Job 35
35
Elihu praat die derde maal
1Elihu het nóg gepraat en hy het gesê:
2“Job, dink jy dit is reg
dat God moet sê jy is onskuldig?
3Nee, jy vra vir God: ‘Wat sal U vir my doen?
Help dit vir my dat ek nie sonde gedoen het nie?’
4Ek sal jou antwoord,
en ek sal ook jou vriende saam
met jou antwoord.
5Kyk op in die lug, kyk goed,
kyk na die wolke hoog bokant jou.
6As jy sonde gedoen het,
wat kan dit aan God doen?
As jy aangehou het om verkeerd te doen,
wat doen dit aan Hom?
7Of as jy nie verkeerd gedoen het nie,
wat doen jy vir God, wat kry Hy van jou?
8Wanneer jy verkeerd doen,
dan is dit ménse wat swaarkry,
mense soos jy.
En wanneer jy reg doen, dan doen jy dit aan ménse.
9Wanneer iemand ander mense verdruk,
dan skree hulle en hulle vra dat iemand moet help.
Hulle roep en vra dat iemand hulle moet help
teen mense wat sterker is as hulle.
10Maar hulle vra nie vir God om hulle te help nie,
God wat hulle gemaak het en wat hulle laat sing
ook wanneer dit donker is om hulle.
11God leer vir ons meer as vir die diere,
Hy maak ons slimmer as die voëls,
ons verstaan beter.
12Daarom doen Hy niks
wanneer daardie mense skree en vra
dat iemand hulle moet help nie,
want hulle is hoogmoedig en sleg.
13Dit help niks dat hulle skree nie,
God hoor hulle nie,
die Almagtige sien hulle nie.
14Job, God sal nog minder luister na jou
as jy sê dat jy Hom nie sien nie,
as jy sê dat jy gekla het by Hom
en dat jy nou wag dat Hy iets moet doen.
15Jy sê ook dat God nie mense straf
wanneer Hy kwaad is nie,
en dat Hy ook nie baie goed kyk
wanneer mense sonde doen nie.
16Nee, Job, jy sê dinge wat nie is
soos dit moet wees nie,
jy praat en praat, maar jy weet niks.”
Currently Selected:
Job 35: ABA
Highlight
Share
Copy
Want to have your highlights saved across all your devices? Sign up or sign in
© Bybelgenootskap van Suid-Afrika 2007. Gebruik met toestemming. Alle regte voorbehou.