Luk 15

Penyoɡre bɛl sɛɡla

(Mat 18:12-14)

1Awola bɛl, toɔ lɛɛra baa dɛ bɔ apoo ne wechɔɡ-ɛɛra teŋɔ dɛ ba bar Yeesu cheme dɛ́ no o wa. 2Anee Farisii tena ne Tɔnjerema bane ŋwalɔ dɛ ŋɔ, “Gɛ baa nɔ dɛ lɛ wechɔɡ-ɛɛra o ne ba yon pɛ nɔn dɛɛ di kwa.”

3Belaa Yeesu sɛɡ ba ŋɔ, 4“He bini umee dɛ dɔ peera lafa, ásɛ beŋkpoŋ nyoɡraa, waa wola o bɔree ɡaaɡe ɔ? Wɛɛ ɡel fifraanuanaarɛ dɛ anuanaarɛ laanee a dibɔr tama, dɛ́ ka ɡaaɡe beŋkpoŋ waa nyoɡra la bɔr ka tel kɛŋɔ waa nao. 5Dɛ naate na a ɡɛ pee nɔ naa, silɛɛ kohona nomanta, wɛɛ kpɔɔ dawɛ vam ba dem. 6O ba dem aa, wɛɛ ŋɔ o daamanar ne nɛra o ne baa soɡa bwa bee ŋɔ, ‘N sie lɛo kohona kɛŋɔ maa na n pee waa nyoɡra nɔ. Anomanta, hé ba yá lɛ ya sie.’ 7Kasinteŋ, ɡɛɛ aa ba Korowii doa ɡe doe. Wechɔɡ-ɛɛ beŋkpoŋ charɛ o liire dɛ le o wechɔɡa ta naa, Korowii ne o nyundua toroma sie ɛɛ lɛ o nɛɛ dɛ́ ɡwaa nɛra fifraanuanaarɛ dɛ banuanaarɛ baa dɛ lii kɛ ba ɛ nɛndɛɛɡa baa wola chɛɛ kɛŋɔ ba charɛ ba liire dɛ le ba wechɔɡa ta.

Suuɡa nyoɡre bɛl sɛɡla

8Gɛ laa ɡe aa, haah besoo lole dɛ dɔ suuɡapoŋa fi, asɛ dɛ beŋkpoŋ nyoɡraa, waa wola niinii choŋi dɛ chaa o dea dɛ ɡaaɡe o bɔr sibeɡra ne ka tel kɛŋɔ waa nao wɔ? 9O nao waa, wɛɛ yerɛ o daamanar ne nɛra o ne baa soɡa laanee dɛ ŋɔ, ‘N sie lɛo kohona kɛŋɔ maa na n suuɡapoŋ waa nyoɡra nɔ. Anomanta, hé ba yá lɛ ya sie.’ 10Kasinteŋ, ɡɛɛ aa ba Korowii doa ɡe doe. Wechɔɡ-ɛɛ beŋkpoŋ charɛ o liire dɛ le o wechɔɡa ta naa, Korowii ne o nyundua toroma sie ɛɛ lɛ o nɛɛ taeh.”

Binyoɡre bɛl sɛɡla

11Yeesu berɔ sɛɡ ba ŋɔ, “Baa bɛl fa dɔ bibaala banɛ. 12O bii la bini ombechala la ŋɔ o be ŋɔ ó bɔne o kpanjoɡo bini, ásɛ dɛ tɛo o bɔr. Asɛ baa la bɔne o kpanjoɡo la bini tɛ o bii la, dɛ kpɔ o bie bechala la bɔr tɛo.

13A ta tɔpere bɛl dii, o bie bechala la yoɡ o te kwaa la bwa, dɛ kpɔ o suuɡa jo pua bojaŋ kaa. Waa laŋa la, o kaa ɛ suuɡa la saɡasaɡa ken. 14Waa baa di suuɡa la bwa la, a ta tɔpere bɛl dii, asɛ lɔrjen bɛl chole harɛ la ta bela waa lole la, dɛ o ta suuɡa dɔe, o ta kondikwaa ɡe dɔe dɛ́ di. 15Aa do ɡɛ la, o kpɔ o te ka pɛl bela te bɛl, asɛ o ɡel o kaa nyiŋi o parakooni nɛ. 16Lɔr la nyoa baa do kpeɡri kohona, asɛ o baa pɛlɛ parakooni la kondikwaa kwaraa ta, kɛ nomɛlbwa ɡe ta on komɛlbwa tɛɛ.

