Lúkas 10
10
Jesus awahkis giwatnivwi muwapuw
1Ayteke ariwnteke ini ig Kiyavwiye Jesus kaniy nawenyevwi hiyeg akiw adahan igkis humaw giwatnivwi. Igkis ntewnehker madikwa gikebikis gikakkis piyana gawnakis (72). Ig gibekheptenkis piyenmempi adahan igkis atak avitit mpuse paytwempu pitati gavit.
2Ig awna gitkis:
— Ka aynsima hiyeg kuwis ahegbet adahan igkis kamaxwevyes ta nuvitit. Ta nutuh igkis kewa pahak wasbe ivatrik ahegbet adahan tariswiki. Heneme ka kiyesadima hiyeg ekkene nuhiyekemni gitkis nudahan. Piriyepkawnabay ta git Kiyavwiye was akivara adahan ig kawatni hiyeg kahadbe igkisme kinetihwa gitkis numinuh.
3Ataknabay kuri. Nah yawahkisten gibetitkis hiyeg ke wotbe nah awahkiswiyebe muwtoh ta gibetitkis axtigiviyenebe.
4Ka yi muwaka atak akak yikakura ine akak yisakola adahan yiwewni ine akak yikaswatni. Tiviknabay waditvi ku kit nah awahkisyi. Ku yis patiptak akak hiyeg avigku ahin, ka yi muwaka kinetihwa gikakkis.
5Ku aysaw yis danuhanten ta givinekut pahavwi hiyegnek, pitatye yis awna gitkis hiyeg aygnenevwi: “Uhokri gabay yikaknek.”
6Ku ignes hiyeg amavay kabayntiwa, henewa Uhokri gabay misakwa gikakkisnek. Heneme ku igkis ka amavay, nikwe Uhokri gabay ka misakwa gikakkisnek.
7Ku kiney yis amavaka, ayge yis misakwa pahayriknene. Axnay, higapnay payak gikakkis. Ka sam yis ax gihamadgakis, mmanawa in kis adahan yis uti yimawkanitnene giwntakkis neras ku pariye yis amnih.
8Ku pariye paytwempu yis danuh arit, ku hiyeg aygnenevwi amavay kabayntiwa, axnay ku pariye ikaka yit.
9Makniwanabay hiyeg ayge ku pariye kakahravye. Akkanabay gitkis hiyeg ku ahawkanavrik Uhokri gikumadukan kuwis danuh.
10Heneme ku yis danuh arit paha paytwempu ku kiney hiyeg aygnenevwi ka amavay aynesnima, nikwe ku samah yis pesanten avigku gihinakis, awnanabay gitkis neras hiyeg:
11“He inin wayk atabdabni ay usuh ka daykiswekere arit aynesnima. Usuh sassah ukugku ariw avathawni adahan areketni ku samah yitaraksan. Heneme usuh ikene yinetni ku Uhokri gikumadukan ahawkanavrik kuwis danuh.” Hene yis awna gitkisnek.
12Aysawnemenek avim ini ku aysaw hiyeg katiwnivwevye ta git Uhokri avatra gitaraksankisnek, neras hiyeg avitya ini paytwempu ignes pi hiyapte mbeyne mpiya neras hiyeg avitya paytwempu Sodoma akak Gomoha. Heneki igkis hiyap mbeynenek.
Jesus wakaymni adahan ku samah hiyeg ka wageskere gihiyekemnikis
Mt 11.20, 12.38; Lk 11.29
13Ayteke ig Kiyavwiye Jesus kavusa wakaymni gidahankis hiyeg ku pariye ka wageskere gihiyekemnikis. Ig awna:
— Akayih. Ka aynsima mbayka ay yidahanek yis hiyeg paytwempuyenevwi Korazih. Hawata ka aynsima mbayka ay yidahanek yis paytwempuyenevwi Betsayda. Mmahkay yis ka wageskere yihiyekemni? Wake nah kehbe inwata nannuhbe aynte paytwempu Tiru akak Sidoh ku samah nah keh ayge yibet, nikwekam ignes paytwempuyenevwi mbayavye gihiyekemnikis ayipa kayehpikam gitaraksankis, ayipa igkis wageskam gihiyekemnikis. Igkis kawihminawkam akak sak kasiwboye, igkis padakkam tiket ahewga gitewharitkis adahan areketni giwakemnikis.
14Nikwe aysawnemenek avim ini ku aysaw hiyeg katiwnivwevye ta git Uhokri avatra gitaraksankisnek, yis pi hiyapte mbeynenek giwkis neras paytwempuyenevwi Tiru akak Sidoh.
