Luke 5

NAKATA 5

Jesus maligutiminik hivullengnik kaitkuiyuk

(Mt. 4:18-22; Mk. 1:16-20)

1Inuillu Jesus ilunahualektaat tuhaayumavlutik Godim ukauhianik, tahium atikaktum Gennesaretmik hinaani nangektillugu. 2Tapfumalu umiak malguk tautuktait inuekhimayuk ikalukhiuktit aahininmata kuvyaktik halumaktitugit. 3Umiagmun aipaanun Simonim piyutaanun ikiyuk apegivlugu Simon kiptaktakuvlugu mikiyumik. Ingivluni ilihautiyain inuit umiagmin. 4Inungnunlu ukaguegami ukallautiyaa Simon, “Itiyumun taunungaugiagin kuvyat ningitiguk ikalukuvlutin.” 5Simon kiuyuk, “Atanek, unugaaluk kuvyaktukpaktugut ikalukngitkaluakhuta. Uktukugangmali kuvyak ningitiniagiga.” 6Taimaligamik ikaluktun amigaitpiaktumik kuvyait ahigukayakhutiklu. 7Aahin nulugaktain havakatitik umiagmi aipaani ikayukuvlugit. Kaigamik umiak tamangmik uhilematigik kaluakayaktuk. 8Simon Peterm takugamiuk tamna palluktuk Jesusmun ukakhuni, “Atanek huinekitugama kimaugin uvamnin”. 9Agligutakpiatuglu ikalukpagamik amigaitpiaktumik, 10tapkuatauk Zebedeem engnigik James Johnlu, Simonim havakatait agligutakkatauvlutik. Jesusimlu Simon ukallautiyaa,“Ekhitailutin talvangaanin inukhiugumaktutin. 11“ Tapkuatauk nunamun tikinamik tamaiyatik tamaita kimakhugit maliktaat.

Kilakhimayuk naguhipkaktauyuk

(Mt. 8:1-4; Mk. 1:40-45)

12Jesus iglukagvit ilanganiitillugu inuk kilakhimayuk, tapfuma takugamiuk Jesus palluktuk nunamun tukhiagvigivlugu ukallaktuk, “Atanek piyumaguvin kilaektiniaktangma.” 13Tapfumalu ihakami aktuktaa ukakhuni, “Piyumayungali kilaekhiguit.” Tayyainaglu kilaektuk. 14Jesusimlu uniuyyitailiyaa ukautivlugu, “Takki angayyuvikpagyuakunungauguit ilingnik takupkaikuvlutin. Aahin aitukpaglutin naguhiyyutikhangnik inuit ilihimakuvlugit naguhivagavin, taima Moses pitkuvangman.” 15Amigaitkiyanigli inuit unipkautigimatigit Jesusim havaangit, allat amigaitpiaktun inuit kaivaktun tuhaayumavlutik, naguhipkaktauyumavlutiglu. 16Jesusli kimauyuk iglupailgulmun kengagumavluni.

Tumangayuk naguhipkaktauyuk

(Mt. 9:1-8; Mk. 2:1-12)

17Tapfumanilu Jesus ilihauyyitillugu Pharisekut pitkuhiliuktillu akuihimayun Galileemin iglukagluangitunin tamainin Judeamillu Jerusalemillu itun, aahin Atangum hakugigningata ikayukmani naguhipkaktain aaniaktun. 18Talva angutit tumangayuk kipikhimayuk tigumiagamitku upagahuaktaat Jesus iglumiitumun. 19Inugiekpallaaman itevikhainamik iglum kaanganun maiyugaktitaat. Kaangalu ungavakaaktillugu tumangayuk ningititaat inuit akunganun Jesusim hanganun. 20Tapfumalu ukpengningat takugamiuk ukallaktuk, “Inuk, huinekutitin ihumagiyauyunaektun.” 21Pharisekut tiitigaktillu apekhinahualektun ukakhutik, “Kinauva tamna ukaniluktuk Godmun? Kia Godim allata huinekinit ihumagiyunaekpagit?” 22Taima apekhilengmata Jesusim ilihimagamiuk kiuyain, “Hug umatipfingni ihumalukpihi? 23Nalliak aiyungnaitkiak ukalluni, 'Huinekutitin ihumagiyauyunaektun' imaatunlunin, 'Makittin pihugiagin'? 24Ilihimakuvluhi Inum engniga hakugingman nunami inuit huinekutain ihumagiyunaeglugit” –tumangayumun ukallaktuk– “Ukautigipkin, makittin kipkin tiguguk aigiaginlu.” 25Tayyainak inuit takuangni makittuk kipini tigugamiuk aiyuk God kuyagivlugu. 26Inuillu agligutakpiaktun tamangmik kuyagiyaat God kuglukpiakhutik ukaktun, “Uvlumi aglingnaktumik tautukaakhuta”.

Levi kaitkuyauyuk

(Mt. 9:9-13; Mk. 2:13-17)

27Kinguagun Jesus anigami tautuktuk manilekhiyimik atikaktumik Levimik tamna manilekhiyikagvingmi ikhivainaktillugu, ukautivlugu, “Malinga” 28Tapfumalu tamaita makittuk maligahuakhugu.

29Levilu negiaktukuiyuk amigaitunik iglumini, manilekhiyillu amihut allatauk negikatigiktun taikani. 30Pharisekut tiitigaktillu ihuigigamitigit maligutait ukaktun, “Hug negikatauvihi imikatauvluhlu manilekhiyini huinekiyunilu?” 31Jesusim kiuyain tapkua, “Inuit naamaktillugit Daktimik takuyumangngitun, aaniaktun kihimi. 32Kaithimangngitunga inuit ilumuktun kaitkukuvlugit, huinekiyun kihimi ihumaliukikuvlugit.”

Apekkut negitailiyukhaumangata

(Mt. 9:14-17; Mk. 2:18-22)

33Ukallautiyaat, “Johnim maligutait, Pharisekullu maligutait amihumik negitailingnaktun kengainakhutik, maligutitilli negivaktun imekhutiglu.” 34Jesusim ukallautiyain, “Tapkua katuhekhektunun pulaakuyauyun negitailiniaktahi tapkua uikhak ilagitillugu? 35Kakugulunin uikhak tapkunanga aullautiyautpan talva negitailiniaktun.”

36Hivuniunegmiglu unipkaktuk tapkununga, “Angnak atigimin nutaamin ilakhamik piyunaituk mitkukuvlugu tamna atigimun utukangmun. Taimaliugumi nutak alingniaktaa ilahaglu allauniaktuglu utukangmin. 37Imektautinun utukangnun wainmik nutaamik ilahiyukhaungitpiaktuk imektautit aheguknakhavun wainlu kuviniaktun 38Inum wain nutaak imektautinun nutaanun ilahivaglugit imektautillu nagunekhutik. 39Aahin inuk waintugumi utukangmik mamaktumik nutaamik imigumangngituk ukangniagami, 'Wain utukat mamakiyaumata' ”.

Currently Selected:

Luke 5: Sperry

Highlight

Copy