Lúkas 5

Jesus kaniy gikannuhnivwi pitatyevwi

Mt 4.18; Mk 1.16

1Pahay hawkri ig Kiyavwiye Jesus ay akigbimna mahakwa kewye Jenesare. Hiyeg kabubuknenekwa kiyaran ganwa timepne Uhokri giwn. Kaba igkis dehekbetig.

2Ayteke ig hiyap mmukna umuh ayge akigbimna mahakwa. Umuh akivaravu ayipa katapte ihapkat. Igkis ayge sukuhbetene gitagmayakis.

3Ig Kiyavwiye Jesus hiyapni hene, ig sarayhwe ta amadgat pahamku umuh, Simawh Pedru gihmun. Ig awna git Simawh Pedru. Giwn:

— Uya amnihun sarayhwa atan amadgat pihmun adahan pis tukuhwa ayteke aynesa.

Igme Simawh Pedru timapni hene, ig sarayhwe muhumdakat ig tukuhwe ayteke. Igme Kiyavwiye Jesus batahkiswe gumadga nor umuh. Ig gikannuhtenkis hiyeg ayteke gumadgatak.

4Pisenwa gikannuhakni ig awna git Simawh Pedru:

— Tarakwanay han pawkat. Subuknay yitagmaya atere adahan yis kamax im.

5Igme Simawh Pedru kaytwa giwn:

— Kiyavwiye, usuh subukmina hewke tiyegem kuwis. Yuma ukamaxnihusima. Heneme ku pis muwaka, nah atak subukminate utagmaya akiw.

6Igkis subukmine gitagmayakis. Ayge nikwe igkis kamax ka aynsima im. Gitagmayakis kaba sigkebdi awaku im gawini.

7Igkis hiyapni hene, igkis base givemkuyavukis ayta gimkatkis adahan ignesme gayavetnikis. Igkisme danuh atere, igkis kivunse mmuknamte umuh akak im. Egnes umuh kivunvevye akak im. Egkis kaba digise.

8Ig Simawh Pedru hiyapni hene, ig tuguhkiswe mabuw givetunat Kiyavwiye Jesus. Ig awna git:

— Ayguhwanaba nuwntak, Kiyavwiye, mmanawa nah patehwevye hiyeg. Nah yuma nukiytanisima pitivut.

9Ig ka aynsima wakaymni awaku ku samah igkis kamax ka aynsima im. Gihiyegavu hawata wakaymnibdi.

10Givemkuyavu amekene Tiyagumni gikak Joawh ku pariye Zebedew gikamkayuvwi, igkis hawata wakaymni. Ig Kiyavwiye Jesus hiyapni hene, ig awna git Simawh Pedru:

— Ka muwaka avis. Ku samah pis uti im, han pitatit nah keh pis uti hiyeg nudahan.

11Igkis hiyapni hene, ku aysaw igkis danuh ihapkat igkis ikise madikte gewkanbetkis. Igkis tivik wew gikak Kiyavwiye Jesus adahan igkis humewnes gikannuhnivwi.

Jesus makniwa awayg axpusakare avit busukne

Mt 8.1; Mk 1.40

12Ariwnteke ini ku samah ig Kiyavwiye Jesus avitnenete paha paytwempu, pahavwi awayg ayge ig axpusakare avit busukne pahavwite. Ig hiyap Kiyavwiye Jesus. Ig danuh atere git. Ig mabukwa ta gitivut adahan ig amnihswene git. Ig awna git:

— Kiyavwiye, uya amnihun. Ku pis muwaka piyihun, pis hiya numakniwka.

13Ig Kiyavwiye Jesus timapni hene, ig sarayh giwak givitit. Ig daxwig atere. Ig awna git:

— Ihi. Nah muwaka. Pis makniw.

Aynewa gibuskana miyvi.

14Ayteke ig Kiyavwiye Jesus awna git:

— Ka ba kinetihwa ta arit hiyeg avigkuya ahin amin ku samah pis makniw. Su atak wade gimkanit muwveg. Akkanaba pivit ta git kahadbe ig iwasap ig hiyap ku pis makniw. Ayteke pis kakanhaw git Uhokri adahan igme barewvithap ariw pivathawni ku samah amekene Moís awna minikwak adahan areketni ta gitkis hiyeg ku pis inyewa makniw.

Igme timapni inakni hene, ig tivik.

