Noo Mian 24
24
CAB. XXIV.
1As hie Yeesey magh as jimmee e veih’n chiamble; as haink y vooinjer va sheer geyrt er huggey, dy chur shilley da jeh stooamit y chiamble.
2As doort Yeesey roo, Nagh vaik shiu ooilley ny reddyn shoh? Dy firrinagh ta mee gra riu, nagh bee faagit yn chlagh er clagh elley, nagh bee er ny hilgey sheese.
3¶ As myr ve ny hoie er cronck ny Olivyn, haink y vooinjer va sheer geyrt er huggey er lieh, gra, Insh dooin cooin vees ny reddyn shoh? as cre’n cowrey vees jeh’n cheet ayd as jeh jerrey’n teihll?
4As dreggyr Yeesey as doort e roo, Cur jee twoai nagh moll dooinney erbee shiu.
5Son hig ymmodee ayns m’ennyms, gra, Mish Creest, as nee ad ymmodee y volley.
6As clinnee shiu jeh caggaghyn, as jeh imraaghyn dy chaggaghyn: jeagh nagh bee shiu seaghnit: son shegin da dy chooilley nee jeu shoh cheet gys kione, agh cha bee yn jerrey foast.
7Son irree ashoon noi ashoon as reeriaght noi reeriaght, as bee gennaghyn as crampyn as craaghyn tallooin ayns ymmodee ynnydyn.
8Bee ooilley shoh toshiaght trimshey.
9Eisht livrey‐ee ad shiu seose dy ve seaghnit, as marree ad shiu: as bee feoh ec dy chooilley ashoon erriu, er coontey yn ennym ayms.
10As eishtagh gowee ymmodee oyr dy huittym ayns peccah, as brah‐ee ad, as ver ad feoh yn derrey yeh da’n jeh elley.
11As nee ymmodee phaderyn foalsey girree seose, as ymmodee y volley.
12As er‐yn‐oyr dy jean olkys bishaghey, nee graih ymmodee feyraghey.
13Agh bee eshyn nee tannaghtyn firrinagh gys y jerrey, er ny hauail.
14As bee sushtal yn reeriaght er ny phreacheil ayns ooilley’n seihl, son fenish da dy chooilley ashoon, as eisht nee yn jerrey cheet.
15Tra hee shiu er‐y‐fa shen eajeeid yn traartys, ta loarit jeh liorish Daniel yn phadeyr, ny hassoo ayns yn ynnyd casherick (eshyn ta lhaih, lig da tastey ghoall).
16Eishtagh lig dauesyn t’ayns Judea roie gys ny sleityn;
17Eshyn t’er mullagh y thie, ny lig da cheet neose, dy ghoall nee erbee ass e hie.
18As ny lig dasyn t’ayns y vagher chyndaa back, dy chur lesh e eaddagh.
19As smerg dauesyn ta torragh, as dauesyn ta cur keeagh ayns ny laghyn shen.
20Agh guee‐jee shiuish nagh bee yn roie eu er chea ayns y yeurey, ny er y doonaght.
21Son bee seaghyn moar ec y tra shen, leid as nagh row er dy hoshiaght y teihll gys yn earish shen, as leid as nagh bee arragh dy bragh.
22As mannagh beagh ny laghyn shen dy leah ec kione, cha beagh feill erbee er ny hauail, agh er graih yn chloan reiht, bee ny laghyn shen dy leah ec kione.
23Eisht my jir dooinney erbee riu, Cur‐my‐ner, ta Creest ayns shoh, ny ayns shid; ny creid‐jee eh.
24Son nee Creestyn foalsey as phaderyn foalsey girree, as cowraghyn moarey as yyndyssyn y hoilshaghey, ayns wheesh as dy mollagh ad (dy beagh eh possible) yn eer chloan reiht.
25Cur‐my‐ner, ta mish er ninsh diu rolaue.
26Shen‐y‐fa my jir ad riu, Te ayns yn aasagh, ny gow‐jee magh: Cur‐my‐ner, te ayns ny shamyryn follit, ny creid‐jee eh.
27Son myr ta’n tendeil cheet ass y shar, as cur soilshey choud as gys y sheear, myr shen myrgeddyn vees cheet yn mac dooinney.