15Ya yis hiyeg avitya paytwempu Kafarnawh? Yis ikewnevwi pi avitminte giwkis madikte hiyeg. Heneme yis tukuhavepkanek ta warikwit arimkat ini iwetrit ku kiney kane aynsima kayahwaki.
16Pisenwa inakni giwn, ig Kiyavwiye Jesus awna ta gitkis neras giwatnivwi:
— Ku pariye hiyeg iha yiwn, amun ini nikwe ignes kuwis iha nuwnuh. Ignesme hiyeg ku pariye ka amavay, amun ini nikwe in ke wotbe igkis ka amavanbe. Ku pariye hiyeg kane amavan, amun ini ignes kawnata amava ku pariye nawahkisten atan amadgat inin.
Pisenwa inakni gawnan, igkis giwatnivwi tivikbet.
Bateknay gikaknen Uhokri gabay
17Ayteke ariwnteke ini igkis giwatnivwi ntewnehkernene madikwa gikebikis gikakkis piyananene gawnakis (72) igkis diyuhe ta git Kiyavwiye Jesus akiw. Igkis batek ginaktinkis ka aynsima. Igkis awna git:
— Kiyavwiye, he wavityempu iha wownuh ku aysaw usuh pekkiswigkis piwavrik.
18Igme Kiyavwiye Jesus kaytwa giwnkis:
— Henewa. Nah kuwis hiyap wavityempu gikivarakis Satanas, ig tuguhe inuriktak. Ig tuguhe ke ugugunebe. 19Kuri yis hiyak ku samah nah iki yit ka aynsima kumadukaki. Yis ik adahan yis sibuh kaybune akak akuw. Nah keh yis pi datte giw ner nuvetunya Satanas. Ig ka hiya yisamanak. 20Yis bateke awaku ku samah wavitye iha yiwn. Heneme kiskama yis pi batekte adahan ku samah yiw tamakka amadga Uhokri gikagtan aynte inurik adahan ku samah yis kuwis inurikyenevwi.
Uhokri akka gihiyekemni ta gitkis hiyeg kene bakimnayhbe
Mt 11.25
21Ayteke Uhokri Gitip keh Kiyavwiye Jesus batek ginaktin mpiynevevye. Ig awna nikwe:
— Kibeyne, Niguh. Pis en akivara. Pis waxri akivara. Nah kabayhap awaku ku samah pis ka akka pihiyekemni gitkis hiyeg hiyakemniyevwi. Gitkisme hiyeg ku pariye kene bakimnayhbe, yumanene gihiyekemnikis, giwntekneswa, pis akka pihiyekemni ta gitkis. Henewa Niguh, mmanawa innewa pimawkan.
22Ayteke ig awna ta gitkis hiyeg ayge. Giwn:
— Niguh kuwis ekke nutuh madikte gihiyekemni. Yuma hiyeg nuhiyekten nah Uhokri gikamkayh. Ignewa Wigwiy igwa pahapo nuhiyekten. Hawata akiw yuma hiyeg gihiyekten Wigwiy. Nahnewa gikamkayh gihiyekten. Ku karit nah muwaka akkig, ignes hawata hiyakginek.
Jesus gikannuhnivwi kabunuga
Mt 13.16
23Ayteke ig wagestaw gimkatkis gikannuhnivwi. Ig awna gitkisyekata:
— Yis ka yibunugasima yis hiyap nannuh ku avim inin. 24Minikwak ka aynsima hiyeg Uhokri gawnevevu, ka aynsima hiyeg kiyatyevwi igkis ka aynsima hiyepkere inin nannuh ku pariye yis hiyap ku avim inin. Igkis ka aynsima timepkere inakni nuwnuh ku pariye yis timap ku avim inin. Henewatbaki igkis. Heneme igkis ka hiyapni, igkis ka timapni.
Uhokri gikumadukan adahan wis batek gikak Uhokri mpiynevevye, inakni pi kabayte ariw madikte kumadukaki
Mt 23.34; Mk 12.28
25Ayteke pahavwi kannuhekevutne amin amekene Moís gikumadukan ig kannikaw atere adahan ig gihikekten Kiyavwiye Jesus. Ig awna git:
— Kiyavwiye, pariye nah keh kuri adahan nah aymuhwa gimun Uhokri adahan avanenekwa?
26Igme Kiyavwiye Jesus kaytwa giwn:
— Pariye iwit tamak amadga amekene Moís gikumadukan amin inakni? Pariye pis hiyap ayge nimadga?
27Igme kaytwa giwn:
— Amekene Moís gikumadukan awna:
“Bateknabay gikak Kiyavwiye Uhokri avititak madikte yiyakni. Bateknay gikak akak madikte yibetki. Bateknay gikak akak madikte yidatni. Bateknay gikak abet madikte yihiyekemni. Hawata akiw yis batek gikakkis yiyakivwi hiyeg hawata ku samah yis batek akak yivit.”
