Lúkas 9

Jesus awahkis giwatnivwi muwapuw

Mt 10.5; Mk 6.7

1Ayteke ariwnteke ini ig Kiyavwiye Jesus pahadguhe giwatnivwi madikawkunene gikebikis gikakkis piyananene gawnakis (12). Ayge ig ike gannukis givititkis adahan igkisme makniwenes hiyeg ariw gikahrikis. Hawata ig ike kumadukaki gitkis adahan igkisme pekkiswiyes wavitye givititakis hiyeg.

2Ig awahkiswigkis muwapuw adahan igkis kinetihwenes amin Uhokri gikumadukan hawata adahan igkis makniwenes hiyeg.

3Ig awna gitkis:

— Ataknay henen yiwakyekata. Ka yi muwaka atak akak yasuga, ine akak yisakola adahan yiwewni, ine akak yimana, ine akak yikakura. Yis kawnata muwaka atak akak pikanema yisimsa. 4Ku aysaw yis danuh ta avitit paha paytwempu, misakwanabay pahaygiknene ku kiney yis amavaka he ku aysaw yis pes ayteke paytwemputak. 5Ku kit yis danuh, ku hiyeg aygnenevwi ka amavay aynesnima, nikwe ku aysaw yis pes ayteke avititak ini paytwempu, yis sassah yikugku ariw avathawni. Ini areketni ku samah gitaraksankis.

6Pisenwa inakni gawnan, igkisme tivik muwapuw paytwempuriw. Igkis ekkenes Kiyavwiye Jesus ginetni. Igkis makniwenes hiyeg muwapuw.

Erodis ka hiyak ku pariyene Jesus

Mt 14.1; Mk 6.14

7Avim ini hawkri ner hiyaptigi Erodis time arak ini Kiyavwiye Jesus gannu. Ig ka aynsima kiyimwihwe awaku ig ka hiyak igi hiyeg. Ig kiyimwihwe awaku gaytakkis hiyeg iki ku ig Kiyavwiye Jesus ig Joawh Batista kannikew akiw ariw gimiremni.

8Gaytakkisme ikigi ku ig amekene Eliyas kahayak atan amadgat inin akiw. Gaytakkisme ikigi ku ig pahavwi gaytakkis Uhokri gawnevevu pitatyevwi kannikew akiw.

9Igme Erodis awna:

— Nahnewa bukihkise Joawh Batista gibita. Hiyaksa kuri nah timap Kiyavwiye Jesus gak ku ig ka gannusima keh annut. Mmah ka ignewatma Joawh Batistamni? Pariyenekig?

Ayge nikwe ig ka aynsima patiptakere gikak Kiyavwiye Jesus.

Jesus iki im ta gitkis hiyeg

Mt 14.13; Mk 6.30; Jo 6.1

10Ig Kiyavwiye Jesus giwatnivwi igkis pisenwa gannivwikis, igkis diyuhe ta gimkanit. Igkis danuh atere, igkis ekke git madikte ku pariye gikehnikis. Ayteke ariwnteke ini ig iwevgikis adahan igkis tivikwiyes gihapti igkiswonas hanpa arimkanit paha paytwempu kewye Betsayda.

11Heneme ku aysaw hiyeg time gak ku ig kuwis tivik, igkis haraksevgikis. Igkis danuh atere, ig amavigkis kabayntiwa. Ig kinetihwe gitkis amin Uhokri gikumadukan. Ig makniwene madikte hiyeg ku pariye amnihswenevwi git.

12Ayteke ariwnteke ini wahanbuku kamuw, igkis giwatnivwi danukwa atere git. Igkis awna git:

— Kiyavwiye, inin iwetrit yuma hiyeg misekwene ay. Wani neras hiyeg tivik adahan igkis ivegva giwetrikis adahan igkis isimwi gimanakis atere. Ik adahan gaytakkis atak ta gitkis was akivara. Gaytakkisme atak tahan paytwempuwit.

