Luk 16
16
Bonɔɔ wejereme bɛl
1Yeesu ŋɔ o habɔteŋra la be ŋɔ, “Baa bɛlee fa lole dɛ ɛ kondɔɔh, dɛ kpɔ o kwaa bwa do o bonɔɔ bɛl nɔn ta ŋɔ wɛ́ɛ nyiŋi a ta. Belaa nɛra ka ŋɔ suuɡate la be ŋɔ o bonɔɔ la dɛ di o suuɡa saɡasaɡa. 2Anee suuɡate la tomɛ nɛn o ka yerɛ o bonɔɔ la, asɛ o ŋɔ o be ŋɔ, ‘N dɛ no waane kɛ he dɛ di n suuɡa. Ka kpɔ he tɔn ba, dɛ́ ba baɡ mɛ suuɡa aa jo he nɔn ta, ne ɡɛ haa ɛ a ne, ásɛ dɛ kpɔ n kwaa do n nɔn ta, dɛkalkɛ maa ɡel he nyiŋi n kwaa ta kpa.’
3Asɛ bonɔɔ la kaa dɛ ka lii o nyu bini ŋɔ, ‘N dɔɔ dɛ ba men toma ta lee. Ɛrɛɛ mɛɛ ba ɛɛ yɔ? N ɡe aa kpeɡe dɛ parɛ di, asɛ n sie ɡe ɡarɔ ne kwaa soŋa. 4N jemɛ ɡɛ maa ɛ, ásɛ dɛ ba lee mɛ toma ta naa, ń dɔ daamanar baa nyiŋ mɛ.’
5O yerɛ nɛra baa di o dɔɔ kema la beŋkpoŋa beŋkpoŋa, dɛ bɔɔ sitɔte la ŋɔ, ‘Aŋwɛnɛɛ he di n dɔɔ kem ɔ?’
6Anee o ŋɔ, ‘N di kem noo ɡarare lafa.’
Anee bonɔɔ la ŋɔ, ‘Lɛ tɔn warane, dɛ́ so harɛ dɛ́ chwerɛ fifraanue.’
7Asɛ o berɛ bɔɔ nɛɛte ɡe ŋɔ, ‘Kem aŋwɛnɛɛ he ɡe dio?’ Asɛ o ŋɔ, ‘N di kem mea baaɡere kaɡboŋ.’
Anee bonɔɔ la ŋɔ, ‘Lɛ tɔn dɛ́ so harɛ dɛ́ chwerɛ lafraanuatoro.’
8Anee bonɔɔ naŋɡarawa te nɔ dɔɔ la aa noa la, o kpɛɛro ŋɔ o ɛa wejema ta.” Yeesu aa sɛɡ ba tonɛ la, o ŋɔ, “Nɛra baa dɔ harɛ nɔ ta liire la, ba dɔ wejema ba ne ba bala kpoŋa dɛ ɡwaa nɛra ba sie aa chaah Korowii waa ta la.” 9Yeesu berɔ ŋɔ ja ŋɔ, “Hé kpɔ he laala ne suuɡa aa ɛ harɛ nɔ ta kondɔɔh la dɛɛ nyin daamanar, ásɛ dɛ a baa hiah heya aa, bá won lɛ heyaa silɛɛ ne bwɛɛ waa wola chɔɡ bwa la ta.
10Naate waa wona dɔ kasinteŋ kontamaa ta la, wɛɛ wonoo dɔ kasinteŋ anjena ɡe ta. Naate waa wola wone dɔ kasinteŋ kontamaa ta la, waa won dɔ kasinteŋ anjena ɡe ta.#Mat 25:21 11Dɛ he ta wone nyiŋi harɛ nɔ ta kondɔɔh a kwara aa ɛ konsale nɔ ta naa, ɛrɛɛ hɛɛ ba wona nyiŋi kondɔɔh tenten ta nɔ? 12Dɛ he ta wone nyiŋi nomɛl kon ta naa, umee dɛɛ ba he ɡbaɡba kwaa kpɔe dɛ́ do he nɔn ta nɔ?
13Nomɛlbwa aa won tomɛ dɔɔranar banɛ. Dɛ a ba ɡɛ naa, wɛɛ dɛɛ nyin bɛl waa dɛ́ ɡwaa bɛl. A laa ɡe aa, o sie ɛɛ dɛɛ lɛ bɛl bee dɛ́ ɡwaa bɛl. Haa won tomɛ Korowii dɛ́ berɛ won nyin harɛ nɔ ta kondɔɔh a maɡre.”
