Joawh 1

Jesus ignewa Uhokri

Mt 1.23; Jo 10.30, 20.28; At 10.36; Ro 9.5; 2Ko 4.4; Fil 2.6; Kol 2.9; Tit 2.13; Eb 1.2; 1Jo 5.20; Ap 1.16

1Minikwak avit hawkri humaw, ner ku pariye “Uhokri giwn” ayiva ig ay kuwis. Ig kanumka “Uhokri giwn” mmanawa ignewa ekkene wotwiy Uhokri ku samah gihiyekemni. Ig ay gikak Uhokri. Ig igyewa Uhokri ig.

2 Henewatbaki ig ayiva ay gikak Kiyavwiye Uhokri ay minikwak avit hawkri humaw.

3Madikte ariknebdi ay amadga hawkri in humaw giwntak Kiyavwiye Uhokri. Wake ka ignema, yumakam ariknawnema humewnekam ay amadga inin hawkri.

Jesus uguhne uhiyekemniwiy

Jo 3.19, 8.12, 12.35; Ef 5.8; Ro 13.12; Kol 1.13; 1Tes 5.5; 1Jo 1.5, 2.9

4Dehetniki pes giwntak. Ku samah kamuw abutni uguh hawkri in keh hiyeg hiyap, hawata ig uguh gihiyekemnikis, ig keh igkis hiyak ku pariye hiyakemniki inyewatnene.

5Hiyeg amedgenevwi inin gihiyekemnikis ke wotbe abetbe amisnavyebe. Igme uguh gihiyekemnikis adahan igkis hiyak ku pariye hiyakemniki inyewatnene. Kibeyne, ku samah amisnavye ka hiya asamanak adahan misanpih kabutniki, kawnata hiyeg gihiyekemnikis amebyemni ka hiya gimaptanka.

6Minikwak pahavwi awayg awahkiska uminwiy gavit Kiyavwiye Uhokri. Giw Joawh Batista.

7Ig awahkiska atan adahanikwa ekkene wotwiy Kiyavwiye Jesus, ku pariye uguhne uhiyekemniwiy. Kiyavwiye Uhokri gimawkan madikte hiyeg kamaxwenekuye givitit Kiyavwiye Jesus awaku ku samah igkis timap giwn Joawh Batista.

8Ka ignema Joawh Batista uguhne uhiyekemniwiy. Kawa. Ig he gekhetninen.

9Igme ner ku pariye igyewa kabutniki ahawkri ig uguh madikte hiyeg gihiyekemnikis.

Ku pariye amava Jesus igkis humaw Uhokri gikamkayuvwi

Ro 8.14; Gal 3.26; Ef 1.5

Minikwak ig Kiyavwiye Jesus danuh atan amadgat inin hawkri.

10Ig misakwa ay. Ignewa keh inin hawkri humaw, heneme hiyeg amedgenevwi inin hawkri igkis mahikohe ner ku pariye gihumtenkis.

11Ig ayta atan amadgat inin hawkri ku pariye gidahan gikehavan, heneme igkis ku pariye gidahan gikehavan igkis ka muwakavgi.

12 Gaytakisme muwakavgi. Nikwe gitkis neras ku pariye muwakavgi, atere ig ike gawaygikis adahan igkis humaw Kiyavwiye Uhokri gikamkayuvwi. Mmanawa ku samah igkis kamaxwa givitit Kiyavwiye Jesus igkis humaw Kiyavwiye Uhokri gikamkayuvwi.

13Avim ini nikwe igkis wayvuka inyewa Uhokriyanvu. Ini giwayvukakkis ka guwntakma tino. In kawnata ariwntakma hiyeg gihiyekemnikis amadgaya inin. In kawnata akakma mpiksawka akak gikehbetankisma. Heneme giwntak ignewa Kiyavwiye Uhokri igkis wayvuka.