13Igme Kiyavwiye Jesus kaytwa giwnkis:

— Kawa. Yisnewa iki axka ta gitkis avim inin.

Igkisme awna git:

— Usuh kadahan pohowkubuwa akebi bugut akak piyanmowa im masaraku. Amawka usuh tahan isim ka aynsima akiw adahan in ik gidahankis madikte hiyeg.

14Igkis awna inakni hene mmanawa ka aynsima hiyeg ayge. Awaykemninen pukuhka kaba danuh pohowku mil (5.000) gikebikis. Igme Kiyavwiye Jesus awna ta gitkis gikannuhnivwi:

— Wani neras bat adahan igkis ahegwa adahan pohowku madikwa (50) gikebikis.

15Igkisme ihe giwn. Igkis keh madikte hiyeg bat.

16Ku aysaw kuwis igkis batebdebdihpikis, ig Kiyavwiye Jesus iwe ini pohowkubunene bugut akak piyananene im. Ig sarayh givegi ta inut, ig kabayha Uhokri adahan ini. Ayteke ig sigkabdihavepni, ig ikepni ta gitkis gikannuhnivwi. Igkisme ibekhepni givuwiwkis neras hiyeg.

17Ignesme madikte ax kabihribdave. Ka aynsima asemne misekwe. Pisenwa nikwe, igkis gikannuhnivwi ahiwavepni, igkis kivunse ka aynsima panye akak asemne gimanakis, madikawku akebi panye akak pisaya arawna (12).

Pedru iki Jesus ku ig Uhokri gikanyan adahan ukumaduketniwiy

Mt 16.13; Mk 8.27

18Avim ini hawkri ig Kiyavwiye Jesus piriyepkewne ig pahapo. Igkisnewa gikannuhnivwi ayge gikak. Ayge ig ayavgikis:

— Pariyeki givewkankis hiyeg ikanuh nah kuri?

19Igkisme kaytwa giwn:

— Gaytakkis ikipi ku pis Joawh Batista kannikew akiw. Gaytakkisme ikipi ku pis amekene Eliyas. Igkisme gaytakkis hiyeg ikipi ku pis pahavwi gaytakkis Uhokri gawnevevu pitatyevwi kannikew akiw.

20Igme Kiyavwiye Jesus timapni hene, ig awna gitkis:

— Ya yis. Mmahpa yis ikanuh kuri?

Igme Pedru kaytwa giwn:

— Pis Cristo, pis Uhokri gikanyan adahan ukumaduketni.

21Igme Kiyavwiye Jesus awna gitkis:

— Henewa. Heneme ka yi muwaka akka inakni ta gitkis hiyeg.

Jesus kinetihwa amin gimiremni

Mt 16.21; Mk 8.31

22Ayteke ig awna:

— Nah, ku pariye wageswe awayg amadgaya inin, amawka ku nah hiyap mbeyne ka aynsimanek ay amadga inin. Aysawnemenek neras uwewkistenwiy gikakkis neras muwveg kiyatyevwi, neras kannuhekevutnevwi, igkis madikte tukuhptevunek. Ayteke nah umehpikanek. Heneme abet amamnampiye hawkri ariwntak numiremni nah kannikasaka akiwnek.

Amawka wixwiy miyeh uvitwiy

Mt 10.37, 16.24; Mk 8.34; Lk 14.25; Jo 12.26; Ro 15.1; 1Ko 10.23; Gal 5.24; Fil 2.4; 1Ped 4.1; Ap 12.11

23Ayteke ariwnteke ini ig awna ta gitkis madikte hiyeg. Giwn:

— Ku pahavwi humewkerevye nuhiyega, amawka ku ig ikise gidahan gibetki. Amawka ku ig umahkis gihiyekemni amadgaya inin takunipti ke wotbe ig daddahkiswinbe ta aminat ahbe. Amawka ku ig ikaw hawata ke nahbe. 24Mmanawa pahavwi ku pariye kiye givitnen, igi biyuknek giw Uhokri adahan avananekwa. Pahavwime ku pariye miyehe givitwa nudahan, igi aymuhwanek gimun Uhokri adahan avanenekwa. 25Ku pahavwi darih madikte igiska amadgaya inin, heneme ku ig biyuke giw Uhokri, nikwe ini igiska waditnevyenen gidahan. Ku ig kayehwene aynte abet tiket, ini igiska waditnevyenenwa gidahan. 26Mmanawa aysawnemenek nah, ku pariye wageswe awayg amadgaya inin, nah aytanek akak madikte nukiytani, gikak Wigwiy gikiytani, gikakkis ahj barewvityevwi gikiytanikis. Avim ini nah marekevwe gikakkis hiyeg ku pariye marekevwevye nukakuh, ku pariye marekevwevye akka nuwnuh ta gitkis hiyeg. 27Kennesa adawnhan Uhokri gikumadukan. Yaytak ku pariye ay ku akak inin, avit yis miyarapnek yis hiyapninek. Ihanabay inakni nuwnuh. Henewatbaki in.

Jesus kahayakse gikiytani kabutenne ay givit

Mt 17.1; Mk 9.2; Jo 1.14; 1Jo 1.1; 2Ped 1.16

28Ayteke ariwnteke ini pahay paka, ig Kiyavwiye Jesus iwe Pedru gikak Tiyagumni, gikak Joawh adahan igkis atak gihapti. Ig awna gitkis:

— Uyay atak piriyepkaw.

Igkis wagehe avitit paha waxri imuwadnene.

29Igkis danuh atere, ig Kiyavwiye Jesus kavusa piriyepkaw. Ayge ig uniyehwe gihivak nawenyewa akiw. Gisimsa wageswe barewye tigigihwe.

30Ayteke pahaye adahan piyana gikebikis awaykemni hiyapkiswe atere git. Igkis kinetihwene ayge gikak. Igkis amekene Moís gikak amekene Eliyas.

31Igkis kabutenne. Igkis ayge kinetihwenes gikak Kiyavwiye Jesus amin ku samah gitepkemninek amadgatak inin. Igkis kinetihwenes amin ku samah ig umahkiswenek aynte Jerusalém kahadbe ig keh madikte ku samah Uhokri ikiswanaw gidahan.

32Igkisme Pedru himekbetwikis ayge. Pahaye adahan igkis wadise igkis hiyap Kiyavwiye Jesus gibutni ku samah ig kabutenne. Igkis hiyap neras piyananene awaykemni tabiwak ayge gikak Kiyavwiye Jesus.

33Ayteke ignes awaykemni tivikbetwikis giw. Ig Pedru hiyapni hene, ig awna ta git Kiyavwiye Jesus. Giwn:

— Kiyavwiye, kibeynekata wixwiy ay kabubuk avim inin. Uyay misakwa ay. Usuh kehbetate mpana paytbetyanyuvwi ay. Paha pidahan, paha gidahan kiyavwiye Moís, pahame gidahan kiyavwiye Eliyas.

Ig he awnebetevyenen inakni, mmanawa ig ka hiyak ku samahpa ig awna.

34Ku samah ig awnempiye inakni iwit hene, paha ukuhne biwhe givititkis. Ku samah in awastevgikis, igkis avisasewbdi ka aynsima.

35Ayteke paha ikuvimnat awna gitkis aytontak abetitak ini ukuhne. In awna:

— Ner nukamkayh nukanyan. Ataybiswanabay git.

36Pisenwa gitimpankis inakni iwit, igkis iwasa. Yumehe neras piyananene gikebikis. Igwo Kiyavwiye Jesus misekwe ayge gimunkis. Ku samah in danuh gitkis, avim ini igkis ka kinetihwa ta gitkis hiyeg aynesnima nimin.

Jesus pekkis wavitye givititak bakimni

Mt 17.14; Mk 9.14

37Hewke nikwe igkis muhuke avititak ini waxri imuwadnene. Igkis danuh ta amadgat asababan. Igkis ute hiyeg kabubuk patiptakene igkis atere.

