Noo Mian 18
18
CAB. XVIII.
1Ec y tra cheddyn haink y vooinjer va sheer geyrt er Yeesey huggey, gra, Quoi syrjey ayns reeriaght niau?
2As deie Yeesey er liannoo beg, as hoie e e kiongoyrt roo,
3As doort e, Dy firrinagh ta mee gra riu, mannagh jean shiu chyndaa as cheet dy ve myr cloan veggey, cha jed shiu stiagh ayns reeriaght niau.
4Quoi‐erbee er‐y‐fa shen nee e hene y injillaghey myr y liannoo beg shoh, e syrjey ta ayns reeriaght niau.
5As quoi‐erbee nee soiaghey jeh leid y liannoo beg shoh ayns yn ennym ayms, te janoo soiaghey jeems.
6Agh quoi‐erbee ver oyr da annane jeh’n vooinjer veggey shoh ta credjal aynyms, dy huittym ayns peccah, veagh eh ny baare da, dy beagh clogh wyllin er ve croghit mish e wannal, as e dy ve baiht ayns divnit ny marrey.
7Smerrick da’n seihl, er coontey oyryn peccah: son shegin da nyn leid y ve ayn, agh smerrick da’n dooinney liorish ta sleih er nyn dayrn gys peccah.
8Shen-y-fa my ta dty laue ny dty chass hene dy dty hayrn gys yn olk, giare jeed as tilg woid ad: te ny share dhyt goll stiagh ayns bea croobagh ny baccagh, ny daa laue ny daa chass y ve ayd, as oo dy ve tilgit ayns yn aile ta dy bragh farraghtyn.
9As my ta dty hooyl dy dty hayrn gys peccah, pluck assyd as tilg woid ee; te ny share dhyt goll stiagh ayns bea lesh yn hooyl, ny daa hooyl y ve ayd, as oo dy ve tilgit ayns aile nivrin.
10Cur‐jee twoai nagh soie shiu beg jeh annane jeh’n vooinjer veggey shoh; son ta mee gra riu, dy vel ny ainlyn ocsyn ayns niau, kinjagh cur‐my‐ner eddin yn Ayr ayms t’ayns niau.
11Son ta mac y dooinney er jeet dy hauail shen ny va callit.
12Cre ta shiu dy smooinaght? My ta keead keyrrey ec dooinney, as annane jeu v’er gholl er shaghryn, nagh vel e fagail yn chiare‐feed as yn nuyh jeig, as goll gys ny sleityn as shirrey yn cheyrrey hie er shaghryn?
13As my she shen dy vel e dy gheddyn ee, dy firrinagh ta mee gra riu, dy vel e goall ny smoo dy voggey jeh’n cheyrrey shen, ny jeh’n chiare‐feed as yn nuyh jeig, nagh jagh er shaghryn.
14Er yn aght keddyn cha nee aigney nyn Ayr t’ayns niau eh, annane jeh’n vooinjer veggey shoh dy hierraghtyn.
15¶ Myrgeddyn my nee dty vraar aggair dhyt, immee as insh da e oill eddyr uss as eshyn nyn lomarcan; my eashtys e rhyt, t’ow er chosney dty vraar.
16Agh mannagh neasht e rhyt, gow mayrt annane ny jees elley, ayns beeal ghaa ny three dy eanishyn, dy vod dy chooilley ockle ve jeant mie.
17As mannagh der e geill dauesyn, insh eh da’n agglish: agh mannagh der e geill da’n agglish, jeagh er myr angreestee as myr publican.
18Dy firrinagh ta mee gra riu, Cre‐erbee nee shiu y chiangley er y talloo, bee eh kainlt ayns niau: as cre‐erbee nee shiu y eysley er y talloo, bee eh feyslit ayns niau.
19Reeshtagh ta mee gra riu, my nee jees jiuish cordail er y talloo my‐chione nee erbee dy jean ad aghin er y hon, bee nyn aghin er ny yialdyn liorish my Ayr t’ayns niau.
20Son raad ta ghaa ny three er nyn jaglym cooidjagh ayns m’ennyms, ayns shen ta mish nyn mastey.
21¶ Eishtagh haink Peddyr huggey, as doort e, Cre cha mennick as ta orryms leih da my vraar, tra vees e janoo peccah m’oi? choud as shiaght keartyn?
22Doort Yeesey rish, Cha vel mish gra rhyt, Choud as shiaght keartyn, agh choud as three feed as jeih keartyn shiaght.
23¶ Shen‐y‐fa ta reeriaght niau er ny holaghey gys ree dy row, ballish coontey ghoall jeh e harvaantyn.
24As tra ve er nianoo toshiaght dy choontey, haink fer huggey va liastyn jeih thousane talent.
25Agh son wheesh as nagh row echey dy eeck, hug e hiarn sarey e hene dy ve creckit as e ven as e chloan as ooilley ny v’echey, as y feeaghyn dy ve eeckit.
26Huit y chiarvaant er‐y‐fa shen sheese, as ghuee e er, gra, Cur daill dou, Hiarn, as neem ooilley y eeck dhyt.
27Eisht va chiarn y chiarvaant shen er ny veyghey lesh chymmey, as ren e feysley er, as leih e da ny ve dy liastyn.
28Agh hie yn chiarvaant keddyn magh, as hooar e fer jeh ny sheshaghyn shiarvaantyn echey va liastyn da keead ping: as haar e greme er, as ghow e e er y scoarnagh, gra, Eeck shen ny t’ow dy liastyn.
29As huit e heshey‐harvaant sheese ec e chassyn, as ghuee e er, gra, Cur daill dou, as neem ooilley y eeck dhyt.
30As cha row e booiaght: agh hie e, as hilg e e ayns pryssoon, derrey eeckagh e ny ve dy liastyn.
31Myr shen tra honnick e heshaghyn harvaantyn kys hie e er, ghow ad dy holk rish, as haink ad, as dinsh ad da nyn jiarn ooilley ny va jeant.
32Eisht deie e hiarn er, as doort e rish, O ghrogh harvaant, leih mish dhyts ooilley ny v’ow dy liastyn, er‐y‐fa dy ren oo aghin hym:
33As nagh lishagh uss myrgeddyn v’er nianoo chymmey er dty heshey‐harvaant, myr va chymmey ayms orts?
34As va e hiarn jymmoosagh, as livrey e e hucsyn va goall kerraghey, derrey eeckagh e ooilley ny ve dy liastyn.
35Myr shen myrgeddyn nee my Ayr flaunyssagh riuish, mannagh leih shiu veih nyn greeaghyn dy chooilley ghooinney da e vraar e loghtyn.
Currently Selected:
Noo Mian 18: NMian
Highlight
Share
Copy
Want to have your highlights saved across all your devices? Sign up or sign in
historic text maintained in digital form by the British and Foreign Bible Society (Sheshaght y Vible)
