Luke 6

NAKATA 6

Uvluk Sabbath puiguktaukunagu

(Mt. 12:1-14; Mk. 2:23-3:6)

1Sabbathmi tapfumani Jesus nauttivit mukpauyakhagli apkutigitillugit, maligutait mukpauyakhanik ilainik ungavaktun algamingnunlu akhalekhutik negiyun. 2Pharisekulli ilait ukaktun, “Hug pilekkihi piyukhaungitumik Sabbathmi?” 3Jesus kiuyuk, “Taigugngilahi Davidim huliyanik inungillu kaalegamik, 4Godim igluanun itegami mukpauyamik Godim piyutanik negivaktuk, tapfuminga tapkua negiyukhaungitgaluaktillugit Davidlu inungillunin angayyuvikut kihimi?” 5Aahin ukallautiyain, “Inum enginga ataniuyuk Sabbathmuntauk.”

6Sabbathmi allamilu Jesus atugvingmun itegami ilihauyyiyuk. Taikani inuk algakluktuk talikpia ituk. 7Tiitigaktit Pharisekullu iigiyaat Sabbathmi naguhipkangniamangagu imakaagiyumavlugu. 8Tapfuma tapkua ihumangit ilihimagamigit ukallautiyaa algagluktuk, “Kaigiagin nangeklutin hamani”. Tuhaagami nangektuk haniani. 9Jesus ukallautiyain, “Apegigipfi, Sabbathmi nalliak nagutkiak havagupta naguyumik nagungitumiglunin? Inuk inungmik tukuttigumi annauyyigumilunin?” 10Talva iigigamigit tamaita inugmun ukallaktuk, “Algat ihaguk”. Taimaligami naguhiyuk. 11Tapkuali ningakpiagamik ukakatigiktun huliyakhamingnik Jesusmun.

Jesusim apostles 12n pilluaktain

(Mt. 10:1-4; Mk. 3:13-19)

12Tapfumani Jesus manilgulmungaktuk kengauyumavluni, unugaaluglu Godmun kengainaktuk. 13Akagungugman maligutini kaitkugamigit tapkunanga pilluaktain 12n taivlugit apostlenik. 14Simon, Petermik attekpaga, tapfumalu nukaa Andrew, Jameslu Johnlu Philiplu Bartholomewlu 15Matthewlu Thomaslu Jameslu, Alphaeusim engniga Simonlu Zealotimik taiyauyuk, 16Judaslu Jamesim engniga, Judas Iscariollu tunihiniaktuk Jesusmik.

Kuviakhuktun aiyukalektunlu pitkuhitigun

(Mt. 5:1-12)

17Tapkunanilu atkaukataulektuk maniktumun maligutini amihut ilagivlugit. Inuit amigaitun Judeamin, Jerusalemin, hinaanin Tyremin Sidonminlu tikinamik Jesusmun tuhaayumavlugu ikayuktaukuvlugillu, 18agiuktukaktunlu naguhipkaktauyun. 19Inuillu tamangmik aktugahuaktaat tapfuma naguhipkangmagit inuit hakuginimigun.

20Aahin aaglukhuni maligutini iigivlugit ukaktuk, “Kuviahuktuhi ilingayuhi Godim atanguvia nanminigigapfiuk.

21Kuviahuktuhi tayya kaalegupfi akeatuktitauhungugapfi ilaani.

Kuviahuktuhi kiagupfi tayya, ilaani iglakhungugapfi.

22Kuviahuktuhi inuit nagugingitpahi anipkakpahilu mitautigikuvluhi huinekiyigiyumavluhilunin, Inum engniga pivlugu. 23Tapfumani aliatakpagluhi mihitakpagluhilu, ilaa akiliutikhakhi angiman kilangmi, inuit hivullingit ayyikutanik pivangmata nalautaiyinun kangagaaluk.

24Kuvianaitugaluak ilipfingnun manigiekupfi tayya naamakpallaahimavagapfi.

25Kuvianaituglu ilipfingnun akeatukhimagupfi tayya kaagniagapfi.

Kuvianaituglu ilipfingnun iglagupfi tayya kiahungugapfi kuviahugunaekapfulu.

26Kuvianaituglu ilipfingnun inuit tamangmik ukautigipahi naguyumik hivullingit taimaliukpangmata nalautaiyimaluktununlu.

