Mak 15

Və dyʉ̀ nə̀ Yesò a shɨ Bilate

(Mat 27.1-2, 11-14; Luk 23.1-5; Jon 18.28-38)

1Tʉʼ lan, tʉtʉ vəpfèm və ngə̀ŋ Nyìngòŋ, vəchəʼ, ndìʼsə̀sə təsoʼ bènə̀ viʼi soʼo nsoʼsə vi no vətsèm ghàʼa ə̀ ntsèntə̀ ə̀ bàʼtə nyʉ̀ vəwenə mù kwìʼ Yesò ə̀ dyʉ̀ nə̀ wen à Bilate. 2Bilate bèm à wen la,“Wù diʼ fòn Vəjew mu?”

Yesò bwènsə̀ gàʼ la, “Kə diʼ tò ando wu gaʼà.”

3Tʉtʉ vəpfèm və ngə̀ŋ Nyìngòŋ mù sə zuʼu nyʉ̀ no ghoʼo a wèn Yesò. 4Bilate bè gìsə̀ bèm à Yesò la, “Zhʉ nyʉ̀ no ghoʼo a və ghàmə̀ wù tsu a. Wù bwènsə̀ la ghò fa tsu a?”

5Alì kò Yesò lù bwènsə̀ no kənyʉ̀. Bilate mù sə diʼ nə̀ kanə.

Və chòsə̀ soʼ la və zhwi Yesò

(Mat 27.15-26; Luk 23.13-25; Jon 18.39–19.16)

6No zhʉ kəzhɨ kə məzaʼsə̀ kə mvi zaʼa, Bilate ə gàʼa və shisə wìʼ fa ngə̀ŋ mfɨŋ a viʼi kòŋə la və shìsə. 7Andìʼ a tʉʼ ayì wutsen diʼ a mfɨŋ a və dzàŋə̀ wen nə̀ Balabas. Ghə̀ ndìʼ tsu wenə̀ viʼi vətsenvə a wen vəwenə nzìtə soyn a ntə̀ʼ bè zhwì wìʼ. 8Nòyn viʼi tsèntə̀ mù sə gàʼà à Bilate la ghə̀ ne tò ando ghə̀ nə̀ nè 9Ghə̀ bèm à vəwenə la, “Ghə̀ŋ kòŋ la mà shisə fòn Vəjew mu?” 10Ghə̀ mbèmə̀ a lì byìʼàndo ghə̀ nkɨ li la à nè tò kənghə̀ʼ tʉtʉ vəpfèm və ngə̀ŋ Nyìngòŋ nghaʼ Yesò ə ku à wen.

11Tʉtʉ vəpfèm və ngə̀ŋ Nyìngòŋ twis nòyn viʼi vi la və gàʼ à Bilate la ghə̀ shisə à diʼ Bàlabàs. 12Bilate bè mù bèm à vəwenə la, “Ghə̀ŋ ke kəŋə la mà shisə̀ wen ə̀ nè ale nə̀ wìʼ ghèn a ghə̀ŋ dzàŋə̀ nə̀ fòn Vəjew a?”

13Vəwenə bwènsə̀ zɨ̀mə a gɨ to la,“Bantə wen a kəntò!”

14Bilate bè bèm la,“Byìʼì ghò? Ghə̀ byɨ̀sə no ghò?”

Vəwenə bè zɨ̀mə̀ dyʉ̀ tò nə̀ mbì la,“Bantə wen a kəntò!”

15Bilate shìsə̀ Bàlabàs fa mfɨŋ ndi nè la viʼi vi ndiʼ nə̀ saŋlə ə̀ ghòm Yesò nə̀ kənjʉ̀ mù ku wen la və dyʉ̀ bayntə a kəntò.

