Luk 14
14
Yeesu aa chah baa bɛl waa ɛ weela te
1Awola Ona Tɔpere bɛl, Yeesu la Farisii tena nomonome la bɛl dem dɛɛ la ka di kwa, asɛ nɛra baa lɔ bela la ɛɛ nyiŋu dɛɛ kari waa waa dɛ ɛ bwa. 2Dɛ baa bɛl waa suuɡa soɡe Yeesu sie bela, 3anee Yeesu bɔɔ Tɔnjerema la ne Farisii tena la ŋɔ, “Ya mmarare la dɛ tɛ ŋwɛnɛ kɛ ba chah nɛn Ona Tɔpere aa?” 4Asɛ ba bwa hel. Anee o lawɛ baa la dɛ chaoh dɛ ɡel o kaa.
5Asɛ o bɔɔ ba ŋɔ, “He bini umee o bie kɛɛ o nao le kɔlɔŋ bini Ona Tɔpere, waa wola on lawɛ le kɔlɔŋ la bini warane Ona Tɔpere la tenten ta nɔ?” 6Ba ta wone dɔ waane chaŋo a ɡɛ waa la ta.
7Nɛra baa yer ba ŋɔ bá ba di kwaa la aa bala la, dɛ ba dɛ pɛne sobɔrdɛɛɡa dɛ́ so. Anee Yeesu aa na ba ɡɛ la, o kpɔ sɛɡla bol waa baɡ ba ŋɔ, 8“Dɛ nomɛl baa yerɛ heyaa hanfale kondikwaa mun ŋɔ hé ba di kwaa aa, he bɛ nomonsobɔra ka pɛne dɛɛ so. Aa bao kɛ o ken ka yerɛ nomɛl o nomonome aa ɡwaale.#Sɛɡ 25:6-7 9Dɛ o balaa, naate waa yerɛ he bwa la ɛɛ ba ŋɔ he bee ŋɔ hé ir dɛ́ kpɔ nomombɔr la tɛ nomoa la. Belaa hɛɛ ba sihiih kpɔe dɛ́ ir ka so bechasobɔr nɛra la bwa habɔɔ. 10Dɛ ba yerɛ a ɡɛ yer nɔ dɔŋ bɔr aa, ka so bechasobɔr, ásɛ dɛ naate waa yerɛ la balaa, ó ba ŋɔ he be ŋɔ, ‘N dam, ir kaa sie nomombɔr bela ka so.’ An dɛ tɛɛ jirima nɛra baa yerɛ he ne ba bwa la siwi ta. 11Nomɛlbwa waa dɛ maŋkura o te la, Korowii ɛɛ ba o ne harɛɛ, asɛ nomɛlbwa waa dɛ pwɛr o te la, Korowii ɛɛ ɛo nɛnjenii.”#1Pi 5:5
12Yeesu aa bol ɡɛ waa nɔ tonɛ la, o ŋɔ baa la waa yer ba ŋɔ bá ba di kwaa la be ŋɔ, “Dɛ he ɛ kondikonjena webaŋa kɛɛ jwaana dɛɛ yerɛ nɛra ŋɔ bá ba di aa, bɛ he daamanar, he nimanar, he lola, kɛɛ he dɔŋa kondɔɔhna ɡbo yerɛ, dɛkalkɛŋɔ ba ɡee ɛ anee dɛ́ yerɛ, amɔ dɛ he kwaa la kemee ba bɔe la. 13Dɛ he ɛ ɡɛ kondikwaa nɔ soo siwi aa, yerɛ nyaara ne boobie ne nɛra ba nakpale aa teŋna, ne nyoŋa bá ba di, 14ásɛ Korowii ɛɛ andɛɛɡa, dɛkalkɛ ba ta komɛlbwa dɔe dɛ kpɔ bɔe kem. Awola nɛndɛɛɡa ba wa aa dɛ su Korowii siwi aa ir seo ta la, Korowii ɛɛ bɔe a kemee.”
Kondikonjena ane sɛɡla
(Mat 22:1-10)
15Nɛra Yeesu ne baa soɡe kondibɔr la bɛl no ɡɛ waa la, dɛ ŋɔ Yeesu be ŋɔ, “Nɛra baa ba ja Korowii Kora la ta dɛ́ di kwaa la, ba sie ɛɛ lɛo kɛrɛdɛ!”
16Anee Yeesu sɛɡ ba ŋɔ, “Baa bɛlee fa lole dɛ ɛ kondikonjena, dɛ yerɛ nɛra pirim ŋɔ bá ba di.#Mat 22:2-10 17Bɔr maɡrɔ kɛ bá ba kondikwaa la dibɔr, asɛ o tomɛ bonɔɔ ŋɔ ó ka yerɛ nɛra waa yer ba la ŋɔ bá ba, kɛ o tonɛ komɛlbwa.
