baʼlə wen. Kə yi ndìʼi bòŋsə bòŋ la kə və à bwi wen.”
22Vəwenə nè sə nzhɨ, Yesò lyɨ̀ kəbàyn ə̀ kù kəzòŋ à Nyìngòŋ ə̀ byəʼ kù à vəwenə gàʼà la, “Ghə̀ŋ ghaʼ ə̀ zhɨ. Ghenə diʼi wen ghomə.” 23Ghə̀ bè lyɨ̀ ndoŋ məlyʉ̀ʼ ə kù kəzòŋ à Nyìngòŋ bè kù à vəwenə. Vəwenə mù sə nyʉ chòsə̀ à vəwenə a ntìntìn. 24Ghə̀ gàʼ à vəwenə la, “Mèn dìʼ mənlyuŋ mwomə̀ a və chʉ̀tə̀ byìʼì nghoʼo viʼi ə chiʼtə məkàyn mə̀ Nyìngòŋ. 25Mà gàʼà à ghə̀ŋ nəmwèʼè la, mà ko lu be nyʉ məlyʉ̀ʼ mèn əzaʼa fa kətsi kì a mà lu nyʉ a kəshi kə fòn Nyìngòŋ.” 26Vəwenə nè zhɨ mwètə̀ ə̀ zhɨmə ndzàŋ mù fʉ̀ kùʼ a pfen Olìf.
Yesò shə̀ʼtə̀ la Bità ne tyen wen
(Mat 26.31-35; Luk 22.31-34; Jon 13.36-38)
27Yesò gàʼ à vəwenə la, “No ghə̀ŋ vətsèm ne nyɨŋ ə mòʼtə̀ mo tò ndə̀ŋndəŋ ando və nyòʼò li a ŋwàʼlə̀ Nyìngòŋ la, ‘Ma ne zhwi ntsɨ̀ŋ byisə, ə byisə a shìsə saykə no sətsèm,’ 28alì à ne ndiʼ a zhʉ a və lusə̀ mò fa pfʉ, mà dyʉ̀ a Galìlì à ghə̀ŋ a mbì.”
29Bità gàʼ à wen la, “Mà ko lu mòʼtə̀ wu tè bè a zhʉ a viʼi vətsèm nyɨŋ li.”
30Yesò bwènsə̀ à wen la, “Nkə̀ʼ ne sə toŋ aghayn à bò nəntʉʼʉ lan mu wù mo li tyen aghaŋ à taʼ.”
31Bità bè bwènsə̀ no a gɨ to la, “Mà dìʼi pfʉ tè yowù kò mà lù gàʼ la mà ko kɨ wù.” Ndzɨ̀mtə̀sə bàm wen no sə tsèm sə bè gàʼ tò a lì.
Yesò jɨ̀m a Gethsèmane
(Mat 26.36-46; Luk 22.39-46)
32Yesò wenə̀ ndzɨ̀mtə̀sə bàm wen ne dyʉ̀ zaʼa a kəshi kə tsenkə a və ndzàŋə̀ nə̀ Gethsèmane, Yesò gàʼ à vəwenə la, “Ghə̀ŋ ŋwʉʼʉ a shèn mà dyʉ̀ jɨ̀m.” 33Ghə̀ gàʼ a lì ə̀ lyɨ̀ Bità, Jems nə̀ Joyn wenə̀ vəwenə mù sə dyʉ̀ a muʼu. Nyʉ̀ zìtə̀ sə ku ngəʼ à wen a kwòʼtə̀ no nànto, ghə̀ be diʼ tò a nshinsə a nshinsə. 34Ghə̀ mù gàʼ à vəwenə la nyʉ̀ tsenəvə ku ngəʼ à mò a kwòʼtə̀ mu və zì və zhwi mo. Ghə̀ŋ ŋwʉʼʉ tò a shèn ə mbvʉ̀tə̀.
