Lúkas 4
4
Wavitye gikivarakis gihikekten Jesus
Mt 4.1; Mk 1.12; Eb 2.18, 4.15
1Ig Kiyavwiye Jesus tivik ariwntak egu warik Jordawh ig gitiphewne Uhokri. Ig danuh ta amadgat amatap. Ayge ig Uhokri Gitip gihwitenten.
2Igme wavitye gikivarakis gihikekten adahan hiyap ba hiya igma taraksasig. Ig Kiyavwiye Jesus misekwe ayge adahan paxnika madikwa (40) hawkri. Abet ini hawkri ig maxhewne. Ayteke nikwe ig mativwe.
3Ig wavitye gikivarakis hiyapni hene, ig danuh atere. Ig awna git:
— Ku pis Uhokri gikamkayh, asa awna ta gut nor tip adahan eg wageswa bugut pidahan.
4Igme Kiyavwiye Jesus kaytwa giwn:
— Kawka. Nah keh ininewa ku pariye Niguh gayapni nutuh. Mmanawa Uhokri gannasan awna: “Hiyeg ka aymuhwa akak bugutwonema.”
5Ayteke ig wavitye gikivarakis ig waxwe Kiyavwiye Jesus ta avitit paha iwetrit imuwadnene. Ayge ig ekke git madikte gikumadukan amedgene inin. Ig akkin git pahatya amin.
6Ig awna git:
— Nah iki madikte inin nukumadukan ta piwakurit. Hawata nah iki madikte igiska pit. In kuwis ikaka nuwakurit. In nudahan nah iki ku karit nah ikekere. 7Ku pis paberetusaw nutivut adahan pis kiyathan, nah iki madikte inin ta piwakurit.
8Igme Kiyavwiye Jesus kaytwa giwn:
— Kawka. Mmanawa Uhokri gannasan awna: “Kiyathanaba Kiyavwiye piwohkiga. Kehnaba ignenwa gibetki.”
9Ayteke ig wavitye gikivarakis ig waxwe Kiyavwiye Jesus ta avitit paytwempu Jerusalém. Ig waxwig ta inut avuhekut ini leglis kewye Uhokri Givin. Ayge ig awna git:
— Ku pis Uhokri gikamkayh, asa watiswa aytakihan inutak adahan areketni ku ig inyerwa ay pikak. 10Mmanawa Uhokri gannasan awna:
“Kiyavwiye Uhokri avuriwkispi ta gitkis ahj 11adahan igkis amavap amadga giwakkis marihwa pikugku ka tes avitit tip.”
12Igme Kiyavwiye Jesus kaytwa giwn:
— Kawka. Mmanawa Uhokri gannasan hawata awna: “Ka yi muwaka hikek Kiyavwiye yiwohkiga baki ig aywatma yikak.”
13Ayteke ig wavitye gikivarakis ig awna arakembet iwit akiw adahan ig taraksasene Kiyavwiye Jesus. Heneme ig ka hiya gisamanak. Ayteke ig hiyapni hene, ig tivik giw. Heneme ig wahepnenekwa ku aysaw ig kawetri akiw adahan ig gihikekten akiw.
Jesus kavusa gannivwi avit Galileyamnaw
Mt 4.12; Mk 1.14
14Pisenwa ig Kiyavwiye Jesus tivik ig diyuhe ta avitit Galileymnaw akak Uhokri Gitip gannu ay givit. Inetit gidahan ibekhewvi muwapuw ayge.
15Ig kannuhekne ariku ka aynsima judeyenevwi gileglisakis. Avim ini madikte hiyeg kabayhig.
16Ayteke ig danuh ta avitit paytwempu Nazaré ku kiney ig aymuhwa. Samdi abet ig lammesya ariku leglis ayge ku samah inpawa ig keh. Ayge ig kannikew ig tabire givetunkis hiyeg adahan ig ivegbohene Uhokri gannasan ta gitkis.