18Bonɔɔ la aa la ba be la, ba bwa ŋɔ ba ta bɔr dɔe, dɛ vɛh. Sitɔte la ŋɔ bonɔɔ la be ŋɔ o yawɛ harɛ bɛl a chɛ kɛ ó la dɛ́ ka nao, anomanta, bonɔɔ la ka ŋɔ o dɔɔ be ŋɔ o bɛ ɡel a ɛ waane kɛ waa wola bɔr dɔe dɛ́ ba la.
19Bɛl ɡe ŋɔ o yawɛ nae fi dɛ vɔrɔwe kwaa doa dɛɛ kaa a ne koo dɛ́ ka parɛ a ne dɛ́ na, kɛ tórome la ka ŋɔ o dɔɔ be ŋɔ o bɛ ɡel a ɛ waane kɛ waa wola bɔr dɔe dɛ́ ba la.
20Bɛl ɡe ŋɔ waa mo haah ta biɡre, anomanta, waa won ba.
21Asɛ bonɔɔ la la dɛ ka ŋɔ o dɔɔ la be ɡɛ baa bola la. Anee o dɔɔ la baah di, o ŋɔ o bonɔɔ la be ŋɔ, ‘Ɛ warane kaa fɔɡbaah ne lomoola ta, dɛ́ ka yerɛ nyaara ne boobie ne nyoŋa ne nɛra ba nakpale aa teŋna ásɛ ba ba di kwaa la.’
22A ta biɡre bɛlbwa bonɔɔ la ba dɛ ba ŋɔ o dɔɔ la be ŋɔ, ‘N la he tom la, kɛ sobɔra ane ta chɔ le pɛɛpɛɛ.’
23Anee o berɛ ŋɔ bonɔɔ la be ŋɔ, ‘La ŋwɛnɛre ta ne dahare, nomɛlbwa haa nao la, lawɔ ba ásɛ n dem bonɔ su. 24Kasinteŋ, n dɛ ŋɔ he be, nɛra n fa aa yer ba la bini bɛlbwa aa n kondikwaa nɔɔ di kpa!’ ”
Gɛ Yeesu nɛɛ teŋa aa do kpeɡri
(Mat 10:37-38)
25Awola bɛl, nɛnlaa bane ja Yeesu nɛɛ o ne baa kaa, asɛ o ka berɛ o te dɛ ŋɔ ba be ŋɔ, 26“Dɛ nomɛlbwa ba n be o ta men nyine ɡwaa o mɛɛ ne o nya, ne o haah ne bii, o dɔɔranar ne nimanar ne nimambii dɛ o ɡbaɡba aa, waa won ɛ n habɔteŋre. 27Nomɛlbwa waa wola won kpɔ o te tɛ, dɛ sɛh wahala nae ne seo bwa, dɛ teŋɛ n nɛɛ kɛŋɔ nɛn waa kpɔ daɡaɡre che bá ka kpaaro pɛl o ta la waa won ɛ n habɔteŋre.
28Dɛ he bini bɛl dɛ nyin kɛ o do dejaŋ aa, waa nyiŋi na kɛŋɔ o dɔ suuɡa aa dɛ ba wona tel la aa? 29O ta nyiŋe kɛrɛdɛ mɔɔ dɛ pa dea la mun, dɛ o ta ba wone tonɛ dea la doe yaa, nɛra ɛɛ mamɔɔ, 30dɛ ŋɔ, ‘Baa nɔ laa fe dɛ do dem la aa? O laa hora naa?’
31Dɛ kooro ne o koodɔŋ bɛl dɔ yoi, o dɔ nɛra kaɡboŋa fi o dɔŋ la ɡe dɔ nɛra kaɡboŋa fifraanɛ naa, waa so dɛ́ lii kɛ wɛɛ wonoo kpɔ o nɛra la ka pu o dɔŋ la waa dɔ nɛra ɡwaalo la mɔɔ dɛ́ le ka puu wa aa? 32O ne o dɔŋ la baah taa jaŋa o na kɛŋɔ waa won puu yo la, wɛɛ do toromaa bá ka larawo ásɛ ba pɛ. 33Gɛ tentenee a chɛ kɛ he so lii mɔɔ. Nomɛlbwa ta o komɛlbwa ɡelaa, waa won ɛ n habɔteŋre.
34Yar wer, kɛ dɛ aa somɛ kpa aa, ɛrɛɛ baa ba a ɛɛ á do som jaɔ?#Mat 5:13; Mak 9:50 35A ta wejema dɔe bá ɛ kpa. Aa harɛ ɡba kwaa. Fuɡaa a den chɛ kɛŋɔ bá fuɡa ta.
He naate haa no la, no.”
Currently Selected:
Luk 14: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
