Joawh 18
18
Jesus kamaxwika
Mt 26.47; Mk 14.43; Lk 22.47
1Pisenwa inakni giviryepkawni ig Kiyavwiye Jesus awna gitkis gikannuhnivwi:
— Uyay atak atere amutrivwit.
Igkisme kaytwa giwn:
— Uyay.
Igkis tivik manuke pahatra parewni makerviye kewye Sedroh. Ayge amutrivwi. Atere igkis pareke.
2Ig Judas Iskariyotismin, ner kamaykistinene Kiyavwiye Jesus, ig hiyak ku kiney ini iwetrit mmanawa ig Kiyavwiye Jesus gibetki atere gikakkis gikannuhnivwi.
3Ayge nikwe ig Judas Iskariyotismin danuh atere. Ig waxwene pahabu hiyeg. Neras hiyeg igkis suwtat gikakkis muwvegviyene gisandagmakis. Igkis iwatit gidahankis neras muwveg kiyatyevwi gidahankis neras farizewkis. Igkis atere akak abukri akak ah kadawempiye akisurik akak giwahrakis.
4Ig Kiyavwiye Jesus hiyapni hene, ig atere patiptakigkis. Ig kuwis hiyak madikte ku pariye danuhne gitmet. Ig danuh atere, ig awna gitkis:
— Pariye yivegvan?
5Igkisme kaytwa giwn:
— Jesus Nazaréyene.
Igme awna gitkis:
— Nahnewa ay.
Ig Judas Iskariyotismin ner kamaykistinene Kiyavwiye Jesus ig tabir ayge gikakkis neras hiyeg.
6Igkis timapni hene inakni giwn, “Nahnewa ay”, igkis ayguhwe, igkis tuguhbet waygborit.
7Ku aysaw igkis kannikewbet akiw ig ayavgikis akiw:
— Pariye yivegvan?
Igkisme kaytwa giwn:
— Jesus Nazaréyene.
8Igme awna gitkis:
— Kuwis nah ku awna yit: “Nahnewa ay.” Ku nah yivegvan, isaksanay nukannuhnivwi ites tivikte.
9Ig awna inakni hene kahadbe in kahayak ku samah giwn kaksa ku samah ig awna git Kiyavwiye Uhokri:
“Nah ka biyuksa pahavwinema hiyeg ku pariye pikan nutuh.”
Pedru ihuk pahavwi awayg gitaybi
Mt 26.51; Mk 14.47; Lk 22.50
10Pahaye adahan ig Simawh Pedru wiwhe giwana ku kakak ig ayta. Ig huwivwihe pahavwi ibukti gidahan ner muwvegviyene gikivarakis. Ig ihuke gitaybi. Giw Mawku.
11Ig Kiyavwiye Jesus hiyapni hene, ig awna git Pedru:
— Paris piwana pibutikminat. Ka muwaka xuwahun giwkis. Adahanikwa ini mbeyne Niguh awahkisun. Mmah pivewkan nah ka amavin?
12Ayteke neras suwtat gikak gikivarakis gikakkis muwvegviyene gisandagmakis igkis kamaxe Kiyavwiye Jesus. Igkis wanakmine giwan.
13Ayteke igkis waxwevgi ta givinekut amekene Kayfas ig muwvegviyene gikivarakis. Amekene Anas ayge hawata. Ig hawata gikivarakis muwvegviyene. Aterekit igkis waxwig givetunat amekene Anas. Ig Anas ig Kayfas gimawhkig. Igme Kayfas ig muwvegviyene gikivarakis adahan ini peheknene kamukri.
14Ignewa ku pariye amakohnokwa awna ku pi kabayte pahavwiwa awayg miya mpinekata madikte hiyeg miyarap.
Pedru wihwa giw Jesus
Mt 26.69; Mk 14.66; Lk 22.55
15Ku samah neras hiyeg waxwenete Kiyavwiye Jesus givetunat amekene Anas, ig Simawh Pedru makeknene gihavukis butte. Nah Joawh nah hawata makeknene gihavukis. Igkisme hiyeg danuh atere arit amekene Anas givin. Igkis pareke atere givinbukut. Nah hawata pareke aterewata. Ig muwvegviyene gikivarakis ig nuhiyakni. Nikwe gihiyega isakse nah parak.