Jesus wageswe awayg amadgaya inin

Mt 1.20; Ro 1.3; Fil 2.7; Kol 2.9; Eb 2.9, 4.15; 1Jo 4.2

14 Kibeyne. Ig ner ku pariye “Uhokri giwn” ig wageswe hiyeg amadgaya inin. Ig ihtikekne. Ig aytwe misekwe atan ubetitwiy wixwiy amadgayavu inin. Ig ka gabayisima. Ig awna hiyakemniki ku pariye inyewatnene. Akakwa wowtyak usuh hiyap gikiytani kabutenne ay givit, nernewa Kiyavwiye Uhokri gikamkayh gikiytani.

15Igme Joawh Batista akkig gitkis hiyeg. Ig awna:

— Ig Kiyavwiye Jesus igyewa ner ku kamin nah kuwis kinetihwa yit. Nah kit danuh giw. Igme danuh nuhavuh butte. Heneme ig ka aynsima gikiytani mpiyan, mmanawa avit nah ay, ig ayiva ay kuwis.

Henewatbaki ig Joawh Batista akkig.

16Ig Kiyavwiye Jesus ka gabayisima. Wixwiyme uti wabaywiy giwntak Kiyavwiye Jesus. Kibeyne, ig wagahkisnenekwa wabaywiy adahan takunipti.

17Minikwak amekene Moís ekkene Uhokri gikumadukan gitkis hiyeg. Kurime ig Kiyavwiye Jesus Cristo ig ekkene Kiyavwiye Uhokri gabay gitkis hiyeg. Ig akki gitkis ku pariye hiyakemniki inyewatnene.

18Yuma pahavwinema hiyeg amadgaya inin gihivetni Kiyavwiye Uhokri. Heneme ignewa gikamkayh ku pariye igyewa Uhokri, ku pariye ay gihumwa Gig, ignenwa kahayaksig wotwiy.

Joawh Batista ahegbetasa hiyeg gihiyekemnikis gavit Jesus gaytni

Mt 3.1; Mk 1.1; Lk 3.1

19Judeyenevwi giwewkistenkis aynte Jerusalém igkis awahkise gaytakis neras muwvegviyene gikakkis gayavetnikis gimin Joawh Batista. Igkis awna gitkis:

— Ataknabay git Joawh Batista. Ayapnay ku pariyene ig.

Igkis timapni hene, igkis tivik. Igkis danuh atere, igkis ayavgi:

— Kiyavwiye, pariyenekap? Ba pisnewa Cristo? Ba pisnewa Uhokri gikanyan adahan ukumaduketni?

20Igme kaytwa giwnkis huwewehe. Ig awna:

— Kawa. Nah ka Cristoma.

21Igkis timapni hene, igkis awna:

— Pariyenekap nikwe? Ba pisnewa amekene Eliyas kannikaw akiw?

Igme kaytwa giwnkis:

— Kawa. Nah kawnata amekene Eliyasma.

Igkisme awna:

— Ba pisnewa ner Uhokri gawneve ku kamin minikwak amekene Moís kinetihwa ku ig awahkiska atanek?

Igme kaytwa giwnkis:

— Kawa. Nah kawnata ignema.

22Igkis timapni hene, igkis awna git:

— Pariyekap nikwe? Amawka usuh akkap gitkis wawahkisten. Uya akki wotuh ku pariye pis.

23Igme kaytwa giwnkis:

— Nah ner ku kamin Uhokri gawneve amekene Izaíyas kinetihwa minikwak. Ig awna ku pahavwi ayta gavitkiya Ukivarawiy, adahan ahegbetevye madikte gavit. Ig awna ku ig ner pahavwi kinetihwanek gitkis hiyeg ay amadga amatap. Avim ini ig awnanek akak gihawna: “Ahekbetanabay yihiyekemni gavit Ukivarawiy gaytni. Ig nehmnik ig.” Henewatbaki. Nawhnewa ner pahavwi ay kuri, ig Joawh Batista awna.

24Neras awaykemni ku pariye kinetihwene gikak Joawh Batista, igkis gaytakis farizewkis.

25Ayge nikwe igkis ayavgi:

— Ku pis ka Cristoma, ku pis ka amekene Eliyasma, ku pis kawnata Uhokri gawnevema, kariwntak pis uti pikumadukan adahan pis kaywa hiyeg? Ba piwnteknewa?