17Ikaka ta git pahak kagta Uhokri gannasan ku pariye Uhokri gawneve amekene Izaíyas gikagtan. Ig wokepni ig ute ini iwetrit ku kiney in awna:
18“Kiyavwiye Uhokri kuwis kawihkiswen gikak Gitip. Ig kaniyven adahan nah ekkene kabayka ta gitkis hiyeg ku pariye kane hiyak kabayka. Ig awahkisun adahan nah ikene gawaygikis ta gitkis hiyeg ku pariye yumanene gawaygikis. Ig awahkisun adahan nah watakminavevye neras ku pariye wanaminamnevye. Ig awahkisun adahan nah keh motavye hiyap. Ig awahkisun adahan nah woka kabayka gidahankis hiyeg ku pariye hiyepne mbeyne. 19Ig awahkisun adahan nah ekkene ku Kiyavwiye Uhokri gihawkanavrik kuwis danuh adahan ig amnihpiye hiyeg.”
20Pisenwa givegbohan inakni iwit, ig Kiyavwiye Jesus sabuke ini kagta ig diyuhkiswin ta git kagta akavriwten. Ayteke ig bat ayge givetunkis hiyeg adahan ig gikannuhtenkis. Igkisme madikte iveg ta gimkat.
21Ig awna ta gitkis hiyeg:
— Ku avim inin inakni iwit Uhokri gannasan metakwa in kahayak amun ini ku aysaw yis timapni.
Nazaréyenevwi ka kiyatha Jesus
Mt 13.53; Mk 6.1
22Igkis hiyeg timapni hene, igkis wakaymnibdi gimin. Igkis awna:
— Inakni kibeyne iwit. Mmahki ig awna inakni iwit hene? Ka ba yis hiyap ku ner he Josenen gikamkayh?
23Ig hiyapni hene, ig awna gitkis:
— Ay pahat iwit patuwesbuhka ku pariye wis inpawa awna ku aysaw wis pukuhpaw gibohri pahavwi. Wis awna: “Ku pis igyewa piyihekevutne, asa piyih pivitkite.” Ku avim inin yis awna inakninek iwit nutuh. Yis awna: “Usuh time pak ku pis keh ka aynsima annut aynte Kafarnawh ku pariye hiyeg amadgaya inin ka hiya nikehka. Ku inyewa pis keh annut ayge, uya akka wotuh pannu ay avit inin piwaxig ku kiney pis aymuhwa.”
24Ayteke ig Kiyavwiye Jesus awna akiw. Giwn:
— Yuma pahavwinema Uhokri gawneve kiyathaka gavitkis hiyegviyene ku pariye avitya giwaxigwa. Henewatbaki in. 25Henewa in ku samah minikwak ku kavim Uhokri gawneve amekene Eliyas ay amadga inin. Avim ini muwok ka wayk adahan mpanabu kamukri akak abusku. Nikwe mihetniki danuhe atere. Ka aynsima madankunovwi judeyanovwi ayge avit Judeyamnaw. 26Ig amekene Eliyas ig hiyeg judeyene heneme ig ka awahkiska guminkisma noras ku pariye avitya giwaxigwa adahan ig gamnihtenkis. Kawa. Ig awahkiska gumin pahavu madankuno ku pariye avitya paytwempu Sarepta kennesa arimkat paytwempu Sidoh. 27Hawata akiw ariwnteke ini, ku kavim Uhokri gawneve amekene Elisew ay amadga inin, ayge Judeyamnaw ka aynsima hiyeg axpusakare avit busukne. Kameki ig makniwigkisme. Igme pahavwi kane judeyenema giw Naamah, ku pariye avitya Síriyamnaw, ignewa ku pariye makniwepka.
28Igkis hiyeg arikunevwi ini leglis igkis timapni inakni iwit hene, igkis ka aynsima dagawne git Kiyavwiye Jesus ku samah ig kinetihwa amin ku samah Uhokri pi kavigsate hiyeg kane judeyenevwima giwkis hiyeg judeyenevwi.
29Igkis awna:
— Uyay umehpig!
