Joawh 16

Yis hiyapkiska mbeyne yitnek heneme ka sam

Mt 10.16; Jo 15.20; Fil 1.29; 1Tes 3.3; 2Tes 1.4; 1Ped 3.14, 4.12, 5.9; Eb 12.3

1— Nah ikene inakni yinetni hene kahadbe aysawnemenek yis ka tuguhkis yihiyekemni.

2Aysawnemenek hiyeg ivukevyi abetitak givahdukawnikisnek. Avim ini igkis umehpey. Gitkis igkis kehne Kiyavwiye Uhokri gibetki.

3Igkis keh ini mbayka yikak awaku igkis ka hiyak Wigwiy igkis kawnata hiyakun.

4Nah akki inakni yit kahadbe ku aysaw in kahayaknek yit yis kiye ku nah kuwis akkamnihni yit. Nah ka akki yit minikwak mmanawa nah aynete yikak.

Nah tivik adahanikwa awahkisne nutivuh atan

Jo 14.15

5— Heneme kuri nah me tivikmet git nawahkisten. Yisme yuma pahavwinema yaytak nayaminetni amin ku kadahan nah atak atere.

6Yis misekwe barukibet awaku nah ike yinetni amin nutepkemni.

7Heneme pugamawka nah tivik. In kabay yidahan. Henewatbaki in. Ku nah ka tivik, nikwe ka hiya igma yawayghetni danuh yit. Heneme ku nah tivik, nah awahkisgi yiminek.

Uhokri Gitip akki gitkis kane Uhokriyanvuma ku igkis taraksavye

Jo 6.44; 1Ko 2.4; 1Tes 1.5

8— Ku aysaw ig yawayghetni danuh atanek ig daxnek avit giyaknikis hiyeg kane Uhokriyanvuma. Ig akki huwewe gitkisnek ku igkis taraksavye. Ig akki huwewe ku nahnewa waditye. Ig akki huwewe ku nah detye adahan nah hiyak akak madikte gitaraksankis.

9 In huwewe ku igkis taraksavye mmanawa igkis ka kamaxwa nuvitit.

10 In huwewe ku nahnewa waditye mmanawa nahnewa danuh atere git Wigwiy, yis ka hiyavun ay amadga inin akiw.

11 In huwewe ku nah detye adahan nah hiyak akak gitaraksankis mmanawa nah hiyak gikak ner ku pariye gitaraksankis ahawkri.

Uhokri Gitip akki nuhiyekemni nukiytani gitkis Uhokriyanvu

12— Muweke ka aynsima arikna akiw adahan nah akki yit, heneme yis kote ikte adahan pukuhpin.

13Ka sam. Aysawnemenek Uhokri Gitip danuh atanek. Ig akkamnih madikte yitnek. Ig avanenekwa ekkenenekwa ku pariye hiyakemniki inyewatnene. Mmanawa ka giwnteknewatma ig awna. Ig awna ku pariye ekkepka git. Ig akki yitnek madikte ku pariye nehmnikuhpiye.

14Hawata ig Uhokri Gitip kiyathasan yit. Mmanawa ig akki yit madikte nukiytani.

15Madikte ku pariye Uhokri kadahan in nudahanwata. Inneki keh nah awna yit: “Ig Uhokri Gitip ig akki nukiytani yit.”

Jesus akki ku ig kannikaw ariw gimiremninek

16Ayteke ig Kiyavwiye Jesus awna gitkis:

— Ka kebadima hawkri akiw yis ka hiyavun akiw. Heneme ariwnteke ini akiw ka kebadima hawkri akiw yis hiyavun akiwnek.

17 Igkis gikannuhnivwi timapni hene, igkis kinetihwa pawtak. Igkis awna:

— Mmahki ig awna inakni hene wotwiy? Mmahki ig awna: “Nah tivikwiye gimkanitwiye Wigwiy?”

18Mmahki ig awna: “Ka kebadima hawkri?” Wixwiy ka pukuha inakni giwn.

Henewatbaki igkis awna.