Vəsugyèʼ sə̀ chəʼə Yesò

(Mat 27.27-31; Jon 19.2-3)

16Vəsugyèʼ vətsenvə lyɨ̀ Yesò kwèn nə̀ wen a fətin a tì ntuʼ mù dzàŋtə̀ vəsugyèʼ vi a və mfaŋə̀ no vətsèm. 17Vəwenə mòʼ ndisə təfòn a wèn Yesò ə̀ bo sòʼ ndzoŋsə ə̀ chìʼ à wen a kətʉ. 18Mù zìtə̀ sə bwènə̀ wen gàʼà la,“Səʼ fòn Vəjew!” 19Ando vəwenə mbwènə̀ wen a lì, və zìtə̀ sə ghòmə̀ wen fa kətʉ nə̀ mbàŋ, chʉ mənte à wen a wèn, shiʼì à vəwenə a nchiʼsə alwi nè kənlobtə̀ la vəwenə gumlə̀ wen. 20Andìʼ a zhʉ a vəwenə ne nyʉ̀ venə mè ə̀ tsuʼ ndisə shìsə a və yì mòʼ à wen a wèn lì ə̀ bwènsə̀ mòʼ nkàntə̀ ndisə wen a wen a wèn mù lyɨ̀ wen ədyʉ̀ bantə a kəntò.

Və bantə Yesò a kəntò

(Mat 27.32-44; Luk 23.26-43; Jon 19.17-27)

21Vəwenə sə ndyʉ̀ a ji ə̀ yen wutsen a və ndzàŋə̀ nə̀ Simon andiʼ wù Silen, mu ghə̀ lù fa tì loʼ a shi təsɨm sə bwènə̀ pfwo. (Simon a ghèn ndiʼ tìʼì Alèksandà wenə̀ Lufùs.) Vəwenə kàyn la ghə̀ byeʼe kəntò kə Yesò. 22Və lyɨ̀ Yesò ə̀ dyʉ̀ nə̀ wen a kəshi kətsenkə a və ndzàŋə̀ nə̀ Golgotà (kə shə̀ʼtə̀ la a dìʼi Kəshi kə Kəwuʼlə kə kətʉ) 23Və nè dyʉ̀ ə̀ zaʼa tsu, ə̀ lyɨ̀ məlyʉ̀ʼ ə̀ fɨ̀ŋtə̀ kəgəŋ kətsen tsu a və dzàŋ nə̀ miyif sə ku à wen, alì ghə̀ tyen la yì ko a nyʉ. 24Vəwenə mù bantə wen a kəntò, ə ghʉ ndisə wen sə temə bàʼ ndi yen la a lyɨ̀ ndo lyɨ kəbàs kə kò lo. 25Və mbantə wen a kəlyɨŋ kə təzhʉ abʉ̀muʼ a boʼòngə̀ŋ. 26Və ne bantə wen mè, ə nyòʼ kənyʉ̀ kì a və ngàʼà la ghə̀ ne lì a kəbàŋ kə fəkòʼ ə̀ bayntə a wen a kətʉ kə kəntò la,“FÒN VƏJEW.” 27Və ne a lì bè bantə viʼi vətsenvə vəbò. Və mbantə wù muʼ a shyə kwoŋ toghə nə̀ ghətsen a shyə kwoŋ nànkwè. 28(A ji ghèn kənyʉ̀ a və ə̀ nyòʼò a ŋwàʼlə̀ Nyìngòŋ la, “Və lu taŋ wen a tì viʼi kwaʼà təsoʼ” ndiʼ nəmwèʼè.)

29Viʼi mù sə chò fa ji nə̀ʼə̀ tʉ vəwenə telə̀ wen gàʼà la, “Gaʼa kò wù tə gàʼ la wu a bə̀ytə ngə̀ŋ Nyìngòŋ ə bwènsə̀ bwom a mətsi ntaʼ. 30Bwòŋsə lì wen ə wu luwèn ə̀ shiʼi fa kəntò yì yès yen.”

31Tʉtʉ vəpfèm və ngə̀ŋ Nyìngòŋ bènə̀ ndìʼsə̀sə təsoʼ bè sə̀ chəʼə wen gàʼà à vəwenə a ntìntìn la, “Ghə̀ tə mbwòŋsə̀ viʼi alì luwèn ghə̀ zì kò ghə̀ lə̀ bwòŋsə̀ wen ə wen.” 32“Shiʼi fa kəntò a Klistò ə̀ fòn viʼi Islel! ndi yès yen ə̀ byɨmə à wù.” Viʼi vi vəbò a və mbantə wen wenə̀ vəwenə lì bè sə telə̀ wen.