26Igme kaytwa giwnkis:

— Nahwa kadahan ini nukumadukan adahan nah kaywene hiyeg ahakwat un. Heneme ay pahavwi ubetwiy ku pariye ka aynsima gikytani mpiyan. Yis ka hiyakgi.

27Ig nehmnikuhpiye nuhavuh butte heneme ig ka aynsima gikiytani mpiyan. Nah yuma nukiytanisima gitivut adahan nah ayavig wiwh gikaswatni gikugkaptak.

28Igkis kinetihwene inakni hene ayge paytwempu Betaniya. Ini paytwempu kennesa arimkat warik Jordawh. Ayge Jordawh ku kiney ig Joawh Batista kaywene hiyeg.

Joawh Batista akki Jesus

Mt 3.11; Mk 1.10; Lk 3.22

29Hewke akiw ig Joawh Batista hiyap Kiyavwiye Jesus mpiya gimuniw. Ig hiyapni hene, ig awna gitkis hiyeg:

— Ivegnay ner igyewatnene muwtohyan giwntekne Kiyavwiye Uhokri. Wixwiy inpawa umah muwtohyan udukwenavrikwiy adahan igkis katiwnihne udahanwiy utaraksanwiy. Igkis muwtohyan he arakaknen gidahan ner awayg. Igme igyewa katiwnih gidahankis madikte hiyeg gitaraksankisnek.

30Ignewa ner ku pariye nah kinetihwa gimin ku ig nehmnikuhpiye nuhavuh butte heneme ig ka aynsima gikiytani mpiyan mmanawa avit nah ay ig ayiva ay kuwis.

31Pitatye nahwa ka hiyakgi ba ig giwntakwatma Kiyavwiye Uhokri. Kurime nah hiyak. Nah awahkiska ayta adahan nah gekkepten yit, yis hiyeg izhaewyenevwi. Adahanikwa inin nah ayta kaywene hiyeg ahakwat un.

32Avim ini ig Joawh Batista akkamnihne ku samah ig hiyap Kiyavwiye Uhokri Gitip ayta inuriktak, gihivak ke pahavu tukwabe, ig misakwa givitit Kiyavwiye Jesus.

33Giwn:

— Avit nah hiyavgi, nah ka hiyakgi ba ig giwntakwatma Kiyavwiye Uhokri. Heneme ig Kiyavwiye Uhokri ku pariye nawahkisten adahan nah kaywene hiyeg ahakwat un, ignewa akkig nutuh. Ig awna nutuh: “Ku pis hiyap nutivuh muhuk misakwa givitit pahavwi, ignewatbaki ku pariye kaywa hiyeg gikak igyewa nutivuh barewvitye, adahan ig kawihkis nudahanwa nuhiyekemni givititkis.

34Ayteke nah hiyap ig Kiyavwiye Uhokri Gitip misakwa givitit ner awayg. Inneki keh nah awna ku igyewa Kiyavwiye Uhokri gikamkayh.

Henewatbaki ig Joawh Batista awna.

Joawh Batista gikannuhnivwi pitatye gihiyaknikis Jesus

35Hewke akiw ig Joawh Batista hiyap Kiyavwiye Jesus akiw. Avim ini ig tabir gikakkis gikannuhnivwi piyana gikebikis.

36Ayge ig hiyap Kiyavwiye Jesus mpiyevye akiw. Ig ivegi atere gimkat. Ig awna:

— Ivegnay ner igyewatnene muwtohyan giwntekne Kiyavwiye Uhokri. Ig umahkiswenek udukwenavrikwiy, ke pahavwi muwtohyanbe, adahan katiwnihpiye madikte utaraksanwiy.

37Igkis piyananene gikebikis timapni hene, igkis tivik makekwevi gihavu Kiyavwiye Jesus.

38Igme Kiyavwiye Jesus wagestaw, ig hiyavgikis. Nikwe ig awna gitkis:

— Pariye yimawkan ayta nuhavuh butte?

Igkisme kaytwa giwn:

— Kiyavwiye Habi, kiney pis misakwa?

Inakni iwit “Habi” wownavrik “ukannuhten”.