38Ayteke pahavwi hiyeg gaytakkis kabiman ta git Kiyavwiye Jesus. Ig awna git:

— Kiyavwiye, ba ayta amnihun iwasa nudahan nukamkayh, ignewa nukamkayh pahavwiwa. 39Ig wavityewnivye. Ku samah wavitye parekwig ig kabiman, ig nuwiswig he ig kahawyu gibiy. Ig ka kiberema ig isahkisgi. Avit giveswen ig nuwiswig ka ahawnasima. 40Nah kuwis amnihswe gitkis pikannuhnivwi ay adahan igkis pekkise ner wavitye givititak, heneme igkis ka hiya gisamanak.

41Ig Kiyavwiye Jesus timapni hene, ig awna:

— Aa, hiyeg taraksavye amadgayavu inin. Mmahki yis ka kamaxwa aynesnima givitit Uhokri? Aysaw akebi hawkri yimawkan nah misakwa ay yikak nah kiyaknihwa yikak he yis kamaxwa givitit Uhokri? Kuri waxwa pikamkayh ayta numkanit.

42Ig bakimni kaba danuh atere, igme ner wavitye nuwiswig akiw. Igme bakimni tuguhe ta waykborit ka ahawnasima. Ayteke nikwe ig Kiyavwiye Jesus hiyapni hene, ig himehe ner wavitye. Ig pekkiswig. Ig makniwe ner bakimni. Pisenwa ig ekkevgi ta giwakurit gig.

43Madikte hiyeg hiyapni hene, igkis wakaymnibdi. Igkis awna:

— Kiyavwiye Uhokri ka gannusima. Ig ka gidatnisima.

Jesus kinetihwa akiw amin gimiremni

Mt 17.22; Mk 9.30

Heneme avimnewa ini hawkri ku samah madikte hiyeg wakaymnibdi gidahan Kiyavwiye Jesus, ig awna gitkis gikannuhnivwi:

44— Ataybiswanabay nutuh kabayntiwa. Aysawnemenek nah, ku pariye wageswe awayg amadgaya inin, nah kamaykiswikanek ta gitkis hiyeg amadgayavu inin.

45Gikannuhnivwi timap inakni giwn, heneme igkis ka pukuhin. Gihiyekemnikis sab adahan igkis ka pukuhin. Igkisme marenpi gibohri adahan igkis ayavgi amin ku samah inakni giwn.

Hiyeg tuwatavye ignesnewa kiyatye giwtrik Uhokri

Mt 18.1; Mk 9.33; Fil 2.3; 1Ped 3.4, 5.5

46Ayteke igkis gikannuhnivwi kavusa mavihpak amin ku pariye gaytakkis pi kiyatenene giwkis.

47Ig Kiyavwiye Jesus hiyak ku pariye abet gihiyekemnikis. Ig hiyapni hene, ig iwe pahavwi bakimni. Ig kahgi ig tabirasig ta gihumwat.

48Ayteke ig awna gitkis gikannuhnivwi:

— Ku pahavwi amnih pahavwi bakimni kene nerbe nudahan, amun ini nikwe in ke wotbe ig kuwis amnihunbe. Ku pahavwi hiyeg amnihun, amun ini nikwe in ke wotbe ig kuwis amnih ku pariye nawahkisten atan amadgat inin. Mmanawa ku pahavwi yaytak ikaw ke wotbe ig yumahbe gikiytanibe, igi kiyatye hiyeg giwtrik Uhokri.

Ku pariye hiyeg ka suguhwi, igi udahan

Mk 9.38

49Ayteke Joawh awna git:

— Kiyavwiye, usuh hiyap pahavwi awayg ig pekkisne wavitye givititakis hiyeg piwavrik. Usuhme awna git: “Ka ba pekkis wavitye giwavrik Kiyavwiye Jesus.” Usuh mpithevgi hene awaku ig ka wew pikak kema usuhma.