Yesò Pfʉ

(Mat 27.45-56; Luk 23.44-49; Jon 19.28-30)

33A nè sə ndiʼ a ntìntìn nə̀nchwì, shi bvʉ̀tə̀ fen no tsèm, nè bwènsə̀ bayn tò a kəlyɨŋ kə mbwaʼà kəbə̀ŋ. 34A zhʉ ayì, Yesò dì no a gɨ̀ to la, “Eloi Eloi, Lama sabatani?” Adiʼ la, “Nyìngòŋ ghom, Nyìngòŋ ghom, byìʼì ghò a wù kyemə mo a?”

35Viʼi vətsenvə a və nti boʼsə tsu zhʉ a lì sə gàʼà la, “Ghə̀ŋ zhʉtə a! ghə̀ sə dzàŋ Elijà.” 36Wutsen fa ntìntìn viʼi a vyi nyɨŋ dyʉ̀ lyɨ̀ nkuncha ə̀ chʉ̀ kəmbas kə məlyʉ̀ʼ tsu ə̀ sù a kətyɨ sə ku la ghə̀ nyʉ gàʼà la, “Ghə̀ŋ kye lì vəghəŋ yen la Elijà a vì əshiʼsə wen lo?”

37Yesò ku nkəʼ dì ə tem kəzhwì kə wen tò ghayn mùʼ.

38Ndisə a və nghaŋsə̀ la sə ngə̀tə̀ ngə̀ŋ Nyìngòŋ a ghan à bò bàymə̀ əwaŋ bò əlù fa kətʉ shìʼi zaʼa a tèn. 39Kətʉ kə vəsugyèʼ kì a kə nti tsu nè yèn ji a Yesò ndì be pfʉ fa tsu, ə̀ gàʼ la, “Nəmwèʼè, wìʼ ghèn tə ndiʼ no wàyn Nyìngòŋ.”

40Ki vətsenvə mbe ti no kəghaf yenə nyʉ̀ tsèm a və nchò. A ntìntìn ki avenə, à ndìʼ, Mèli wù Magdala, Mèli lì Jems tyetə wen ə Josèf bènə̀ Salomè. 41Vəwenə ngyàmtə̀ Yesò a tʉʼ a ghə̀ ndìʼ a Galìlì be dzɨ̀mtə̀ wen. Ki vətsenvə mbe dìʼ tsu no və ghoʼo a və ndzɨ̀mtə̀ wen ə kùʼ a Jelusalèm.

Və bvɨ̀mə̀ Yesò

(Mat 27.57-61; Luk 23.50-56; Jon 19.38-42)

42-43A sə ndiʼ a kəlyɨŋ kə zhʉ mpfwomə a tʉʼ ndiʼi layn a ndiʼ kətsi kə zhʉtəkə, Josèf wù Alimàtya, kwiʼi tyɨm dyʉ̀ gàʼ à Bilate la yì kəŋ əlyɨ̀ kəmpfʉ kə Yesò ə dyʉ̀ bvɨ̀mə̀. Ghə̀ ndiʼ wìʼ a və ngumlə̀ a tì ntsèntə̀ viʼi ku təsoʼ. Ghə̀ nkə̀ʼtə̀ soʼ foyn Nyìngòŋ. 44Bilate ndìʼ nə̀ kaynə əzhʉ la Yesò pfʉ li, mù tɨm ə̀ dzàŋ kətʉ kə vəsugyèʼ ə bèm à wen la Yesò pfʉ li nəmwèʼè lo. Ghə̀ byɨmə. 45Bilate mù kù kədyòʼ la Josèf lyɨ kəmpfʉ kə wen. 46Ghə̀ zen ə kwoŋ ndisə ə̀ shìʼsə kəmpfʉ kə Yesò ə̀ lèmtə tsu ə̀ bvɨ̀mə̀ wen a tì sè a və ntyuŋə a wu, ə̀ buŋsə ngùʼ ə shiʼi kènə chʉ̀ sè wen tsu. 47Mèli wù Magdala nə̀ Mèli lì Josèf yen kəshi a və mbvɨ̀mə̀ Yesò tsu.

Currently Selected:

Mak 15: bbkDBLnt

Highlight

Copy