16Igme Pedru misekwe aytontak aranwatak iyar alapota kabaywaktak. Nah hiyapni hene, nah awna gut ku pariye avuriwkevutno lapot:
— Uya isaksa nukebyi parak hawata.
Hene eg paraksevgi.
17Ayteke nor tino avuriwkevutno lapot eg awna git Pedru:
— Mmah ka pisnema hawata ner awayg gikannuhni?
Igme kaytwa guwn:
— Ka nahnema.
18 Ayteke ig tivik tabire ahumwat tiket. Neras muwveg gibukvig gikakkis gihiyegavu igkis hamehe egu tiket ayge mmanawa ayge ka aynsima kisevikri. Igkis tabirbet ayge awehewnekis. Igme Pedru hawata tabire atere awahpusewnata.
Jesus ay givetun muwvegviyene gikivarakis Anas
Mt 26.59; Mk 14.55; Lk 22.26
19Avimwata ini neras muwveg gisandagmavukis waxwe Kiyavwiye Jesus givetunat ner muwvegviyene gikivarakis, giw Anas. Ayge ig ayapte Kiyavwiye Jesus. Ig ayavgi:
— Pariyeki pikannuhnivwi? Pariyeki pinetni gitkis?
20Igme kaytwa giwn:
— Nah ka ayamawnema adahan nah kannuhekne. Nah kannuhak giwtrikneswa madikte hiyeg. Nah kannuhekne ku kiney judeyenevwi pahadguvu. Nah kannuhak aynte ariku leglis, aynte ariku Uhokri Givin.
21Mmahki pis ayavun amin nnetni gitkis hiyeg? Pis ka kis ayavun. Kiskama yis ayap hiyeg ku pariye timepnevwi nuwnuh amin ku pariye nnetni gitkis. Igkisnewa hiyak ku kamin nah kinetihwa.
22Pahavwi muwveg gisandagma ayge gihumwa Kiyavwiye Jesus ig timapni inakni giwn hene, ig biwhpig. Ig awna git:
— Mmahki pis kaytwa giwn muwvegviyene gikivarakis hene?
23Igme Kiyavwiye Jesus kaytwa giwn:
— Ku inakni nuwnuh ka kibeynema iwit, uya akki wotuh. Heneme ku nah awna kibeyne iwit, mmahki pis biwhun nikwe?
24Igme amekene Anas hiyapni hene, ig ka hiya gisamanak. Ayteke nikwe ig awahkiswig gidukwenewa waneke giwan gimkanit gihigi Kayfas ku pariye hawata muwvegviyene gikivarakis adahan igme hiyak gikak. Ig danuh atere ku kiney madikte izhaewyenevwi giwewkistenkis, ayge igkis tukuhwebdi giw.
Pedru wihwa giw Jesus akiw
Mt 26.71; Mk 14.69; Lk 22.58
25Avimwata ini Simawh Pedru gidukwenewa tabirnene ayge kabaywak awahpusewne. Ayteke nikwe neras hiyeg ayge awna git:
— Mmah ka ba pisnema gaytakis ner awayg gikannuhnivwi?
Igme wihwe giw Kiyavwiye Jesus akiw. Ig awna:
— Ka nahnema.
26Ayteke pahavwi muwvegviyene gikivarakis gibuk awna git Pedru. Ig gikebyi ner awayg ku pariye Pedru ihuke gitaybi. Ig awna git:
— Nah hiyapi aynte amutrivwi gikak ner awayg.
27Igme Pedru wihwe giw Kiyavwiye Jesus akiw. Nikwenewa pahavwi takarak awna.