15Bawkata inakni inetit gimin Kiyavwiye Jesus ibekhewvi muwapuw. Ka aynsima hiyeg pahadguhwa atere git adahan igkis timepnes giwn, adahan ig makniwgikis ariw gikahrikis.

16Kiberevut ig higihwa piyawakad ku kiney yumanene hiyeg adahan ig piriyepkewne git Uhokri.

Jesus makniwa awayg miyavuvye

Mt 9.1; Mk 2.1

17Avim ini hawkri ig Kiyavwiye Jesus kannuhne hiyeg. Ka aynsima farizewkis gikakkis kannuhekevutnevwi amin amekene Moís gikumadukan igkis batebdebdih ayge ganwa. Igkis pes avititak madikte paytwempu aytontak Galileyamnawtak, aytontak Judeyamnawtak, aytontak Jerusalémtak. Ig Kiyavwiye Jesus kannuhekne ayge, Uhokri gidatni ay givit adahan ig piyihekne.

18Ayteke awaykemni danuh atere, igkis ayta waxwenes pahavwi awayg miyavuvye ta gimkat Kiyavwiye Jesus. Igkis waxwig amadga gisivamna. Igkis ivegva ahin adahan igkis giwaxwetni atere marihwa igkis dukugisgi ta givetunat Kiyavwiye Jesus.

19Heneme igkis ka hiya igkisma uti ahin awaku ba akebentenwa hiyeg ayge. Igkis hiyapni hene, igkis wagehe ta inut ta amadgat payt ahigwi. Ayge igkis wiwhe avettak payt. Igkis keh pahayku miyokwiye ayge. Pisenwa igkis wiwhkise ner miyavuvye ariku miyokwiye peyeke akak gisivamna. Igkis wiwhkiswig ta gibetitkis hiyeg wade givetunat Kiyavwiye Jesus.

20Ig Kiyavwiye Jesus hiyapni hene ku samah gikamaxwankis givitit, ig awna ta git awayg miyavuvye. Giwn:

— Nukebyi, nah bayahminap ariw pitaraksan gikak Uhokri.

21Neras farizewkis gikakkis neras kannuhekevutnevwi igkis timapni inakni giwn hene, igkis kinetihwa gimin pawtak. Giwnkis:

— Pariyenekig ner awayg? Yuma pahavwinema hiyeg hiya ubayamnihkawiy ariw utaraksanwiy gikak Uhokri. He ignewa Uhokri hiya ubayamnihkawiy. Ig ner miyathene Uhokri ku samah ig awna inakni hene.

22Ig Kiyavwiye Jesus hiyapni hene ku samah gihiyekemnikis, ig awna ta gitkis:

— Mmahkay yis pukuhpaw nubohri hene? 23Mmah yivewkan ku in mahiko nudahan nah bayahminig ariw gitaraksan? Ku yis hiyap nah hiya gikankasak nah keh ig wew akiw, ininkata akiw nah ka dat adahan nah bayahminig ariw gitaraksan? 24Nah hiyapkiste yit ku nah ku pariye wageswe awayg amadgaya inin, nahnewa detye amadga inin adahan nah bayahminene hiyeg ariw gitaraksankis gikak Uhokri.

Ayteke ig awna ta git ner awayg miyavuvye. Giwn:

— Kannikaw. Kidis pisivamna. Hiyawa pis diyuhe pivinwate.

25Aynewa ig awayg kannikew giwtrikneswa hiyeg. Ig iwe gisivamna ig tivik givinwate. Ig kibeyhene Uhokri.

26Madikte hiyeg hiyapni hene, igkis wakaymnibdi. Igkis kabayha Uhokri akak madikte gavisnikis. Igkis awna:

— Usuh ka hiyapti akebi inin. Kabahte usuh ka ihpin.

Jesus humak Levi

Mt 9.9; Mk 2.13

27Ayteke ig Kiyavwiye Jesus pese paytrikutak. Ig waywe avigku ahin, ig hiyap pahavwi ladwan giw Levi, igme betnene ariku payt ahiwket karukri. Ig ahiwne karukri gidahan guvelma. Igme Jesus awna git:

— Ba ayta wew nukakuh adahan pis humewne nukannuhni.

28Igme Levi timapni hene, ig ikise madikte gewkanbet, ig kannikew ig tivik gikak.