Ini paytwempu ay avit paha waxri imuhgivitnene. Ayteke nikwe igkis ivukevgi avititak paytwempu. Igkis waxwevgi ta arit kasebavawnene kahadbe igkis gitukepten atere.
30Igme hiyapni hene, ig mpiye givuwiwkis. Ig tivik giwkis.
Jesus pekkis wavitye givititak pahavwi
Mk 1.21
31Ig danuh ta avitit paytwempu Kafarnawh aynte Galileynamnaw. Ayge ig kannuhne hiyeg abet samdi, abet ini hawkri ku pariye hiyeg judeyenevwi kiyatha.
32Neras hiyeg aygnenevwi wakaymnibdi gidahan ku samah gikannuhakni. Mmanawa ig kinetihwene akak madikte gikiytani.
33Ayge ariku ini leglis pahavwi awayg wavityewnivye mbeyevye. Ig kabiman kihhaw. Ig awna git:
34— Aa, Jesus Nazaréyene, ka ba kiyimwih usuh. Pariye pikehni ukakuh? Mmah pis ayta pisenwevye uhawkan ku avim inin? Nah hiyaknap ku pis Uhokri gikanyan barewvitye.
35Ig Kiyavwiye Jesus timapni hene, ig himehe ner wavitye. Ig awna git:
— Tinwohaw. Asa pes ayteke givititak ner awayg.
Aynewa ig wavitye nuwiswig. Ig keh ig tuguhe gibetkis hiyeg. Ayteke ig pese givititak. Ig ka keh mbaynema gikak aynesnima.
36Madikte hiyeg hiyapni hene, igkis wakaymnibdi. Igkis kinetihwenes pawtak. Igkis awna:
— Mmah awitwak git inakni giwn? Ig pekkis wavityempu akak madikte gikiytani akak gidatni. Igkisme pes.
37Ariwnteke ini, inetit gimin Kiyavwiye Jesus ibekhewvi muwapuw avitiw ini waxri.
Jesus makniwa Simawh Pedru gimatru
Mt 8.14; Mk 1.29
38Ayteke ig Kiyavwiye Jesus kannikew ig pese arikutak ini leglis, ig tivik. Ig danuh ta givinekut Simawh Pedru. Ig ute Simawh Pedru gimatru ayge. Eg nawevyo ka aynsima. Ayteke neras hiyeg ayge amnihswe git Kiyavwiye Jesus gudahan.
39Ig Kiyavwiye Jesus hiyapni hene, ig atere tabir guhumwa. Ig himehe gunawan. Kibehtenwa mpiye guw. Aynewa eg kannikew eg kuwegwano gidahankis.
Jesus makniwa hiyeg kakahribdavye
Mt 8.16; Mk 1.32
40Ayteke wahanbuku kamuw madikte hiyeg ku pariye kadahan hiyeg kakahriye ay givinekukis igkis waxwevgikis ta gimkat Kiyavwiye Jesus. Ignesme arakembet gikahrikis. Ig hiyapni hene, ig sarayh giwak givititkis. Ig makniwavevgikis.
41Hawata akiw wavitye pese givititakis ka aynsima hiyeg. Igkis kabiman. Igkis awna git:
— Pis Uhokri gikamkayh.
Igme himahgikis. Ig ka isaksigkis adahan igkis awna awaku igkis hiyaknig ku ig Cristo.
Jesus tivik muwapuw
Mk 1.35
42Ayteke hewke ig Kiyavwiye Jesus tivik. Ig tivik avawyewa ku kiney yumanene hiyeg. Igkisme hiyeg ivegevgi. Igkis danuh atere git. Igkis awna git:
— Uya ka muwaka tivik wowhu.
43Igme kaytwa giwnkis:
— Kawk. Pugamawka nah akki Uhokri ginetni amin gikumadukan aynte avit nawenyevwi paytwempu akiw. Adahanikwa ini nah awahkiska atan.
44Ayteke nikwe ig tivik ekkene Uhokri giwn ariku judeyenevwi gileglisakis muwapuw Judeyamnaw.
Currently Selected:
Lúkas 4: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
