Noo Mian 21
21
CAB. XXI.
1As tra va’d tayrn er‐gerrey da Jerusalem; as dy row ad er jeet gys Bethphage, gys cronck ny Olivyn, hug Yeesey jees jeusyn va kinjagh geyrt er, er chaghteraght,
2As doort e roo, Immee‐jee gys y balley beg ta shiu dy akin, as chelleeragh yiow shiu assyl kainlt as lhie mâree: feysle‐jee as cur‐jee lieu ad hyms.
3As my loarys dooinney erbee veg riu, abbyr‐jee shiuish, Ta feme ec y Chiarn orroo, as chelleeragh liggee e yn raad daue.
4Va ooilley shoh jeant, dy voddagh shen ve cooilleenit va loarit liorish y phadeyr, gra,
5Insh‐jee da inneen Sion, Cur‐my‐ner, ta dty Ree cheet hood, dy imlee, as ny hoie er assyl, as er lhie sharragh assyl.
6As hie adsyn rumboo, as ren ad myr va Yeesey er noardaghey daue.
7As hug ad lieu yn assyl as y lhie, as hug ad orroo nyn eaddagh, as hug ad eshyn ny hoie er yn eaddagh.
8As ren earrooyn moarey dy leih skeylley nyn gharmadyn er y raad; yiare feallagh elley banglanyn jeh ny biljyn, as skeyl ad ad er y raad.
9As deie yn pobble hie roish, as adsyn haink ny yei, gra, Hosanna gys mac Ghavid, bannit ta eshyn ta cheet ayns ennym y Chiarn, Hosanna ayns yn yrjid.
10As tra ve er jeet gys Jerusalem, va ooilley’n ard‐valley jymmoosagh, gra, Quoi e shoh?
11Doort y pobble, Shoh Yeesey yn phadeyr, ta veih Nazareth ayns Galilee.
12¶ As hie Yeesey stiagh ayns chiamble Yee, as deiyr e magh ooilley adsyn va creck as kionnaghey ayns y chiamble, as hilg e harrish ny buird ocsyn va caghlaa argid, as ny stuill ocsyn va creck calmanyn.
13As doort e roo, Te scruit, Bee my hies enmyssit thie yn phadjer, agh ta shiuish er nianoo eh ny ooig dy vaarlee.
14As haink ny doal as ny croobee huggey gys y chiamble, as ren e ad y leihys.
15As tra honnick ny ard‐saggyrtyn as ny scruderyn ny reddyn yyndyssagh ve dy yianoo, as y chloan gemagh ayns y chiamble, as gra, Hosanna gys mac Ghavid, va’d feer jymmoosagh,
16As doort ad rish, Vel oo clashtyn cre ta’d shoh dy ghra? Doort Yeesey roo, Ta mee, nagh lhaih shiuish rieau, magh ass beill ooikanyn as cloan er y cheeagh t’ow er gheddyn moylley firrinagh?
17As daag e ad, as hie e magh ass yn ard‐valley gys Bethany, as ghow e aight ayns shen.
18Nish ayns y voghrey, myr ve goll reesht gys yn ard‐valley, ve accryssagh.
19As tra honnick e billey‐figgagh er y raad, haink e huggey, as cha dooar e nee erbee er, agh ynrycan duillagyn, as doort e rish, Nar aase mess erbee orts veih shoh magh er son dy bragh. As chelleeragh ren y billey figgagh fioghey ersooyl.
20As tra honnick yn vooinjer va sheer geyrt er shoh, ghow ad yyndyss, gra, Cre cha leah as ta’n billey figgagh er fioghey ersooyl?
21Dreggyr Yeesey, as doort e roo, Dy firrinagh ta mee gra riu, My vees credjue eu, as mannagh jean shiu dooteil, nee shiu cha nee ynrycan shoh, ta jeant rish y billey‐figgagh, agh my jir shiu rish y slieau shoh, Bee er dty scughey, as er dty hilgey ayns y cheayn, bee eh er ny yianoo.
22As dy chooilley nee, cre‐erbee nee shiu y hirrey ayns padjer, my vees eh lesh credjue, nee shiu y gheddyn eh.
23¶ As tra ve er jeet stiagh ayns y chiamble, haink ny ard‐saggyrtyn as shanstyr yn pobble huggey, myr ve gynsaghey, gra, Cre’n phooar t’ayds dy yannoo ny reddyn shoh? as quoi hug yn phooar shoh dhyt?