35Ghə̀ kwentə dyʉ̀tə̀ a mbì ə̀ fəŋ ə̀ dyʉ̀ a nse mù sə jɨ̀mə̀ la jì sətsèn ndiʼ Nyìngòŋ ə gyàmtə̀ nè la kə mà à chò fa tì ngəʼ ghèn. 36Mù jɨ̀m la, “Bàba,Tìʼ ghòm, kənyʉ̀ kə zì ko kə lù chò wù. Shi ndoŋ ngəʼ ghèn fà mò a kəvu, alì ne tò kənyʉ̀ a wù kòŋə̀.”
37Ghə̀ jɨ̀m mwètə̀ sə bwènə̀ ə dyʉ̀ mu ndzɨ̀mtə̀sə bàm wen shì sətaʼ sə bʉnə̀ li. Ghə̀ bèm à Bità la, Simon, ghə̀ŋ ə bʉnə̀ bʉnə̀ à? Ghə̀ŋ bè yì zi kò ghə̀ŋ lù ŋwʉʼʉ ə̀ mbvʉ̀tə̀ tò a fəshinə fə zhʉ alə̀. 38Ghə̀ŋ ə mbvʉ̀tə̀ be jɨ̀mə̀ la kə mwòmsə̀ à vì à ghə̀ŋ. Mà kɨ li la à dìʼ à ghə̀ŋ a kwòʼtə̀ ghə̀ŋ kòŋə̀ ənè ando mà gàʼà alì kò kədyòʼ kə lu ndiʼ à ghə̀ŋ a wen.
39Ghə̀ gàʼ a lì bè bwènə̀ dyʉ̀ sə jɨ̀mə̀ gàʼà tò nyʉ̀ vì a ghə̀ yì ngàʼà lì. 40Ghə̀ nè sə bwènə̀ vì bè yen vəwenə, və bʉnə̀ tò bʉ̀nə byìʼàndo mbəynsə nsù dìʼ à vəwenə a ashɨ. Vəwenə nko kɨ la və a gàʼ la ghò à Yesò lo.
41Ghə̀ nè bwènə̀ vi a ndiʼ aghayn à taʼ ə̀ gàʼ à vəwenə la, “Ghə̀ŋ bò bʉnə̀ tò bʉnə zhʉ̀tə̀ à? Kə ghə̀ŋ be bʉnə! zhʉ kwʉʼʉ̀ li ə və ku Wàyn Wìʼ à viʼi nè nyʉ̀ byɨvə.” 42Ghə̀ŋ lukə və ndyʉ̀. Ghə̀ŋ yen wìʼ yì a ghə̀ baʼlə̀ mo a. Ghə̀ yi a ghə̀ vì.
Və ghaʼ Yesò
(Mat 26.47-56; Luk 22.47-53; Jon 18.3-12)
43Andìʼ ando Yesò mbu gàʼà tò gaʼa, Judàs a andiʼì wìʼ muʼ fa tì ndzɨ̀mtə̀sə bàm wen shì njʉ̀sə̀bò kuʼu vì wenə̀ nòyn ə viʼi ghə̀ kiʼ nyisə nə̀ mbàŋsə mu à tɨ̀m tʉtʉ vəpfèm və ngə̀ŋ Nyìngòŋ, nə̀ ndìʼsə̀sə təsoʼ bènə̀ vəchəʼ ntɨm vəwenə. 44Kə nsə ndiʼ a lì, mu wìʼ a ghə̀ mbaʼlə̀ wen nku li kəchwitə à nòyn ayi gàʼà la, “Mà nè bwàmtə no tè ndò, ghə̀ŋ ə kɨ̀ la à dìʼ wìʼ yì a ghə̀ŋ ə kəŋə. Ghə̀ŋ ghàʼ tò ghaʼa ghə̀ njèʼè tò a avu viʼi.”
