Joawh 19
19
Jesus mahivwihka gavitkis suwtat
Mt 27.27; Mk 15.16
1Ayge nikwe ig Pilatus iwapkise Kiyavwiye Jesus. Ig biwhkiswig akak tigay gitkis gisuwtatavu.
2Avim ini gisuwtatavu awna:
— Uyay arehwa gikak. Uyay kawihkis gikawihni givitit kewa ukivarawiybe ku samah ig kawih dagam wagageboye akak gisuwvren karukri wahano.
Ayteke nikwe igkis imeve puduku, igkis kehe gisuwvren nikak. Igkis kawihkiswin gitewharit. Pisenwa nikwe igkis kadagmanevgi akak pahak dagam wagageboye.
3Ayteke igkis mahivwihpig. Igkis awna git:
— Aa, kiyavwiyad, kibeyne pis ay kuri. Pis judeyenevwi gikivarakis.
Akak ini igkis biwhbokevgi.
Jesus daddahkiswika
Mt 27.22; Mk 15.9; Lk 23.20
4Pisenwa nikwe ig Pilatus pese givetunatkis neras hiyeg akiw. Ig awna gitkis:
— Ivegnay ayta. Kuri nah waxwasig ayta yivetunat adahan yis hiyakni ku nah ka uti ariknawnema gikehni mbay. Ka kis adahan nah umahkisgi.
5Ig Kiyavwiye Jesus pese atere. Gisuwvren puduku ay gitewha. Ig kadagmanvit akak gidagmanvit wagageboye. Ayteke nikwe ig Pilatus awna gitkis hiyeg:
— Ivegnay gimkat ner awayg. Akayih. Ikeyvi kuri yis hiyapkis mbeyne git.
6Igkisme muwveg kiyatyevwi gikakkis gisandagmavukis igkis hiyapni hene, igkis kaytwa giwn:
— Uya daddahkiswinig udahan! Uya daddahkiswinig!
Igme Pilatus kaytwa giwnkis:
— Yiswa iwavgi. Yiswa daddahgi. Mmanawa nah ka uti ariknawnema gikehni mbay.
7Igkisme judeyenevwi giwewkistenkis kaytwa giwn:
— Usuh judeyenevwi kadahan ukumadukan. Inakni ukumadukan awna ku amawka ig umehpika avatra ku samah ig ikawvari ku ignewa Uhokri gikamkayh.
8Igme Pilatus timapni hene ku ig ikewne Kiyavwiye Uhokri gikamkayh, ig avisasew ka aynsima akiw.
9Ayteke nikwe ig pareke givinekut akiw. Ig iwapkise Kiyavwiye Jesus atere. Ayteke ig awna git:
— Pariyenekap?
Igme Kiyavwiye Jesus ka kaytwa giwn.
10Ig Pilatus hiyapni hene, ig awna git:
— Mmahki pis ka kaytwa nuwnuh? Ka ba pis hiyapknima ku nah kadahan nudatni adahan isahkispi, nah hawata kadahan nudatni adahan daddahkispi?
11Igme Kiyavwiye Jesus awna git:
— Kiyavwiye, igwa Kiyavwiye Uhokri inurikyene iki pit ini pidatni adahan pis nudaddahkisepten. Igme ner ku pariye nudaddahkiswitni pit, igi gitaraksan ka aynsima mbayte ariw pitaraksan, mmanawa giwnteknewa ig daddahkiswen.
12Ayteke ariwntak inakni giwn, ig Pilatus muwaka isahkisgi. Heneme neras judeyenevwi giwewkistenkis ka isaksig. Ku aysaw ig diyuhe givetunatkis igkis kabimanave git. Igkis awna:
— Ku pis isahkiswig, nikwe in arakak ku pis ka batek gikak ukivarawiy kiyavwiye Sezar, ku pariye kumadukene madikte hiyeg amadga wayk. Mmanawa ku pahavwi ikaw hiyeg gikivarakis, amun ini nikwe ig suguhne kiyavwiye Sezar. Ku pis isaksa Jesus ikaw hiyeg gikivarakis, nikwe kiyavwiye Sezar dagawne pitnek. Ig pisenwa pikaknek.
13Ig Pilatus timapni hene ig ka hiyak ku pariye ig keh akiw. Ayteke nikwe ig pese amadgat ini iwetrit kewye “Tipahaki”. Inakni giwnavrikkis judeyenevwi kewye “Gabbata”. Ig batahkiswe atere amadgat gevwi adahan ku kiney ig hiyekne gikakkis hiyeg. Ayteke igkis suwtat waxwe Kiyavwiye Jesus atere kaba puwip kamuw, abetnewa ahawkanavrik adahan puwiknebdi kaniyka adahan umahka adahan katiwnihpiye hiyeg gitaraksankis.