39Igme kaytwa giwnkis:

— Ba yi ayta adahan yis hiyap.

Igkis timapni hene, igkis tivik gihapti. Daraka kamuw igkis danuh givinwat. Ayge igkis hiyak ku kiney ig misakwa. Nikwe igkis pareke atere. Igkis misekwe gikak he aygete.

40Pahavwi gaytakis neras piyananene gikebikis ku pariye ihe inakni Joawh Batista giwn, ig kewye Andre. Ig Simawh Pedru gisamwi.

41Pisenwa ig tivik gimkanit gegni Simawh. Ig danuh atere, ig awna git:

— Yey. Usuh kuwis patipteke gikak “Messiyas”. Inakni “Messiyas” wownavrik “Cristo”, inaknikok “Uhokri gikanyan adahan ukumaduketniwiy”.

42Ayteke ig waxwe Simawh git Kiyavwiye Jesus. Igkis danuh atere, ig Kiyavwiye Jesus murotvi git Simawh. Ig awna git:

— Pis Simawh, ku pariye kiyavwiye Joawh gikamkayh. Aysawnemenek pis nawenyewa piw akiw. Pis kanumkanek “Sefas”.

“Sefas” wownavrik “Pedru”. Inakni giw “tip nopsadnano”.

Filip gikak Natanael

43Hewke akiw ig Kiyavwiye Jesus tivikwiye avitit Galileyamnaw. Avit gitepkemni, ig ute pahavwi awayg kewye Filip. Ig awna git:

— Ba ayta wew nukakuh adahan pis humewne nukannuhni.

Igme kaytwa giwn:

— Ihkata nikwe.

44Ig Filip ariwntak paytwempu Betsayda, ku kiney Andre gikak Simawh misakwa.

45Ayteke ig Filip tivik iwasene pahavwi gikagmada kewye Natanael. Ig danuh atere, ig awna git:

— Usuh kuwis patipteke gikak Uhokri gikanyan adahan ukumaduketniwiy, ner ku pariye amekene Moís kinetihwa gimin minikwak, ner ku pariye Uhokri gawnevevu pitatyevwi kinetihwa gimin. Igi Kiyavwiye Jesus Nazaréyene, ku pariye José gikamkayh.

46Igme Natanael timapni hene, ig awna git:

— Mmah hene? Nah ka iha inakni piwn. Yuma pahavwinema hiyeg Nazaréyene kibeyne hiyeg.

Igme Filip kaytwa giwn:

— Ba ayta iwasa.

Igkis tivik. Igkis danuh atere git Kiyavwiye Jesus.

47Igme hiyavgikis ayta gimkanit. Ig awna:

— Nehmnik pahavwi ku pariye igyewa Uhokri gihiyega izhaewyene. Ig ka batek kinis hiyeg kema amekene Jakóma.

48Ig Natanael timapni hene, ig awna git:

— Mmah ahiyaka pit inakni? Pis ka hiyakun.

Igme kaytwa giwn:

— Avit Filip waxwap atan numkanit nah kuwis hiyak ku pariye ay abet pihiyekemni. Ku aysaw pis aynte anavi nor ah akat kewyo “figeyra”, nah kuwis hiyak ku pariye ay abet pihiyekemni.

49Igme Natanael timapni hene, ig awna git:

— Kiyavwiye, nikwe pis Uhokri gikamkayh. Pis izhaewyenevwi gikivarakis.

50Igme Kiyavwiye Jesus awna git:

— Kibeyne pis kamaxwa nuvitit awaku nah awna inakni iwit pit amin ku samah nah hiyavi anavi ah. Aysawnemenek pis hiyap annut ka aynsima kabayte ariw inin akiw.

51Henewatbaki pis hiyapnek. Aysawnemenek yis hiyapnek en wokhaw hawata ke amekene Jakóbe. Ayge yis hiyapnek Uhokri giwatnivwi ahj muhukempi wagehempi hawata ke igbe. Igkis muhukempi numkanit nah ku pariye wageswe awayg amadgaya inin.

Pisenwa inakni giwn igkis tivik.

Currently Selected:

Joawh 1: pluPB

Highlight

Copy