Akigat nagugikuvlugit

(Mt. 5:38-48)

27“Ukautigipfi tuhaagupfi, akigahi nagugihigit inuillu nagugiyuitpahi ikayuklugit, 28huniaktaahilu naguguktihigit, nangiktipahilu kengautilugit. 29Inuk tiglukkan uluangnun tamna pipkaglugu igluanun. Inugli tuhuluni pinahualekkagu atigin tuniguk kulitangniglu. 30Kinalika tukhiakkan ilingnin tunivigilugu, inugli pikutingnik pitpan akhuktailugu pifaakuvlutin tapkuninga. 31Ilvillu kanu-iliugutikhangnik inungnin piyumaguvin ayyikutanik pivaglutin tapkununga.

32“Nagugiyihi kihimi nagugigupfigit kanuk akiliuhiakhunguyuhi? Huinekiyullu nagugiyain nagugiyitik. 33Naguyumik pigupfi tapkununga naguyumik pivangmata ilipfingnun kanuk akiliuhiakhunguyuhi? Huinikeyunlunin taimalingnakpangmata. 34Atukiktigupfigit tapkua tapkunanga ilaani ilipfi atukiktitauyumagapfi, kanuk naguyumik pivihi? Huinekiyullu allat atukiktitain tapkunangalu atukiktumavlutik. 35Akigahili nagugihigit naguyumik piluhi, atukikpagluhilu ikayuktauyumatailuhilunin, taima akiliuhiakhi anginiaktuk, aahin Kingikiyauyum engniginiaktaahi, tamna nagligutakpiagami uivituyunun tuhuvallaktununlu, 36Naglitakpagluhi Angutikitauk nagligutakpiangman.

Uktugiaktukunagit allat

(Mt. 7:1-5)

37“Uktugiaktuktailuhi uktuktaukunahi, ihuigitailugit allat ilipfilu ihuigiyaukunahi. Ihumagiyunaegvigigupfigit allat ilipfitauk ihumagiyauyunaekhunguyuhi. 38Tunihigitti allanun tunihiviuyumaktuhilu, naamaktumik amigaitumik avakumayumiglu pikangniaktuhi. Aktigiyumik tunihigupfi allanun, ayyikutanik tunihiviuniaktuhi tapkunanga.”

39Talva Jesus hivuniunengmik unipkaktuk, “Inuk takpiituk tahiugniakka takpiitumik allamik? Itekhangmun ulguniaktuk tamangmik? 40Maliguhuktuk ilihauyyiminin ataniukiyaungituk, tamangmiglu ilihauyyauhimagumik ilihauyyimitun-iniaktun.

41“Ilvin katangutivit iyingani iyyiun hug takuviuk malugingitkaluaktillugu keyuk iyingnihimayuk? 42Kanuktuntauk katangutin ukautiniakkiuk imaatun, 'Uvanga iyyiun pieglagu iyingnin' ilvit takulimaitkaluaktillugu keyuk iyingnihimayuk? Ilumukhektuktutin hivullengmik iyingnin keyuk pieguk tautuktiakuvlutin iyyiut piekuvlugu katangutivit iyinganin.

43“Taima napaaktun naguyun ahiakakpaktun naguyumik napaaktulli nagungitun ahiakpaktun nagungitumik. 44Napaaktun tamangmik nagumangata naunaekhimayun ahiagingnin. Napaaktuk kakilautilik ahianilimaituk fignik, ukpillunin kakilautilgit ahianiyuitun grapenik. 45Inuk naguyuk naguyumik umaminin anitiyuk, inuglunin nagungituk nagungitumik umaminin anitiyuk, inum umata piyutain, nagumangatalunin naunaegmata ukauhitigun.

Igluk tungavikaktuk ayyikiingitumik

(Mt. 7:24-27)

46“Hug taivipfinga 'Atanengmik atanengmik' tuhaangitgaluaktilluhi uvamnun? 47Kialika upagaminga ukauhitka tuhaavlugit maliglugillu ukautigiyaga tamna imaatun. 48Tamna igluliuktitun-iliyuk tamna algakaaktillugu nunami kaektumun tungaviliuktuk igluhaminun. Aahin kugak ulipkangman iglu tikittugu imiktilimaitpiaktaa tamna tungavikakpiagman kaektumi. 49Inuklunin ukauhimnik tuhaagumi malikhimaitumik tamna igluliuktitun-iliyuk tamna igluligami nunami tungaviliukhimaitumik. Talva kugak ulipkangman tayyainak iglu imiktuk tapfuma tamagvialu kuvianaitpiaktuk.”

Currently Selected:

Luke 6: Sperry

Highlight

Copy