Lúkas 24
24
Jesus kannikaw
Mt 28.1; Mk 16.1; Jo 20.1
1Ayteke paka abet bekawkenen egkis tinogben tivikwiyos ta arimkanit Kiyavwiye Jesus gimew. Egkis iwe ini imihgi ku pariye gahegbetankis. Egkis tivik.
2Egkis danuh atere, egkis ute gimew asabwat ayipa wokepka.
3Egkis hiyapni hene, egkis pareke aterenewa arikut gimew. Heneme egkis ka uti Kiyavwiye Jesus givit ayge.
4Egkis hiyapni hene, egkis wakaymnibdi ka aynsima. Egkis awna:
— Kitwiki givit?
Pahaye adahan egkis hiyap piyana awaykemni tabirwak ayge gumunkis. Igkis kasimsavu akak simis tigigihwene.
5Egkis hiyapni hene, egkis avisasew, egkis paberetusaw mabuw ta gikimpuritkis. Ayteke nikwe neras awaykemni awna gutkis:
— Kiyavwiye Jesus iveg ig. Mmahki yis givegvetni ay ariku miyaviye giwetri? 6Ig yuma ay. Ig kuwis kannikew. Kiyeminahnay giwn ku samah ig awna yit kuhwekwa ku samah ig aynete avit Galileyamnaw. 7Avim ini ig awna yit ku ig kamaykiswikanek ta gitkis hiyeg ku pariye mbeyevyenen gihiyekemnikis. Ig awna ku ig daddahkiswikanek, heneme Abet amamnampiye hawkri ariwntak gimiremni ig kannikawnek akiw.
8Egkis timapni hene, egkis kiye inakni giwn.
9Ayteke nikwe egkis pese arikutak gimew egkis diyuhe ta gitkis Kiyavwiye Jesus giwatnivwi madikawkunene gikebikis gikak pahavwi gawna (11). Egkis danuh atere, egkis ekke gitkis madikte ku pariye danuh gutkis. Hene egkis akka gitkis madikte gikannuhnivwi nawenyevwi akiw.
10Eg kiyavuno Mahi Madalena gaytakkis noras tinogben gukak kiyavuno Joana, gukak kiyavuno Mahi, ku pariye Tiyagu ginag, gukakkis nawenyovwiwa tinogben akiw. Egkis ekke madikte gitkis Kiyavwiye Jesus giwatnivwi.
11Igkisme timapni hene, igkis ka iha inakni gunetnikis. Gitkis he inetitapnen.
12Igme Pedru kannikew, ig sigise atere arimkanit Kiyavwiye Jesus gimew. Ig danuh atere, ig darakaw ig iwasa atere ta arikut. Ig hiyap he Kiyavwiye Jesus gidagmanvitnen in kihubete ayge ariku gimew. Yumehe givit ayge. Ig hiyapni hene, ig diyuhe akak giwakemni.
Jesus hiyapkiswa gitkis piyana gikebikis gikannuhnivwi
Mk 16.12
13Nikwenewa avim ini hawkri piyana gikebikis gikannuhnivwi igkis tivikwiyes ta arimkanit paha paytwempu kewye Emaws. In misakwa piyawakte ariw Jerusalém. Awewka atere adahan pisaya ler.
14Igkis waywapnene avigku ahin, igkis kinetihwenes amin ku pariye danuh git Kiyavwiye Jesus amakonohkwa.
15Igkis kinetihwenes ayge akak madikte giwakemnikis. Pahaye adahan igwa Kiyavwiye Jesus humewvi gihavukis butte. Ig waywe pahemteke gikakkis.
16Igkis hiyapni hene, igkis mahikohpig. Gihiyekemnikis ka ik adahan igkis hiyakgi.
17Igme Kiyavwiye Jesus ayavgikis:
— Pariye yinetni kuhwekwa ahinavrik?
Igkisme misekwe barukibdi.
18Pahavwi gaytakkis kewye Kilewpas, ig awna:
— Mmah pis nawotunye arit Jerusalém? Mmah pis ka hiyak ku pariye danuh ayge inin hawkri?