45Judàs vì ə̀ nàʼ dyʉ̀ tò à Yesò no a zhʉ̀ kò toŋtə wen la “Tìʼ” ə̀ mù bwàmtə wen tò bwàmtə. 46Viʼi a vyi vì ghàʼ Yesò ə̀ fàŋtə wen ghə̀ to à vəwenə avu, 47alì wutsen a ghə̀ nti tsu tsuʼ nyì wen, ə̀ tin kətiʼitiʼi kə wù shwèʼ kətʉ kə tʉtʉ vəpfèm və ngə̀ŋ Nyìngòŋ. 48Yesò mù bèm à vəwenə la, “Ghə̀ŋ fʉ̀ sə vì nə̀ nyisə bènə̀ mbàŋsə əghaʼ mo tò sə mà dìʼ tsoŋ ale? 49Gaʼa kò mà tə nzhʉsə̀ tò vəghəŋ a ngə̀ŋ Nyìngòŋ ziʼi tsu no mətsi tsèm, alì kò ghə̀ŋ lu nghaʼa mò. No tè a lì, kənyʉ̀ à və nyòʼò li a ŋwàʼlə̀ Nyìngòŋ diʼi kwʉ̀ʼ.”
50Ndzɨ̀mtə̀sə bàm wen sə nyɨŋkə no sətsèm ə mòʼtə̀ wen tò wen nyɨŋ, 51və mù sə dyʉ̀ nə̀ wen, wù mbvòʼò wìʼ tsen boʼsə dyʉ̀ fà wen a bàm mu ghə̀ mòʼ tò fənditə̀. 52Və ghaʼa wen fa ndisə ghə̀ soyn ə̀ shì wenə wen mù nyɨ̀ŋ tò nə̀ wen zɨm ghə̀.
Və dyʉ̀ nə̀ Yesò a kəbòʼ kə nsoʼ
(Mat 26.57-68; Luk 22.54-55, 63-71; Jon 18.13-14, 19-24)
53Və lyɨ̀ Yesò ə̀ dyʉ̀ nə̀ wen a shɨ kətʉ kə tʉtʉ vəpfèm və ngə̀ŋ Nyìngòŋ, tʉtʉ vəpfèm və ngə̀ŋ Nyìngòŋ no vətsèm nə̀ vəchəʼ və loʼ bènə̀ ndìʼsə̀sə təsoʼ vì tsèntə̀ tsu. 54Və ndyʉ̀ nə̀ Yesò Bità be dzɨ̀mtə̀ dyʉ̀ nə̀ wen no fa kəghaf, ə̀ dyʉ̀ kwen a kəbəŋ kətʉ kə tʉtʉ vəpfèm və ngə̀ŋ Nyìngòŋ akì, ə̀ dyʉ̀ ŋwʉʼʉ sə zosə zhiʼ wenə̀ ntsɨ̀ŋsə sətsensə a kəbəŋ ayì. 55Tʉtʉ vəpfèm və ngə̀ŋ Nyìngòŋ bènə̀ nòyn viʼi soʼò nsoʼsə shì no tsèm mù sə̀ kəŋə viʼi la və vi gàʼ kənyʉ̀ kə byɨkə kùmə̀ Yesò ndi və zhwi wen, alì kò vəwenə lù yèn no kənyʉ̀ kə mùʼ. 56Viʼi no və ghoʼo zhò ndzɨ̀ŋsə a kətʉ Yesò, alì vəwenə mboŋsə fɨŋ təwen tə vəwenə a nyʉ̀ a vəwenə ngàʼà.
57Viʼi vətsenvə mù bè zhò ndzɨ̀ŋsə kùmə̀ wen gàʼà la, 58“Yès tə nzhʉ ando ghə̀ gàʼà la, ‘Ma bə̀ytə̀ ngə̀ŋ Nyìngòŋ ghèn a və bwomə̀ nə̀ avu ə bwènsə̀ bwom ghə̀ kədyàŋ tò a mətsi ntaʼ kèn la à bè dìʼ nə̀ avu.’” 59Tè nkàntə̀ vəwenə nzì kò vəwenə lù nè gaʼa vəwenə kəŋmə. 60Kətʉ kə tʉtʉ vəpfèm və ngə̀ŋ Nyìngòŋ kə lù tɨ̀mə à vəwenə a ntìntìn ə̀ bèm à Yesò la, “Wu be ko kiʼ kənyʉ̀ əgàʼ byìʼì nyʉ̀ venə a və ghàmə̀ wù tsu lə̀.”
