Noo Mian 23
23
CAB. XXIII.
1Eishtagh loar Yeesey rish y pobble, as roosyn va sheer geyrt er,
2Gra, Ta ny scruderyn as ny Phariseyn nyn soie ayns stoyl Voses.
3Ooilley er‐y‐fa shen cre‐erbee nee ad y oardaghey div dy realley, freil‐jee as jean‐jee eh; agh ny jean‐jee lurg ny obbraghyn oc: son ta’d gra, as cha vel ad janoo.
4Son ta’d kiangley erraghyn tromey as doillee dy ve er nyn ymmyrkey, as dyn goyrt ad er geayltyn deney, agh cha gleashee adsyn hene ad lesh annane jeh ny meir oc.
5Agh ooilley nyn obbraghyn ta’d dy yanoo, dy ve er nyn vakin liorish deney: ta’d janoo liane ny #23.5 Peeshyn dy chracknyn orroo va scruit raaghyn dy leigh Yee: phylactereeyn oc, as cur chemmallyn moarey er nyn gharmadyn.
6As shynney lieu ny ard ynnydyn‐soie y ve oc ec cuirraghyn, as ny ard stuill ayns ny kialteenyn,
7As sleih dy vannaghey daue ayns ny margaghyn, as dy ve enmyssit liorish deney, Rabbi, Rabbi.
8Agh ny bee-jee shiuish enmyssit Rabbi: son ta yn vainshter eu, ta shen dy ghra, Creest; as ta shiuish ooilley nyn mraaraghyn.
9As ny enmys‐jee dooinney erbee yn ayr eu er y talloo, son ta yn er ny Ayr diu, ta ayns niau.
10Cha‐moo bee‐jee enmyssit mainshteryn, son ta yn er ny vainshter erriu, ta shen dy ghra, Creest.
11Agh y fer syrjey nyn mast eu, bee e diu ny harvaant.
12As quoi‐erbee nee e hene y hoiaghey seose, bee e er ny injillaghey, as eshyn nee e hene y injillaghey, bee e er ny hoiaghey seose.
13¶ Agh smerg diuish, scruderyn as Phariseyn, chrauee‐foalsey; son ta shiu jeih seose reeriaght niau noi deney: son cha vel shiu goll stiagh shiu hene, as ta shiu dyn liettal adsyn ta aarloo dy gholl stiagh.
14Smerg diu, scruderyn as Phariseyn, chrauee‐foalsey; son ta shiu cur mow thiyn mraane treoghe, as liggey erriu dy bee shiu foddey ec padjer; shen‐y‐fa ta kerraghey strimmey nyn gouyr.
15Smerg diu, scruderyn as Phariseyn, chrauee‐foalsey; son ta shiu goll my‐geart keayn as talloo, dy hayrn yn yoarree gys y chredjue, as tra te er jyndaa hiu, ta shiu dy yanoo e ny liannoo dy nivrin ghaa wheesh as shiu hene.
16Smerg diu, leedeilee doall, ta gra, Quoi‐erbee looys liorish y chiamble, nagh vel eh veg: agh quoi‐erbee looys liorish aer y chiamble, dy negin da coontey choyrt.
17Mee‐cheealagh as doall, son quoi smoo ta dy ve soit jeh, yn aer, ny’n chiamble ta casherickey yn aer?
18As quoi‐erbee looys liorish yn altar, nagh vel eh veg: agh quoi‐erbee looys liorish y gioot t’er yn altar, dy vel er coontey choyrt.
19Mee‐cheealagh as doall: son quoi smoo ta dy ve soit jeh, yn gioot, ny’n altar ta casherickey yn gioot?
20Quoi‐erbee er‐y‐fa shen looys liorish yn altar, te loo liorish yn altar hene, as liorish dy chooilley nee ta er.
21As quoi‐erbee looys liorish y chiamble, te loo liorish y chiamble as liorishyn ta vaghey ayn.