50Igme Kiyavwiye Jesus kaytwa giwn:

— Ka yi muwaka awna git hene. Mmanawa pahavwi ku pariye ka suguhwi, igi udahan.

Tiyagu gikak Joawh ayepkere tiket inuriktak

51Ariwnteke ini ig Kiyavwiye Jesus gihawkanavrik danuhemet adahan ig iwepka ta inurikut. Ayge nikwe ig ikaw adahanikwa. Ig tivikwiye ta arimkanit paytwempu Jerusalém.

52Ig awahkise hiyeg pitati gavitkis adahan ivegvene giwetrikis adahan igkis himekevyes. Igkisme tivik. Igkis danuh avitit paha paytwempu givinkis hiyeg samariyenevwi. Igkis ayavaptihwevye gitkis.

53Igkisme ka ikekere iwetrit gitkis awaku igkis hiyakni ku ig tivikwiye avitit paytwempu Jerusalém. Igkisme hiyapni hene, igkis diyuhe ta git Kiyavwiye Jesus. Igkis danuh atere, igkis awna git:

— Neras samariyenevwi ka ikekere iwetrit wotwiy.

54Igkisme gikannuhnivwi amekene Tiyagumni gikak Joawh, igkis timapni hene, igkis awna ta git Kiyavwiye Jesus:

— Kiyavwiye, uyay aya tiket inuriktak adahan pisenwehe gihawkankis neras hiyeg.

55Igme wagestaw ta gimkatkis ig awna gitkis:

— Ka yi muwaka awna inakni hene. Yis ka hiyak ku pariye kahiyekemniye yis awna inakni.

56Nah, ku pariye wageswe awayg amadgaya inin, nah ka ayta adahan pisenwevyema gikakkis hiyeg, heneme adahan nah gamnihtenkis.

Ayteke nikwe igkis tivik ta avitit nawenyewa paytwempu akiw.

Hiyeg kote ahegbete adahan wewnes gikak Jesus

Mt 8.18; Lk 14.26

57Ayteke ariwnteke ini ku aysaw igkis avigku ahin, pahavwi awayg danuh atere git Kiyavwiye Jesus. Ig awna git:

— Kiyavwiye, nah wewkere pikak ku kitwiye pis.

58Igme Kiyavwiye Jesus kaytwa giwn:

— Ba pis ahegbetnema adahan pis hiyepne mbeyne payak nukakuh? Puwikne kadahan giwetrikis ariku miyokwiye. Kuhivra kadahan guwetrikis avewi ah. Nahme ku pariye wageswe awayg amadgaya inin nah yuma nuwetri adahan nah mayekne.

59Ayteke ig Kiyavwiye Jesus awna ta git pahavwiwa nawenyewa awayg ayge. Giwn:

— Ba ayta wew nukakuh.

Igme awayg kaytwa giwn:

— Kiyavwiye, ik adahan nah atak pihapti, heneme gita niguh miyavinate. Ku aysaw ig miyavinek, nah avuhpig, nikwe nah tivik pihapti.

60Igme Kiyavwiye Jesus kaytwa giwn:

— Ka sam pis tivik nuhapti kurinewa. Hiyawa pis isaksa pahavwi ku pariye kuwis ke wotbe ig miyarevyebe giw Uhokri, isaksig adahan ig avuhe giyaki miyaviye. Pisme, pis tivik kinetihwene amin Uhokri gikumadukan.

61Ayteke pahavwiwa akiw awna git:

— Kiyavwiye, nah muwaka wewkere pikak, heneme uya isaksan adahan nah ekkewviye gitkis nukebyuvwi pitatye.

62Igme Kiyavwiye Jesus kaytwa giwn:

— Ku pahavwi isaksa arikna adahan in mpithebdih giwewni nukakuh, igi ka kawih adahan Uhokri gikumadukan. Ig kewa pahavwi awaygbe ku pariye wew han pitatit, heneme ig ivegnenekwa giharavrikut butte.

Currently Selected:

Lúkas 9: pluPB

Highlight

Copy