Jesus ayta humekwiye hiyeg taraksavye ta git

Mt 9.10; Mk 2.15

29Ayteke ariwnteke ini ig Levi kehe axka ariku givin adahan ig kiyathene Kiyavwiye Jesus. Ayge ka aynsima ladwan gikakkis nawenyevwi hiyeg akiw ku pariye ikaka kane kibeynevwima hiyeg igkis ahegiw payak gikakkis.

30Neras farizewkis gikakkis neras kannuhekevutnevwi amin amekene Moís gikumadukan igkis hiyapni hene, igkis himehe Kiyavwiye Jesus gikannuhnivwi. Igkis awna gitkis:

— Mmahkay yis axne yis darihwekne gikakkis ladwan hawata gikakkis hiyeg akiw kane kibeynevwima? Wake yis kibeynevwibe hiyeg, yis ka axkam gikakkis gikebikis neras hiyeg.

31Ig Kiyavwiye Jesus hiyapni hene, ig kaytwa giwnkis. Ig awna ta gitkis:

— Hiyeg kane kibeynevwima ignes kewa hiyeg kakahribdavyebe. Igkis muwaka pahavwi ayta amnihgikis. Ignesme hiyeg makniwyevwi ignes ka muwaka mekseh. Ignesme hiyeg kakahribdavye igkis muwaka mekseh. 32Nah ka ayta adahan nah humeknema ku pariye hiyeg kibeynevwi kuwis adahan igkis wageswiyes gihiyekemnikis. Nah ayta adahanikwa nah humekwiye neras ku pariye taraksavye adahan ignesnewa wageswiyes gihiyekemnikis.

Amawka wixwiy maxhaw inyewa avititak uyakniwiy

Mt 9.14; Mk 2.18

33Ayteke hiyeg ayta awna git Kiyavwiye Jesus:

— Joawh Batista gikannuhnivwi maxhaw adahan igkis kiyenes Uhokri adahan igkis piriyepkewnes. Kiberevut igkis maxhaw. Igkisme farizewkis gikannuhnivwi hawata akiw igkis maxhaw hene. Pisme pikannuhnivwi ka maxhaw hene. Igkis ax takunipti. Mmahki igkis ka kiyatha Uhokri hawata kema nerasma?

34Igme Kiyavwiye Jesus kaytwa giwnkis:

— Igkis ka maxhaw adahan nukiyetni mmanawa nah kuviknene ay gikakkis. Nah kehte abektey akak pahavwi awayg maripkewviye. Ku aysaw ig maripkewviye, gikagmadavu ayta iwasa gimaripkawni. Ku samah ig ayge gikakkis abet ini fet ba ignes maxhaw? Kawa. 35Henneme aysawnemenek ku aysaw nah iwepka giwkisnek nukannuhnivwi, avim ini nikwe igkis maxhawnek.

Jesus gihiyekemni ka kis gikakkisma hiyeg kuwisnene dehe gihiyekemnikis

Mt 9.16; Mk 2.21

36Ayteke ig Kiyavwiye Jesus awna pahat iwit patuwesbuhka gitkis akiw. Giwn:

— Ka kis adahan wis iwi kamisbet ariwntak pahak simis nukune adahan wis kahava simis mugumguviye nikak. Ku pahavwi kahava gisimsa mugumguviye akak ahap ariwntak gisimsa nukune, nikwe ig mbayha gisimsa nukune. Inme gisimsa mugumguviye hawata ig mbayhin mmanawa ahap ariwntak gisimsa nukune ka kis akak gisimsa mugumguviye. 37Kawnata kis adahan wis katiyha win nukune arikut pakir amar ayivwivye ivatmakuvye. Mmanawa ku aysaw ini win tukugwa, in pakir amar ka ahwa payak nikak. In bekwe awaku. Ayge ini win dimuke, hawata in pakir amar ka kabay akiw. 38Amawka wis katiyha win nukune ta arikut pakir amar nukune ku pariye mitibetnene. 39Hawata akiw ku pahavwi kuwis higap win ayivwivye, ig ka batek akak win nukune akiw. Ig awna: “Ku pariye ayivwivye in pi kabayte.” Hawata hiyeg ka batek akak hiyakemniki nukunema. Ignes batek akak hiyakemniki ayivwivye.

Currently Selected:

Lúkas 5: pluPB

Highlight

Copy