24As dreggyr Yeesey as doort e roo, Fênyms jiuish yn red, as my inshys shiu dou eh, inshyms myrgeddyn diuish, cre’n phooar t’aym dy yanoo ny reddyn shoh.
25Bashtey Ean, cre woish ve? veih niau, ny veih deney? As loar ad nyn mast oc hene, gra, My jir mad veih niau, jir eshyn rooin, Cre’n fa eisht nagh chred shiu eh?
26Agh my jir mad, Veih deney; ta aggle ain roish y pobble; son ta dy chooilley ghooinney goall Ean son phadeyr.
27As dreggyr ad Yeesey, as doort ad, Cha vel shin able insh. As doort e roo, Cha‐moo inshyms diuish, cre’n phooar t’aym, dy yanoo ny reddyn shoh.
28¶ Agh cre ta shiu dy smooinaghtyn? Va dooinney dy row, as daa vac echey, as haink e gys y chied vac as doort e, Vac, gow as obbree jiu ayns my gharey‐feeney.
29Dreggyr eshyn, as doort e, cha jem: agh ny lurg shen ghow e arrys as hie e.
30As haink e gys yn nah vac as loar e rish myrgeddyn. As dreggyr eshyn, as doort e, Hem, vainshter, as cha jagh e.
31Quoi jeu shoh nyn neesht ren aigney e ayrey? Doort adsyn rish, Yn chied vac. Doort Yeesey roo, Dy firrinagh ta mee gra riu, dy jed ny publicanee as ny streebaghyn stiagh ayns reeriaght Yee, reuish.
32Son haink Ean hiuish ayns raad y chairys, as cha chred shiu eh: agh chred ny publicanee as ny streebaghyn e. As tra honnick shiuish shoh, cha ghow shiu arrys ny lurg shen, dy voddagh shiu e y chredjal.
33¶ Easht‐jee rish coraa dorraghey elley: Va far‐thie dy row, ren garey‐feeney y hoiaghey, as ren e cley y mish, as chley e press‐feeney ayn, as hrog e toor, as hoie e e rish fir‐hie, as hie e gys cheer foddey.
34As tra va earish ny mess tayrn er‐gerrey, hug e e ir‐mooinjerey gys ny fir‐hie, dy voddagh ad geddyn jeh’n mess echey.
35As ghow ny fir‐hie e ir‐mooinjerey, as woail ad fer, as var ad fer elley, as chlagh ad fer elley.
36Reeshtagh hug e magh shiarvaantyn elley ny sliee ny’n chied eallagh; as ghell ad roosyn er yn aght keddyn.
37Agh er jerrey ooilley hug e huc e vac, gra, Bee ad arrymagh da my vac.
38Agh tra honnick ny fir‐hie yn mac, doort ad nyn mast oc hene, Shoh’n Eirey, tar‐jee, lig dooin e [y] varroo, as bee’n eiraght echey lien hene.
39As ghow ad e, as hilg ad e magh ass y gharey‐feeney, as var ad e.
40Tra hig er‐y‐fa shen chiarn y gharey‐feeney, cre nee e rish ny fir‐hie shen?
41Doort adsyn rish, Stroie‐ee e fegooish myghin ny drogh gheney shen, as soiee e yn garey‐feeney rish fir‐hie elley, livrey‐ys ny messyn da, ayns nyn imbaghyn.
42Doort Yeesey roo, Nagh lhaih shiuish rieau ayns goo Yee, Yn chlagh ren adsyn va troggal y thie y vee‐lowal, ta’n chlagh cheddyn er jeet dy ve yn ard-chlagh chorneilagh: shoh janoo yn Chiarn, as te yyndyssagh ayns ny sooyllyn ainyn?
43Shen‐y‐fa ta mish gra riu, Dy bee reeriaght Yee er ny ghoall veuish, as er ny choyrt da ashoon, ymmyrkys magh yn mess echey.
44As quoi‐erbee huittys er y chlagh shen, bee e er ny vroo: agh quoi‐erbee huittys y chlagh shen er, nee ee cha meen as joan jeh.
45As tra va ny ard‐saggyrtyn as ny Phariseyn erreish ny coraaghyn dorraghey echey y chlashtyn, dennee ad dy nee jeusyn ve loart.
46Agh tra va’d aignagh dy ghoall e, ghow ad aggle roish y pobble, er‐yn‐oyr dy row ad jeaghyn er dy ve ny adeyr.
Currently Selected:
Noo Mian 21: NMian
Highlight
Share
Copy
Want to have your highlights saved across all your devices? Sign up or sign in
historic text maintained in digital form by the British and Foreign Bible Society (Sheshaght y Vible)
