Mak 16

Yesò lù fa pfʉ

(Mat 28.1-8; Luk 24.1-12; Jon 20.1-10)

1Andìʼ ando kətsi kə zhʉ̀təkə nchò li, Mèli wù Magdala, Salomè bènə̀ Mèli Lì Jems zen njʉ̀sə̀ əzuʼ ə wen ədyʉ̀ əzuʼ kəmpfʉ kə Yesò tsu. 2Tʉʼ lan a mbì kətsi a tì ngàm, tò a chʉzhʉ saʼaghə, vəwenə fʉ̀ dyʉ̀ a chʉ̀ sè Yesò. 3Vəwenə sə njèʼè dyʉ̀ a ji, sə̀ kayntə̀ la, a dyʉ̀ buŋsə ndo ngùʼ yì fa chʉ̀ sè Yesò a vəwenə lo. 4Ne dyʉ̀ zaʼa tsu sə ki dyʉ̀sə̀, mu və buŋsə li ngùʼ ayì fa chʉ̀ sè ayì. Ngùʼ ayì ndìʼ no ngùʼ ghoʼo. 5Vəwenə sə nkwenə dyʉ̀ a tì sè ayì, ə yèn wàyndyə nkuŋ tsen, ghə̀ ŋwʉʼ a shə kwoŋ toghə vəwenə, mu ghə̀ mòʼ ndisə fəfə sə. Təchʉ̀ tə vəwenə tə zɨm.

6Ghə̀ gàʼ à vəwenə la, “Kə chʉ zɨm ghə̀ŋ byìʼe Yesò a ghə̀ŋ kəŋə lì a diʼì wàyn wù Nazalèt, a və tə bàyntə wen lì diʼ mu ghə̀ lù li fa pfʉ. Ghə̀ ko diʼ a shə̀, ghə̀ŋ yen kəshi a və tə̀ nyòŋsə̀ wen tsu a. 7Ghə̀ŋ dyʉ̀ ə̀ shə̀ʼtə̀ a Bità bènə̀ ndzɨ̀mtə̀sə bàm wen sətsen shì la ghə̀ shiʼì li ndyʉ̀ a Galìlì a ghə̀ŋ a mbì ando ghə̀ tə gàʼà ghə̀ŋ.”

8Vəwenə fʉ̀ fa sè ayì a kənyɨŋ, tsɨŋtə̀ kò vəwenə lù nshə̀ʼtə̀ kənyʉ̀ à wìʼ byìʼàndo vəwenə mfànə̀.

9Andìʼ ando Yesò nlu fa pfʉ a tsi boʼòngə̀ŋ mbì kətsi a tì ngàm ghə̀ zìtə̀ fʉ̀ a kə̀ʼ Mèli wù Magdala a ghə̀ ndzɨ̀mə̀ zhwì byɨvə sòmbo fà wen a wèn. 10Mèli lù dyʉ̀ yèn viʼi vi a wenə̀ və Yesò ndìʼ a muʼu və kusə̀ nshinsə dì. Ghə̀ shə̀ʼtə̀ kənyʉ̀ a kə yì chò à vəwenə. 11Vəwenə nè zhʉ̀ ando ghə̀ gàʼà la Yesò lu li fa pfʉ ghə̀ nyenə wen, kò vəwenə lù byɨmə.

Yesò fʉ̀ a kə̀ʼ ndzɨ̀mtə̀sə bàm wen səbò

(Luk 24.13-35)

12Ayì a bàm Yesò fʉ̀ a kə̀ʼ ndzɨ̀mtə̀sə bàm wen səbò a ji vəwenə dyʉ̀ a tì loʼ. 13Vəwenə bè bwènə̀ dyʉ̀ shə̀ʼtə̀ à ndzɨ̀mtə̀sə bàm sə tsensə shi alì kò vəwenə lù byɨmə.

Yesò fʉ̀ a kə̀ʼ ndzɨ̀mtə̀sə bàm wen shì njʉ̀mùʼ

(Mat 28.16-20; Luk 24.36-49; Jon 20.19-23; She 1.6-8)

14Fa bàmə nyʉ̀ avenə Yesò bè fʉ̀ a kə̀ʼ ndzɨ̀mtə̀sə bàm wen shi ə njʉ̀mùʼ vəwenə zhɨ zhɨ. Ghə̀ ghàm vəwenə byìʼàndo vəwenə ndìʼ mu vəwenə tosə li tətyɨm tə vəwenə la vəwenə ko a byɨmə kənyʉ̀ a viʼi yenə sə shə̀ʼtə̀ à vəwenə. 15Ghə̀ mù gàʼ à vəwenə la, “Ghə̀ŋ dyʉ̀ a təshyə tə mbi no tətsèm ə̀ shə̀ʼtə̀ ntɨm jùŋə̀ à viʼi vətsèm. 16No mə ndò a ghə̀ byɨmə ə̀ shì mu, ghə̀ nè bwòŋ. No ndò a ghə̀ tyenə ke byɨmə Nyìngòŋ lù byɨbsə wen. 17Viʼi vi a və byɨmə, Nyìngòŋ à kù àdyoʼ à vəwenə la vəwenə ndìʼì nchwi, nè nyʉ̀ kanəvə dzɨ̀mə̀ shìsə̀ zhwì byɨvə, be gàʼà təgàʼ a vəwenə nko təmə̀ gàʼ. 18Vəwenə sətsèn ghàʼ zhusə ko zhɨ ləʼ kò kənyʉ̀ kə à nè vəwenə. Vəwenə a nghʉ avu a tʉ viʼi və kwaʼkəvə, vəwenə to.”

Və kuʼsə Yesò a kàŋ

(Luk 24.50-53; She 1.9-11)

19Bobo Yesò nè gàʼ à ndzɨ̀mtə̀sə bàm wen ə̀ myètə̀, və kuʼsə wen a kàŋ ə̀ ŋwʉ̀ʼsə wen a shyə kwoŋ toghə Nyìngòŋ. 20Ndzɨ̀mtə̀sə bàm wen lyɨ̀ ntɨm ə jùŋə aghèn sə̀ shə̀ʼtə̀ dyʉ̀ no fe. Bobo nè nyʉ̀ kanəvə à vəwenə a ntìntìn ndìʼi nchwi la ntɨm jùŋə aghèn dìʼ nəmwèʼè. Amèyn.

Currently Selected:

Mak 16: bbkDBLnt

Highlight

Copy