17Asɛ o sie aa baa ba harɛ la, o soɡo dɛ lii o mɛɛ waa dɛ ŋɔ, ‘N mɛɛ bonɔɔna kwaraa baa lɔ o sie la di kwaa dɛɛ ka, asɛ n do bonɔ lɔr ɛɛ kpo mɛ la. 18Mɛɛ iruu, dɛ́ la n mɛɛ be dɛ́ ka ŋɔ, “N mɛɛ, n ɛ wechɔɡa dɛ jo he ne Korowii bwa nɛ. 19N ta chɛɛ kɛŋɔ he yer mɛ he bie kpa. Kɛ n poori, lɛɛ mɛ dɛ́ kpɔ mɛ ɛ he bonɔɔna la bɛl.” ’ 20Bie la aa lii ɡɛ la, o iro chiɡ ŋwɛnɛ ta dɛɛ kaa o mɛɛ be.

Waa dɛ kaa o mɛɛ be la, o mɛɛ lɔ dem dɛ nao bojaŋ, asɛ o tea domɔ, o chwa chemo dɛ ka ɡbaaro pɛl o bambile.

21Belaa bie la ŋɔ, ‘N mɛɛ, n jo he ne Korowii nɛ. N ta chɛɛ kɛŋɔ he yer mɛ he bie kpa.’

22Bie la nyoa ta lee mɔɔ dɛ o mɛɛ yerɛ o bonɔɔna ŋɔ, ‘Hé chwa ka nyiŋi n yale la bwa bini ondɛɛɡe ba tɛo ó tɔ, dɛ́ kpɔ noniseɡdɛɛɡe ba doo, dɛ́ nyin naŋɡawa ba tɛo ó do. 23He tonaa, hé ka lawɛ nabie la bwa bini ondɛɛɡe dɛ́ ba kpo, ásɛ ya di kwa, dɛ́ lɛ ya sie, 24dɛkalkɛŋɔ n fa liiro kɛŋɔ n bie nɔ sewɔ, asɛ o berɛ ba nɔ. O fa aa nyoɡra la, taraken te n nao.’ Ate, ba ɛ kondikwaare dɛɛ di dɛɛ lɛ ba sie tenten.

25Waa nɔ bwa aa dɛ ɛ la, dɛ binomoa la le koo dɛɛ ba. Waa dɛ tel ba dem la, o no ɡboŋri ne yela ne sae ɡbɔɡa dem bela. 26Anee o yerɛ o mɛɛ bonɔɔna la bɛl dɛ bɔɔro ŋɔ, ‘Bɔkwa waa chiɡ deemɔ?’ 27Anee o ŋɔ, ‘He nime la waa joa kaa la, onee bala, asɛ he mɛɛ ɡel ya kpo nabie la bwa bini ondɛɛɡe la dɛ ɛ kondikwaa dɛ di dɛɛ lɛ ya sie, dɛkalkɛŋɔ wobɛlbwa ta on ɛɛ.’

28Asɛ binomoa la baah di, o kire ŋɔ waa deemii jo. Asɛ o mɛɛ ba larawo ŋɔ ó ba dem. 29Belaa bie la ŋɔ o mɛɛ be ŋɔ, ‘N mɛɛ, n ɡe aa dena dɛɛ tomɛ saŋ la bwa, n ta he toma vɛɛh bwa, bɔkwa konee he tɛ mɛ nɔ? He ta bombie kwaraa lawɛ tɛ mɛ ŋɔ ń kpo n ɡe ne n daamanar kpɔ lɛ sie bwa. 30Kɛ he bie nɔ waa kaa chɔɡ o suuɡa haahna nɛɛ dɛ ba nɔ, he berɔ ɡarɛ kpo nabidɛɛɡe tɛo.’

31Anee baa la ŋɔ, ‘N bidɛɛɡe, n ne haa lole nɔ, n komɛlbwa maa dɔa la, hen dɔa. 32He nime nɔ aa nyoɡra dɛ berɛ ba nɔ, a chɛ kɛŋɔ yá ɡel ya sie lɛ, dɛkalkɛŋɔ ya ŋɔ o sewɔ, o berɛ ba nɔ, ya ŋɔ o nyoɡrɔ, kɛ taraken ya nao.’ ”

Currently Selected:

Luk 15: mzw

Highlight

Copy