14Ayteke nikwe ig awna gitkis neras muwveg kiyatyevwi. Ig awna:
— Nobaki kuri yikivara!
15Igkisme timapni hene, igkis kabiman git:
— Ka ba isahkisgi! Daddahkiswinig!
Igme Pilatus awna gitkis:
— Mmah yis muwaka nah daddahkis yikivara?
Igkisme muwveg kiyatyevwi kaytwa giwn:
— Ignewa kiyavwiye Sezar ignewa ukivara.
16 Ig timapni hene, ayge nikwe ig matiwniswe. Ig ikevgi giwakuritkis gisuwtatavu adahan igkisme gideddehpitni. Ayteke nikwe igkis iwevgi igkis hiyuhkise giyakni git.
Jesus deddehpika aminat giyakni
Mt 26.32; Mk 15.21; Lk 23.26
17Ayteke ig Kiyavwiye Jesus hiyuhwe akak giyakni, ig tivikepka avititak ini paytwempu tahan avitit paha waxri imuhgivitnene kewye “Waxri Hiyeg Gaptiwvitwiye”. Inakni giwnavrikkis judeyenevwi kewye “Gówgota”.
18Igkis danuh atere, ayge igkis deddehpig aminat giyakni. Igkis tabirasevgi ay giyegbikis piyana gikebikis awaykemni. Igkisme amin giyaknikis ayge gihumwa, igme pakwa giyegbikis.
Kagta daddahka aminat giyakni
Mt 27.37; Mk 15.26; Lk 23.38
19Ayteke ig Pilatus tamakise pahak kagta adahan areketni ku pariye gikehnitnene gitkis hiyeg. Ig daddahkiswin aminat Kiyavwiye Jesus giyakni. Amadga ini kagta awna: “Ig Jesus Nazaréyene Ig judeyenevwi Gikivarakis.”
20Ini waxri imuhgivitnene ku kiney Kiyavwiye Jesus deddehpika in kennesa arimkat paytwempu Jerusalém. Ayge nikwe ka aynsima hiyeg danuh atere, ignes ivegboha ini kagta. In tamakka giwnavrikkis mpana gikebikis hiyegviyenevwi: kadahan judeyenevwi giwnavrikkis, romayenevwi giwnavrikkis akak gresiyenevwi giwnavrikkis.
21Neras muwveg kiyatyevwi hiyapni hene, igkis awna git Pilatus:
— Ka muwaka tamakkis hene ku ig judeyenevwi gikivarakis. Ka ignema. Uya tamak ku ig he ikawvari ku ig judeyenevwi gikivarakis.
22Igme Pilatus kaytwa giwnkis:
— Ku pariye nah tamakkise henewa in misekwe kuri.
Suwtat ibakha Jesus gikawihni pawtak
Mt 27.35; Mk 15.24; Lk 23.34
23Neras suwtat pisenwa gidaddahnikis, igkis iwe Kiyavwiye Jesus gikawihni. Igkis ibekhepni pawtak mpuse givuwiwkis neras paxniknene gikebikis suwtat. Gidagmanvit misekwe. In yuma nivodkak. In kehka he kamisnen.
24Igkis hiyapni hene, igkis kinetihwa pawtak. Igkis awna:
— Uyay ka sigkebdihni. Uyay arehwa akak tip adahan wixwiy hiyap ku pariye kabunuganen igi darihpin.
Ayge nikwe igkis arehwe akak tip. Igkis kehe hene, metakwa in kahayak ku samah Uhokri gannasan awna. In awna:
“Igkis ibekhe nukawihni pawtak. Igkis arehwe akak tip adahan hiyap ku pariye kabunuganen igi darihpiye nusimsa.”
Henewatbaki in Uhokri gannasan awna.
Jesus avuriwkis ginag git Joawh
25Ayge tinogben tabirbet kennesa ahumwa Kiyavwiye Jesus giyakni. Ginag tabir ayge payak gukak gusamu, gukak pahavuwa Mahi akiw ku pariye Kilopas gihayo, gukak Mahi Madalena.
26Ig Kiyavwiye Jesus hiyap ginag tabir ayge. Ig hiyavun nah Joawh hawata nah ayge kennesa guhumwa. Ayge nikwe ig avuriwkise usuh pawtak. Ig awna gut ginag:
— Kiyavuno, ig ner humaw nuwenyan kuri hawata ke pikamkayhbe.
27Ayteke ig awna nutuh:
— Joawh, nor humaw pinag kuri.
Ariwnteke ini nah amevevgu adahan eg misakwa ay nuvineku.
Jesus miyap
Mt 27.45; Mk 15.33; Lk 23.44
28Pisenwa inakni giwn, Kiyavwiye Jesus hiyakni ku gannivwi amadga inin kuwis pisenwa. Ayteke ig awna:
— Nah arabyu un.