14Farisii tena la aa no ɡɛ la, ba chwee Yeesu, dɛkalkɛ dɛ ba dɛ nyin suuɡa taeh. 15Anee Yeesu ŋɔ ba be ŋɔ, “He dɛ ɛ he te kɛ he ɛ nɛndɛɛɡa he waa aa dɛ su Korowii siwi, kɛ Korowii jemɛ ɡɛ he liire aa doa. Kon waa ɛ konjen nɛwɛnyini sie ta la, Korowii te aa on komɛlbwa bu.#Sɛɡ 16:5
16Mosis Mmara la ne Korowii keamere la waa la baa chwera laanee lole baa baɡle mɔɔ, dɛ́ ka tel ɡɛ saŋ Jɔn o fa aa dɛ sɔ nɛra Korowii nee la aa bala. Le ɡɛ saŋ waa bala dɛ baa bol Korowii Kora la Amanesoma la, nomɛlbwa siwi swɛɛrɔ wɛɛ nyin bɔr dɛ́ ja Korowii Kora la ta.#Mat 11:12-13 17Kɛ, nyundua ne harɛ ɛɛ chɔɡoo, dɛ ba ta Mmara la bini wejeɡaa bɛlbwa berɛ.
18Nomɛlbwa waa vɛh o haah dɛ berɛ ka mo hanfale la, o ɛ wechɔɡa dɛ bɔ jwamane, asɛ nomɛlbwa ɡe waa mo haah o jaa aa vɛoh la, o ɡe bɔ jwamane.”#Mat 5:31-32; Mak 10:11-12
Dɔɔh bɛl ne Lasorɔs
19Yeesu berɔ ŋɔ, “Baa bɛlee fa lole dɛ dɔ suuɡa, dɛɛ do laaladɛɛɡa dɛ dɔ kwaa nɔ bwa, asɛ dɛɛ di kondɛɛɡa tɔpere bɛlbwa, dɛɛ lɛ o sie tenten. 20Dɛ baa bɛl ɡe lole dɛ nya, asɛ ŋwɛra ɛ o bwa baa yerɔ Lasorɔs. Ba yon kpɔɔ ka bil suuɡate la dem doonyoa, 21asɛ wɛɛ do hwɛɡa kondikwaa suuɡate la aa di ka asɛ o bonɔɔna kpɔ ba ta la ta. Hale dɛ nyootena ba dɛ kpɛle o ŋwɛra la.
22Nyaa la baa sewɛ, asɛ nyundua toroma ba kpɔɔ kaa nyundua o ka so Abraham be. Suuɡate la ɡe baa sewɛ, asɛ ba huɡo, 23asɛ o ka jo Bɔnsam nii ta. Dɛ o dɛ na nii taeh. On ŋɔa o nyiŋi, dɛ na Abraham bojaŋ le, asɛ Lasorɔs so o be. 24Anee o ha nyoa yerɛ Abraham dɛ ŋɔ, ‘N Naa Abraham! Na n sum, ásɛ dɛ tomɛ Lasorɔs ásɛ o kpɔ o nonii ka leɡe nesɔn dɛ́ kpɔ ba leɡe n nyondoŋe. N lɔ nii ta n bwara ɛɛ nyɛɡ mɛ.’
25Anee Abraham ŋɔ, ‘N bie, lii kɛŋɔ ɡɛ saŋ he fa aa lɔ harɛ ta la, he di yɛɛ kɛrɛdɛ, asɛ Lasorɔs na wahala. Taraken nɔ o dɛ di yɛɛ, asɛ he ɡee na wahala. 26Hale n ŋɔ o ba bela kwaraa noo, waa won ba, dɛkalkɛŋɔ bɔjen bɛl lɔ ya ne he baah ta, nomɛlbwa waa lɔ bonɔ dɛɛ nyin o ba bela haa lole la aa wola won ba, asɛ nɛra baa lɔ he be bela dɛɛ nyin dɛ ba bonɔ la ɡe aa won ba.’
27Anee suuɡate la ŋɔ, ‘Amɔ te n dɛ soŋe, n Naa, tomɔ ó la n mɛɛ dem, 28dɛ́ ka kah n nimanar banue bane baa lɔ bela la ŋɔ, ɡɛ maa ɛa la, ba bɛ ɡɛ ɛ ásɛ dɛ ba bonɔ maa lole dɛɛ na wahala nɔ.’
29Asɛ Abraham ŋɔ, ‘He nimanar la dɔ tɔne Mosis ne Korowii keamere la aa chwera la, á ja ba. A chɛ kɛ ba kura dɛ́ no waa baa dɛ bol.’
30Anee suuɡate la ŋɔ, ‘Akai, baa no, n Naa. Kɛ dɛ nomɛl iro le seo ta dɛ ka ŋɔ ba be te naa, anee ba no dɛ́ charɛ ba liire dɛ́ le ba wechɔɡa ta.’
31Anee Abraham ŋɔ, ‘Dɛ baa tɔne Mosis ne Korowii keamere la aa chwera la waa no aa, nomɛl iro le seo ta dɛ la ba be kwara noo, baa no.’ ”
Currently Selected:
Luk 16: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