19Igme Kiyavwiye Jesus hiyakni ku igkis muwaka gayepten. Ig hiyapni hene, ig awna gitkis:

— Mmah yis pukuhpakere ku kamin nah kinetihwa yit? Nah awna yit: “Ka kebadima hawkri akiw adahan yis ka hiyavun akiw. Heneme ariwnteke ini akiw ka kebadima hawkri akiw yis hiyavun akiw.”

20Henewatbaki in. Kuwewanek yis tihebdi, yis kadnibdi. Igkisme hiyeg kane Uhokriyanvuma avim ini igkis batekyes ginaktinkis. Yisme kadnibdi heneme aysawnemenek ini yikadni wageswa adahan batekkanek.

21In kewa pahavu tinobe eg pamakutekwiyobe eg kayah mmanawa kuwis guhawkanavrik danuh. Heneme ku aysaw eg kuwis sarayh guwenyan kuwis, eg ka kiye gukayhan akiw mmanawa eg batek gunaktin ku samah gukamkayh kuwis amadgat wayk.

22Yis hawata kuri yis kayahnek avit yiyakni. Heneme ka sam. Kuwewanek nah patiptakay akiwnek. Ayge nikwe yiyakni bateke akiwnek. Ini batekka yuma pahavwinema hiyeg hiya awiwhka yivititak.

23Avim ini hawkri ku samah Uhokri Gitip kuwis ay yivit yis ka ayapminan amin ariknawnema akiw mmanawa avim ini yis kuwis pukuhepni madikte.

Piriyepkawnabay giwavrik Jesus

— Ku pariye kabayka yis ayap git Wigwiy nuwavrik ke wotbe nahnebe aygebe ayepne git, ig iki yitnek. Ihanabay inakni nuwnuh. Henewatbaki in.

24Yis kote ayapte git ariknawnema nuwavrik. Ayapnabay kabayka git Uhokri. Ayge nikwe in ikaka yitnek kahadbe yis kadahan ka aynsima batekka.

25Nah kinetihwa yit kuri akak iwit patuwesbunka heneme aysawnemenek nah kinetihwa yit akak iwit ka patuwesbunkama akiw. Avim ini nah kinetihwa gimin Wigwiy yit huwewe.

26Avim ini hawkri yis ayapnek kabayka git Wigwiy nuwavrik. Yis ka ayapni nutuh adahan nahme ayap git Wigwiy yidahan. Yiswa ayapni git.

27Mmanawa Wigwiy igwa batek yikak awaku ku samah yis batek nukakuh, yis iha ku nah ayta giwntekne Uhokri.

28Nah ayta atan amadgat inin hawkri, nah giwntak Wigwiy. Kuwewa akiwnek nah tivik amadgatak inin. Nah diyuhe aterewata git Wigwiy.

29 Igkis gikannuhnivwi timapni hene, igkis awna git:

— Kuri pis awna huwewe. Pis ka awna patuwesbunkama. 30Kuri usuh hiyakni ku pis hiyak madikte arikna. Pis ka muwaka adahan hiyeg ayapi mmanawa pis kuwis hiyak ku pariye umawkan pit. Inneki keh usuh iha ku pis giwntakwa Kiyavwiye Uhokri.

31Igme Kiyavwiye Jesus awna gitkis:

— Mmah inyewatki ku yis ihpa inakni?

32Timapnay nuwnuh. Hawkri kaba danuh, in me danuhmet adahan yis madikte pekhe. Yis ibekhewbetnek adahan yidahanwa yivinwetwiye. Yis ikiswenek nahwo pahavo. Kameki nah pahavoname, mmanawa Wigwiy ay nukakuh.

33Nah ikene ini yinetni yit kahadbe yihiyekemni karisaw awaku ku samah yis kamaxwene nuvitit. Ay amadga inin yis hiyapkiska mbeyne ka aynsima yitnek. Ka sam. Ka ba yi barukiswa. Kuwis nah wanekbete yivetunyavu gihawkankis.

Currently Selected:

Joawh 16: pluPB

Highlight

Copy