28Igme Kiyavwiye Jesus timapni hene, ig kaytwa giwn:
— Piwnavriknawa! Ku pis keh hene, pis aymuhwa gimun Uhokri adahan avanenekwa.
29Igme ner awayg wihwevye ariw ini ku samah ig ka batek gikakkis madiktema hiyeg. Nikwe ig awna git Kiyavwiye Jesus:
— Pariyevahki nuyakivwi hiyeg adahan nah batek gikakkis?
Awayg samariyene amnih giyaki hiyeg
30Igme Kiyavwiye Jesus kaytwa giwn akak iwit patuwesbuhka. Giwn:
— Minikwak pahavwi awayg pes avititak paytwempu Jerusalém. Ig tivik muhukwiye ta avitit paytwempu Jerikó. Pahaye adahan amevwavye patiptakevgi ayge avigku ahin. Igkis wadisasevgi igkis wiwhminevgi. Igkis ka aynsima biptevgi. Ayteke igkis ikiswig harite kaba miya. 31Nikwenewa pahavwi muwveg waywe avigku inwata ahin. Ig danuh atere ku kiney ner awayg haritnene. Ig hiyapni hene, ig mpiye waywe awvre gihumwew. Ig ka amnihgi. 32Ayteke ariwnteke ini pahavwi awayg ku pariye gayavetni muwveg ig danuh atere. Ig hawata hiyavgi ayge. Ig mpiye hawata waywe awvre gihumwew. Ig kawnata amnihgi. 33Ayteke ariwnteke ini pahavwi samariyene tivikwiye hawata avigku ini ahin. Ig danuh atere givaknit igi awayg, ig hiyapni hene ku samah ig biptepka, ig kayah gidahan, ig amnihpig. Hiyeg samariyenevwi amiyhaw pawtak gikakkis hiyeg judeyenevwi, heneme 34ig atere git, ig iwevgi, ig haviywote gibuskana akak win akak tivigu. Ayteke ig wanakute gibuskana akak kamis. Pisenwa ig kidiswig ig batahkiswig ta aduhyamadgat givig kaway. Ig waxwevgi ta arikut payt danuhpenevwi givinkis. Ayge ig avuriwvig. 35Hewke akiw ig iwe mmukna karukri ig ike ta git payt akivara. Ig awna git: “Uya amnihun avuriw nudahan ner awayg. Ku pis sarayh mpiy nor karukri, kuwewanek nudiyepninek nah diyuhkis pikakura awenyan.”
36Pisenwa gawnan inakni iwit, ig Kiyavwiye Jesus awna ta git ner awayg:
— Kuri nah muwaka pis kaniy. Ku aysaw ner awayg patiptekwika gikakkan gavitkis amevwavye, pariyevahki gaytakkis igkis mpananene awaykemni, pariyevahki gaytakkis kayah gidahan giyaki hiyeg ke givitbe?
37Igme kaytwa giwn:
— Nernewa ku pariye amnihpig, ignewa kayah gidahan ke givitbe.
Igme Kiyavwiye Jesus awna git:
— Amawka pis keh hawata ke ignebe. Ku pis hiyap pahavwi piyaki hiyeg arikna muwak git, amawka pis amnihgi.
Mahi gukak Marta
38Ayteke ariwnteke ini igkis Kiyavwiye Jesus tivik ayteke. Igkis danuh ta avitit paha paytwempu. Ayge pahavu tino kewyo Marta eg ameve Kiyavwiye Jesus adahan ig misakwa ta guvinekut.
39Eg kadahan gusamu pahavu tino kewyo Mahi. Egme Mahi bat givetun Kiyavwiye Jesus adahan eg timapno giwn.
40Egme Marta eg wagewgeswano egwa pahapo. Eg hiyapni hene, eg sigise gimin Kiyavwiye Jesus eg awna git:
— Kiyavwiye, uya amnihun awahkis nusamu adahan eg ayavan wagewgeswa ay. Eg ikiswen nah pahapo adahan nah kehno madikte inin annivwit.
41Igme Kiyavwiye Jesus kaytwa guwn:
— Marta, Marta. Pis ikano pitew adahan arakembet annivwit. Pis kiyimwihwa nikak.
42Henneme pahat arikna ay pi kabayte adahan wis keh. Eg Mahi kuwis kaniye ini ku pariye kabaytenene adahan eg keh. Eg timapno nuwnuh. Nah ka miniwkisgu niw.
Currently Selected:
Lúkas 10: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