61Yesò chɨmə la kùʼ. Kətʉ kə tʉtʉ vəpfèm və ngə̀ŋ Nyìngòŋ kì bèm à wen la, “Wù bè dìʼ Klistò yì adiʼ wàyn Nyìngòŋ yì a yès ə kuʼsə̀ lì?”
62Yesò bwènsə̀ gàʼ la, “Mà dìʼi wen. Ghə̀ŋ lu yen Wàyn Wìʼ ghə̀ ŋwʉʼ a shyə kwoŋ toghə Nyìngòŋ a kəshi kə adyòʼ à tsèm, shiʼì vì a tì mbòʼsə a kàŋ.”
63Kətʉ kə tʉtʉ vəpfèm və ngə̀ŋ Nyìngòŋ ghaʼ ndisə wen ə̀ bàs tò fà wen a ngə̀ŋ bèmə̀ la, “Vəghəŋ bè kəŋə əzhʉ ghò fà ndò bu chòsə̀ soʼ a?” 64Ghə̀ŋ zhʉ li ando ghə̀ gàʼà nyʉ̀ byɨvə kùmə̀ Nyìngòŋ. Ghə̀ŋ kòŋ la və ne ale nə̀ wen a?
Vəwenə gàʼ tò vətsèm la, “Ghə̀ diʼi pfʉ.”
65Viʼi vətsenvə mù zìtə̀ sə̀ chʉlə̀ mənte a wèn Yesò, chiʼtə̀ kəʼə wen nə̀ basə ndisə, ghòmə̀ wen, gàʼà la,“shə̀ʼtə̀ lì la à ghòm ndò wù lo.” Ntsɨ̀ŋsə kətʉ kə tʉtʉ vəpfèm və ngə̀ŋ Nyìngòŋ kì bè shi wen ə̀ ghòm.
Bità tyen Yesò
(Mat 26.69-75; Luk 22.56-62; Jon 18.15-18, 25-27)
66Bità mbò bu tò a fətin fə kətʉ kə tʉtʉ vəpfèm və ngə̀ŋ Nyìngòŋ kì, wàyn wùwì shwèʼ tsen a ghə̀ nshyèʼè a kəbəŋ ayì vì, 67ə̀ yèn Bità ando ghə̀ zosə zhiʼ ə̀ tuŋ ashɨ wen a wèn Bità mù gàʼ la, “Nkàntə̀ wù tə njèʼè wenə̀ Yesò wù Nazalèt.”
68Bità tensə gàʼà la, “Mà ko kɨ̀ kənyʉ̀ akènkə, zhʉ kò mà lu nkɨ tè la wù gàʼà la ghò lo.” Ghə̀ gàʼ alə̀ lù fʉ̀ dyʉ̀ tɨ̀mə a ji a ghə̀ dyʉ̀ a kəbəŋ. No a zhʉ̀ kò nkə̀ʼ toŋ.
69Wàyn wùwì yì bè nè sə yen wen tò yenə tsu bè zìtə̀ sə̀ gàʼà à viʼi vyi a və nti tsu la,“Ghèn dìʼ wù nòyn Yesò tsen.” 70Bità bè tensə tò tènsə.
A sə laʼtə̀ viʼi vyi a və nti tsu bè gàʼ à Bità la, “Kə diʼ tò nəmwèʼè la wù dìʼ wù muʼ fa nòyn Yesò byìʼàndo wù dìʼ wù Galìlì.”
71Bità kàyn la, “Nyìngòŋ ku ngəʼ à mò a zhʉ a mà wamə wamə. Mà ko kɨ̀ wìʼ ghèn a ghə̀ŋ ə gàʼà byìʼì wen lə̀.”
72Tò fa zhʉ, nkə̀ʼ bè toŋ andìʼ aghayn à bò. Bità mù kwòʼtə̀ ando Yesò yì gàʼ à wen la,“Nkə̀ʼ ne sə toŋ aghayn à bò mu wù tyen li mò aghayn à taʼ.” Wenə wen bwaʼ, ghə̀ dì no mwèʼè mwèʼè.
Currently Selected:
Mak 14: bbkDBLnt
Highlight
Share
Copy
Want to have your highlights saved across all your devices? Sign up or sign in
