Joawh 2
2
Jesus wages un win
1 Igkis danuh atere avitit Galileyamnaw. Ariwnteke ini pina hawkri akiw pahavwi awayg ayge kehne fet adahan maripkawka avit paha paytwempu kewye Kana. Ig Kiyavwiye Jesus ginag ayge iwasano ini maripkawka.
2Ig Kiyavwiye Jesus awnesepka atere payak gikakkis gikannuhnivwi. Nikwe igkis tivik, igkis danuh atere, igkis fetya ayge.
3Pahaye adahan win makere. Ig Kiyavwiye Jesus ginag hiyapni hene, eg awna git gukamkayh. Guwn:
— Ayipa win makere.
4Igme Kiyavwiye Jesus kaytwa guwn:
— Kiyavuno, ka muwaka kiyimwihwa nikak. Uhiyakemni ka tuguhkak mmanawa nah ka kiyimwihwa akak akebi inin. Ka muwaka hiyak nikak. Nahwa hiyak nikak. Heneme kote danuhte nuhawkanavrik adahan nah ekkewne ku pariyene nah.
5Eg ginag timapni hene, eg awna gitkis fet akivara gihiyegavu:
— Ku pariye ig awna yit, ihanabay inakni giwn.
6Ayge puguhkuna akebi dayivwit tiptiye adahan sukokewket, mmanawa hiyeg judeyenevwi sukokaw kiberevut. Mpuse dayivwit kamax adahan kabahkam madikawku madikwa (100) lit.
7Ig Kiyavwiye Jesus hiyapni hene, ig awna gitkis neras fet akivara gihiyegavu:
— Kivunsanay noras dayivwit akak un.
Igkis timapni hene, igkis kivunsavemni kivunmadave.
8Igme hiyapni hene, ig awna:
— Kavuknay niwntak. Ewkni git ner fet akivara.
Igkisme ihe giwn. Igkis ewkwin git ner fet akivara.
9Igkis danuh atere git, ayiva ini un kuwis wageswe win. Igme fet akivara ig higepni ig ka hiyaknima ba ini win unma. Igkisme gihiyegavu hiyakni mmanawa igkis nikapketni. Pisenwa gihigvan ig humeke ner awayg ku pariye maripkewviye.
10Ig awna git:
— Madikte hiyeg ku aysaw ignes kehnes fet, igkis kavusa akakit win kibeyne. Ayteke ku aysaw hiyeg kuwis ihuhpewne akak ini win ayivwivye, nikwe pes win ka kibeynema akiw kema pitatyema. Pisme ka kehni hene. Pis darihe ini win ku pariye kabaytenene adahan metakwa pis ikini wotuh.
Henewatbaki ig fet akivara awna.
11 Igkis gikannuhnivwi hiyapni hene ku samah ig Kiyavwiye Jesus kehe ini kibeyne annut, igkis pi kamaxwate givitit akiw mmanawa in hiyapkise wotuh gikiytani. Ig kehe ini annut avit paytwempu Kana ayge Galileyamnaw. In pitatye annut ig keh ku pariye hiyeg amadgaya inin ka hiya nikehka.
12Amavya ini fet ig Kiyavwiye Jesus tivik atere avitit paytwempu Kafarnawh. Ig tivik gukak ginag payak gikakkis gisamwivwi. Igkis gikannuhnivwi hawata tivik gihapti. Igkis mpiyase aynesa hawkri ayge gikak.
Jesus pekkis piyuknevwi arikutak Uhokri Givin
Sa 69.9; Mt 21.12; Mk 11.15; Lk 19.45
13Ayteke ahawkanavrik danuh adahan hiyeg judeyenevwi fetya adahan kiyene ku samah minikwak Kiyavwiye Uhokri wiwhkiswiye amekenegben giwakutakis hiyeg ejituyenevwi. Ig Kiyavwiye Jesus hiyapni hene, ig tivik avitit paytwempu Jerusalém ku kiney gifetrakis.
14 Ig danuh atere, ig pareke arikut ini leglis kewye Uhokri Givin. Ayge ig hiyap hiyeg batebdebdihpikis igkis piyuknes pak, muwtoh, tukwa adahan hiyeg kakanhewne git Kiyavwiye Uhokri. Hawata ig hiyap hiyeg uniyehkevutnevwi karukri ayge.
15Ig Kiyavwiye Jesus hiyapni hene, ig kehe pahat gimahga tiray akak kuwawta. Ig ivukevgikis madikte payak gikakkis muwtoh gikakkis pak. Hawata ig tukuhave gaxtenkis neras ku pariye uniyehkevutnevwi karukri. Gikakurakis hehe madikte waygborit.
16Ig awna gitkis neras piyuknevwi tukwa. Giwn:
— Iwavavepniy madikte aytakihan. Inin payt in Niguh givin. Ka yi muwaka uges Niguh givin ke piyuketbe.
17 Igkis gikannuhnivwi hiyapni hene, igkis kiye pahat iwit amadgatak Uhokri gannasan. Inakni iwit awna:
— Nah kiyatha Uhokri Givin mpinevevye. Nah ka hiyepkere ariknawnema patahwaki parak atere.
Giwewkistenkis kehkis annut git Jesus
18Ayteke neras judeyenevwi giwewkistenkis ayge, igkis awna git Kiyavwiye Jesus:
— Mmahki pis keh ini ku pariye pikehni ay? Kitak pis uti pikumadukan adahan pis keh hene? Asa keh annut wowtrik adahan areketni pidatni wotuh kahadbe usuh hiyakpi ba pis ayta giwntakwatma Kiyavwiye Uhokri.
19Igme kaytwa giwnkis:
— Nah akki yit pahatwowa annut. Hiyawa yis mehe inin Uhokri Givin. Adahan mpana hawkri nah kannikasin akiwnek.
20Igkisme kaytwa giwn:
— Usuh wagahkisne inin payt kibite kamukri kuwis, paxnika madikwa akebi akak puguhkunabu arawna (46). Mmah ik adahan pis kannikasin adahan mpana hawkri? Ka ik.
21 Igkis ka pukuha inakni Kiyavwiye Jesus giwn patuwesbunka. Bawa ig kinetihwene amin givit ku pariye inyewa Uhokri Givin.
22Ariwntak ini ku aysaw ig kuwis kannikaw ariw gimiremni, avim ini igkis gikannuhnivwi kiye inakni giwn. Inneki keh igkis iha madikte Uhokri gannasan amin gikankawni. Hawata avim ini igkis iha madikte Kiyavwiye Jesus giwn amin gikankawni.
Jesus ka kamaxwa givititkis hiyeg
Jo 5.34,41,44; 2Ko 6.8; Gal 1.10, 2.6
23Ayge Jerusalém abet ini fet adahan kiyene ku samah minikwak Kiyavwiye Uhokri wiwhkiswiye amekenegben giwakutakis hiyeg ejituyenevwi, ayge ig Kiyavwiye Jesus keh ka aynsima annut ku periye hiyeg amadgayavu inin ka hiya nikehka. Ig keh ini annut adahan areketni gidatni. Ka aynsima hiyeg hiyapni hene, igkis ihe ku ig Uhokri gikanyan adahan ukumaduketniwiy.
24Heneme ig ka kamaxwa givititkis neras hiyeg awaku ig hiyakni ku hiyeg gihiyekemnikis atekekbetwiye.
25Ig ka muwaka pahavwi adahan akki git, ku samah hiyeg gihiyekemnikis amadgaya inin mmanawa ig kuwis hiyak kabayntiwa ku samah gihiyekemnikis.
Currently Selected:
Joawh 2: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