19Igme ayavgikis:
— Pariye danuh?
Igkisme kaytwa giwn:
— Ku pariye danuh git Jesus, ner Nazaréyene. Ig Uhokri gawneve. Ig keh kibeynenen annut. Ig awna kibeynenen iwit. Uhokri ay gikak. Madikte hiyeg kiyatig. 20Heneme neras muwveg kiyatyevwi gikakkis uwewkistenwiy igkis kamaykiswig adahan ig ikaksaka adahanikwa miyaka. Ayteke igkis daddahkiswinig. 21Usuhme uvewkankama ku ignewa ayta uwiwhpitniwiy giwakutakkis uvetunyavuwiy wixwiy izhaewyenevwi. Ku avim inin kuwis amamnampiye hawkri ariwntak ku samah ini mbeyne danuhe git. 22Heneme ku avim inin aynesa waytakuh tinogben keh usuh wakaymni mpiynevevye. Kabeyweke egkis tivik arimkanit gimew. 23Egkis danuh atere, egkis ka uti givit ayge. Ayteke nikwe egkis diyuhe ta wotuh. Egkis awna wotuh ku egkis hiyap he ahjnenwa hiyapkiswa gutkis. Igkisme awna gutkis ku ig Kiyavwiye Jesus kuwis iveg akiw. 24Waytakuh timapni hene, igkis tivik iwasenes gimew. Igkis danuh atere, igkis hiyap ku inyewa ku samah noras tinogben awna. Heneme igkis ka hiyavgi ayge.
25Ig Kiyavwiye Jesus timapni hene, ig awna gitkis:
— Mmahkay yis ka pukuhasaki? Mmahkay yis ka iha madikte ku pariye Uhokri gawnevevu pitatyevwi awna? 26Amawka ku Cristo hiyap madikte ini mbeyne, ayteke nikwe Uhokri iki gikiytani givitit akiw aynte inurik.
27Ayteke nikwe ig Kiyavwiye Jesus akkamnih madikte iwit amadgatak Uhokri gannasan ku pariye kinetihwa gimin. Ig kavusa ariwntak amekene Moís gikagtan, ig akkamnih madikte gannasankis Uhokri gawnevevu pitatyevwi ku samah in kinetinwa gimin.
28Ayteke ariwnteke ini igkis kennesmin gidawnhankis arimkanit ini paytwempu ku kitwiye igkis. Ig Kiyavwiye Jesus keh ke wotbe ig mpiyepni, ig tiviknene.
29Igkisme kinistevgi adahan ig misakwa ayge gikakkis. Igkis awna git:
— Uya misakwanate ay ukakuh, mmanawa kuwis aygete, kaba misanpi.
Ig timapni hene, ig pareke atere adahan ig misakwa gimunkis.
30Ig batahkiswe atere adahan axne gikakkis. Ig kidis bugut. Ig kabayha Uhokri. Ayteke ig sikebdih ini bugut ig ibekhepni givuwiwkis.
31Aynewa Uhokri woke gihiyekemnikis. Igkis hiyakgi ku ig Kiyavwiye Jesus. Aynewa akiw ig menwevi giwkis.
32Igkis hiyapni hene, igkis kinetihwa pawtak. Igkis awna:
— Ignewa Kiyavwiye Jesus. Mmanawa ku samah ig kinetihwempiye ukak avigku ahin ig akkamnih Uhokri gannasan wot, giwn dax avit uyakni.
33Ayteke nikwe igkis kannikew igkis diyuhe tivik ta avitit paytwempu Jerusalém akiw. Igkis danuh atere, igkis ute giwatnivwi madikawkunene gikebikis gikak pahavwi gawna (11), ignes pahadguvunas gikakkis gikannuhnivwi nawenyevwi.
34Ku samah igkis danuhantenwa atere, igneskit awna gitkis:
— Kiyavwiye Jesus kuwis hiyapkiswe git Simawh Pedru! Inyewatbaki ig kuwis kannikew!