Jesus ay givetun Pilatus
Mt 27.1,11; Mk 15.1; Lk 23.1
28Ayteke ariwnteke ini kibeyweke neras muwvegviyene gisandagmavukis waxwe Kiyavwiye Jesus arikutak amekene Kayfas givin. Igkis waxwevgi givinwat ner hiyaptigi romayene. Heneme igkis ka parak atere givinekut. Mmanawa ka hiya igkisma pasamrak akak hiyeg romayene abet gifetrakis. Wake igkis pasamrekuye gikakbe, gitkiskam igkis patehwevye. Nikwekam ka ikkam adahan igkis fetya.
29Ayteke ig ner hiyaptigi romayene pese givetunatkis. Giw Pilatus. Ig awna gitkis:
— Kavatraki yis kamiye ner awayg?
30Igkisme awna git:
— Wake ig ka kakehniyema, usuh ka waxwigkam atan pivetunat. Amawka pis hiyak gikak. Amawka pis umahkiswig.
31Igme Pilatus timapni hene, ig awna gitkis:
— Yiswa hiyak gikak. Iwapnig. Hiyaknabay gikak ku samah yis hiyeg judeyenevwi yihiyekemni.
Igkisme kaytwa giwn:
— Kawa. Usuh muwaka ig umehpika. Minikwak usuh hiyeg judeyenevwi padakta kakehniye akak tip. Heneme kuri yis romayenevwi yikumadukan ka isaksa usuh judeyenevwi umahkis hiyeg kakehniye. Amawka piswa umahkiswig.
Henewatbaki igkis awna.
32Inneki keh in kahayak ku samah Kiyavwiye Jesus awna ku ig miyap amin giyakninek.
33Ig Pilatus timapni inakni giwnkis hene, ig pareke givinekut akiw. Ig iwapkise Kiyavwiye Jesus givetunat. Igme danuh atere, igme awna git:
— Mmah pis hiyeg judeyenevwi gikivarakis?
34Igme Kiyavwiye Jesus awna git:
— Kitak pis uti inakni iwit? Ba piwnteknewa ba kawk ba giwntakis nawenyevwi hiyeg?
35Igme Pilatus kaytwa giwn:
— Mmahki nah ayapi nuwnteknewa? Nah ka judeyenema. Inakni giwntakis piyakivwi judeyenevwi. Neras muwveg kiyatyevwi igkisnewa ikepi nuwakuwit. Pariyeki pikehni gikakkis?
36Igme kaytwa giwn:
— Nahnewa gikivarakis heneme nah ka kema ikivarat amedgenema inin. Wake nah gikivarakis ke ikivaratbe amedgene inin, nikwekam nuhiyegavu keryekiskam adahan nah ka kamaxka gavitkis judeyenevwi gimuwvegakis. Heneme nukumadukan ka ariwntakma inin hawkri.
37Ig Pilatus timapni hene, ig awna:
— Mmah pis pahavwi ikivarat nikwe?
Igme Kiyavwiye Jesus kaytwa giwn:
— Henewa ku samah pis awna. Nah wayvuka amadgat inin adahan nah humaw hiyeg gikivarakis. Nah ayta amadgat inin adahan nah ekkene hiyakemniki ku pariye inyewatnene. Madikte hiyeg ku pariye batekye akak hiyakemniki ku pariye inyewatnene, ignes timap nuwnuh.
38Ig Pilatus timapni hene, ig awna:
— Pariyevahki ini hiyakemniki inyewatnene?
Pisenwa gawnan inakni iwit, ig pese akiw givetunatkis neras judeyenevwi giwewkistenkis. Ig danuh atere, ig awna gitkis:
— Nah ka uti mbaynema gikehni. Ku avim inin yis fetya adahan kiyene ku samah minikwak Uhokri wiwhkise yahawkrivwi giwakutakis hiyeg ejituyenevwi.
39Mpuse yivetra hene yis yibetki adahan keh nah isahkis avim ini pahavwi awayg judeyene ku pariye paraksepkare. Ba yis muwaka nah isahkis ner ikawvarinene yikivara judeyenevwi?
40Igkisme timapni hene, igkis madikte kabiman git:
— Kawa. Ka ignema. Uya isahkis udahan Bahabas.
Henewatbaki igkis kabiman. Ig Bahabas ig amepye.
Currently Selected:
Joawh 18: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