22As eshyn nee loo liorish niau, te loo liorish stoyl‐reeoil Yee, as liorishyn ta ny hoie er.
23Smerg diu, scruderyn as Phariseyn chrauee‐foalsey; son ta shiu geeck jaghee jeh myndey, anise as cumin, as cha vel shiu er chooilleeney currymyn symmyrtsee jeh’n leigh, cairys, myghin, as firrinys: ad shoh lishagh shiu ve’r nianoo, fegooish y chooid elley y agail gyn janoo.
24Leedeilee doall, ta carwhillag snemmey erriu, agh sluggee shiu camel.
25Smerg diu, scruderyn as Phariseyn, chrauee‐foalsey; son ta shiu glenney yn cappan as y claare er cheu‐mooie, agh cheu‐stie ta’d laane dy hranlaase as dy niau‐heeltys.
26Pharisee doall, glen hoshiaght shen ny ta cheu‐stie jeh’n chappan as jeh’n chlaare, dy vod yn cheu‐mooie oc ve glen myrgeddyn.
27Smerg diu, scruderyn as Phariseyn, chrauee‐foalsey; son ta shiu goll rish oaiaghyn t’er nyn niallaghey, ta dy jarroo jeaghyn aalin er cheu‐mooie, agh cheu‐stie ta’d laane dy chrauyn ny merriu, as jeh dy chooilley vroid.
28Shen myr ta shiuish neesht er cheu‐mooie cairagh ayns shilley deney, agh cheu‐stie ta shiu laane dy chraueeaght-oalsey as dy vee‐chairys.
29Smerg diu, scruderyn as Phariseyn, chrauee‐foalsey; er‐y‐fa dy vel shiu troggal oaiaghyn ny phaderyn, as soiaghey magh liaghtyn ny deney cairagh,
30As gra, Dy beagh shinyn er ve ayns laghyn nyn ayraghyn, cha beagh shin er ve nyn baarteasyn maroosyn ayns fuill ny phaderyn.
31Shen‐y‐fa ta shiu nyn venishyn diu hene, dy nee yn chloan ocsyn shiu ren ny phaderyn y varroo.
32Lieen‐jee seose eishtagh towse nyn ayraghyn.
33Shiuish ard‐nieughyn, sheeloghe dy ard‐nieughyn, kys oddys shiu kerraghey nivrin y scapail?
34¶ Shen‐y‐fa, cur‐my‐ner, ta mish coyrt hiu phaderyn, as deney creeney, as scruderyn; as part jeu nee shiu y varroo as y chrossey, as part jeu nee shiu y chustey ayns ny kialteenyn eu, as tranlaase y yanoo orroo veih ard‐valley gys ard‐valley.
35Dy vod ooilley yn uill chairagh hie er deartey er y talloo tuittym erriu, veih fuill Abel cairagh, gys fuill Zacharias, mac Barachias, e ren shiu y varroo eddyr y chiamble as yn altar.
36Dy firrinagh ta mee gra riu, dy jig dy chooilley nee jeu shoh er y cheeloghe shoh.
37Yerusalem, Yerusalem, ta marroo ny phaderyn, as dyn glaghey adsyn t’er nyn goyrt er chaghteraght hood, cre cha mennick as va mish booiaght ve’r haglym dty chloan cooidjagh, ’naght myr ta kiark goall stiagh e hein fo my skainyn, as cha nee yn aigney eu ve?
38Cur‐my‐ner, ta’n thie eu faagit diu tregit.
39Son ta mee gra riu, Nagh vaik shiu mish ny yei shoh, derrey jir shiu, Bannit ta eshyn ta cheet ayns ennym y Chiarn.
Currently Selected:
Noo Mian 23: NMian
Highlight
Share
Copy
Want to have your highlights saved across all your devices? Sign up or sign in
historic text maintained in digital form by the British and Foreign Bible Society (Sheshaght y Vible)
