Luke 9

NAKATA 9

Apostles havaktakhait

(Mt. 10:5-15; Mk. 6:7-13)

1Talva Jesusim 12n kaitkugamigit inminun hakugiktitain atannektukuvlugit agiuktun tamaita, naguhipkaikuvlugit aaniaktunik. 2Aahin tiliyain ilihauyyikuvlugit Godim atanguviagun, naguhipkaikuvlugillu. 3Ukallautiyaillu, “Aullautikhapfingnik natkaktailuhi aiyaupiamiglu, pukhautiniglu, nekihamiglu, maniniglunin, aahin natkaktailuhi atigihanik malgunik. 4Namunlunun iglumun itegaigupfi taikanihimayukhaugaluaktuhi aullakiktinahi. 5Ilaitali naiyuktailipahi tamna iglukagvik kimagupfiuk itigahi hiugaektilugit tapkunani naunaikutagikuvlugit.” 6Tapkualu aullaktun iglukagluangitun apkutigivlugit ilihauyyivlutik unipkainik naguyunik naguhipkaivlutiglu tamaini.

Herod ihumalukpaktuk

(Mt. 14:1-2; Mk. 6:14-16)

7Herodlu atanek Jesusim havaagingnik tuhaagami ihumaluktuk, inuit ilait ukangmata Johnkun makiktitauyumik, 8allat ukangmatalunin Elijah nuimiyunakhiyuguk, allatauk nalautaiyit ilangat tikimiyuguk ukaktun. 9Herod ukaktuk, “John niakuektitpagaga, unali inuk tuhaayaga kinauva?” Aahin talvangaanin takuyumainaktaa.

Inuit 5000guyun negipkaktauyun

(Mt. 14:13-21; Mk. 6:30-44; Jn. 6:1-13)

10Apostleslu Jesusmun utegamik havaatik ukautigiyait tapfumunga. Tapfumalu aullautiyain iglukagvingmun Bethsaidamik taiyauyumun. 11Inuillu tamna tuhaagamitku malingnaktaat. Jesusim kuviahutigiyain tapkunungalu Godim atanguvia ukautigiyaa naguhipkakhugillu aaniakhimayun. 12Uvluglu nungulengman 12n upautigamik ukallaktun tapfumunga, “Inuit aullaktikit iglukagluangitununlunin niuvegiaktukuvlugit nekihamingnik, takanani naiyukuvlugillu iglukpailgulmiinapta hamani.” 13Kiuyagaluangit “Ilipfi nekihainik tunihigit.” Ukaktun “Uvagut mukpauyagliuyugut talimanik ikalugliuyugullu malguinagnik kihimi-aahini niuvegiaktugngitkupta hapkununga amigaitunun.” 14Inuit tapkua 5000guyun. Jesusim maligutini ukallautiyain, “Tapkua inuit ingikuhigit 50-laanik atuni.” 15Taimaliugamik ingititain. 16Jesuslu mukpauyanik talimanik, ikalungniglu malgunik tiguhigami aagluktuk kilangmun kuyakhukhuni avguktain maligutini tunivlugit tapkuninga tapkua tunikuvlugit inuit. 17Tamangmiglu negiyun akeatukhutik. Kinguagun tapkua ilakungit katiyaugamik tigumiaktit 12n tatatait.

Peterm Jesus ukautigiyaa Christiunahugigamiuk

(Mt. 16:13-19; Mk. 8:27-29)

18Tapfumanilu Jesus kihimgiukhuni kengaktuk, talva maligutaita upagmayyuk apegiyait, “Inuit kinaunahugivangnga, kanuk ukaktun?” 19Kiuyun, “John Baptaiektiunahugiyaatin, allata Elijaunahugiyaatin, allata nalautaiyit ilangat makititaunahugiyaat.” 20Jesusim ukallautiyain, “Ilipfili kinaunahugivihinga?” Peter kiuyuk, “Christiuyutin Godmin.”

Jesus tukuyyutini makiyyutinilu ukautigiyaik

(Mt. 16:20-21; Mk. 8:30-31)

21Talva tapfuminga uniuyyitailiyain inungnun. 22Ukakhuni, “Inum engniga naglikhaktitauniaktuk amihumik, igitauluni inuit ataningingnin, angayyuvikpagyuakuninlu ataningit tiitigaktininlu tukutaulunilu, uvluglu pingahuani makiniaktugaluak.”

Inuk inminik nagugiyukhaungituk

(Mt. 16:24-28; Mk. 8:34-9:1)

23Jesusim tamaita ukautiyain, “Inuk uvamnik maligumayuk inminik pitailiyukhak haniagutikhaminiglu tigulauk malikuvlunga. 24Kinalika inuheminik annautigumi tamaktiniaktaa, kinalikalunin inuheminik tamaktigumi pivlunga annautiniaktaa. 25Inuk humik pikangniakka nunat tamaita piyutigigumigit inminik tamakumi? 26Inum uvanga ukauhitkalu kanguhutigipagit, tamnatauk inum engningata kanguhutiginiaktaa angumi kaumaningagun kaitkumi ilagilugit ihalgulgit naguyun. 27Ilumun ukautigipfi hapkua inuit ilait nangekataulektun tukutunaitun tautuktinatik Godim atanguvianik tikilektillugu.