35Neras piyananene gikebikis timapni hene, igkis ekke gitkis ku pariye kuhwekwa danuh gitkis ahinavrik. Igkis ekke ku samah igkis hiyekevgi amun ku samah ig sigkebdihne bugut gidahankis.
Jesus hiyapkiswa gitkis giwatnivwi
Mt 28.16; Mk 16.14; Jo 20.19; At 1.6
36Ku samah igkis awnempiye inakni iwit, igwa Kiyavwiye Jesus hiyapkiswe tabir ayge gibetkis. Ig awna gitkis:
— Uhokri gabay yikaknek!
37Igkisme wadisasew mpiynevevye hawata igkis misekwe akak aviska. Gitkis igkis hiye pahavwi anmapti.
38Ig hiyapni hene, ig awna gitkis:
— Mmahki yis ka aynsima wadisasew? Mmahki yis matekbeta yihiyekemni?
39Ivegnay nuwakurit akak nukugkavrikut adahan yis hiyak ku nahnewa ay in. Daxtanuy. Ayge nikwe yis ihpin. Mmanawa anmapti yuma gih yuma gavita kema nahma.
40Ig awna inakni, ig ekke giwak gitkis akak gikugku adahan igkis hiyap pudubdu adukwen.
41Igkis hiyapni hene, igkis batek mpiynevevye. Kabahte igkis ka ikwa adahan ihpin. Igkis wakaymnibdi mpiynevevye. Ig Kiyavwiye Jesus hiyapni hene, ig awna gitkis:
— Ba yis kamananema adahan nah ax?
42Igkis timapni hene, igkis ike git im tepka.
43Igme iwepni, ig axwin ay giwtrikneswa.
44Ayteke nikwe ig awna gitkis:
— Kuhwekwa ku samah nah aynete yikak, nah ekke yit madikte ku pariye amekene Moís gikagtan kinetihwa numinuh, madikte ku pariye Uhokri gawnevevu pitatyevwi kinetihwa numinuh, madikte ku pariye kagta avatkekne Salmus kinetihwa numinuh. Nah awna yit ku inyewa in danuh nutuhnek. Kuri, kibeyne, metakwa in kuwis kahayak.
45Ayteke nikwe ig woke gihiyekemnikis adahan metakwa igkis pukuha Uhokri gannasan gidahan.
46Ig awna gitkis:
— Uhokri gannasan awna ku amawka nah hiyap mbeyne ka aynsima, amawka nah umehpika, heneme abet amamnampiye hawkri ariwntak numiremni nah kannikaw akiw. 47Hawata akiw in awna ku amawka inetit adahan nuwnuh in ibakaw muwapuw ta gitkis madikte hiyegviyenevwi amadga wayk. In kinetihwaka ta gitkis adahan ignes wages gihiyekemnikis marihwa Uhokri bayahminigkis ariw gitaraksankis. 48Yisnewa ku pariye inetitkekne nudahan adahan ekkene inakni nuwnuh ta gitkis. Pitatye yis kavusa akkin ay Jerusalém. 49Hawkavanek nah kawihkis nutivuh yivititnek ku pariye Wigwiy gikaksan yit. Misakwanabay ay avit inin paytwempu Jerusalém he ku aysaw Uhokri gannu kawihkiska yivititnek.
Jesus iwepka ta inurikut
Mk 16.19; At 1.9
50 Ayteke pisenwa inakni gawnan, igkis pese. Ig Kiyavwiye Jesus waxwevgikis kennesa arimkanit paytwempu Betaniya. Ayge ig awokasew gimkanitkis. Ig sarayh kabayka givititkis.
51Henewa ig tivik giwkis ig iwepka ta inurikut.
52Igkis hiyapni hene, igkis kabayhig. Ayteke igkis diyuhe ta avitit Jerusalém akak madikte gibetkikis.
53Ariwnteke ini igkis takunipti ariku ini leglis kewye Uhokri Givin. Ayge igkis kibeyhenes Uhokri takunipti.
Currently Selected:
Lúkas 24: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
