Noo Mian 17
17
CAB. XVII.
1As ec kione shey laa, ghow Yeesey Peddyr, as Jamys, as Ean e vraar, as hug e lesh ad er lieh, seose er slieau ard.
2As va’n cummey echey er ny chaghlaa kiongoyrt roo, as ren yn eddin echey soilshain myr y ghrian, as va’n coamrey echey gial myr y soilshey.
3As cur‐my‐ner haink Moses as Elias ayns yn eanish echey, as va’d taggloo rish.
4Eishtagh dreggyr Peddyr as doort e rish Yeesey, Hiarn, Te mie er nyn son ainyn dy ve ayns shoh; My she dt’aigneys eh, lig dooin three cabbanyn y yanoo, cabbane er dty hons, as cabbane son Moses, as cabbane son Elias.
5Choud as ve foast loart, cur‐my‐ner, ren bodjal sollys scadoo y hilgey harrystoo, as cur‐my‐ner coraa ass y vodjal, doort, Shoh my vac graihagh, jeh ta mee dy moar soiaghey, easht‐jee rish.
6As tra cheayl ny ostyllyn eh, huit ad sheese lesh nyn eddinyn gys y talloo, as va’d feer agglagh.
7As haink Yeesey as venn e roo, as doort e, Irree‐jee seose as ny gow-jee aggle.
8As tra hrog ad seose nyn sooyllyn, cha vaik ad annane erbee, agh Yeesey ny lomarcan.
9As myr va’d cheet neose jeh’n clieau, hug Yeesey currym daue, gra, Ny insh‐jee yn ashlish da annane erbee, derrey vees yn mac dooinney er nirree veih ny merriu.
10As denee e ostyllyn jeh, gra, Cre’n oyr ta ny scruderyn gra, dy vel Elias dy heet hoshiaght?
11Dansoor Yeesey as doort e roo, Hig Elias hoshiaght, as liassee e dy chooilley nee.
12Agh ta mish gra riu, dy vel Elias er jeet hanna, as cha dug ad enney er, agh ta’d er ghellal rish lurg nyn aigney hene, as er yn aght keddyn ghellys ad myrgeddyn rish yn mac dooinney.
13Eishtagh hoig e ostyllyn dy nee my‐chione Ean Bashtey ve loart roo.
14¶ As tra va’d er jeet gys y cheshaght, haink huggey dooinney dy row, as huit e sheese er e ghlioonyn, gra,
15Hiarn, jean chymmey er my vac, son te eddrym ayns e cheeal, rish caghlaa ny haist, as dy moar seaghnit, son dy mennick te tuittym ayns yn aile, as dy mennick ayns yn ushtey.
16As hug mee liam e gys dty ostyllyn, as cha yiarg ad e y leihys.
17Dansoor Yeesey as doort e, O Heeloghe vee‐chredjuagh as niau‐yeeragh, Caid ta mish dy ve meriu? Caid ta mee dy hurranse diu? Cur liat ayns shoh hyms e.
18As vaggyr Yeesey er y drogh spyrryd, as hie e magh ass, as va’n liannoo er ny leihys veih’n oor shen.
19Eishtagh haink e ostyllyn gys Yeesey er lieh, as doort ad, Cre liorish nagh voddagh shinyn e y hilgey ass?
20Doort Yeesey roo, Kyndagh rish y vee-chredjue eu: son dy firrinagh ta mee gra riu, My ta credjue eu myr greine dy rass mustard, jir shiu rish y slieau shoh, Scugh ass shoh noon ayns shid, as nee eh scughey; as cha bee nee erbee niau‐phossible diu.
21Ny yei cha vel y sorch shoh dy ghrogh spyrrydyn er nyn eiyrt magh, agh liorish padjer as trostey.
22¶ As choud as va’d ayns Galilee, doort Yeesey roo, Bee mac y dooinney er ny vrah gys lauyn deney.
23As ver ad e gy baase, as y trass laa nee e girree reesht. As var ad feer trimshagh.
24¶ As tra va’d er jeet gys Capernaum, haink y vooinjer va troggal argid y cheesh gys Peddyr, gra, Nagh vel y mainshter eauish geeck y cheesh?
25Doort eshyn, dy row: As tra ve er jeet stiagh ayns y thie, loar Yeesey rishyn hoshiaght, gra, Cre t’ow dy smooinaght, Simon? quoi jeh ta reeaghyn y tallooin troggal custom ny keesh? jeh nyn gloan hene, ny jeh joarreeyn?
26Doort Peddyr rish, Jeh joarreeyn. Doort Yeesey rishyn, Eishtagh, cha vel veg er y chloan dy eeck.
27Ny yei son nagh bee commys er ny chur hooin, gow uss gys y cheayn, as tilg magh dooan, as trog y chied eeast hig hood, as tra vees oo er vosley’n beeal echey, yiow peesh dy argid ayn, shen gow, as cur daue er my hons as er dty hon hene.
Currently Selected:
Noo Mian 17: NMian
Highlight
Share
Copy
Want to have your highlights saved across all your devices? Sign up or sign in
historic text maintained in digital form by the British and Foreign Bible Society (Sheshaght y Vible)