Jesus allangukpiaktuk

(Mt. 17:1-8; Mk. 9:2-8)

28Taimatumik ukaguegami uvlut 8n nungumata Jesusim mallaukuyain Peter, Johnlu Jameslu maiyugakatigiyumavlugit manilgulmun kengauyumagami. 29Tatpikanilu kengaktillugu akuliata takuanga allanguktuk annugaillu kakuktangukpiaktuk kengnagnakhuni. 30Ilaa angutik ukakatigiyaak, Moses Elijahlu, 31hagyaekpiagamik kaumayumi ukautigivlugu tukuyyuta Jerusalemi-itniaktuk. 32Peter allallu uingalekaluaktillugit Jesusim kaumaninganik, angutiniglu nangekatauyunik tautuktun. 33Angutiglu aullagahualengmanik, Peterm ukallautiyaa Jesus, “Atanek hamaniinapta nagutpiaktuk. Tupiliukta pingahunik, ilingnun atauhengmik, Mosesmunlu atauhengmik, Elijahmunlu atauhengmik”–ukauhiminik nalulegami. 34Taima ukaktillugulu nuvuyam uliktain, tapfuma ulingmatik ekhitaktun. 35Nipi nuvuyangmin ukaktuk, “Una engniga pilluagapku tuhaahiuk.” 36Nipi ukaguegman Jesus avaliektuk. Tapkualu tapfumani takuyamingnik uniuyyiyuitpiaktun.

Inuhuktuk agiuktulik naguhipkaktauyuk

(Mt. 17:14-18; Mk. 9:14-27)

37Akagumanlu manilgulmin atkaumata inuit amigaitun paaktaat. 38Ilaa inungnin inuk ukaktuk 'Ilihauyyi, tukhiagvigiyagin tautukuvlugu engnituaga. 39agiuktum pimagu iglialaakpiaktuk. Tapfuma pigagamiuk ulgutiyaa kapekuvlugu aanekuvlugulu kimagumangngitkivlugulu. 40Maligutitillu tukhiagvigivaktatka anipkakuvlugu tapkua pilimaitugaluit.” 41Jesus kiuyuk, “Inuit ukpektaipiaktun hunauvat, kanuk hivitutigiyumik naiyugniagipfi? Kanuk hivitutigiyumik huginiakkihi? Engnin uvamnun kagitiyyuk.” 42Kaitillugu, agiuktum ulgutiyaa kiipkakhugu. Jesusimli agiuktuk ihuakhaagamiuk naguhipkaktaa inuhuktuk tunivlugu angutaa tapfuminga.

Jesus hivuniugiamiyuk tukuyyutimigun

(Mt. 7:22-23; Mk. 9:30-32)

43Tamangmiglu agligutakpiaktun Godim hakugigninganun. Tapkuali Jesusim havaangit agligutautigitillugit ukallautiyain maligutini, 44“Ukua ukauhit puiguktailugit akhun, Inum engniga tuniyauniangman inungnun.” 45Tapkua ukakhimayain kangegngitpiaktun tapkununga naunangmata, aahin apekutigingitain Jesusmun kanguhukpallaagamik.

Inuit anangayangitukhaumata

(Mt. 18:1-5; Mk. 9:33-37)

46Maligutaillu ingmingnik kangutivaktun nallitik ataniukiyaumangat. 47Jesusimlu ihumangit ilihimagamigit nutagak piyaa haniminun ilivlugu, 48ukautivlugit, “Kialika una nutagak ilagigumiuk atimni ilagiyanga uvanga. Aahin kialika ilagiguminga atauhektun ilagingnaktaa tamna tiliyiga. Ilipfingni nalliak ataniukiyaungitpiaktuk tamnauyuk ataniukiyauyugaluak.”

Ihuigikunagit allat uvaptitun-itngitkaluakhutik

(Mk. 9:38-40)

49John Jesusmun ukallaktuk, “Atanek tautukpagapta angunmik anipkaitillugu agiuktunik atingnun pitailiyakkut malingngimatigut.” 50Jesusim ukallautiyagaluanga “Pitailiyukhaungitkaluaktuhi tapfuminga, inuk akikektungitkumi ilipfingnun ikayugmahi.”

Jesus Jerusalemun aullagahualektuk; Samariamiut pulaaktailiyaat

51Jesusim utegniagvia kilangmun kaglilengman, ihumaliuktuk aullakuvlugu Jerusalemun. 52Hivuniminilu tiliyait iglukagluangitumun Samariamiut nunaaniitumun upalungayakuvlugu innikhani, 53inuilli takanani naiyukungitagaluangat apkuhainaktutun-ilivangman Jerusalemliakhuni. 54Maligutaik Jamesim Johnimlu takugamikku ukaktuk, “Atanek ingnek katakuniakkitugu kilangmin ikualakuvlugit tapkua?” 55Kiviagamili ihuakhaaktaik. 56Talva iglukagluangitumun allamun aullaktun.

Maligumayun piyakhain

(Mt. 8:19-22)

57Aahin apkunmi aullalektillugit, inum Jesus ukallautiyaa “Naamunlunin aullagaiguvin malingniaktagin.” 58Jesusimli ukallautiyagaluanga, “Teggiganiat hitikaktun, tingmiallu uvlukakhimayun, Inum engnigali innikhaekpiaktugaluak.” 59Allamunlu ukallaktuk, “Malinga”. Kiuyugaluak “Atanek, angutiga tukuman hivullengmik iluvegiaktugniagiga pipkagungma”. 60Ukallautiyagaluanga, “Tukungayun tukungayunik iluvegiaktuglit ingmingnik, ilvit aullagiagin ukautigilugu Godim atanguvia.” 61Allatauk ukaktuk, “Maligahualektagin, Atanek, ilaanitaukkaalunga ilamnun kihimi.” 62Jesusim kiuyagalunaga, “Inuk havagahualegami kiviakhuni tunuminun, tamna naamagunaituk Godim atanguvianun.”

Currently Selected:

Luke 9: Sperry

Highlight

Copy