Luke 21

NAKATA 21

Uilgaktuk aituktuk

(Mt. 12:41-44)

1Jesuslu kungniakhuni manigiektunik tautuktuk aituktillugit manikagvingmun. 2Uilgaktuktauk ilingayuk maniuyangnik malgunik kanuyangnik aitungman tautuktaa. 3Ukallaktuglu, “Ilumun ukautigipfi, tamna uilgaktuk ilingayuk aituktuk amigaitkiyanik inungnin allanin tamainin, 4tapkua manigiekaluaktillugit aituktun, angnagli inugutikhaminik tamainik aitukpaktugaluak.

Jesus ukagiaktuk angayyuvikpagyuak imignialengman

(Mt. 24:1-2; Mk. 13:1-2)

5Inuillu ilaita ukautigimayyuk angayyuvikpagyuak iglukpait pimagikpiangmata akituyunik ukallaktuk, 6“Tapkua tautuktahi tayya taman imihungugamik uyagak malguklunin kaligiktauyunaektuk.”

Aiyungnagnigit kaitauhunguyun

(Mt. 24:3-25; Mk. 13:3-23)

7Tapkualu apegiyaat, “Ilihauyyi, kakugu tamna piniakka angayyuvikpagyuamun kanuk tapfuma naunaikutaa itniakka?”

8Ukallaktuk “Upingakhitailuhi ilipfi ulamnekunahi, amigaitun kaithungumata atipkun ukakhutik, 'Christiuyunga uvanga' imaalunin, 'Tapfuma pivikhaa tikituk'. Maliktailugit tapkua. 9Tuhaagupfilu anguyaktutigun, anguyaktun unipkautaitigullu ekhiukpallaaktailuhi, tapkua tuhaanangniagmata, nunaumli ihua tikingitugaluak tapfumani.” 10Talva ukallautiyain, “Nunakatigit allat anguyautiginiaktain, atanguvillu allanun anguyautingnangniaktun. 11Tamainilu nunat ingutakhunguyun amihumik inuillu akeaguakhunguyun, aaniagyuakhutiglu, ekhinakpiaktullu naunaikutillu kilangmin kaitauniaktun.

12“Hivunganili tiguniaktaahi naglikhaktitumavluhi agitivluhilu atugvingnun itektauvingnullu. Taimatun agitiyauniaktuhi atanengnun atanekpainun atiga pivlugu. 13Talvani ilihimayyiniaktuhi. 14Aahin hivullengmik ukaktukhapfingnik ihumaluktailuhi 15ukaktiniagapfi naguyumik ihumapkakuvluhilu akigapfi ihuigikunagit ukauhihi. 16Tuniyauhunguyuhilu angayukapfigunlunin, katangutipfigunlunin, ilapfigunlunin ilannapfigunlunin, tapkua ilaita tukuniaktaahi. 17Nagugiyauyunaektuhilu tamainin atiga pivlugu. 18Niakupfingnin nuyat atauhingnaklunin tamagunaituk. 19Ipigagngitkupfi annautiniaktahi inunihi.

20“Iglukagvik Jerusalem iluyautillugu anguyaktinin takugupfiuk, ilihimangniaktuhi tamagvia tikiyyukilengman. 21Tapkua Judeamiut manilgulnun kimalugit, inuillu iglukagvium iluaniitun aullalit, iglukagvi-ilgumiitunlu utektailugit kimautinatik. 22Naglikhaktitauyun uvluangit taiyauniaktun tapkua tiitigautigiyauyun ilumugniangmata. 23Alianainiaktuk tapfumani angnangnun nutaganiyyukilektunun nutaganualingnunlu, nunaum inungit akhun aiyukaktitauhungumata, 24tapkua tukutauniaktun havikpagnun, aullautiyauhunguyunlu Jewmiungitunun amigaitunun; iglukagviglu Jerusalem Jewmiungitun atannektugniaktaat, tapkua pivikhait innektinagit.

Nunaum ihua

(Mt. 24:29-31; Mk. 13:24-27)

25“Aahin tapfumani hikenek, tatkeglu, uvlugiayyallu naunaikutakangniaktun, nunamilu nunakatigit aiyukakhunguyun ekhiugniagamik tagiugmun malgillu akhun kagaktagniangmata. 26Inuillu utakingnaglutik ekhinaktunun kuglugniaktun kilaum hakugigningit ingutagniangmata. 27Talva tapkua Inum engniga tautukhunguyaat atkautillugu nuvuyaktigun hakugiktumik kaumakpiaktumiglu. 28Ilaa tapkua nuinahualekkata aglukpagitti annautikhakhi kaglinialengman.

Inuit upalungayakuvlugit

(Mt. 24:32-35; Mk. 13:28-31)

29Talva Jesusim ukautiyain hivuniunengmik “Tautuglugit napaaktuk ahiakaktumik fignik, allatauk, 30kihektutain nuigagata auyak tikilengman ilihimayuhi ilipfingnik. 31Taimatuntauk hapkuninga tamainik takugupfi ilihimangniaktuhi Godim atanguvia tikilengman.

32Ilumun ukautigipfi hapkua inuit inuyun tayya tukuyunaitun hapkua tamaita taimaktinagit. 33Kilak nunalu nunguniaktuk ukauhitkali nunguyunaitugaluit.

34Ilipfingnik upingakhitailuhi umatihi ukumailiugnakhavun ihuitukun, imingakpiagupfi, ihumalukpallaagupfilunin, Godim uvlua tikinakhavuk upalungayakhimaitkaluaktilluhi, 35tamna ila tikiniaktuk inungnun tamainun nunaniitunun. 36Amekhivagluhi nutkakhimaitumik kengagluhilu hakugiktitaukuvluhi annauyyaukuvluhilu tapkunanga tikiniaktunin, aahin nangekuvluhilu Inum engningata hangani.”

37Uvluk tamanlu Jesus ilihauyyingnaktuk angayyuvikpagyuami, unugaganli aahinungaktuk naiyukhuni manilgulmi Olivetmik taiyauyumi. 38Uvlaamilu kilamik inuit tamangmik paaktaat angayyuvikpagyuami tuhaayumavlugu.

Currently Selected:

Luke 21: Sperry

Highlight

Copy