Ig awna inakni hene kahadbe in kahayak ku samah Uhokri gannasan kinetihwa gimin.
29Ayge paha atiy kivun akak win suwiyweye. Igkis hiyeg ayge igkis hiyapni hene, igkis iwe paha arikna ku pariye mitibetnene. Igkis subukwin ahakwat ini win adahan anugasene. Igkis ike akisurik pahat ahisa kewye “iysopu”. Pisenwa igkis tarekwin gibiyrikut Kiyavwiye Jesus.
30Igme amevepni. Ayteke ig awna:
— Madikte ku pariye gimawkanitnene nawahkisten in kuwis pisenwa.
Ayge ig kuwigihe gitew. Giyakek madike. Ig miyap.
Jesus digistepka akak kurumwi
31Ayge nikwe samdi kaba kavusaw. Neras judeyenevwi giwewkistenkis hiyapni hene, igkis tivik git Pilatus. Igkis danuh atere, igkis awna git:
— Kiyavwiye, dunihkiswinaba gibagwankis neras awaykemni aminene giyaknikis adahan iwawha gimiremnikis kahadbe igkis wiwhpika aminatak giyaknikis avit samdi kavusaw.
Igkis awna inakni hene awaku igkis ka muwaka givitkis misakwa ay amin giyaknikis abet samdi. Mmanawa ini samdi avitmin madikte hawkri adahan gifetrakis. Igme Pilatus ihe giwnkis.
32Ayteke nikwe gisuwtatavu piyana gikebikis tivik, igkis danuh atere ku kiney igkis awaykemni daddahka. Igkis dunihe gibagwan ner pitatye awayg. Ayteke igkis dunihe gibagwan ner ku pariye daddahka payak gikak. Aynewa ignes miyarap.
33Heneme ku aysaw igkis danuh git Kiyavwiye Jesus adahan giduhnepten, ayge igkis hiyavgi ayipa gimiremni kuwis. Igkis hiyapni hene, igkis ka dunih gibagwan.
34Heneme pahavwi gaytakis digiswig gimuhrik akak pahat kurumwi. Aynewa migat akak un sugke givitak.
35 Nah Joawh ekkene yit ku pariye nah hiyap akakwa nuwtyak. Nah ekkene yit inetit ku pariye inyewatnene. Nah hiyakni ku in inyewa. Nah akkin yit kahadbe yis kamaxwa givitit Kiyavwiye Jesus.
36Ini ku samah gibagwan ka dunihka in kahayak hawata ku samah Uhokri gannasan kinetihwa gimin ig muwtohyan ku pariye umehpika gidukwenavrikkis hiyeg. In awna:
“Yuma pahatnema gavita dunihkanek.”
37 Inme ku samah ig digiswika akak kurumwi in hawata kahayak ku samah gannasan awna amadgatak nawenyewa iwetrit. In awna:
“Igkis iveg gimkanit ner ku pariye gidigsankis.”
Jesus avuhpika
Mt 26.56; Mk 15.42; Lk 23.50
38Ariwnteke ini pahavwi awayg giw José arimateyene ig danuh atere. Ig pahavwi gaytakis Kiyavwiye Jesus gikannuhnivwi heneme ig ka akkaw awaku ig avise gibohrikis neras judeyenevwi giwewkistenkis. Ig hiyapni hene ku samah ayiva gimiremni, ig tivik ig danuh atere git Pilatus. Ig awna git:
— Kiyavwiye, uya amnihun isaksan adahan nah atere iwevye amekene Jesusmin givit.
Igme Pilatus kaytwa giwn:
— Barika. Iwepnika.
Ig José timapni hene, ig tivik wiwhpiye Kiyavwiye Jesus givit aminatak giyakni.
39Igme ner Nikodemus ku pariye minikwak danuh git Kiyavwiye Jesus tiyegem, ig atere gihapti José arimateyene. Ig ewk pohowku madikwa (50) ahehtet ah amar kukwaki kewye “miha” akak ah adidkan kukwaki kewye “aloes”.
40Igkis danuh atere, igkis wiwhe Kiyavwiye Jesus givit aminatak giyakni. Igkis wanakminevgi akak kamis seyne barewbetye payak akak ini ah amar kukwaki adahan gimihetni ku samah hiyeg judeyenevwi gihiyekemnikis.
41Pahayku amutrivwi ayge kennesa arimkat ku kiney Kiyavwiye Jesus deddehpika. Ayge amutrivwi pahayku imewti nukune ku pariye kote kawihkante.
42Igkis hiyapni hene, igkis awna:
— Inin imewti kennesa. Uyay iwawhaw sarayh givit atere, mmanawa amawka ku wis barewvithaw avit samdi danuh.
Atere igkis sarayhe Kiyavwiye Jesus givit.
Currently Selected:
Joawh 19: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
