Noo Mian 22
22
CAB. XXII.
1As dreggyr Yeesey as loar e roo reesht liorish coraaghyn dorraghey, gra;
2Ta reeriaght niau er ny holaghey gys ree dy row ren bannish son e vac,
3As hug e magh e harvaantyn dy emagh orroosyn va cuirt gys y vannish, as cha row ad aignagh dy heet.
4Reeshtagh hug e magh shiarvaantyn elley, gra, Abbyr‐jee roosyn ta cuirt, Cur‐my‐ner ta mee er naarlaghey my yinnair: ta my ghew as my veiyn beiht marroo, as dy chooilley nee aarloo; tar‐jee gys y vannish.
5Agh hoie adsyn beg jeh, as hie ad rumboo, fer gys e valley as fer elley gys y dellal echey:
6As ghow yn chooid elley ny shiarvaantyn echey, as ghell ad dy roonagh roo, as var ad ad.
7Agh tra cheayl y Ree jeh, ve jymmoosagh: as hug e magh e heshaghtyn‐caggee, as stroie e ny dunveryn shen, as losht e yn ard‐valley oc.
8Eishtagh doort e rish e harvaantyn, Ta’n vannish aarloo, agh y vooinjer va cuirt, cha row ad feeu.
9Gow‐jee magh er‐y‐fa shen gys ny raadjin moarey, as chooilleen as yiow shiu, cuir‐jee gys y vannish.
10As hie ny shiarvaantyn shen magh gys ny raadjin moarey, as ren ad chooilleen as haink nyn raad y haglym cooidjagh, chammah sie as mie, as va thie ny banshey er ny lieeney lesh goaldee.
11¶ As tra haink y Ree stiagh dy akin ny goaldee, honnick e dooinney ayns shen nagh row garmad‐poost er.
12As doort e rish, Charrey, kys haink uss stiagh ayns shoh, fegooish garmad‐poost? as cha row fockle echey dy ghra.
13Eisht doort y Ree rish ny shiarvaantyn, Kiangle‐jee e laue as cass, as gow‐jee e ersooyl, as tilg‐jee e ayns y dorraghys sodjey mooie: ayns shen vees keaney as snaggeraght feeacklyn.
14Son ta ymmodee er nyn eam, agh beggan er nyn reih.
15¶ Eishtagh hie ny Phariseyn, as hug ad nyn goyrle dy cheilley, kys oddagh [ad] e y hayrn ayns rybbey, liorish e ocklyn.
16As hug ad magh huggey shiartance jeusyn va’d hene er nynsaghey, marish ny Herodianee, gra, Vainshter, ta fys ain dy vel oo firrinagh, as dy vel oo gynsaghey raad Yee ayns firrinys, cha‐moo t’ow ayns imnea roish dooinney erbee: son cha vel oo soiaghey jeh persoon deney.
17Insh dooin er‐y‐fa shen, cre t’ow dy smooinaght, Vel eh lowal keesh y choyrt da Cesar, mannagh vel?
18Agh dennee Yeesey yn olkys oc, as doort e, Cre’n fa ta shiu dy my violaghey, chrauee foalsey?
19Jeagh‐jee dou argid y cheesh, as hug ad lieu huggey ping.
20As doort e roo, Quoi gys ta’n jalloo as y scrieu shoh bennalt?
21Doort adsyn rish, gys Cesar. Eishtagh doort e roo, Eeck‐jee er‐y‐fa shen da Cesar, ny reddyn ta lesh Cesar: as da Jee ny reddyn ta lesh Jee.
22Tra cheayl ad shoh, ghow ad yyndyss, as daag ad e, as hie ad rumboo.
23¶ Yn laa keddyn haink huggey ny Sadduceyn, ta gra nagh vel irree-seose-reesht dy ve ayn, as dênee ad jeh,
24Gra, Vainshter, ta Moses er ghra, my ta dooinney geddyn baase, fegooish cloan, dy vel e vraar dy phoosey’n ven echey, as dy hroggal seose sluight gys e vraar.
25Nish boyn dooinyn shiaght braaraghyn, as hooar y chied vraar, tra ve er phoosey ben, baase, fegooish cloan, as daag e e ven gys yn nah vraar.
26As hooar yn nah vraar myrgeddyn baase as y tress gys y chiaghtoo.
27As er jerrey ooilley hooar y ven baase myrgeddyn.
28Shen‐y‐fa ec yn irree-reesht, quoi jeh’n chiaght vees ee echey son ben, son vie son ben daue ooilley.
29Dreggyr Yeesey as doort e roo, Ta shiu fo marranys, as cha vel toiggal eu jeh goo, ny jeh pooar Yee.
30Son ec yn irree-reesht, cha vel ad poosey ny er nyn goyrt ayns poosey; agh ta’d myr ainlyn Yee t’ayns niau.
31Agh my‐chione irree-seose-reesht ny merriu, nagh vel shiu er lhaih shen va loarit riu liorish Jee, gra,
32Mish Jee Abraham, as Jee Isaac, as Jee Yacob? cha vel Jee ny Yee jeh ny merriu, agh jeh ny bio.
33As tra cheayl yn pobble shoh, ghow ad yyndyss jeh’n ynsaghey echey.
34¶ Agh tra va ny Phariseyn er chlashtyn, dy row e er chur er ny Sadduceyn ve nyn dost, va’d er nyn jaglym cooidjagh.
35As denee fer jeu va ny er‐ynsee jeh’n leigh, question jeh, er chee y violaghey e, gra,
36Vainshter, cre yn ard anney ayns y leigh?
37Doort Yeesey rish, Ver oo graih da’n Chiarn dty Yee, lesh ooilley dty chree, as lesh ooilley dt’annym, as lesh ooilley dt’aigney.
38Shoh yn chied as yn ard anney.
39As ta’n nah anney casley rish, Ver oo graih da dty naboo, myr dhyt hene.
40Yn daa anney shoh bun y leigh as ny phaderyn.
41¶ Choud as va ny Phariseyn er nyn jaglym cooidjagh, dênee Yeesey jeu,
42Gra, Cre ta shiu dy smooinaght jeh Creest? quoi da mac e? Doort adsyn rish, Mac Ghavid.
43Doort eshyn roo, Kys eishtagh dy vel David liorish y spyrryd genmys e ny Hiarn, gra,
44Doort y Chiarn rish my Hiarn’s, Soie uss er my laue yesh, derrey verrym dty noidjyn son stoyl fo dty chassyn.
45My ta David eisht genmys e ny Hiarn, kys te yn mac echey?
46As cha row dooinney erbee able fockle dy ansoor y chur da, cha‐moo by loys da dooinney erbee (veih’n laa shen magh) question erbee sodjey y enaght jeh.
Currently Selected:
Noo Mian 22: NMian
Highlight
Share
Copy
Want to have your highlights saved across all your devices? Sign up or sign in
historic text maintained in digital form by the British and Foreign Bible Society (Sheshaght y Vible)