28Son raad erbee dy bee yn corp, ayns shen vees ny urlaghyn er nyn jaglym.
29¶ Chelleeragh lurg seaghyn ny laghyn shen, aasee yn ghrian dorraghey, as cha der yn aist e soilshey, as tuittee rollagyn yn aer, as bee pooaraghyn yn aer er nyn graa.
30As eishtagh bee cowrey jeh’n Mac dooinney er ny akin ayns yn aer: as ec y tra shen nee ooilley sheeloghyn y tallooin dobberan, as hee ad yn Mac dooinney cheet ayns bodjallyn yn aer, lesh pooar as gloyr woar.
31As ver e magh e ainlyn lesh feiyr moar cayrn, as nee ad e chloan reiht y haglym cooidjagh veih ny kiare geayghyn, veih yn derrey chione jeh’n aer gys y chione elley.
32Ynsee‐jee eisht coraa dorraghey jeh’n billey figgagh: tra ta’n banglane echey foast oor, as cur magh duillagyn, ta fys eu dy vel y sourey er‐gerrey.
33Myr shen myrgeddyn shiuish, tra hee shiu ooilley ny reddyn shoh, toig-jee dy vel e er‐gerrey, dy jarroo ec ny dorryssyn.
34Dy firrinagh ta mee gra riu, roish my vow yn cheeloghe shoh baase, dy bee dy chooilley nee jeu shoh cooilleenit.
35Nee niau as talloo cherraghtyn, agh my ghoans cha jean cherraghtyn.
36¶ Agh er y laa as yn oor shen, cha vel fys ec dooinney erbee, ny ec ainlyn niau, agh ec my Ayr ny lomarcan.
37Agh myr va laghyn Noe, myr shen myrgeddyn vees cheet yn Mac dooinney.
38Son myr ayns ny laghyn va roish y thooilley, va’d gee as giv, poosey as coyrt ayns poosey, derrey yn laa hie Noe stiagh ayns yn arg,
39As cha dug ad tastey, derrey haink y thooilley as ghow eh ad ooilley ersooyl, myr shen myrgeddyn vees cheet yn Mac dooinney.
40Shen y tra vees jees ayns y vagher, bee yn derrey yeh goit, as y jeh elley fagit.
41Bee daa ven blieh ec y wyllin, yn derrey yeh goit as y jeh elley fagit.
42¶ Bee‐jee er nyn dwoai er‐y‐fa shen, son cha vel fys eu er oor cheet nyn Jiarn.
43Agh shoh toig‐jee, dy beagh fys er ve ec maishter y thie cre’n oor veagh y maarlagh er jeet, veagh e er watchal, as cha beagh e er liggey da e hie y vrishey stiagh.
44Shen‐y‐fa bee‐jee shiuish myrgeddyn aarloo, son ec leid yn oor as nagh vel shiu smooinaght er, hig yn Mac dooinney.
45Quoi eisht yn chiarvaant firrinagh as creeney, ta e hiarn er nianoo ny er‐reil er e hie, dy chur daue nyn meaghey ayns earish cooie?
46Bannit ta’n chiarvaant shen yiow e hiarn janoo myr shen ec y cheet echey.
47Dy firrinagh ta mee gra riu, dy livrey e dys y churrym echey ooilley e chooid.
48Agh my jir y drogh harvaant shen ayns e chree, Ta my hiarn liggey shiaghey yn cheet echey,
49As toshiaght y yanoo dy woalley e heshaghyn‐harvaant, as dy ee as dy iv marish y vooinjer veshtal:
50Hig chiarn y chiarvaant shen ec laa nagh bee e jeaghyn er y hon, as ayns oor nagh bee e twoaiagh jeh,
51As giaree e e veih my chielley, as pointee e e chronney marish ny crauee‐foalsey: ayns shen vees keaney as snaggeraght feeacklyn.
Currently Selected:
Noo Mian 24: NMian
Highlight
Share
Copy
Want to have your highlights saved across all your devices? Sign up or sign in
historic text maintained in digital form by the British and Foreign Bible Society (Sheshaght y Vible)
